Ha ka bynta kaba 55 jong ka IFFI ha Goa, ki riewshemphang ha ka kam pynsawa Nakul Kamte bad Eric Hoehn ki la batai shaphang kane ka kam bad ka jingstad science shaphang ka jingsaindur ia ka jingsawa. U Kamte, uba la jop khusnam National Award ar sien, u la pynkylla ia ka kam shna phlim jong ka India lyngba ki phlim kum ka Lagaan bad Dil Chahta Hai. U Hoehn, uba la jop khusnam Emmy ar sien, u la paw bha namar ka The Queen's Gambit bad Deepwater Horizon. Baroh arngut kine ki riewshemphang ki la batai shaphang ki jingsngew jong ki shaphang ka teknoloji kaba iadei bad ka jingpynsawa, ka bynta jong ka ha ka kam iathuh khana bad ka jingkylla ha ka jingsaindur ia ka jingpynsawa ha ka kam shna phlim.

Kane ka bynta ka la sdang ha kaba u Kamte bad u Hoehn ki la iakren shaphang ka jingkylla ha ka jingsaindur ia ka jingpynsawa. U Kamte u la kren shaphang ki jingeh bad ki lad kiba wan lyngba ka jingkiew ka teknoloji katba u Hoehn u la kdew sha ka bynta kaba kongsan jong ki briew ha ka jingsaindur ia ki jingpynsawa.

Kane ka jingiamir jingmut ka la phai sha ka jingktah ki teknoloji ba thymmai, khamtam ka Artificial Intelligence (AI), ia ka jingsaindur ia ka jingpynsawa. U Hoehn u la ong, “Ka AI ka ai shuh shuh ki lad, hynrei kam shim ia ki rai ne pyni ia ka jinglong shisha jong ki jingak – ka bynta kaba kongsan jong ka kam iathuh khana kaba lah ban leh tang da ki briew.” U kamte ruh u la kren halor kane ka phang ha kaba u la ban jur halor ka jingkongsan jong ka rai jong ki briew ha ka jingsaindur ia ki jingpynsawa.

Ka jingiakren ka la phai ruh sha ki jingeh ba ki nongsaindur ia ki jingpynsawa ki iakynduh. U Hoehn u la batai, “Kaba kongsan ka dei ka jingpynleit jingmut, da kaba pynthikna ba ki bynta jong ka jingpynsawa kim pynkulmar ia ki nongpeit hynrei ki ialam lynti ia ki sha ka jingthmu jong u nongshna phlim.” U Kamte u la ban jur halor ka jingdonkam ia ka jingsawa ha ka cinema da kaba ong, “Ki phlim mynta bunsien ki tam ia ki jingsawa ba la ioh jingmynjur bad kane ka ktah ia ka jingpeit ia kine ki phlim.”

La iakren ruh shaphang ka jingsaindur ia ki jingpynsawa ha ki phlim ksuid ha kaba u Kamte u la ong, “Ka khana kaba khlain ka lah ban pyniaidiew ia ka phlim wat lada ym don ki jingpynsawa,” bad u Hoehn u la ong, “Ka jingduna ki jingpynsawa ka plie lad ia ki nongpeit ba kin ngam kham jylliew ha ka khana.” Baroh arngut kine ki riewshemphang ki la mynjur ba ka jingpynsawa bad ka put ka tem ka don ka bynta ha ka jingsngew jong ka phlim.

Ka jingiakren ka la phai sha ka jingkylla ha ka jingpyniasoh ia ka jingpynsawa bad ki jingring dur ha kaba u Kamte u la kren shaphang ka jingkiew jong kane ha ki phlim ka India, bad u la kdew sha ka Lagaan kum ka nuksa jong kane. U la ong, “ Ka jinpyniasoh ia ka jingpynsawa ka donkam ia ka jingpynleit jingmut bad ka jingjied kaba bniah ban pynduna ia ka jingioh ia kiwei kiwei ki jingsawa, hynrei ka kam ka long kaba sngewtynnad bha haba ni ioh ia ki jingak kiba tbit.

Kane ka bynta ka peit ruh ia ki jingiapher ha ka jingsaindur ia ki jingpynsawa hapdeng ka Hollywood bad ka kam shna phlim ha India. U Kamte u la batai kumno ki jingeh ha ka jingbei tyngka ha India bunsien ka pynlong ba ki nongsaindur ia ki jingpynsawa ki hap ba pyndonkam tyngkai ia ki jingdon jingem, hynrei ki don ruh ki por ba kane ka pher bha kumba la iohi ha ka Master and Commander. U Hoehn u la ong ba bunsien ka jingsaindur thymmai ka mih na ka jingtei hapdeng kine ki jingeh da kaba ong, “Teng teng ka jingktah ka jingpynsawa kaba ioh da kaba ring da ka iPhone ka tam ia ki jingkyrmen.”

Baroh ar ngut ki riewshemphang ki ban jur halor ka jingtrei lang ha kaba iadei bad ki jingpynsawa ha ka kam shna phlim. U kamte u la ong, “Ki director kiba batai bniah ki plie lad ia ki nongsaindur ia ki jingpynsawa ba kin trei kham bha,” katba u Hoehn u la ong, “Ki scene kiba dei ban paw bha ki dei kita kiba ngi kham phaikhmat da kaba pynthikna ba ka jingpynsawa ka iahap bha bad ka khana.”

Haba kut kane ka bynta, ki riewshemphang ki la kren shaphang ka bynta jong ka jingsaindur ia ka jingpynsawa ha ki phlim ki bym dei na ka ri. U Hoehn u la ong, “Wat ha ki subtitle, ka jingpynsawa ka don ka bynta kaba khraw ban bat ia ka jingpynleit jingmut jong ki nongpeit,” katba u Kamte u la ong ba ym ju dei ban khein sting ia ka jingsaindur ia ka jingpynsawa ha ka kam shna phlim.

Kane ka bynta ka la kut lyngba ka jingai jingmut ia kito kiba kwah ban trei ha ka jingsaindur ia ka jingpynsawa. U Kamte u la ong, “Sdang da kaba peit ia ki jingpynsawa kiba paw bha ha ki phlim,” katba u Hoehn u la pynshlur ia ka jingpynbud ia ki jingsaindur ia ki jingpynsawa ba pawnam ban sngewthuh ia kane ka kam. Baroh arngut ki riewshemphang ki la mynjur halor ka jingpynbiang ia ka thup ki jingpynsawa ban pyntbit ialade ha kane ka kam.

 

* * *

(Release ID: 2076481) Visitor Counter : 3