কেন্দ্ৰীয় গৃহ পৰিক্ৰমা তথা সমবায় দপ্তৰৰ মন্ত্ৰী শ্ৰী অমিত শ্বাহে আজি গুজৰাটৰ গান্ধীনগৰত ‘চতুৰ্দশ সৰ্বভাৰতীয় গৃহৰক্ষী আৰু অসামৰিক প্ৰতিৰক্ষা সন্মিলন’ত ভাষণ দিয়ে। এই অনুষ্ঠানত গুজৰাটৰ মুখ্যমন্ত্ৰী শ্ৰী ভূপেন্দ্ৰ পেটেল আৰু কেন্দ্ৰীয় গৃহ সচিব শ্ৰী গোবিন্দ মোহনকে ধৰি কেবাগৰাকীও বিশিষ্ট ব্যক্তি উপস্থিত আছিল।

অনুষ্ঠান প্ৰদান কৰা ভাষণত শ্ৰী অমিত শ্বাহে উল্লেখ কৰে যে প্ৰধানমন্ত্ৰী শ্ৰী নৰেন্দ্ৰ মোদীয়ে ২০৪৭ চনৰ ভিতৰত ভাৰতক এখন সম্পূৰ্ণ উন্নত ৰাষ্ট্ৰ হিচাপে গঢ়ি তোলাৰ সংকল্প লৈছে। তেওঁ কয় যে এই দৃষ্টিভংগী বাস্তৱায়িত কৰিবলৈ হলে আমি প্ৰতিটো খণ্ডত উন্নয়নৰ লগতে আমাৰ মূল্যবোধ, পৰম্পৰা, সংস্কৃতি আৰু ভাষাসমূহ সংৰক্ষণ কৰি এখন সম্পূৰ্ণ উন্নত ৰাষ্ট্ৰ হ'ব লাগিব। শ্ৰী শ্বাহে এই প্ৰতিশ্ৰুতি পূৰণৰ ক্ষেত্ৰত সেৱা আৰু নিৰাপত্তা দুটা অতিকে গুৰুত্বপূৰ্ণ বিষয় বুলি অভিহিত কৰে। তেওঁ উল্লেখ কৰে যে সুৰক্ষাই আমাৰ সেৱাৰ মূল মূল্যবোধৰ লগতে প্ৰতিগৰাকী ব্যক্তি, সম্পত্তি, ভৱিষ্যত, অধিকাৰক সামৰি লয়। তেওঁ উল্লেখ কৰে যে অসামৰিক প্ৰতিৰক্ষা আৰু গৃহৰক্ষীসকল হৈছে নিৰাপত্তা আৰু সেৱাৰ সৈতে সম্পৰ্কিত প্ৰতিষ্ঠান, যি সমাজৰ এটা অংশক সমাজৰ সুৰক্ষা আৰু সেৱাৰ সৈতে সংযোগ কৰিবলৈ কাম কৰি আছে। তেওঁ লগতে কয় যে প্ৰধানমন্ত্ৰী শ্ৰী নৰেন্দ্ৰ মোদীয়ে কল্পনা কৰা অনুসৰি এখন ‘উন্নত ভাৰত’ গঢ়ি তোলাৰ প্ৰতিশ্ৰুতি ‘গৃহৰক্ষী আৰু অসামৰিক প্ৰতিৰক্ষা’ৰ দ্বাৰা প্ৰদান কৰা সেৱা আৰু নিৰাপত্তাৰ মাত্ৰাৰ জৰিয়তে প্ৰাপ্ত কৰিব পাৰি।

কেন্দ্ৰীয় গৃহমন্ত্ৰীগৰাকীয়ে উল্লেখ কৰে যে এই দুদিনীয়া সন্মিলনখনত ‘গৃহৰক্ষী আৰু অসামৰিক প্ৰতিৰক্ষা বাহিনী’ৰ শক্তিশালীকৰণ, সামৰ্থ্য বৰ্দ্ধন আৰু পাঁচটা অধিৱেশনত দুৰ্যোগ ব্যৱস্থাপনাত তেওঁলোকৰ ভূমিকা সন্দৰ্ভত বিভিন্ন বিষয়ত ব্যাপক আলোচনা কৰা হ'ব। তেওঁ উল্লেখ কৰে যে এই সন্মিলনে ৰাজ্যসমূহৰ মাজত আলোচনাৰ মাধ্যম হিচাপেও কাম কৰিব, ভাল পদ্ধতিৰ আদান-প্ৰদানত সহায় কৰিব আৰু উদীয়মান প্ৰত্যাহ্বান সমাধানত তেওঁলোকৰ সামৰ্থ্য বৃদ্ধি কৰিব।

শ্ৰী অমিত শ্বাহে কয় যে প্ৰাক্তন প্ৰধানমন্ত্ৰী লাল বাহাদুৰ শাস্ত্ৰীয়ে ১৯৬২ চনৰ পৰা ‘গৃহৰক্ষী আৰু অসামৰিক প্ৰতিৰক্ষা বাহিনী’ক গুৰুত্ব দিয়াত গুৰুত্বপূৰ্ণ ভূমিকা পালন কৰিছিল। তেওঁ উল্লেখ কৰে যে ‘অসামৰিক প্ৰতিৰক্ষা সঞ্চালকালয়’ ১৯৬২ চনত স্থাপিত হৈছিল আৰু ১৯৬৮ চনত ‘অসামৰিক প্ৰতিৰক্ষা আইন’ গৃহীত হৈছিল। শ্ৰী শ্বাহে ১৯৬৫ আৰু ১৯৭১ চনৰ যুদ্ধৰ সময়ত ‘গৃহৰক্ষী আৰু অসামৰিক প্ৰতিৰক্ষা’ স্বেচ্ছাসেৱকসকলৰ অমূল্য অৱদানৰ কথা উল্লেখ কৰে। তেওঁ উল্লেখ কৰে যে ১৯৬৫ চনৰ ভাৰত-পাকিস্তান যুদ্ধৰ সময়ত গৃহৰক্ষী আৰু অসামৰিক প্ৰতিৰক্ষা সংগঠনসমূহে অত্যাৱশ্যকীয় আন্তঃগাঁথনি সুৰক্ষিত কৰা, নাগৰিকসকলক সাধাৰণ প্ৰশিক্ষণ প্ৰদান কৰা আৰু সশস্ত্ৰ বাহিনী আৰু স্থানীয় প্ৰশাসনৰ সহযোগত তেওঁলোকক সুৰক্ষিত স্থানলৈ স্থানান্তৰ কৰাত সহায় আগবঢ়োৱাত গুৰুত্বপূৰ্ণ ভূমিকা পালন কৰিছিল।

কেন্দ্ৰীয় গৃহমন্ত্ৰীগৰাকীয়ে কয় যে অহা চাৰি মাহত কেবাটাও নতুন দিশ আৰু সময়সাপেক্ষ পৰিৱৰ্তন সংযোজিত  কৰি গৃহৰক্ষী আৰু অসামৰিক প্ৰতিৰক্ষা ঘোষণাপত্ৰক প্ৰাসংগিক আৰু উপযোগী কৰি তুলিবলৈ মোদী চৰকাৰে প্ৰচেষ্টা চলাব। তেওঁ উল্লেখ কৰে যে এই পদক্ষেপৰ উদ্দেশ্য হৈছে দুয়োটা সংগঠনলৈ এক নতুন সজাগতা আৰু জীৱনীশক্তি অনা। শ্ৰী শ্বাহে ব্যাখ্যা কৰে যে বৰ্তমানৰ ঘোষণাপত্ৰখনত অন্তৰ্ভুক্ত আছে যুদ্ধৰ জৰুৰীকালীন অৱস্থাৰ বাবে লোকসকলক প্ৰস্তুত কৰা, নাগৰিকসকলক সুৰক্ষা দিয়া, যুদ্ধৰ প্ৰভাৱ পৰিহাৰ কৰিবলৈ তেওঁলোকক প্ৰশিক্ষণ দিয়া, অহিংস নাগৰিক প্ৰতিৰোধৰ মানসিকতা বৃদ্ধি কৰা, সম্প্ৰদায়সমূহক সংগঠিত কৰা, যুদ্ধত ক্ষতিগ্ৰস্ত আন্তঃগাঁথনি মেৰামতিত সহায় কৰা আৰু মনোবল বৃদ্ধি কৰা। তেওঁ উল্লেখ কৰে যে যদি কোনো সংগঠনৰ ঘোষণাপত্ৰত ৫০ বছৰ ধৰি পৰিৱৰ্তন নহয় তেন্তে সংগঠন আৰু ঘোষণাপত্ৰ দুয়োটাই অপ্ৰচলিত হৈ পৰে। তেওঁ গুৰুত্ব আৰোপ কৰে যে বিগত ৫০ বছৰত দেশত আমূল পৰিৱৰ্তন ঘটিছে আৰু প্ৰযুক্তিগত উন্নতিয়ে প্ৰয়োজনীয়তা সলনি কৰিছে, যাৰ ফলত দেশখনে যথেষ্ট উন্নতি লাভ কৰিছে।

শ্ৰী অমিত শ্বাহে কয় যে ক’ভিড-১৯ মহামাৰীৰ সময়ত গৃহৰক্ষী আৰু অসামৰিক প্ৰতিৰক্ষা বাহিনীৰ স্বেচ্ছাসেৱকসকলে পালন কৰা ভূমিকাৰ লগতে ৰাইজক সেৱা আগবঢ়োৱাৰ প্ৰতি তেওঁলোকৰ সমৰ্পণ প্ৰশংসনীয়। তেওঁ উল্লেখ কৰে যে মহামাৰীৰ সময়ত গৃহৰক্ষী বাহিনী আৰু অসামৰিক প্ৰতিৰক্ষা বিভাগৰ ২৭ গৰাকী কৰ্মীয়ে জনসাধাৰণৰ সেৱা কৰি প্ৰাণ হেৰুৱাইছিল।

কেন্দ্ৰীয় গৃহ পৰিক্ৰমা আৰু সমবায় মন্ত্ৰীগৰাকীয়ে কয় যে ‘গৃহৰক্ষী আৰু অসামৰিক প্ৰতিৰক্ষা বাহিনী’ৰ বাবে জৰুৰীকালীন সেৱাত অৱদানৰ বাবে প্ৰশিক্ষণ প্ৰণালীবদ্ধ হ'ব লাগে আৰু তাৰ বাবে ঘোষণাপত্ৰত স্থান থাকিব লাগে। তেওঁ কয় যে যান-বাহন ব্যৱস্থাপনাৰ ক্ষেত্ৰতো গৃহৰক্ষী আৰু অসামৰিক প্ৰতিৰক্ষাৰ বাবে প্ৰতিষ্ঠানগত ব্যৱস্থা কৰাৰ প্ৰয়োজন আছে। তেওঁ কয় যে একেদৰে তেওঁলোকে অন্যান্য সজাগতা কাৰ্যসূচী যেনে ‘ড্ৰাগ মুক্ত ভাৰত’, ‘স্বচ্ছ ভাৰত অভিযান’, ‘বৃক্ষ ৰোপণ অভিযান’, জল সংৰক্ষণ, সামাজিক কুফলৰ বিৰুদ্ধে সজাগতা, মহিলা সুৰক্ষা, সামূহিক স্বাস্থ্য সেৱা, যক্ষ্মা মুক্ত ভাৰত, পুষ্টিহীনতাৰ বিৰুদ্ধে যুঁজ, ‘পোষণ অভিযান’ আদিত যোগদান কৰিব লাগে। শ্ৰী শ্বাহে কয় যে চাইবাৰ নিৰাপত্তাৰ বাবে সজাগতা বিয়পোৱাত আৰু ‘ডিজিটেল প্ৰৱঞ্চনা’, ‘স্বচ্ছ ভাৰত অভিযান’, ‘প্লাষ্টিক মুক্ত ভাৰত’ আৰু পৰিৱেশ সুৰক্ষাৰ বাবে ‘বৃক্ষ ৰোপণ অভিযান’ আদিৰ ক্ষেত্ৰত গঠনমূলক ভূমিকা পালন কৰা উচিত। তেওঁ কয় যে আইন-শৃংখলাৰ ক্ষেত্ৰত সহায়ৰ বাবে এক পথ-মানচিত্ৰ প্ৰস্তুত কৰিব লাগে যাতে স্থানীয় আইন-শৃংখলা পৰিচালনা বিষয়া আৰু গৃহৰক্ষী আৰু অসামৰিক প্ৰতিৰক্ষাৰ মাজত সমন্বয় স্থাপন কৰিব পৰা যায়। তেওঁ লগতে কয় যে শিক্ষাৰ ক্ষেত্ৰত তেওঁলোকৰ ভূমিকা, যেনে ‘ড্ৰপ আউট’ৰ অনুপাত হ্ৰাস কৰা, ১০০ শতাংশ নামভৰ্তি আৰু শিক্ষাৰ মান উন্নত কৰা আদিকো নতুন ঘোষণাপত্ৰত স্থান দিয়া উচিত। তেওঁ কয় যে গৃহৰক্ষী আৰু অসামৰিক প্ৰতিৰক্ষা বাহিনীক ঘোষণাপত্ৰত অন্তৰ্ভুক্ত কৰাৰ প্ৰয়োজন আছে যাতে তেওঁলোকক নিযুক্তি আৰু আত্মনিৰ্ভৰ ভাৰতৰ বাবে বহুতো চৰকাৰী কাৰ্যসূচীৰ সৈতে সংযুক্ত কৰিব পৰা যায়।

শ্ৰী অমিত শ্বাহে কয় যে আজি দেশৰ প্ৰয়োজনীয়তাৰ কথা মনত ৰাখি এই দুয়োটা সংগঠনৰ ভূমিকাৰ বিষয়ে নতুনকৈ চিন্তা কৰাৰ প্ৰয়োজন আছে, যাতে তেওঁলোক অধিক প্ৰাসংগিক হৈ উঠে। তেওঁ কয় যে অহা ৪ মাহত এই দুয়োটা সংগঠনত নতুন জীৱন সঞ্চাৰিত কৰাৰ প্ৰয়োজন আছে। শ্ৰী শ্বাহে কয় যে প্ৰশিক্ষণ আৰু নতুন আৰু যুৱ মুখক আগুৱাই অনাতো গুৰুত্ব দিয়াৰ প্ৰয়োজন আছে। গৃহমন্ত্ৰীগৰাকীয়ে কয় যে এই পৰ্যন্ত কেৱল সেই লোকসকলহে গৃহৰক্ষী আৰু অসামৰিক প্ৰতিৰক্ষাৰ সৈতে জড়িত যিসকলে সমাজৰ বাবে আগবাঢ়ি আহিব বিচাৰে। তেওঁ কয় যে চৰকাৰে চেষ্টা কৰিব যে সমাজৰ সকলো শ্ৰেণীক ‘এনচিচি’, ‘এনএছএছ’ত প্ৰতিনিধিত্ব কৰাৰ দৰে, একেদৰে সমাজৰ প্ৰতিটো শ্ৰেণীৰ যুৱক-যুৱতীসকলকো এই সংগঠনসমূহৰ সৈতে জড়িত কৰিব পৰা যায়।

***

RK/VV/PR/PS/KB