ورلڈ انٹلیکچوئل پراپرٹی آرگنائزیشن (ڈبلیو آئی پی او) نے عالمی انٹلیکچوئل پراپرٹی انڈیکیٹرز (ڈبلیو آئی پی آئی) 2024 شائع کی ہے، جو انٹلیکچوئل پراپرٹی (آئی پی) کے رجحانات کو اجاگر کرتی ہے۔ رپورٹ میں پیٹنٹ، ٹریڈ مارک، اور صنعتی ڈیزائن درخواستوں میں اعلیٰ معیشتوں میں نمایاں اضافہ ظاہر کیا گیا ہے۔ بھارت نے تینوں بڑے انٹلیکچوئل پراپرٹی رائیٹس – پیٹنٹ، ٹریڈ مارک، اور صنعتی ڈیزائن – میں عالمی ٹاپ 10 میں جگہ بنا لی ہے۔ بھارت نے انٹلیکچوئل پراپرٹی (آئی پی) کے میدان میں اہم پیش رفت کرتے ہوئے اپنی پوزیشن کو مزید مضبوط کیا ہے اور آئی پی سرگرمیوں میں نئے سنگ میل عبور کیے ہیں۔

بھارت نے 2023 میں پیٹنٹ درخواستوں میں 15.7فیصد کے اضافے کے ساتھ تیز ترین ترقی ریکارڈ کی ہے، جو کہ مسلسل پانچویں سال دوہندسی ترقی کا مظہر ہے۔ بھارت پیٹنٹس کے معاملے میں 64,480 درخواستوں کے ساتھ عالمی سطح پر چھٹے نمبر پر ہے، جن میں سے 55.2 فیصد درخواستیں ملک کے اندر سے دی گئی ہیں—جو کہ بھارت کے لیے پہلا موقع ہے۔ پیٹنٹ آفس نے 2023 میں گزشتہ سال کے مقابلے میں 149.4 فیصد زیادہ پیٹنٹس جاری کیے، جو ملک کے تیزی سے ترقی پاتے ہوئے آئی پی ماحولیاتی نظام کی عکاسی کرتا ہے۔

رپورٹ کے مطابق بھارت میں صنعتی ڈیزائن کی درخواستوں میں 36.4 فیصد کا مستقل اضافہ دیکھنے میں آیا ہے، جو ملک میں پروڈکٹ ڈیزائن، مینوفیکچرنگ، اور تخلیقی صنعتوں پر بڑھتی توجہ کے مطابق ہے۔ ٹیکسٹائل اور لوازمات، اوزار اور مشینیں، اور صحت و کاسمیٹکس کے تین اہم شعبے تمام ڈیزائن درخواستوں کا تقریباً نصف بناتے ہیں۔

2018 سے 2023 کے درمیان بھارت میں پیٹنٹ اور صنعتی ڈیزائن کی درخواستوں میں دو گنا سے زیادہ اضافہ ہوا، جبکہ ٹریڈ مارک درخواستوں میں 60 فیصد اضافہ دیکھنے میں آیا، جو ملک کی انٹلیکچوئل پراپرٹی (آئی پی) اور جدت پر بڑھتی توجہ کو ظاہر کرتا ہے۔ بھارت کے پیٹنٹ-ٹو-جی ڈی پی تناسب میں بھی نمایاں اضافہ ہوا، جو گزشتہ دہائی میں 144 سے بڑھ کر 381 تک پہنچ گیا، جس سے ظاہر ہوتا ہے کہ اقتصادی ترقی کے ساتھ آئی پی سرگرمیوں میں بھی تیزی سے اضافہ ہو رہا ہے۔

بھارت 2023 میں ٹریڈ مارک درخواستوں کے لحاظ سے عالمی سطح پر چوتھے نمبر پر رہا، جس میں 6.1 فیصد اضافہ ہوا۔ ان میں سے تقریباً 90 فیصد درخواستیں مقامی افراد کی جانب سے تھیں، جن میں صحت (21.9 فیصد)، زراعت (15.3 فیصد)، اور کپڑے (12.8 فیصد) کے اہم شعبے نمایاں رہے۔ بھارت کا ٹریڈ مارک دفتر دنیا میں دوسرے نمبر پر سب سے زیادہ فعال رجسٹریشنز رکھتا ہے، جہاں 3.2 ملین سے زائد ٹریڈ مارک نافذ العمل ہیں، جو عالمی سطح پر برانڈ کے تحفظ میں ملک کی مضبوط پوزیشن کو ظاہر کرتا ہے۔

رپورٹ میں عالمی انٹلیکچوئل پراپرٹی (آئی پی) درخواستوں میں مسلسل اضافے کو اجاگر کیا گیا ہے، جو اقتصادی چیلنجوں کے باوجود جدت کی مضبوطی کو ظاہر کرتا ہے۔ کلیدی نتائج میں 2023 میں دنیا بھر میں 3.55 ملین پیٹنٹ درخواستوں کا ریکارڈ شامل ہے، جو 2022 کے مقابلے میں 2.7 فیصد زیادہ ہے، جس میں ایشیا کی بڑی معیشتوں کا نمایاں کردار ہے۔ اس اضافے کی بڑی وجہ چین، امریکہ، جاپان، جنوبی کوریا، اور بھارت میں مقامی درخواست دہندگان کی جانب سے درخواستیں تھیں۔ مقامی درخواستوں میں اس اضافے کا رجحان ملک کے اندر جدت کی طرف بڑھنے کی عکاسی کرتا ہے، کیونکہ کئی ممالک اپنے داخلی آئی پی نظام کو مضبوط بنانے کا ارادہ رکھتے ہیں۔

ڈبلیو آئی پی او کے ورلڈ انٹلیکچوئل پراپرٹی انڈیکیٹرز 2024 کے نتائج بھارت کی جدت اور انٹلیکچوئل پراپرٹی (آئی پی) میں پیش رفت کو اجاگر کرتے ہیں۔ مقامی درخواستوں میں مسلسل اضافہ حکومت کی اقدامات کے اثرات کو ظاہر کرتا ہے، جو بھارت کو عالمی سطح پر جدت کا رہنما بنانے کے لیے اٹھائے گئے ہیں۔

تفصیلی رپورٹ کے لئے نیچے دئے گئے لنک پر جا ئیں :

https://www.wipo.int/edocs/pubdocs/en/wipo-pub-941-2024-en-world-intellectual-property-indicators-2024.pdf

*****************

) ش ح – ا م- س ع س )

U.No. 2377