صدر جمہوریہ ہند محترمہ دروپدی مرمو نے آج (26 اکتوبر 2024 کو) انڈین انسٹی ٹیوٹ آف ٹکنالوجی (آئی آئی ٹی) بھیلائی کے جلسہ تقسیم اسناد میں شرکت کی۔

اس موقع پر خطاب کرتے ہوئے صدر جمہوریہ نے کہا کہ آئی آئی ٹی گریجویٹس نے اپنی نئی سوچ، تجرباتی ذہنیت، اختراعی نقطہ نظر اور دور اندیشی کے ساتھ ملک اور دنیا کی ترقی میں بیش قیمتی تعاون دیا ہے۔ متعدد عالمی کمپنیوں کی قیادت کرتے ہوئے، وہ اپنی تکنیکی اور تجزیاتی مہارتوں سے 21ویں صدی کی دنیا کو کئی طریقوں سے نئی شکل دے رہے ہیں۔ آئی آئی ٹی کے متعدد سابق طلباء نے صنعت کاری کا راستہ منتخب کیا ہے اور نئی ملازمتیں پیدا کی ہیں۔ انہوں نے ہندوستان کی ڈیجیٹل تبدیلی اور اسٹارٹ اپ کلچر کو فروغ دیا ہے۔

صدر جمہوریہ نے کہا کہ صنعت کے شعبے میں کہا جاتا ہے کہ ’’خطرہ مول لیے بغیر، کوئی فائدہ نہیں‘‘۔ بہ الفاظ دیگر، کاروبار میں کامیابی خطرے سے بچنے کے رویے سے حاصل نہیں کی جا سکتی۔ انہوں نے اس اعتماد کا اظہار کیا کہ فارغ التحصیل طلباء خطرات  کا سامنا کرنے کی اپنی بھوک کے ساتھ آگے بڑھتے رہیں گے، نئی تکنالوجیاں وضع کریں گے، اور دنیا کو ایک بہتر مقام بنانے کے لیے کام کریں گے۔

صدر جمہوریہ نے کہا کہ چھتیس گڑھ قبائلی ثقافت اور روایات سے مالا مال ہے۔ قبائلی معاشرے کے لوگ فطرت کو قریب سے سمجھتے ہیں اور صدیوں سے ماحول کے ساتھ ہم آہنگی قائم کر کے زندگی بسر کر رہے ہیں۔ وہ فطری طرز حیات کے توسط سے جمع ہونے والے علم کا ذخیرہ ہیں۔ ان کو سمجھ کر اور ان کے طرز حیات سے سیکھ کر، ہم ہندوستان کی پائیدار ترقی میں اہم تعاون دے سکتے ہیں۔ لیکن ملک کی ہمہ گیر ترقی ہمارے قبائلی بھائیوں اور بہنوں کی فعال شمولیت سے ہی ممکن ہے۔ انہوں نے قبائلی سماج کی ترقی کے لیے تکنیکی میدان میں خصوصی کوششیں کرنے کے لیے آئی آئی ٹی بھیلائی کی تعریف کی۔

صدر جمہوریہ ہند کو یہ جان کر خوشی ہوئی کہ آئی آئی ٹی بھیلائی زرعی تکنالوجی، صحتی تکنالوجی اور مالی تکنالوجی پر توجہ دے رہا ہے۔ اس ادارے نے حفظانِ صحت کے شعبے میں ایمس رائے پور کے ساتھ مل کر موبائل ایپس بنائے ہیں جو دیہی افراد کو گھر پر طبی مدد حاصل کرنے میں تعاون فراہم کرتے ہیں۔ انسٹی ٹیوٹ نے اندرا گاندھی زرعی یونیورسٹی، رائے پور کے ساتھ بھی تعاون کیا ہے تاکہ کسانوں کے لیے ایسے تکنیکی حل تیار کیے جائیں جو ان کی رہنمائی اور اپنے وسائل کو صحیح طریقے سے استعمال کرنے میں مدد کریں۔ اس نے یہ بھی کہا کہ آئی آئی ٹی بھیلائی قبائلی برادریوں کی ترقی کے لیے کام کر رہی ہے جو مہوا جیسی معمولی جنگلاتی مصنوعات پر کام کر رہی ہے۔

صدر جمہوریہ ہند کو یہ جان کر خوشی ہوئی کہ آئی آئی ٹی بھیلائی ایک جامع نقطہ نظر کے ساتھ آگے بڑھ رہا ہے اور محروم اور پسماندہ طبقات کے نوجوانوں کو معیاری تعلیم فراہم کر رہا ہے۔ ادارے نے طالبات کی تعداد اور شرکت میں اضافے کے لیے بھی اقدامات کیے ہیں۔ انہوں نے اس اعتماد کا اظہار کیا کہ آئی آئی ٹی بھیلائی، نئے خوابوں، نئی سوچ اور جدید ترین تکنالوجیوں کے ساتھ ملک کی عظمت میں چارچاند لگائے گا۔

صدر جمہوریہ ہند کی تقریر ملاحظہ کرنے کےلیے براہِ کرم یہاں کلک کریں-

**********

 (ش ح –ا ب ن)

U.No: 1778