0 3

#IFFIWood, 21 नोव्‍हेंबर 2024 

इफ्फी खातीर 384 सिनेमांतल्यान 20 भारतीय चित्रपटांची निवड करप, हें एक कठीण काम आशिल्लें आनी ह्या इफ्फी खातीर खंयच्याय चित्रपटांची निवड ना जावप हें चित्रपटांच्या दर्ज्याचेर विधान मानूंक फावना, अशें इफ्फी 2024 इंडियन पॅनारोमाच्या फिचर फिल्म विभागा खातीरच्या परीक्षक वांगड्यांनी उक्तायलें. आयज 55व्या इफ्फी 2024च्या फाटभुयेर घेतिल्ल्या पत्रकार परिशदेंत ते उलयताले.

भारतीय पॅनोरमा खातीर निवड करपाचे प्रक्रियेचेर आपले विचार उक्तायतना नामनेचे चित्रपट निर्माते हिमांशु सेखर खटुआ हांणी स्पश्ट केलें, की ते सगळे देशांतल्या वेगवेगळ्या वाठारांतल्यान आयिल्ले आनी देशाच्या सगळ्या वाठारांक फावो तें प्रतिनिधीत्व मेळचें हाची खात्री करपाची तांची इत्सा आशिल्ली, ताकालागून परीक्षक वांगड्या खातीर हें एक मोठे कठीण काम आशिल्ले. ह्या विभागांतले सगळ्यांत बरे पंचवीस चित्रपट थारावपा खातीर, 13 परीक्षकांच्या पॅनेलान बेचाळीस दीस विचारविनिमय केलो. खटुआ हाणी फुडें सांगलें, की गोंय हें शुटींगचें आवडीचें थळ जालां आनी गोंयाकडच्यान फिल्म निर्मात्यांक, गोंयांत शुटींग करतना गरजेची सगळी मजत मेळटा हें दिसून येता.

ह्या संदर्भात उलयतना परीक्षक वांगडी मनोज जोशी हांणी सांगलें, की देशांतल्या सगळ्या वाठारातल्यान येवपी प्रतिभेक, चित्रपटांक आनी सृजनशीलतेक न्याय दिवपाचो परीक्षकानी यत्न केलो. “आमी संवसारांतले आदिम कथाकार. कथा सांगप आमच्या रगतांत आसा. आनी आमचो देश संवसारांतलो सगळ्यांत बरो मजकूर (कंटेंट) पुरवण करपी देश आसा”, अशे श्री जोशी हाणी सांगलें.

इफ्फी  2024च्या भारतीय पॅनोरमा फिल्मांनी भारतान आशिल्ली विविधताय आनी भारतीय सिनेमात आशिल्ली विविधताय प्रगट जाता, अशें परीक्षक वांगडी रत्नोत्तमा सेनगुप्तान सांगलें.  हो महोत्सव फकत 10 दीस चलता तरी तातूंत जायते विभाग आसात, जातूंत विंगड विंगड प्रकारचे आनी वर्गांतले चित्रपट दाखयतात, हांचेर तिणें भर दिलो.

सिनेमा होच एक धर्म आसा आनी सिनेमाची निवड बारीकसाणीन आनी धर्मीक रितीन केल्या, अशें परीक्षक वांगडी आशू त्रिखान सांगलें. तांणी फुडें सांगलें, कि स्पेशल इफेक्ट्स आनी डिजिटल तंत्रगिन्यानाचो वापर तशेच अशा सगळ्या विभागांत, भारतीय सिनेमा नवे मानक थारायता आनी संवसारीक मानकांबरोबर मुखार सरत आसा.

परीक्षक वांगडी प्रिया कृष्णस्वामी हिणे, आयज भारतीय सिनेमांत हाजीर आशिल्ल्या विशयात्मकतेची तोखणाय केली. तिणें सांगलें, कि नवे चित्रपट निर्माते कलाप्रकार आनी मुखार हाडिल्ले नवे सिनेमा भाशेचेर कशे प्रयोग करतात, तें पळोवन उमेद जाली. चित्रपटांची बारीकसाणीन निवड करून परीक्षक वांगड्याच्या यत्नांतल्यान, चित्रपट निर्मितींत येवपी प्रवृत्ती दाखोवपाचो आनी भारतीय सिनेमाच्या विंगड विंगड प्रकारांचेर संवसाराक उजवाड घालपाचो, यत्न आशिल्लो.

पत्रकार परिशदेत सुष्मिता मुखर्जी, ओइनम गौतम, एस. एम. पाटील, नीलभ कौल, सुशांत मिसरा, अरुण कुमार बोस आनी समीर हंचाटे हे हेर परीक्षक वांगडी हाजीर आशिल्ले. राजीथ चंद्रन हांणी परिशदेचें सूत्र संचालन केल्लें.

भारतीय आंतरराष्ट्रीय चित्रपट महोत्सवाचो एक मुखेल विभाग आशिल्ल्या इंडियन पॅनोरमा ह्या विभागात 25 फिचर फिल्मां आनी 20 नॉन फीचर फिल्मां इफ्फीच्या 55व्या आवृत्तींत दाखोवपाचे आसात. मुखेल प्रवाहांतल्या सिनेमांतल्या 5 चित्रपटां सयत, 25 फीचर फिल्मांचें पॅकेज 384 समकालीन भारतीय फिचर फिल्मांच्या विस्तृत वर्णपटांतल्यान वेंचून काडल्यात. इंडियन पॅनोरमा 2024च्या उक्तावण फिल्मा खातीर परीक्षकांची निवड श्री रणदीप हुड्डा हांणी दिग्दर्शीत केल्लो “स्वतंत्र्य वीर सावरकर (हिंदी)” हो चित्रपट आशिल्लो.

द इंडियन पॅनोरमा फिचर फिल्म्स विभागाचे परीक्षक वांगडी:

1. श्री. मनोज जोशी, अभिनेते

2. सुस्मिता मुखर्जी, अभिनेत्री

3. श्री. हिमांसू सेखर खटुआ, फिल्म दिग्दर्शक

4. श्री. ओइनम गौतम सिंग, चित्रपट दिग्दर्शक

5. श्री. आशू त्रिखा, चित्रपट दिग्दर्शक

6. श्री. एस.एम. पाटील, चित्रपट दिग्दर्शक आनी लेखक

7. श्री. नीलाभ कौल, सिनेमाटोग्राफर आनी फिल्म दिग्दर्शक

8. श्री. सुशां मिसरा, चित्रपट दिग्दर्शक

9. श्री. अरुण कुमार बोस, प्रसाद इन्स्टिट्यूट आनी साउंड इंजिनियरचे आदले एचओडी

10. रत्नोत्तमा सेनगुप्ता, लेखक आनी संपादक

11. श्री. समीर हंचाटे, चित्रपट दिग्दर्शक

12. प्रिया कृष्णस्वामी, फिल्म दिग्दर्शक

इंडियन पॅनोरमा विशीं :

सिनेमा कलेच्या आदारान भारताची गिरेस्त संस्कृताय आनी दायज हांचे वांगडा भारतीय चित्रपटांचो प्रचार करपा खातीर इफ्फीचो एक भाग म्हूण 1978 वर्सा इंडियन पॅनोरमा सुरू केल्लो. इंडियन पॅनोरमात सुरवाती सावन वर्साचे उत्कृश्ट भारतीय चित्रपट दाखोवपा खातीर पुरायपणान समर्पित आसा. इंडियन पॅनोरमा विभागा खातीर वेंचून काडिल्ले चित्रपट, फिल्म कलेचो प्रसार करपाच्या हेतान, भारतांत आनी परदेशांतल्या आंतरराष्ट्रीय चित्रपट महोत्सवांनी नाफा विरयत प्रदर्शना खातीरय दाखयतले. तातूंत द्विपक्षीय सांस्कृतीक आदान-प्रदान कार्यावळी खाला जाल्ले भारतीय चित्रपट सप्तक आनी सांस्कृतीक विनिमय प्रोटोकॉल भायर खाशेले भारतीय चित्रपट महोत्सव, आनी भारतांतले खाशेले भारतीय पॅनोरमा महोत्सवांचो आस्पाव जाता.

For More: https://pib.gov.in/PressReleasePage.aspx?PRID=2067711

* * *

PIB IFFI CAST AND CREW | Subhash/Manali/Darshana | IFFI 55

सोशल मिडियावर आम्हाला फॉलो करा:@PIBPanaji    /PIBPanaji    /pib_goa   pibgoa[at]gmail[dot]com  /PIBGoa