Naduh ka Magadheera haduh ka Eega bad Baahubali haduh ka RRR; u cinematographer ba pawnam u K. K. Senthil Kumar u dei u briew ha lyndet ki camera, uba la pynkylla ia bun ki khana kiba pawnam sha ki phlim kiba itynnad na ka bynta ki riewieid phlim ha kylleng ka pyrthei. Ka jingring dur, ka jingpyndonkam ia ki rong, ki syrniew bad ka jingshai ha kine ki phlim ka pyni ia ka jingtbit jong u ban ring dur da kaba wanrah lang ia ki bynta bapher bapher jong ki phlim. U Senthil Kumar, u la iasam ia ki jingsngewthuh jong u bad ka jingiaid lynti ha ka jingim ha ka jingiakren halor ka “Jingpyniasoh ia ka VFX bad ka Cinematography” mynta ha ka bynta ba 55 jong ka IFFI ha Goa. Ia ka jingialang la pyniaid da u film director ba pawnam bad u Screenwriter Shankar Ramakrishnan.

Ha ka jingai jingkren ha ka jingialang, u Senthil u la ong ba ka kam shna phlim kalong ka kam kaba eh. “Ka jingshna phlim ka dap da ki jingeh. Lada phim kwah ban iakynduh ia ki jingeh, ka bha ban nym wan sha ka kam shna phlim,” la ai jingmut une u cinematographer. U la ban jur ia ka jingkongsan ban pdiang ia kine ki jingeh, khamtam ha ka jingmih ki teknoloji kum ka VFX, kaba u iohi kum ka atiar ba khlain bor kaba la kham pynsuk ia ka kam jong u cinematographer da kaba kyntiew ia ka jingiathuh khana lyngba ki video. “Ka VFX ka la pynsuk ia ka jingim jong u cinematographer bad ka VFX kaba iohbor na ka AI ka dang mih kum ka lawei”, u la ong, da kaba ban jur ia ka jinglah ka teknoloji ban pynkylla ia ka jingsaindur.

Hynrei u Senthil u batai ia ka jingsngew jong u halor kumno u pyndonkam ia ka jingkiew shaphrang ka teknoloji. “Ngam kwah ban iakhun pyrshah bad ka teknoloji. Nga kwah ban pyniasoh ia ka teknoloji bad ki kam jong nga bad wanrah jingkylla,” u la ong. Kane ka rukom pyrkhat ka la long kaba kongsan ha ka jingjop jong u, haba u bteng ban pyniasoh ia ki rukom tynrai jong ka kam shna phlim bad ka VFX ban wanrah ka jingsngewtynnad haba peit ia ki phlim.

Haba kren shaphang ka kam saindur jong u, u Senthil u la batai ia ka jingkongsan ban sngewthuh man ki jingdonkam ba kyrpang jong ka khana. “Man ka khana kalong kaba kyrpang ha la ka jong. Kalong kaba kongsan kumno phi iathuh ia ka khana jong phi sha ki briew. Nga shim kham bun ka por ha ka bynta jong ka kam hadien ba la dep ring ban sngewthuh ia ka khana bad ka jingdonkam jong ka bad pynkhreh bha ia ka jingring ia ka phlim’, u la ong. U la kren ruh shaphang ka jingdon ka jingiatreilang ha ka kam jong u, da kaba ong ba u cinematographer udei ban don ka jingiatreilang bad u VFX Director ban wanrah ia ki dur ba iahap bad ka khana haba kyrshan ia ki jingdawa ha ki kam teknikal na ka bynta ki visual effect.

Kum u nongprat lynti ha ka jingpyndonkam ia ki visual effect bad ka jingring phlim u Senthil u la kdew ia ka jingbym don ki ain ba pyrkhing ha ka jingshna phlim. “Ym don ain ha ka kam shna phlim. Kadei ka rai shimet. Baroh ka shong halor kumno phi iathuh ia ka khana jong phi,” u la pynthikna da kaba ban jur ba ha man ka phlim ba seisoh ka don ka khana kaba sngewtynnad.

Ha ki jingkren pynkut, u Senthil u la batai ruh shaphang ka jingshem shimet jong u ha ki por ba u dang samla, da kaba pynpaw ba ka lynti jong u sha ka cinematography ka long kaba jia ryngkhat. Ha kito ki por u la rai ban rung ha ka skul ba ai jinghikai ha ka kam shna phlim hynrei hadien katto katne ka jingiaid ka por, u la ioh ia ka jingieid ia ka kam shna phlim bad u la noh met bad mynsiem ha kane ka kam. Haba kren shaphang ka jingdonkam ban wanrah ia ki khana kiba kham heh ha ki phlim, u la ong, “Ki don ki por ha kaba ngi hap ban weng ia ki maw jynthut ban kham pyniar ia ka khana ha ka rukom kaba khring bha ia ki nongpeit.

 

* * *

(Release ID: 2077169) Visitor Counter : 2