#IFFIWood, 22 नोव्‍हेंबर 2024

दिग्दर्शक नवज्योत नरेंद्र बांदिवडेकर हांचो मराठी फिल्म ‘घरत गणपती’ हो समकालीन भारतांत शेणत वचपी  भारतीय परंपरा, संस्कृताय, आनी मुल्यां मुखार व्हरपाचो प्रामाणीक यत्न. आयच्या संवसारांत संयुक्त कुटुंबाची संकल्पनाय उणी जायत आसा. 55व्या इफ्फीत उत्कृश्ट पदार्पण दिग्दर्शक पुरस्कार मेळोवपा खातीर सर्त करपी ह्या चित्रपट निर्मात्यान सांगलें की ताचो चित्रपट वेगवेगळ्या मजेन भरिल्ल्या तशेंच अराजक परिस्थितींतल्यान सगळ्या कुटुंबांतल्या वांगड्या मदल्या आंतर-वैयक्तीक गतीशास्त्राचो अणभव दिता. आयज भारताच्या 55व्या आंतरराष्ट्रीय चित्रपट महोत्सवांत पीआयबीन आयोजीत केल्ले पत्रकार परिशदेंत ते उलयताले.

‘घरत गणपती’ चो संगीत दिग्दर्शक संकेत साने हांणी सांगलें की, ह्या सिनेमाच्या संगीतातल्यान प्रेक्षकांक भारतीय संस्कृताये कडेन जोडला; दर एका भारतीय काळजाकडेन भावनीक नाते जोडला.

हो सिनेमा महाराष्ट्राच्या सैमीक कोंकण दर्यादेगेर आदारीत आसा; पूण ह्या सिनेमांत दाखयल्लें पूर्वजांचे महाराष्ट्री घर केरळांत आसा! ह्या संदर्भार बांदिवडेकरान म्हणलें, “सगल्या भारतांत सैमीक सोबीतकाय भरपूर प्रमाणांत आसा, ताचे खातीर आमकां भारता भायर वचपाची गरज ना.”

‘घरत गणपती’ ची कार्यकारी सहनिर्माता अश्विनी परांजपे हांणी ही काणी आयकून पयल्याच दिसा ह्या सिनेमा विशीं  खात्री जाली अशें सांगलें. ‘घरात गणपती’ फिल्म मान्यताय, विकसीत जावपी परंपरा आनी भारतीय कुटुंबांतल्या गुंतागुंतीचे  बंधन हाताळता. ‘घरात गणपती’ हो सिनेमा उत्सवा वेळार हांसो आनी दुकां मदीं  मोग, अस्मिताय, संस्कृतीक भावना कश्यो फुलतात हाची वळख करून दिता.

पटकथेंत बळिश्ट बायलां पात्रां आसात अशेंय ह्या सिनेमाच्या दिग्दर्शकान नदरेक हाडलां. ह्या सिनेमांत गणपती महोत्सवांत महाराष्ट्री कुटुंबा कडेन रावपाक कोंकणाक येवपी उत्तर भारतीय चलयेचें चित्रण आसा. ह्या सिनेमाच्या कलाकारां मदीं निकिता दत्ता, भूषण प्रधान, अजिंक्य देव, अश्विनी भावे, संजय मोने, शुभांगी लाटकर आनी शुभांगी गोखले हांचो आस्पाव आसा.

‘लेव्हल क्रॉस’ मलयाळम फिल्माचो दिग्दर्शक, पटकथा लेखक आनी मुखेल अभिनेतोय पत्रकार परिशदेंत वांटेकार जालो. दिग्दर्शक अरफाज अयूब हांणी आपल्या प्रकल्पाचें वर्णन करताना सांगले  की हे  एक  “अतिवास्तववादी फिल्म” आसा जातूंत थळूय एक पात्र आसा! जिवीत कितलें अनिश्चीत आसा तें ह्या सिनेमांतल्यान दिसून येता! अरफाज अयुबान फुडें सांगलें, हो सिनेमां समाजीक वर्णपटाच्या दोन परिसिमीत लोकांक सादर करता जे वेल्यावेल्यान सामके वेगळे दिसतात. पूण मनशाच्यो भावना खोल पातळेचेर एकूच आसात हेंय ह्या चित्रपटांतल्यान स्पश्ट जाता. कथेंत लिपिल्लो वर्तमान हो भूतकाळाचो अवशेश, हें चित्रपटांतल्यान सूक्ष्मपणान जाणवता. जगपाची ही काणी परस्परविरोधी दृष्टीकोनातल्यान आणि सूक्ष्म रूपकांच्या मानवी भावनेनी भरिल्ली आसा अशें तांणी सांगलें.

‘लेव्हल क्रॉस’चें शूटिंग ट्युनिशियांतल्या सहारा वाळवंटात जालां. प्रेक्षकांनी  नवो वाठार पळोवचो आनी पटकथेच्या मागणेप्रमाण तो “अतिवास्तववादी, काल्पनीक संवसार” आसा अशें मानचें  देखून हें थळ वेंचून काडलें अशें दिग्दर्शकान सांगले.  ट्युनिशियांत शुटींग जाल्लो हो पयलो भारतीय सिनेमा अशें तांणी सांगलें. “काळ आनी जाग्या भायर काल्पनीक भुंयेर घडिल्लो हो सिनेमा भावना, विचार आनी समजुतींचो सोबीतपणान सोद घेता”, अशें दिग्दर्शकान सांगलें.

आपल्या प्रकल्पा खातीर एक परिपूर्ण सुवात सोदपाचे आपले अणभव सांगून, अरफाज अयूब आपल्या थळाव्या ट्युनिशियन लायन निर्मात्या वांगडा वाळवंटात मैलां मेरेन चलून रस्त्याची जोडणी नाशिल्ल्या शूटिंग स्पॉटाचेर कसो गेलो तें विशी उलयलो. 

मलयाळम टीव्हीचो अग्रदूत आनी अरफाज अयुबाचो बापूय  एडम अयूब  हाणें ‘लेव्हल क्रॉस’ ची पटकथा बरयल्या . पत्रकार परिशदेंत फिल्म उद्देगाच्या ह्या दिग्गजान ह्या प्रकल्पाची पटकथा जायते फावटीं परतून बरयल्या अशें सांगले . मानवी भावना हुपपाचेर हो चित्रपट आसा अशें एडम अयूब हांणी सांगलें. ताणें प्रेक्षकांक सिनेमा निमाणे मेरेन पळोवपाचो सल्लो दिलो, कारण निमाण्या दृश्या मेरेन काणयेंत ट्विस्ट आसा !  अदभूत व्हिज्युअल आनी मन भुलोवपी ध्वनी डिझायनसयत  एक आगळोच सिनेमॅटिक अणभव हे फिल्म दिता. 

मुखेल अभिनेत्री अमाला पॉलान आपली भुमिका गुंतागुंतीची आशिल्ली आनी जायत्या ट्विस्टानी  भरिल्ल्या ह्या  थ्रिलर फिल्मात  ह्या पात्राचे जायते थर आसात अशें सांगलें. अमाला पॉलान “अनिश्चीत वाळवंटी वातावरणांत” शूटिंग करपाचो आपलो रोमांचक अणभव सांगलो. चित्रीकरणाच्या  निमाण्या दिसा टोर्नाडो पळयल्लो उगडास तिका आयलो!

‘लेव्हल क्रॉस’ ह्या थ्रिलर फिल्माच्या  कलाकारां मदीं आसिफ अली आनी शराफ यु  धीन हांचोय आस्पाव आसा.

* * *

PIB IFFI CAST AND CREW | Subhash/Utkarsha/Darshana | IFFI 55