মথং চহিগী এপ্রিলদা বিহারনা য়ুম্বু ওইদুনা খেলো ইন্দিয়া য়ুথ গেমস ২০২৫ পাংথোক্লগনি। য়ুথ এফেয়ার্স অমসুং স্পোর্তস মিনিস্ত্রিগী মরুওইবা থৌরম অমা ওইরিবা অসিনা, লৈবাক অসিগী খেলো ইন্দিয়াগী মেপ্তা নৌনা বিহার হাপচিল্লগনি।

অহানবা ওইনা অমসুং সম্মর ওলেম্পিক্সকী মওংদা, খেলো ইন্দিয়া পেরা গেমশু বিহারদা পাংথোক্কনি। য়ুথ গেমসকী মতুংদা পেরা গেমস পাংথোক্কনি অমসুং গেম অনি অসিগী মরক্তা নুমি ১০ দগী নুমিৎ ১৫ ফাওবা লাপ্নহনগনি। হৌখিবা চহিদা দিল্লিদা অহানবা পেরা গেমস পাংথোকখ্রে।

য়ুথ এফেয়ার্স অমসুং স্পোর্তসকী য়ুনিয়ন মিনিস্তর দোক্তর মনসুখ মন্দাবিয়ানা হায়খি লৈবাক অসিগী কাচিন-কোয়া খুদিংমক্ত খেলো ইন্দিয়া গেমস পাংথোকপা অসি প্রধান মন্ত্রী শ্রী নরেন্দ্র মোদীগী পান্দমনি। মহাক্কী পান্দম অসিগী শরুক অমা ওইনা, বিহারনা গেম অমা খক নত্তনা গেম অনি পাংথোক্কনি। বিকসিত ভারত ২০৪৭ গী পান্দম ফংনবা হোৎনবদা শান্নবনা মরুওইবা থৌদাং অমা লৌগনি। অচৌবা শান্নবগী থৌরমশিং য়ুম্বু ওইদুনা হন্দক বিহারনা মসিগী তৌবা ঙম্বা উৎখ্রে।

হন্দক বিহারগী রাজগিরদা নুপীগী এসিয়ান চেম্পিয়ন্স ত্রোফি হোক্কি চেম্পিয়নশিপ পাংথোকখ্রে। হায়রিবা চেম্পিয়নশিপ অদুদা ভারতনা পেরিস ওলেম্পিক্সতা ব্রোঞ্জ মেদল ফংখিবা চাইনা মাইথিবা পীদুনা অমুক হন্না মহাদেস অসিগী চেম্পিয়ন ওইরে।

চহি অসিগী জনুৱারিদা তামিল নাদুদা খেলো ইন্দিয়া য়ুথ গেমস ২০২৩ পাংথোকখ্রে। য়ুনিয়ন মিনিস্তরনা হায়খি মদুদি লৈবাক শীনবা থুংনা লৈরিবা খুদোংচাবশিং শীজিন্ননবা ঐখোয়না শান্নরোয়শিংগী পুক্নিং থৌগৎলি। বিহারগী ইনাকখুল্লবা নাত অমসুং চৎনবীশিং অসিনা মীওই খুদিংমক্কী পুক্নিং চিংশিনগনি। মপাঙ্গল কনবা লৈবাক অমা শেমগৎপদা রাজ্য অমগী হেরিতেচ হরাওবা ফোঙদোকপা অসি তঙাইফদে।

ইনফ্রাস্ত্রকচর শেমগৎনবা অমসুং মখোঙদগী হৌনা শান্নরোয়শিং য়োকখৎনবা মিনিস্ত্রিগী থৌরাংদা বিহার তৎন-থানবা য়াদ্রবা শরুক অমনি। হৈথোই-শিংথোইবা য়োকখৎপা অসি খেলো ইন্দিয়া থৌরমগী মরুওইবনি অমসুং স্পোর্তস দিপার্তমেন্তগী চাউখৎ-থৌরাংগী থবকশিং য়াম্না কান্নবা ফংবা রাজ্যশিংগী মনুংদা বিহারশু অমনি। বিহারদা খেলো ইন্দিয়া সেন্তর ৩৮ অমসুং খেলো ইন্দিয়া স্তেৎ সেন্তর ওফ এক্সলেন্স অমা লৈদুনা থাক খুদিংমক্তা শান্নরোয়শিং থম্লি। মসিগী মথক্তা, বিহারদা সাই ত্রেনিং সেন্তর অহুম লৈরি।

লাক্লিবা চয়োলশিংদা বিহারদা পাংথোক্কদৌরিবা খেলো ইন্দিয়া য়ুথ গেমসগী অকুপ্পা মরোলশিং খঙহল্লগনি।

***