ঙাকশেল মন্ত্রী শ্রী রাজনাথ সিংহনা ওক্তোবর ৩১, ২০২৪দা অরুনাচল প্রদেশকী তৱাংদা সর্দার বল্লবভাই পতেলগী ‘দেশ কা বল্লব’ মীতম, অমসুং মেজর রালেঙ্গনাও ‘বোব’ খথিং ‘ম্যুজিয়ম ওফ ভেলর’ ভর্চুএল ওইনা লৈবাক্কী মফমদা কত্থোকখ্রে‍। ঙাকশেল মন্ত্রীনা শঙ্গাবগী থৌরম অদু অসামগী তেজপুরদা লৈবা ৪ কোর হেদক্বার্তর্সতগী পাঙথোকখিবনি‍। মহাক তৱাংদা চৎনবা তৌরম্বনি, অদুবু নোং নুংশিৎকী ফীভম ফত্তবনা চৎপা ঙমখিদবনি‍। মায়খুম হাংদোক্লিবা অসি মৈগী কুমহৈ ‘দীপাবলি’ অমসুং ভারতকী অহান্বা উপ প্রধান মন্ত্রী অমসুং গৃহ মন্ত্রী সর্দার বল্লবভাই পতেলগী মপোক কুমওন পাঙথোকপা ওইনা চহি খুদিংগী ওক্তোবর ৩১দা পাঙথোক্লিবা ‘রাস্ত্রিয় এক্তা দিবস’ নুমিৎকা চাননা পাঙথোক্লি‍।

ঙাকশেল মন্ত্রীনা ভারত অমসুং চাইনাগী মরক্তা LACগী অকক্নবা মফম খরদা হান্নগী ফীভমদা হঞ্জিলহন্নবা চাউরাক্না য়ানখিবা ৱাফম পল্লদুনা মহাক্কী ৱারোল হৌখি‍। “ভারত অমসুং চাইনানা LACকী মফম খরদা লৈরিবা খেন্নবশিং ৱাখৈননবা দিপ্লোমেতিক অমসুং মিলিতরীগী থাক অনিমক্তা ৱারী শানরি‍। ৱারী শানবা অসিগী মহৈনা মান্নবা অমসুং নাকল অনিগী ওইবা ঙাকশেলদা য়ুম্ফম ওইরবা চাউরাক্না য়ানবা ৱাফম অমা পুরকপা ঙম্লে‍। য়ানরিবা অসিদা মহৌশাদগী লৈরক্লবা মফমশিংদা পেত্রোলিং চৎপা অমসুং শা-শন শজিক চাবগী হক য়াওরি‍। য়ানবা অসিদা য়ুম্ফম ওইরগা, দিসএঙ্গেজমেন্তকী প্রোসেস অয়াম্বনা লোইশিল্লক্লে‍। ঐখোয়না ফীভম অসিদা দিসএঙ্গেজমেন্তকী ৱাংমা লান্না চশিন্নবা হোৎনরি; অদুবু মদু ফংনবগীদমক ঐখোয় মতম খরদি ঙাইখিবা তারি,” হায়না মহাক্না হায়খি‍।

শ্রী রাজনাথ সিংহনা আইরন মেন ওফ ইন্দিয়া হায়নসু খঙনবা সর্দার পতেলগী মফমদা, অপুন্বা ভারত অমা শেম্নবগীদমক মহাক্না খোঙফম চেৎনা লেপখিবা অমসুং হোৎনখিবগী খুদম ওইরিবা, নীংতম্লবা মতুংদা নিংথৌ পান্বা লৈবাক ৫৬০ হেন্না পুনশিন্বদা মহাক্না লৌখিবা মরুওইবা থৌদাংগীদমক শ্রদ্ধাঞ্জলি কৎখি‍। “ঙসিগী ‘দেশ কা বল্লব’ হায়রিবা মীতম অসিনা ঐখোয়গী অসিগুম্না খেন্নবা কয়ানা থন্বা লৈবাক অমা শেমগৎপদা মথৌ তারিবা অমত্তা ওইবগী মপাঙ্গল অমসুং হন্বা লৈত্রবা থৌনাবু নীংশিংহন্দুনা মীয়ামবু পুক্নিং থৌগৎকনি,” হায়না মহাক্না হায়খি‍।

ঙাকশেল মন্ত্রীনা অৱাং নোংপোক লমদম অমসুং লৈবাক্কী ঙাকশেলদা মমল নাইদ্রবা থৌদাং য়ারম্বা তোপ তোপ্পা মীশক অমা ওইরম্বা মেজর বোবপ খথিংগী মফমদসু শ্রদ্ধাঞ্জলি কৎখি‍। “মেজর খথিংনা তৱাংবু হিংসা য়াওদনা ভারত্তা পুনশিন্বদা লমজিংলম্বতা নত্তনা, সসস্ত্র সীমা বল, নগালেন্দ আর্ম্দ পুলিস, অমসুং নগা রেজিমেন্তনচিংবা মরুওইবা মিলিতরী অমসুং সসিক্যুরিতী ফ্রেমৱর্কশিংসু লিংখৎলমখি‍। ‘ম্যুজিয়ম ওফ ভেলর’ অসিনা হৌজিক্তি মহাক্কী থৌনা ফবা অমসুং মীৎয়েঙ শানবা; মতৌগী খুদম ওইনা লেপ্তুনা তুংদা লাক্কদবা মীরোলশিংবু পুক্নিং থৌগৎকনি,” হায়না মহাক্না হায়খি‍। 

শ্রী রাজনাথ সিংহনা অমত্তা ওইবা অমসুং পুকচেল খোয়জেল তিন্ননা লৈবগী মরুওইবা, অমদি লৈবাক্কী শক্তম শাগৎপদা অৱাং-নোংপোক্কী তোপ তোপ্পা থৌদাংবু শিংথাখি‍। লৈবাক পুম্বদা শেন্মিৎলোন অমসুং ইনফ্রাস্ত্রকচর চাওখৎপা পুরক্নবা প্রধান মন্ত্রী শ্রী নরেন্দ্র মোদীগী মঙলানবু মহাক্না অমুক্কা হন্না ময়ামগী মফমদা থমখি‍। “লৈবাক অসিনা মপুং ফানা চাওখৎপা হায়বসি অৱাং-নোংপোক্না নুংঙাই য়াইফরবা মতমদা ওইগদৌরিবনি‍। ঐখোয়না মহৌশা অমসুং নাৎকী খক্তা নত্তনা শেন্মিৎলোন্দসু মপাঙ্গল কন্বা অৱাং নোংপোক অমা শেমগনি,” হায়না মহাক্না হায়খি‍।

ঙাকশেল মন্ত্রীনা লমদম অসিদা চাওখৎপা পুরকপদা বোর্দর রোদ ওর্গনাইজেসন (BRO)না লৌরিবা মরুওইবা থৌদাংবু শিংথাখি‍। মহাক্না অৱাং নোংপোক লমদম পুম্বদা কন্নেক্তিবিতীগী ফীভম ফগৎহল্লিবা প্রোজেক্ত অমা ওইরিবা অসাম অমসুং তৱাং শম্নহল্লিবা সেলা তন্নেলবু অখন্ননা পনখি‍। “তুংদা, অরুনাচল ফ্রন্তিয়র হায়ৱে প্রোজেক্তনা অৱাং নোংপোক লমদম পুম্বা, মরুওইনা ঙমখৈগী মফমশিং শক্নহন্বদা অচৌবা থৌদাং লৌরক্কনি‍। কিলোমিতর ২,০০০ শাংবা হায়ৱে অসিনা লমদম অসিগী ওইনা লোয়ননা লৈবাক পুম্বগী ওইনা মরুওইবা স্ত্রেতেজিক অমসুং ইকনমিক এসেত অমা ওইরক্কনি,” হায়না মহাক্না মখা তাখি‍।

শ্রী রাজনাথ সিংহনা লমদম অসিদা NCC ইনিসিএতিব অমসুং লোকেল ইকনমিক সপ্পোর্ত্তগী হৌরগা মরুওইবা দিজাস্তর রিলীফকী থবক ফাওবদা আর্ম্দ ফোর্সনা লৌরিবা মরুওইনা থৌদাংবু শিংথাখি‍। “আর্ম্দ ফোর্সনা সিক্যুরিতী পীবতা নত্তনা, ঙমখৈ মনাক্কী মীওইশিংগা তেংবাংনদুনা লমদম অদুগী চাওখৎনবগী পাম্বৈ অমসু ওইরি‍। মসিনা অৱাং নোংপোক্তা চাওখৎপা, ইং-তপ্পা, অমসুং সিক্যুরিতী পুরক্নবা ভারতনা লেপ্লিবা খোঙফমবু মখা তানা মপাঙ্গল কনখৎহল্লি,” হায়না মহাক্না হায়খি‍।

অরুনাচল প্রদেশকী গভর্নর লেফ্তনেন্ত জেনেরেল কে.তি. পত্নাইক, অরুনাচল প্রদেশকী মুখ্য মন্ত্রী শ্রী পামা খন্দু, পার্লিয়ামেন্তরী এফ্যার্সকী কেন্দ্র মন্ত্রী শ্রী কিরন রিজিজু, মনিপুরগী মুখ্য মন্ত্রী শ্রী এন. বিরেন সিংহ, অরুনাচল প্রদেশকী উপ মুখ্য মন্ত্রী শ্রী চৌনা মৈন অমসুং মেজর বোব খথিংগী ইমুং মনুংসু থৌরমদুদা শঙ্গাফম মফমদা শরুক য়াখি‍। চীফ ওফ আর্মী স্তাফ জেনেরেল উপেন্দ্র দ্বিবেদী, জেনেরেল ওফিসর কম্মান্দিং-ইন-চীফ, ইস্তর্ন কম্মান্দ, লেফ্তেনেন্ত জেনেরেল আর.সি. তিৱারী, GOC 4 কোর লেফ্তেনেন্ত জেনেরেল গম্ভির সিংহ, অমসুং অতৈ সিভিল অমসুং মিলিতরীগী মকোক থোংবা ওফিসিএলশিংসু থৌরমদুদা ঙাকশেল মন্ত্রীগা লোয়ননা ভর্চুএল ওইনা শরুক য়াখি‍।

******