ಹಣಕಾಸು ಸೇವೆಗಳ ಇಲಾಖೆಯ (ಡಿಎಫ್ಎಸ್) ಕಾರ್ಯದರ್ಶಿ ಶ್ರೀ ಎಂ. ನಾಗರಾಜು ಅವರು ಇಂದು ನವದೆಹಲಿಯಲ್ಲಿ ಪ್ರಧಾನ ಮಂತ್ರಿ ಜನ್ ಧನ್ ಯೋಜನೆ (ಪಿಎಂಜೆಡಿವೈ) ಖಾತೆದಾರರಿಗೆ ಹೊಸ ನೋ ಯುವರ್ ಕಸ್ಟಮರ್ (ರೀ-ಕೆವೈಸಿ) ಪ್ರಕ್ರಿಯೆಯನ್ನು ಕೈಗೊಳ್ಳಲು ಎಲ್ಲಾ ಪಾಲುದಾರರೊಂದಿಗೆ ಸಭೆ ನಡೆಸಿದರು.

ಪಿಎಂಜೆಡಿವೈ ಅನ್ನು 2014 ರಲ್ಲಿ ಪ್ರಾರಂಭಿಸಲಾಯಿತು ಮತ್ತು ಆಗಸ್ಟ್ 2014 ರಿಂದ ಡಿಸೆಂಬರ್ 2014 ರ ಅವಧಿಯಲ್ಲಿ ಸುಮಾರು 10.5 ಕೋಟಿ ಪಿಎಂಜೆಡಿವೈ ಖಾತೆಗಳನ್ನು ಮಿಷನ್ ಮೋಡ್‌ ನಲ್ಲಿ ತೆರೆಯಲಾಯಿತು. ಈ ಪಿ. ಎಂ. ಜೆ. ಡಿ. ವೈ. ಖಾತೆಗಳು 10 ವರ್ಷಗಳ ನಂತರ ನಿಯತಕಾಲಿಕ ನವೀಕರಣ ಅಥವಾ ಮರು-ಕೆ. ವೈ. ಸಿ. ಗೆ ಬಾಕಿ ಇವೆ.

ಸಭೆಯಲ್ಲಿ ಶ್ರೀ ನಾಗರಾಜು ಅವರು ಎಟಿಎಂ , ಮೊಬೈಲ್ ಬ್ಯಾಂಕಿಂಗ್ , ಇಂಟರ್ನೆಟ್ ಬ್ಯಾಂಕಿಂಗ್ ಮತ್ತು ಇತರ ಲಭ್ಯವಿರುವ ಡಿಜಿಟಲ್ ಪ್ಲಾಟ್‌ ಫಾರ್ಮ್‌ ಗಳ ಮೂಲಕ ಮರು-ಕೆವೈಸಿ ಅಗತ್ಯವನ್ನು ಎತ್ತಿ ತೋರಿಸಿದರು - ಉದಾಹರಣೆಗೆ ಫಿಂಗರ್‌ ಪ್ರಿಂಟ್, ಮುಖ ಗುರುತಿಸುವಿಕೆ, ಕೆವೈಸಿ ದಾಖಲೆಗಳಲ್ಲಿ ಯಾವುದೇ ಬದಲಾವಣೆಯಿಲ್ಲದಿದ್ದರೆ ಡಿಕ್ಲರೇಶನ್ ಫಾರ್ಮ್ ಇತ್ಯಾದಿಗಳನ್ನು ಬಳಸಲು ಸೂಚಿಸಲಾಗಿದೆ. ಇತರ ಸಹವರ್ತಿ ಬ್ಯಾಂಕ್‌ಗಳ ಉತ್ತಮ ಪದ್ಧತಿಗಳನ್ನು ಜಾರಿಗೆ ತರಲು ಬ್ಯಾಂಕ್‌ ಗಳು ಸಹ ಉತ್ಸುಕರಾಗಬೇಕು ಎಂದು ಅವರು ಹೇಳಿದರು.

ರಾಜ್ಯ ಮಟ್ಟದ ಬ್ಯಾಂಕರ್‌ ಗಳ ಸಮಿತಿ (ಎಸ್. ಎಲ್. ಬಿ. ಸಿ/ಯು. ಟಿ. ಎಲ್. ಬಿ. ಸಿ) ಹಾಗೂ ಲೀಡ್ ಡಿಸ್ಟ್ರಿಕ್ಟ್ ಮ್ಯಾನೇಜರ್‌ಗಳ (ಎಲ್‌ಡಿಎಂ) ಪಾತ್ರವು ಮಹತ್ವದ್ದಾಗಿದೆ  ಮತ್ತು ಅವರು ಅಭಿಯಾನದ ಮಾದರಿಯಲ್ಲಿ ಮರು-ಕೆ. ವೈ. ಸಿ. ಯನ್ನು ಮಾಡಲು ಜನರನ್ನು ಸಜ್ಜುಗೊಳಿಸಲು ರಾಜ್ಯ/ಜಿಲ್ಲಾ ಆಡಳಿತ/ಗ್ರಾಮ ಪಂಚಾಯಿತಿಗಳ ಸಹಾಯವನ್ನು ಪಡೆಯಬೇಕು ಎಂದು ಶ್ರೀ ನಾಗರಾಜು ಒತ್ತಿ ಹೇಳಿದರು.

ಪಿ. ಎಂ. ಜೆ. ಡಿ. ವೈ. ಯೋಜನೆಯ ಪ್ರಾರಂಭದ ಸಮಯದಲ್ಲಿ ತೋರಿಸಿದ ಉತ್ಸಾಹದಲ್ಲಿ ಕೆಲಸ ಮಾಡುವಂತೆ ಮತ್ತು ಗ್ರಾಹಕರಿಗೆ ಯಾವುದೇ ಅನಾನುಕೂಲತೆಯನ್ನು ತಪ್ಪಿಸಲು ಮಿಷನ್ ಮೋಡ್ ನಲ್ಲಿ ರೀ-ಕೆವೈಸಿ ಕಾರ್ಯವನ್ನು ಪೂರ್ಣಗೊಳಿಸುವಂತೆ ಶ್ರೀ ನಾಗರಾಜು ಅವರು ಬ್ಯಾಂಕ್‌ ಗಳನ್ನು ಒತ್ತಾಯಿಸಿದರು. ಕಾಲಮಿತಿಯಲ್ಲಿ ಮರು-ಕೆವೈಸಿಯನ್ನು ಪೂರ್ಣಗೊಳಿಸಲು  ಅಗತ್ಯವಿರುವ ಕಡೆ  ಹೆಚ್ಚುವರಿ ಸಿಬ್ಬಂದಿಯನ್ನು ನಿಯೋಜಿಸುವಂತೆ ಅವರು ಬ್ಯಾಂಕ್‌ ಗಳಿಗೆ ನಿರ್ದೇಶನ ನೀಡಿದರು.

*****