0 8

#IFFIWood, 26 नोव्‍हेंबर 2024

नामनेचो इंग्लीश फिल्म निर्मातो आनी अभिनेतो, स्टीफन वूली हांणी आयज “हू इज अ फिल्म प्रोड्युसर ? - फिल्म निर्मितीचे पांच म्हत्वाचे पांवडे” ह्या विषयाचेर आयज गोंयांत 55व्या भारतीय आंतरराष्ट्रीय चित्रपट महोत्सवांत (इफ्फी), एक ज्ञानवर्धक मास्टरक्लासाक संबोधित केलें.  

आकांक्षी चित्रपट निर्माते, विद्यार्थी आनी चित्रपट मोगी हाजीर आशिल्ल्या ह्या सत्रांत चित्रपट निर्मात्याच्या बहुआयामी भुमिकेचो खोलायेन अभ्यास केलो. तातूंत चित्रपट निर्मिती प्रक्रिया पांच गरजेच्या पांवड्यानी विभागली: विकास, प्री प्रोडक्शन, प्रोडक्शन, पोस्ट-प्रोडक्शन, मार्केटिंग आनी रिलीज. 

निर्मात्याचो प्रवास संकल्पनेची वा काणयेची खोलायेन आवड आशिल्ल्यान सुरू जाता, हाचेर भर दिवन स्टीफन हाणी मास्टरक्लासाक सुरवात केली. “एका निर्मात्याक पयलीं कथेमदी ते  खरपण आनी प्रकल्पाची आवड जाणवची पडटा,” अशें तांणी स्पश्ट केलें. निर्मात्यांनी स्वताक विचारपाची गरज आसा, कि "हें म्हजें जिवीत आसतलें काय कितें?" ताच्या मतान आवड आनी वचनबद्धताय म्हत्वाची आसली, तरी निर्मात्यान व्यावहारीकय आसूंक जाय. नदर आनी वेव्हारीक मर्यादा हांचे मदीं समतोल सोदून काडचो पडटा. 

प्री-प्रोडक्शन टप्प्याचेर केल्ले चर्चेंत, स्टीफनान सहकार्याचें म्हत्व उक्तें केलें. “निर्माते मुखेलपणान सहयोगी आसतात,” अशें तांणी स्पश्ट केलें आनी एक प्रकल्प साकार करपाखातीर अर्थीक, सृजनशील वेवसायीक आनी हेर मुखेल भागधारकांवांगडा लागींच्यान काम करपाचें म्हत्व तांणी सांगलें.

उत्पादन टप्प्यांत बारीकसाणेन नियोजन आनी कार्यान्वयन करचें पडटा, तेच बरोबर निर्मातो आनी दिग्दर्शक हांचे मदीं नाजूक समतोल दवरचो पडटा, अशें स्टीफन हाणी स्पश्ट केलें. “एक निर्मात्यान आपलो अहंकार पूर्ण वेळ नियंत्रणांत दवरून, दिग्दर्शकाक सृजनशील सुवात दिवंक जाय”, अशी तांणी टिप्पणी केली. ही सहकार्याची पद्दत पुराय कलाकार आनी टीम सदस्यांक पावता, निर्मात्याची भुमिका कामात वर्चस्वा परस सुलभताय हाडपाची आसता.

स्टीफन हाणी फुडें, प्रसारणा उपरांतच्या टप्प्याची उमेद आनी म्हत्व सांगले, जंय सिनेमा प्रेक्षकांमेरेन पावचे पयलीं ताका निमाणो स्पर्श करतात. प्रेक्षकांच्या प्रतिसादाविशीं मोलादीक अंतर्दृष्टी आनी परिष्करणाची संद दिवपी, चांचणी स्क्रिनिंगचें म्हत्व तांणी उजवाडायलें. “प्रेक्षक हे लोक असतात जे प्रत्यक्षांत सिनेमाचें नशीब थारायतात. तुमचे फिल्म प्रेक्षकांक आवडले, जाल्यार तुमचें काम जाता, हे तांणी नदरेक हाडलें.

निमाणो टप्पो म्हणल्यार मार्केटिंग आनी रिलीज हातूंत रणनिती नियोजन करचें पडटा. स्टीफन हाणी, सिनेमाक येसस्वीपणान मार्केटात हाडपाखातीर जायरातदार, वितरक आनी हेर भागीदार हांचो आस्पाव आशिल्ली घटमूट विपणन रणनितीची गरज आसा, हाचेर भर दिलो.

आपल्या अंतर्दृष्टी वरवीं ह्या प्रशंसीत चित्रपट निर्मात्यान चित्रपट निर्मितीच्या गुंतागुंतांचेर उजवाड घालो. तशेच फुडले पिळगेच्या चित्रपट निर्मात्यांक अमूल्य मार्गदर्शन दिवन निर्मिती कलेंतल्या आवड, व्यावहारिकता आनी सहकार्याचें म्हत्व बळकट केलें.

वक्त्यांविशीं : 

स्टीफन वूली हे एक इंग्लीश फिल्म निर्माते आनी अभिनेते जाची कारकीर्द साडेतीन दशकां परस चड काळ चलल्या, ह्या काळांत तांका फेब्रुवारी 2019 वर्सा सिनेमांत उत्कृश्ट ब्रिटीश योगदाना खातीर बाफ्टा पुरस्कार फावो जाला. निर्माते म्हणून तांका  ‘द क्रायिंग गेम’ ((1992) ह्या सिनेमा खातीर ऑस्कर पुरस्कार फावो जाला आनी ताणें मोनालिसा (1986), लिटल व्हॉयस (1998), मायकल कॉलिन्स (1996), द एन्ड ऑफ द अफेअर (1999) इंटरव्यू विथ द व्हॅम्पायर (1994), आनी कॅरल (2016)  अशे जायते अकादेमी पुरस्कार नामांकीत चित्रपट तयार केल्यात. ते आपली जोडीदार एलिझाबेथ कार्लसन हिचे वांगडा, नंबर 9 फिल्म्स ही निर्मिती कंपनी चलयतात.

* * *

PIB IFFI CAST AND CREW | Subhash/Manali/Darshana | IFFI 55