Ka Kynhun Myntri jong ka Sorkar Pdeng ba la khlieh da u Myntri Rangbah Duh, Narendra Modi ka la ai jingmynjur ia ka One Nation One Subscription, ka skhim Sorkar Pdeng ba thymmai ka ban pynbiang lad ha kylleng ka ri ban ioh ia ki jingthoh na ki jingwad bniah. Kane ka skhim ka dei ka ban pyniaid da ka lad digital kaba suk ban pyndonkam. Kane kan dei ka lad “One Nation One Subscription” na ka bynta ki jaka ai jingpule ba kham halor ba pyniaid da ka Sorkar bad ki R&D laboratory jong ka Sorkar Pdeng.

La mang kumba T. 6,000 klur na ka bynta ka One Nation One Subscription na ka bynta 3 snem 2025, 2026 bad 2027 kum ka skhim ba thymmai jong ka Sorkar Pdeng. Ka One Nation One Subscription kan rah shakhmat bad pyniar ia ki sienjam ba la shim da ka Sorkar India ha kine ki 10 snem ba la dep ha ki kam pule puthi, khnang ban plié lad ia ki samla ka India ba kin ioh ia ki jingpule ba kham halor. Kane kan iarap ia ka sienjam ANRF ban kyntiew ia ka jingwadbniah bad wanrah ia ka jingwadbniah bad ka jingsaindur thymmai ha ki skulbah, kolej, jaka wad bniah bad ki R&D laboratory jong ka Sorkar Pdeng.

Ki jingmyntoi jong ka skhim One Nation One Subscription ki dei kiba yn pynbiang ia baroh ki jaka ai jingpule ba kham halor kiba pyniaid da ka Sorkar Pdeng ne ki Sorkar Jylla bad ki jaka wad bniah jong ka Sorkar Pdeng, lyngba ka national subscription ba pyniaid da kawei ka kynhun kaba long ka Information and Library Network (INFLIBNET), ka inter-university centre jong ka University Grants Commission (UGC). Kane ka kynthup palat 6,300 tylli ki jaka pule, kaba mut jan 1.8 klur ngut ki samla pule, ki nonghikai bad ki stad wad bniah, ki ba lah ban ioh ia ki jingmyntoi na ka One Nation One Subscription.

Kane ka iahap bad ki thong Viksitbharat@2047, National Education Policy (NEP) 2020 bad Anusandhan National Research Foundation (ANRF). Kane ka sienjam kan pyniar ia ki lad jong ki samla pule, ki nonghikai bad ki nongwad bniah bad ki stad science ban ioh ia ki jingthoh, ba kynthup ia kito kiba don ha ki nongbah tier 2 bad tier 3, bad kane kan kyntiew ia ka kam wad bniah ha ka ri. Ka ANRF kan peit na ka por sha ka por ia ka jingpyndonkam ia ka One Nation One Subscription bad ka jingpynmih jingthoh ki nongthoh ka India ha kine ki jaka.

Ka tnad Pule Puthi ba kham halor kan don ia kawei ka rynsan “One Nation One Subscription” bad lyngba kane, kine ki jaka kin lah ban ioh ia kine ki jingthoh. Ka ANRF kan peit na ka por sha ka por ia ka jingpyndonkam ia ka One Nation One Subscription bad ka jingpynmih jingthoh ki nongthoh ka India ha kine ki jaka. Ka Tnad bad kiwei kiwei ki tnad kiba don ia ki jaka ai jiingpule ba kham halor bad ki jaka kiba trei ha ka R&D hapoh ka jingpyniaid jong ki kin pynlong ia ki prokram Information, Education and Communication (IEC) na ka bynta ki samla pule, ki nonghikai bad ki nongwadbniah ha kine ki jaka shaphang ka lad ban ioh ia ka One Nation One Subscription, ka ban kyntiew ia ka jingpyndonkam ia kane ka lad ha kylleng ka ri. Yn kyrpad ruh ia ki Sorkar Jylla ba kin pynlong ia kum kine ki kam ban kyntiew ia ka jingpyndonkam ia kane ka lad kaba kyrpang da ki samla pule, ki nonghikai bad ki nongwad bniah ha baroh ki jaka treikam ba pyniaid da ka Sorkar.

*****