#IFFIWood, 18 ऑक्‍टोबर 2024

#इफ्फीवुड हांगा तुमकां येवकार. 55व्या भारतीय आंतरराष्ट्रीय चित्रपट महोत्सव (इफ्फी) 2024 खातीर मीडिया प्रतिनिधींची नोंदणी 18 ऑक्टोबर 2024 दिसासावन सुरू जाल्या. तुमी एक अणभवी फिल्म समीक्षक आसूं वा कथा सांगपाची आवड आशिल्लो नवोदित पत्रकार आसूं, ही तुमचेखातीर 20 ते 28 नोव्हेंबर, 2024 मेरेन गोंयच्या पणजी शारांत जावपी इफ्फीच्या 55व्या आवृत्तींत, उक्ते जावपी सिनेमा उत्कृश्टतायेचो अणभव घेवपा खातीरची, भांगराळी तिकेट. महोत्सवा खातीर मीडिया प्रतिनिधी म्हूण नांव नोंदणी केल्यार, सिनेमाच्या खोशीयेचेर तुमच्या काळजीपूर्वक तयार केल्ल्या लेखांतल्यान, संवसाराच्या कोनशांकोनशांनी ह्या महोत्सवाक भौसा मेरेन व्हरपी पंगडाचो तुमी एक भाग आसतले.

भारत संवसारा खातीर किफायतशीर आनी उच्च दर्जाचें आशय निर्मिती केंद्र जावपाक तयार आसतना, ताचो प्रिमियर चित्रपट महोत्सव – भारतीय आंतरराष्ट्रीय चित्रपट महोत्सव (इफ्फी) - हो मनरिजवण क्षेत्रांतल्या प्रतिभेक प्रोत्साहन दिवपाक, वळख दिवपाक आनी ताची कदर करपी एक माची आसा. सृजनशील अभिव्यक्तीच्या हे आवडीक दिल्ले मान्यतायेक लागून, भागधारकांक आनी तांच्या कश्टाक संद मेळपाची एक मांडावळ उक्ती जाता. तशेंच असंख्य विषयाचेर आधारित म्हत्वाच्यो कथा पळोवंक, आयकुपाक आनी अणभवपाक मेळटात. भारतीय आंतरराष्ट्रीय चित्रपट महोत्सव हो चित्रपट निर्मितीचे कला आनी हस्तकलेविशीं तुमची समजूत वाडोवपाचो एक मंच आसा, कारण तातूंत मास्टरक्लास आनी संवादांत्मक सत्रां आसतात, जातूंत संवसारभरांतले चित्रपट उद्देगांतले दिग्गज आपले अणभव आनी आपले विचार सांगातात.

जशे तुमकां खबर आसा, सिनेमाची कदर करपाची संस्कृताय वाडोवपाक आनी चित्रपट निर्मितीच्या कलेचो खरो मोग वाडोवपाक म्हायती आनी संवादाची म्हत्वाची भुमिका आसा. देखूनच, तुमी मीडिया प्रतिनिधी भारताच्या 55व्या आंतरराष्ट्रीय चित्रपट महोत्सवाक, भव्य यश मेळोवन दिवपाखातीर एक गरजेचो भाग आसात. तुमचे कडेन  55व्या इफ्फीत चित्रपट आनी चित्रपट निर्मात्यांची बारीकसाणी बरोवपाचें, उलोवपाचें आनी दाखोवपाचें अधिकार आनी विशेषाधिकार आसात. जे दरेक काणयेक आपलो खीण जगपाक मेळटलो, हाची खात्री करतले.

नोंदणी प्रक्रिया :

मीडिया प्रतिनिधी म्हूण नोंदणी करपा खातीर, तुमी 1 जानेवारी 2024 मेरेन पिरायेची 21 वर्सां पुराय केल्ली आसूंक जाय, आनी मुद्रित, इलॅक्ट्रॉनीक, डिजिटल, वा ऑनलायन मीडिया संस्थेचो संवाददार, फोटोग्राफर, कॅमेरा पर्सन वा डिजिटल आशय निर्मातो आसूंक जाय. पिरायेचो निकश पाळपी, फ्रीलान्स पत्रकारांकय नोंदणी करूंक शकता. उपकार करून नोंदणी करचे पयलीं हांगा, संबंदीत पात्रताय निकश वाचात आनी नोंदणी करचे पयलीं सांगिल्ले दस्तावेज अपलोड करपाक तयार दवरात. नोंदणी प्रक्रिया सोपी आसा आनी https://my.iffigoa.org/media-login ह्या संकेतथळार ऑनलायन पुराय करूं येता.

नोंदणी करपाची निमाणी तारीख 12 नोव्हेंबर 2024 दिसा 11:59:59 पीएम (भारतीय मानक वेळ) थारायल्या. मीडिया प्रतिनिधी म्हूण तुमच्या मान्यतायेची निश्चितताय, अर्जाची छाननी केल्या उपरांत, तुमकां तुमच्या नोंदणीकृत ईमेल आयडीचेर कळयतले, हाची नोंद घेवची. नोंदणी प्रक्रियेंतल्यान फकत प्रेस इन्फॉर्मेशन ब्युरोन (पीआयबी) मान्यताय दिल्ले मीडिया व्यक्तीच, 55व्या इफ्फी 2024 खातीर मीडिया प्रतिनिधी पास मेळोवपाक पात्र आसात. पीआयबी, प्रसार माध्यमांच्या वेगेवेगळ्या घटकांच्या आधाराचेर, दरेक माध्यम संस्थेक कितली मान्यतापत्रा दिवपाची हाचो निर्णय घेतली. हातूंत माध्यमाची नियतकालिकताय, आकार (प्रसार, प्रेक्षक, आवाठ), सिनेमाचेर भर आनी इफ्फीचें अपेक्षीत माध्यम कव्हरेज हांचो आस्पाव आसतलो.

मीडिया प्रतिनिधी पास, मान्यताय प्राप्त माध्यम प्रतिनिधींक 18 नोव्हेंबर 2024 सावन इफ्फी स्थळार मेळटलें. हेविशीं खंयच्याय समस्ये खातीर ‘मीडिया ऍक्रेडिशन क्वेरी’ असो विशय आशिल्लो मेल iffi4pib[at]gmail[dot]com चेर धाडचो.

प्रसार माध्यम प्रतिनिधीं खातीर एफटीआयआय वतीन फिल्म तोखणाय प्रमाणपत्र अभ्यासक्रम

फिल्म कित्याक यशस्वी जाता, हाचो विचार केन्ना केला? फिल्माच्या पडद्या भायर चित्रपटाची खोलायेन म्हायती मेळोवपाची तयारी दवरात. ही म्हायती कशी मेळोवची ?

अंदूं पयल्या कांय नशीबवान मान्यताय प्राप्त मीडिया प्रतिनिधींची एक अनोखी गजाल वाट पळयता. तांकां 18 नोव्हेंबर 2024 दिसा, गोंयच्या पणजी शारांत प्रतिश्ठीत फिल्म आनी दूरचित्रवाणी संस्थे (एफटीआयआय) च्या म्हायतीयुक्त व्यक्तींनी प्रेस इन्फॉर्मेशन ब्युरो (पीआयबी) हांच्या सहकार्यान आयोजित केल्ले, फिल्म तोखणाय अभ्यासक्रमात वांटो घेवपाची संद मेळटली. हो अभ्यासक्रम दीसभर चलपी कार्यावळ आसा. मीडिया प्रतिनिधी, नोंदणी फॉर्म सादर करून आनी फॉर्मांत दिल्ल्या अभ्यासक्रमाक हाजीर रावपाचो पर्याय निवडून, मान्यताय प्राप्त माध्यम प्रतिनिधींक 'पयलो येवपीक पयली संद' ह्या तत्वाचेर हो अभ्यासक्रम उपलब्ध आसतलो.

अभ्यासक्रमाची फुडली म्हायती, वेंचून काडिल्ल्या माध्यम प्रतिनिधींक कळयतले. आयजच नोंदणी करात आनी पळयात बेगीन नोंदणी करप, कसो गेम चेंजर थारता तो. तुमका धांवपळ करी नसताना, 2024 वर्साचो इफ्फी एक्स्ट्रावागांझा सुरू जावचे पयलीं, वळख वाडोवपाक खाशेली  संद मेळटली.

उपकार करून हांगा क्लिक करून नोंदणी करात आनी सिनेमाची खोस वांटपाखातीर परत एक फावट आमी तुमका येवकार दितात !

फिल्म महोत्सवात मेळुयाच !

इफ्फी विशीं :

1952 वर्सा स्थापन जाल्लो भारतीय आंतरराष्ट्रीय चित्रपट महोत्सव (इफ्फी) आशिया खंडांतलो एक मुखेल चित्रपट महोत्सव आसा. सुरवाती सावन इफ्फीन चित्रपट, तांच्यो मनभुलोवपी कथा आनी ताचे फाटल्यान आशिल्ल्या प्रतिभावान व्यक्तींक मनोवपाचो हेत दवरला. ह्या महोत्सवांत चित्रपटांची खोलायेन कदर आनी मोग वाडोवपाक आनी पातळावपाक, लोकां मदीं समजूती आनी इश्टागतीचे संबंद तयार करपाक आनी वैयक्तीक आनी सामुहीक उत्कृश्टतायेच्या नव्या उंचायेर पावपाक प्रेरणा दिवपाचो यत्न केला.

भारत सरकाराच्या म्हायती आनी प्रसारण मंत्रालय, गोंय सरकाराच्या मनरिजवण सोसायटीच्या सहकार्यान दर वर्सा इफ्फी घडोवन हाडटा. म्हायती आनी प्रसारण मंत्रालयांतलें चित्रपट महोत्सव संचालनालय (डीएफएफ) ह्या महोत्सवाचें फुडारपण करतालें, जाल्यार राष्ट्रीय चित्रपट विकास म्हामंडळाकडेन चित्रपट माध्यम युनिटांचें विलीनीकरण जाल्ल्यान, एनएफडीसीन महोत्सवाचें संचालन हातांत घेतलां. 55व्या इफ्फीचेर ताज्या घडामोडीं खातीर www.iffigoa.org ह्या महोत्सवाच्या संकेतथळाक भेट दिवची आनी पीआयबीच्या सोशल मीडिया प्लॅटफॉर्मांचेर जशें एक्स, फेसबूक, आनी इंस्टाग्राम तशेंच पीआयबीच्या सोशल मीडिया हँडलांचेर इफ्फीक फॉलो करचें, हि नमळायेची विनवणी.

* * *

PIB Mumbai | NM/M.Prabhugaonkar/D.Rane

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai