"ভারতকী হকশেলগী পথাপ অসিনা "লৈঙাক্কী অপুনবা" অমস্নগ "খুন্নাইগী অপুনববু" কোনশিনবা খোঙথাং অমদা প্রাইমরী হেল্থকেয়র অমসুং ইসেন্সিএল সর্ভিসশিং মপাঙ্গল পীনবা হোৎনবগা লোইননা য়ুনিভর্সেল হেল্থ কভরেজ পীনবা হোৎনরি।" ৱাফম অসি কেন্দ্রগী হকশেল মন্ত্রী শ্রী জগত প্রকাশ নাদ্দানা ঙসি মফম অসিদা রিজনেল কম্মিতী ওব WHO সাউথইস্ত এসিয়া রিজনগী ৭৭শুবা তাংকক হৌদোকপগী ৱারোলদা ফোংদোকখিবনি।

রিজনেল কম্মিতীগী মীফমগী হৌদোকপগী সেসন্দা থৌ পুবশিং খনবা, "রিজোলুসন অমসুং দিসিজনশিংগী দ্রাফতিং গ্রুপ" লিংখৎপা, সেসন হৌদোক্নবা অমসুং প্রোভিজনেল এজেন্দা রিগুলেত তৌনবা "অখন্নবা প্রোসিজ্যুর"শিং লৌখৎপা য়াওরি। থৌরম অসিদা শরুক য়াখিবা মীথুংলেনশিংগী মরক্তা, দা. রাজিয়া পেন্দসে, চেফ দি কেবিনেত, WHO ময়াই লোইশঙ; শ্রী লিওনপো তান্দিন ৱাংচুক, হকশেল মন্ত্রী, ভুতান; শ্রী অবদুলা নজিম ইব্রাহিম, হকশেল মন্ত্রী, মালদিবস; শ্রী প্রদিপ পৌদেল, হকশেল অমসুং পোপুলেসন মন্ত্রী, নেপাল, দা. ইলিয়া এন্তোনিও দে অরাউজো দোস রৈস অমরাল, হকশেল মন্ত্রী, তিমোর লেস্ত; শ্রী এম এ অক্মল হোসৈন অজাদ, সেনিয়র সেক্রেতরী, হকশেল অমসুং য়াইফ য়ুম্বাল মন্ত্রালয়, বঙ্গলাদেশ; রী কুন্তা ৱিবাৱা দাস নুগ্রাহা, জেনরেল সেক্রেতরী, হকশেল মন্ত্রী, ইন্দোনেসিয়া; দা. পিজি মাহিপালা, সেক্রেতরী, হকশেল মন্ত্রী, শ্রী লঙ্কা; শ্রী চোই হুই চোল, অম্বাসেদর ওব দি দেমোক্রেতিক পিপলস রিপব্লিক ওব কোরিয়া তু দি রিপব্লিক ওব ইন্দিয়া অমসুং দা. ৱিরাৱুৎ ইমসাম্রান, দিপুতি পার্মনেন্ত সেক্রেতরী, পব্লিক হেল্থ মন্ত্রী, থাইলেন্দ য়াওখি।

শ্রী নাদ্দানা হায়খি মদুদি "মীপুম খুদিংমক্তা হকশেল পীনবগীদমক কেন্দ্র সরকারনা মালেমগী খ্বাইদগী চাউবা পব্লিক ওইনা ফন্দ তৌবা হকশেল শোইদনা পীনবগী স্কিম আয়ুশ্মান ভারত প্রধান মন্ত্রী – জন আরোগ্যা য়োজনা হৌদোকখ্রে। মসিগী থৌরাং অসিনা ইমুং মিলিয়ন ১২০ হেন্না কোনশিল্লদুনা ইমুং অমদা য়ু.এস.দি. ৬,০০০ গী চহিগী হোস্পিতালগী খুদোংচাবা পীরি।" মহাক্না ফোঙদোকখি মদুদি লৈঙাক অসিনা হন্দক্তা স্কিম অসি চহি ৭০গী মথক্তা লৈবা মীওইশিংদসু ফংহন্নবা পাকথোক চাউথোকখ্রে। "অসুম্না পাকথোক চাউথোকপনা ইমুং মিলিয়ন ৪৫ হেন্না কান্নবা পীগনি, মসিদা অহল ওইরবা মীওই মিলিয়ন ৬০ য়াওরি। মসিনা অহল ওইরবা মীওইশিংগীদমক লৈঙাক্না হকশেল পীনবা হোৎনরি হায়বদু তাক্লে," হায়না মহাক্না ফোংদোকখি।

নোন-কম্ম্যুনিকেবল দিজিজ (এন.সি.দি.)না মীয়ামগী হকশেলদা পীরিবা শিংনবশিং খঙলদুনা কেন্দ্রগী হকশেল মন্ত্রীনা হায়খি মদুদি " ভারতনা ২০১০দগী হৌদুনা নেসনেল প্রোগ্রাম ফোর প্রিভেন্সন এন্দ কন্ত্রোল ওব এন.সি.দি. চলাইদুনা হায়পর্তেন্সন, দাইএবিতিস, অমসুং কার্দিওভেস্কুলার দিজিজশিং লাকশিন্নবা হোৎনরক্লি। থৌরাং অসিনা এন.সি.দি. ক্লিনিক ৭৫৩, দে কেয়র সেন্তর ৩৬৫, অমসুং কম্ম্যুনিতী হেল্থ সেন্তর ৬২৩৮ লিংখৎতুনা ঙন্না প্রিভেন্তিব ওইবা খোঙথাং লৌখৎনবা মীতয়েং থম্লি।"

শ্রী নাদ্দানা হায়খি মদুদি ভারতনা দিজিতেল হেল্থকী লমদা মঙাল পীবা লৈবাক অমা ওইনা আয়ুশ্মান ভারত দিজিতেল মিসন, ই-সঞ্জিবানি, IHIP, SAKSHAM অসিনচিংবশিংগুম্বা দি.পি.আই.শিং অসি ভারতকী জি২০গী মনুংদা লিংখৎখিবা দিজিতেল হেল্থ WHOনা মেনেজ তৌবা নেৎৱার্ক্কী খুত্থাংদা তেক্নিকেল অমসুং ফাইনান্সিএল সপ্পোর্ত পীনবা হোৎনরি। মহাক্না মসিমসু হায়খি মদুদি "কোৱিন দিজিতেল প্লেৎফোর্মগী কোবিদ ১৯ লাইচৎকী মনুংদা মায় পাকখিবগা লোইননা ভারতনা য়ুনিভর্সেল ইম্ম্যুনাইজেসন প্রোগ্রামগীদমক ওনলাইন দিজিতেল প্লেৎফোর্ম UWIN শেমগৎনবা হোৎনরি। পোর্তেল অসিনা তিকা থাবগী থবকশিং রেজিস্তর তৌগনি, ত্রেক তৌগনি অমসুং মোনিতর তৌগনি।"

সাউথ এসিয়ন মেম্বর স্তেতশিংগী মরক্তা ত্রেদিসনেল অমসুং কমপ্লিমেন্তরী মেদিসিন্না লৌরিবা থৌদাংশিং অসিবু খঙলদুনা শ্রী নাদ্দানা মরুওইবা থমখি মদুদি হায়রিবা সিস্তেমশিং অসিবু মালেমগী থাক্তা শেমগৎনবা পান্দমদা ভারতনা WHO বু গ্লোবেল ত্রেদিসনেল মেদিসিন সেন্তর শেমগৎপদা মতেং পাংলি। মহাক্না হায়খি মদুদি "ভারতকী হায়রিবাই সিস্তেমশিং অসিবু হিদাক লাংথক্কী মহৌশাগী পথাপকা পুনশিনবগী খঙ হৈবনা মপুং ওইবা হকশেল পীবদা মতেং ওইরগনি।" "কম্ম্যুনিতী হেল্থকেয়র অমসুং ৱেলনেস সেন্তরশিং ওইরিবা ঐখোয়গী আয়ুশ্মান আরোগ্যা মন্দিরশিং অসিনা ত্রেদিসনেল অমসুং কনভেসনেল সিস্তেমগী হিদাক লাংথকশিং পীনবা হোৎনবদা অচৌবা থৌদাং লৌরি," হায়না মহাক্না ফোঙদোকখি।

কেন্দ্রগী হকশেল মন্ত্রীনা মহাক্কী ৱারোলবু ইকাইখুম্নজরিবা প্রধান মন্ত্রী শ্রী নরেন্দ্র মোদীজিগী 'সবকা সাথ, সবকা বিকাস, সবকা বিসশ্বাস, সবকা প্রয়াস' হায়বদি 'পুম্নমক্না শরুক য়াদুনা, পুম্নমক্কী ওইবা চাউখৎপা, পুম্নমক্কী থাজবা, পুম্নমক্কী থৌরাং' হায়বগী মঙলান অসিবু পন্দু লোইশিনখি। মসিনা মালেমগী শিংনবশিং থেংননবা হোৎনবদা, পুম্নমকপু কোনশিনবদা, মীওইবদা মীৎয়েং থম্বা চাউখৎপা পুরক্নবা, লৈবাক খুদিংমক্না মালেমগী য়াইফনবা লৌখৎলকপা থবকশিংবু শকখঙবীবগী পান্দমশিং য়াওরি। "ঐখোয়না থাজৈ মদুদি পুন্না হোৎনমিন্নবনা লৈবাক খুদিংমক্তা অচৌবা অহোংবা অমা পুরকপা ঙমগনি। হকশেল হায়বসিদা ঙমখৈ লৈতে, অপুনবগী থৌরাং অমা চঙই। অমগা অমগগী অখংবশিং লান্থোক্নদুনা ঐখোয়না হকশেলগী পথাপ অসিবু হেন্না মপাঙ্গল কলহনবা ঙমগনি", হায়না মহাক্না হায়খি।

থৌরম অসিদা ৱা ঙাংলদুনা সাইমা ৱাজেদ, রিজনেল দিরেক্তর, WHO SEARO না হায়খি, "১৯৪৮দা, অহানবা রিজনেল কম্মিতী ফোর সাউথ-ইস্ত এসিয়া অসিনা অহানবা ওইনা শেমখিবা মতমদা, ইনফেন্ত মোর্তালিতী রেত অসি মালেমগী ওইনা ১৪৭ দা লৈরম্মি। ঙসিদি মসি ২৫তা লৈরে। মসিদগী এন্তিবাইওতিক এজ লাকপা হৌখ্রে। ঙসিদি ঐখোয়না এন্তিমাইক্রোবাইএল রেজিস্তেন্স অমুক থেংনরে।" অমসুং মসিদগী, ঐখোয়না অরিবা অকিবশিং থেংনরবা মতুংদা অনৌবা অমুক থেংনরে। ঐখোয়গী মাংদা থেংনরিবশিং অসি ২১শুবা চহি চাগী খুৎলাইশিংগা লোইননা ঐখোয়না অপুনবা ওইনা থেংনগনি, হায়না মহাক্না ফোঙদোকখি।

শ্রীমতি পুনিয়া সলিলা শ্রীবাস্তব, কেন্দ্রগী হকশেল সেক্রেতরী; শ্রীমতি হেকালি ঝিনোমি, এদিসনেল সেক্রেতরী, হকশেল মন্ত্রী; শ্রীমতি অরাধানা পত্নাইক, এদিসনেল সেক্রেতরী, হকশেল মন্ত্রালয়; দা. রোদ্রিগো ওফ্রিন, ভারতকী WHO রিপ্রজেন্তেতিব অমসুং কেন্দ্রগী হকশেল মন্ত্রালয়গী মকোক থোংবা ওফিসরশিংনা থৌরম অদুদা শরুক য়াখি।

***************