న్యూఢిల్లీలోని సెన్సస్ బిల్డింగ్ లో సర్దార్ వల్లభాయ్ పటేల్ విగ్రహాన్ని కేంద్ర హోం, సహకార శాఖల మంత్రి శ్రీ అమిత్ షా ఈరోజు ఆవిష్కరించారు. సివిల్ రిజిస్ట్రేషన్ సిస్టమ్ (సిఆర్ఎస్) మొబైల్ అప్లికేషన్ ను కూడా శ్రీ అమిత్ షా ప్రారంభించారు.

సర్దార్ పటేల్ దేశాన్ని ఐక్యతా బంధంతో ముడిపెట్టి బలమైన భారతదేశానికి పునాది వేశారని శ్రీ అమిత్ షా ఈ సందర్భంగా సామాజిక మాధ్యమ వేదిక ‘ఎక్స్’  పోస్ట్ లో పేర్కొన్నారు. దేశ ప్రయోజనాల కోసం పోరాటానికి, త్యాగానికి చిహ్నమైన ఈ ఉక్కు మనిషి విగ్రహం దేశంలో ప్రజాస్వామ్య విలువల స్థాపనలో ఆయన అచంచలమైన అంకితభావానికి నిదర్శనంగా అందరికీ స్ఫూర్తినిస్తూనే ఉంటుందని ఆయన పేర్కొన్నారు. 

ప్రధానమంత్రి శ్రీ నరేంద్ర మోదీ డిజిటల్ ఇండియా దార్శనికతకు అనుగుణంగా ప్రారంభించిన సివిల్ రిజిస్ట్రేషన్ సిస్టం (సిఆర్ఎస్ ) మొబైల్ అప్లికేషన్ సాంకేతిక పరిజ్ఞానాన్ని పరిపాలనతో అనుసంధానం చేసే ఒక ముఖ్యమైన ఆవిష్కరణ అని శ్రీ అమిత్ షా ‘ఎక్స్’ వేదికగా చేసిన మరో పోస్టులో పేర్కొన్నారు. ఈ అప్లికేషన్ ద్వారా పౌరులు ఎప్పుడైనా, ఏ ప్రాంతం నుంచైనా, స్థానిక భాషలో జనన, మరణాల వివరాలను ఎలాంటి ఇబ్బందీ, అంతరాయం లేకుండా నమోదు చేసుకోవచ్చని, ఇది రిజిస్ట్రేషన్ కు పట్టే సమయాన్ని గణనీయంగా తగ్గిస్తుందని శ్రీ అమిత్ షా పేర్కొన్నారు.