05.10.2024 : ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ମହାରାଷ୍ଟ୍ରର ଥାନେଠାରେ ୩୨,୮୦୦ କୋଟି ଟଙ୍କାରୁ ଅଧିକ ମୂଲ୍ୟର ବିଭିନ୍ନ ପ୍ରକଳ୍ପର ଉଦଘାଟନ ଏବଂ ଶିଳାନ୍ୟାସ କରିଛନ୍ତି ।

ସଭାକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ ଯେ କେନ୍ଦ୍ର ସରକାର ମରାଠୀକୁ ଶାସ୍ତ୍ରୀୟ ଭାଷାର ମାନ୍ୟତା ପ୍ରଦାନ କରିଛନ୍ତି ଏବଂ ଏହା କେବଳ ମହାରାଷ୍ଟ୍ର ଏବଂ ମରାଠୀ ଭାଷା ପ୍ରତି ସମ୍ମାନ ନୁହେଁ ବରଂ ସେହି ପରମ୍ପରାପ୍ରତି ଏକ ସମ୍ମାନ ଯାହା ଭାରତକୁ ଜ୍ଞାନ, ଦର୍ଶନ, ଆଧ୍ୟାତ୍ମିକତା ଏବଂ ସାହିତ୍ୟର ସମୃଦ୍ଧ ସଂସ୍କୃତି ଦେଇଛି । ଶ୍ରୀ ମୋଦୀ ସମଗ୍ର ବିଶ୍ୱର ସମସ୍ତ ମରାଠୀ ଭାଷୀଙ୍କୁ ଅଭିନନ୍ଦନ ଜଣାଇଛନ୍ତି ।

ଗତ କାଲି ପ୍ରଧାନମନ୍ତ୍ରୀ ୱାଶିମ ଗସ୍ତ କରିଥିଲେ ଯେଉଁଠାରେ ସେ ଦେଶର ୯.୫ କୋଟି କୃଷକଙ୍କୁ ପିଏମ୍ କିଷାନ ସମ୍ମାନ ନିଧି ପ୍ରଦାନ କରିଥିଲେ। ଏହା ସହିତ ନବରାତ୍ରୀ ଅବସରରେ ଏକାଧିକ ପ୍ରକଳ୍ପର ଉଦଘାଟନ ଏବଂ ଶିଳାନ୍ୟାସ ବିଷୟରେ ଉଲ୍ଲେଖ କରି ଅନେକ ଉନ୍ନୟନମୂଳକ ପ୍ରକଳ୍ପର ଶୁଭାରମ୍ଭ କରିଥିଲେ । ମହାରାଷ୍ଟ୍ରର ଆଧୁନିକ ବିକାଶ ଦିଗରେ ଥାନେ ନୂତନ ମାଇଲଖୁଣ୍ଟ ହାସଲ କରିଛି ବୋଲି ସେ କହିଥିଲେ ଏବଂ ଆଜିର ଅବସର ରାଜ୍ୟର ଉଜ୍ଜ୍ୱଳ ଭବିଷ୍ୟତର ଝଲକ ପ୍ରଦାନ କରୁଛି ବୋଲି ଆଲୋକପାତ କରିଥିଲେ। ଶ୍ରୀ ମୋଦୀ ସୂଚନା ଦେଇଛନ୍ତି ଯେ ୩୦,୦୦୦ କୋଟି ଟଙ୍କାରୁ ଅଧିକ ମୂଲ୍ୟର ମୁମ୍ବାଇ ଏମଏମଆର ପ୍ରକଳ୍ପ ଆଜି ଆରମ୍ଭ ହୋଇଛି ଏବଂ ୧୨,୦୦୦ କୋଟି ଟଙ୍କାରୁ ଅଧିକ ମୂଲ୍ୟର ଥାନେ ଇଣ୍ଟିଗ୍ରାଲ ରିଙ୍ଗ ମେଟ୍ରୋ ରେଳ ପ୍ରକଳ୍ପର ଶିଳାନ୍ୟାସ ଆଜି କରାଯାଇଛି । ଆଜିର ବିକାଶ ମୂଳକ ପ୍ରକଳ୍ପ ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ ଏହା ମୁମ୍ବାଇ ଏବଂ ଥାନେକୁ ଏକ ଆଧୁନିକ ପରିଚୟ ପ୍ରଦାନ କରିବ ।

ପ୍ରଧାନମନ୍ତ୍ରୀ ଘୋଷଣା କରିଥିଲେ ଯେ ମୁମ୍ବାଇର ଆରେରୁ ବିକେସି ପର୍ଯ୍ୟନ୍ତ ଆକ୍ୱା ଲାଇନ୍ ମେଟ୍ରୋ ମଧ୍ୟ ଆଜିଠାରୁ ଆରମ୍ଭ ହେଉଛି । ସେ ଆହୁରି ମଧ୍ୟ କହିଛନ୍ତି ଯେ ମୁମ୍ବାଇର ଲୋକମାନେ ଦୀର୍ଘ ଦିନ ଧରି ଏହି ମେଟ୍ରୋ ଲାଇନକୁ ଅପେକ୍ଷା କରୁଥିଲେ। ଆକ୍ୱା ମେଟ୍ରୋ ଲାଇନକୁ ସମର୍ଥନ କରିଥିବାରୁ ଜାପାନ ସରକାର ଏବଂ ବିଶେଷ କରି ଜାପାନ ଇଣ୍ଟରନ୍ୟାସନାଲ କର୍ପୋରେସନ ଏଜେନ୍ସି (ଜାଇକା)କୁ ଶ୍ରୀ ମୋଦୀ ଧନ୍ୟବାଦ ଜଣାଇଥିଲେ । ତେଣୁ ଏହି ମେଟ୍ରୋ ଲାଇନ ମଧ୍ୟ ଭାରତ-ଜାପାନ ବନ୍ଧୁତାର ପ୍ରତୀକ ବୋଲି ସେ କହିଛନ୍ତି।

ଶ୍ରୀ ମୋଦୀ କହିଥିଲେ ଯେ ଶ୍ରୀ ବାଲା ସାହେବ ଠାକରେଙ୍କ ଥାନେ ପ୍ରତି ବିଶେଷ ସ୍ନେହ ଥିଲା । ସେ ଆହୁରି ମଧ୍ୟ କହିଛନ୍ତି ଯେ ଥାନେ ସ୍ୱର୍ଗତ ଶ୍ରୀ ଆନନ୍ଦ ଦିଘେଙ୍କ ସହର ମଧ୍ୟ ଥିଲା । "ଥାନେ ଭାରତର ପ୍ରଥମ ମହିଳା ଡାକ୍ତର, ଡାକ୍ତର ଆନନ୍ଦୀ ଭାଇ ଯୋଶୀଙ୍କୁ ଦେଇଥିଲା", ବୋଲି ଶ୍ରୀ ମୋଦୀ କହିଥିଲେ। ସେ ଆହୁରି ମଧ୍ୟ କହିଛନ୍ତି ଯେ ଉନ୍ନୟନମୂଳକ କାର୍ଯ୍ୟ ଦ୍ୱାରା ଆଜି ଆମେ ଏହି ସମସ୍ତ ଦୂରଦର୍ଶୀଙ୍କ ସ୍ୱପ୍ନ ପୂରଣ କରୁଛୁ । ଆଜି ଠାରୁ ଆରମ୍ଭ ହୋଇଥିବା ଉନ୍ନୟନମୂଳକ କାର୍ଯ୍ୟ ପାଇଁ ପ୍ରଧାନମନ୍ତ୍ରୀ ଥାନେ, ମୁମ୍ବାଇ ଏବଂ ମହାରାଷ୍ଟ୍ରବାସୀଙ୍କୁ ଅଭିନନ୍ଦନ ଜଣାଇଥିଲେ ।

"ବିକଶିତ ଭାରତ ଆଜି ପ୍ରତ୍ୟେକ ଭାରତୀୟଙ୍କ ଲକ୍ଷ୍ୟ", ବୋଲି ଶ୍ରୀ ମୋଦୀ କହିଥିଲେ । ସେ କହିଥିଲେ ଯେ ଆମ ସରକାରଙ୍କ ପ୍ରତ୍ୟେକ ନିଷ୍ପତ୍ତି, ସଂକଳ୍ପ ଏବଂ ସ୍ୱପ୍ନ ବିକଶିତ ଭାରତ ପାଇଁ ସମର୍ପିତ । ପ୍ରଧାନମନ୍ତ୍ରୀ କହିଥିଲେ ଯେ ବିକଶିତ ଭାରତର ଲକ୍ଷ୍ୟ ହାସଲ କରିବାକୁ ହେଲେ ମୁମ୍ବାଇ, ଥାନେ ଆଦି ସହରକୁ ଭବିଷ୍ୟତ ପାଇଁ ପ୍ରସ୍ତୁତ କରିବା ଜରୁରୀ । ସେ ଆହୁରି ମଧ୍ୟ କହିଥିଲେ ଯେ ସରକାରଙ୍କୁ ଏହାର ପ୍ରୟାସକୁ ଦ୍ୱିଗୁଣିତ କରିବାକୁ ପଡିବ କାରଣ ତାଙ୍କୁ ବିକାଶକୁ ତ୍ବରାନ୍ବିତ କରିବା ସହିତ ପୂର୍ବ ସରକାରମାନଙ୍କର କ୍ଷତିଗୁଡିକର ପରିଚାଳନା କରିବାକୁ ପଡିବ । ପୂର୍ବ ସରକାରମାନଙ୍କ ବିଷୟରେ ସେ କହିଛନ୍ତି ଯେ ମୁମ୍ବାଇରେ ବଢୁଥିବା ଜନସଂଖ୍ୟା ଏବଂ ଟ୍ରାଫିକ ଘନତା ବୃଦ୍ଧି ସତ୍ତ୍ୱେ ସମସ୍ୟାର ସମାଧାନ ପାଇଁ କୌଣସି ସମାଧାନ ହୋଇନାହିଁ । ସେ ଆହୁରି ମଧ୍ୟ କହିଛନ୍ତି ଯେ ବଢୁଥିବା ସମସ୍ୟା ଯୋଗୁଁ ଭାରତର ଆର୍ଥିକ ରାଜଧାନୀ ମୁମ୍ବାଇ ଅସ୍ତବ୍ୟସ୍ତ ହେବାର ଆଶଙ୍କା ରହିଛି। ବର୍ତ୍ତମାନର ସରକାର ସମସ୍ୟାର ସମାଧାନ ପାଇଁ ଚେଷ୍ଟା କରିଛନ୍ତି ଏବଂ ଆଜି ୩୦୦ କିଲୋମିଟର ର ମେଟ୍ରୋ ନେଟୱାର୍କ ବିକଶିତ ହେଉଛି ବୋଲି ଶ୍ରୀ ମୋଦୀ ଆଲୋକପାତ କରିଥିଲେ । ସେ ଆହୁରି ମଧ୍ୟ କହିଛନ୍ତି ଯେ ମେରାଇନ୍ ଡ୍ରାଇଭରୁ ବାନ୍ଦ୍ରା ଯିବାକୁ ଲାଗିଥିବା ସମୟ ଉପକୂଳ ସଡ଼କ ଯୋଗୁଁ ୧୨ ମିନିଟ୍ କୁ ହ୍ରାସ ପାଇଥିବା ବେଳେ ଅଟଳ ସେତୁ ଉତ୍ତର ଏବଂ ଦକ୍ଷିଣ ମୁମ୍ବାଇ ମଧ୍ୟରେ ଦୂରତା ହ୍ରାସ କରିଛି। ସେ ଆହୁରି ମଧ୍ୟ ଉଲ୍ଲେଖ କରିଛନ୍ତି ଯେ ମେରାଇନ୍ ଡ୍ରାଇଭ୍ ଭୂତଳ ଟନେଲ ପ୍ରକଳ୍ପର ଅରେଞ୍ଜ ଗେଟ୍ ମଧ୍ୟ ତ୍ୱରାନ୍ୱିତ ହୋଇଛି। ଭର୍ସୋଭାରୁ ବାନ୍ଦ୍ରା ସି ବ୍ରିଜ୍ ପ୍ରକଳ୍ପ, ଇଷ୍ଟର୍ଣ୍ଣ ଫ୍ରି-ୱେ, ଥାନେ-ବୋରିଭାଲି ଟନେଲ, ଥାନେ ସର୍କୁଲାର ମେଟ୍ରୋ ରେଳ ପ୍ରକଳ୍ପ ଭଳି ସହରର ବିଭିନ୍ନ ପ୍ରକଳ୍ପ ବିଷୟରେ ଉଲ୍ଲେଖ କରି ଶ୍ରୀ ମୋଦୀ ଗୁରୁତ୍ୱାରୋପ କରିଥିଲେ ଯେ ଉନ୍ନୟନମୂଳକ ପ୍ରକଳ୍ପଗୁଡ଼ିକ ମୁମ୍ବାଇର ଚେହେରା କୁ ବଦଳାଉଛନ୍ତି ଏବଂ ମୁମ୍ବାଇ ତଥା ଏହାର ଆଖପାଖ ସହରଗୁଡିକର ସମସ୍ୟାକୁ ହ୍ରାସ କରି ମୁମ୍ବାଇବାସୀ ବହୁତ ଉପକୃତ ହେବେ । ସେ ଆହୁରି ମଧ୍ୟ କହିଛନ୍ତି ଯେ ଏହି ପ୍ରକଳ୍ପଗୁଡିକ ଶିଳ୍ପର ଅଭିବୃଦ୍ଧି ସହିତ ନୂତନ ନିଯୁକ୍ତି ସୁଯୋଗ ମଧ୍ୟ ସୃଷ୍ଟି କରିବ।

ବର୍ତ୍ତମାନର ରାଜ୍ୟ ସରକାର ମହାରାଷ୍ଟ୍ରର ବିକାଶକୁ ନିଜର ଏକମାତ୍ର ଲକ୍ଷ୍ୟ ବୋଲି ବିଚାର କରୁଛନ୍ତି ବୋଲି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ । ସେ ମଧ୍ୟ ପୂର୍ବ ସରକାରମାନଙ୍କର ତ୍ରୁଟିପୂର୍ଣ୍ଣ ଆଭିମୁଖ୍ୟ ପାଇଁ ଦୁଃଖ ପ୍ରକାଶ କରିଥିଲେ, ଯାହା ଫଳରେ ମୁମ୍ବାଇ ମେଟ୍ରୋ ୨.୫ ବର୍ଷ ବିଳମ୍ବିତ ହୋଇଥିଲା ଏବଂ ୧୪,୦୦୦ କୋଟି ଟଙ୍କା ବ୍ୟୟ ବୃଦ୍ଧି ପାଇଥିଲା । ଏହି ଟଙ୍କା ମହାରାଷ୍ଟ୍ରର ପରିଶ୍ରମୀ ଟିକସଦାତାଙ୍କ ବୋଲି ପ୍ରଧାନମନ୍ତ୍ରୀ କହିଥିଲେ।

ପ୍ରଧାନମନ୍ତ୍ରୀ କହିଥିଲେ ଯେ ପୂର୍ବ ସରକାରଙ୍କ ଟ୍ରାକ୍ ରେକର୍ଡ ପ୍ରମାଣ କରୁଛି ଯେ ସେମାନେ ବିକାଶ ବିରୋଧୀ ଏବଂ ଅଟଳ ସେତୁ ବିରୋଧରେ ପ୍ରତିବାଦ, ମୁମ୍ବାଇ-ଅହମ୍ମଦାବାଦ ବୁଲେଟ୍ ଟ୍ରେନ୍ କୁ ବନ୍ଦ କରିବାକୁ ଷଡ଼ଯନ୍ତ୍ର ଏବଂ ରାଜ୍ୟର ମରୁଡ଼ି ଅଞ୍ଚଳରେ ଜଳ ସମ୍ବନ୍ଧୀୟ ପ୍ରକଳ୍ପ ଅଟକାଇବାର ଉଦାହରଣ ଦେଇଛନ୍ତି। ପ୍ରଧାନମନ୍ତ୍ରୀ ଅତୀତରୁ ଶିକ୍ଷା ଗ୍ରହଣ କରିବାକୁ ପରାମର୍ଶ ଦେବା ସହ ତୁଷ୍ଟୀକରଣ ରାଜନୀତିରେ ଲିପ୍ତ ଥିବା ଲୋକଙ୍କ ବିରୋଧରେ ସତର୍କ କରାଇଥିଲେ।

ଅଭିଭାଷଣ ଶେଷ କରି ପ୍ରଧାନମନ୍ତ୍ରୀ ଦେଶ ଓ ମହାରାଷ୍ଟ୍ର ପାଇଁ ସଚ୍ଚୋଟ ଓ ସ୍ଥିର ନୀତି ସମ୍ପନ୍ନ ସରକାରର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ । ବର୍ତ୍ତମାନର ସରକାର କେବଳ ଆଧୁନିକ ଭିତ୍ତିଭୂମି ନିର୍ମାଣ କରିନାହାନ୍ତି ବରଂ ସାମାଜିକ ଭିତ୍ତିଭୂମିକୁ ମଧ୍ୟ ସୁଦୃଢ଼ କରିଛନ୍ତି ବୋଲି ସେ ଆଲୋକପାତ କରିଥିଲେ। ରାଜପଥ, ଏକ୍ସପ୍ରେସ୍ ୱେ, ରେଳପଥ ଓ ବିମାନବନ୍ଦରର ବିକାଶ ପାଇଁ ଆମେ ରେକର୍ଡ ସୃଷ୍ଟି କରିଛୁ ଏବଂ ୨୫ କୋଟି ଲୋକଙ୍କୁ ଦାରିଦ୍ର୍ୟରୁ ବାହାର କରିଛୁ। ଆମକୁ ଏବେ ବି ଦେଶକୁ ଆହୁରି ଆଗକୁ ନେବାକୁ ପଡ଼ିବ", ମହାରାଷ୍ଟ୍ରର ପ୍ରତ୍ୟେକ ନାଗରିକ ଏହି ସଂକଳ୍ପ ରେ ଅଟଳ ଅଛନ୍ତି ବୋଲି ପ୍ରଧାନମନ୍ତ୍ରୀ ବିଶ୍ୱାସ ବ୍ୟକ୍ତ କରିଥିଲେ ।

ମହାରାଷ୍ଟ୍ର ରାଜ୍ୟପାଳ ଶ୍ରୀ ସି ପି ରାଧାକ୍ରିଷ୍ଣନ, ମହାରାଷ୍ଟ୍ର ମୁଖ୍ୟମନ୍ତ୍ରୀ ଶ୍ରୀ ଏକନାଥ ସିନ୍ଦେ, ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଶ୍ରୀ ଦେବେନ୍ଦ୍ର ଫଡନାଭିସ୍ ଏବଂ ଶ୍ରୀ ଅଜିତ ପାୱାର ଏହି ଅବସରରେ ଉପସ୍ଥିତ ରହିଥିଲେ।

ପୃଷ୍ଠଭୂମି

ଏହି ଅଞ୍ଚଳରେ ସହରୀ ଗତିଶୀଳତାକୁ ପ୍ରୋତ୍ସାହିତ କରିବା ପାଇଁ ପ୍ରଧାନମନ୍ତ୍ରୀ ପ୍ରମୁଖ ମେଟ୍ରୋ ଏବଂ ସଡ଼କ ପ୍ରକଳ୍ପଗୁଡ଼ିକର ଉଦଘାଟନ ଏବଂ ଶିଳାନ୍ୟାସ କରିଥିଲେ । ପ୍ରଧାନମନ୍ତ୍ରୀ ପ୍ରାୟ ୧୪,୧୨୦ କୋଟି ଟଙ୍କା ମୂଲ୍ୟର ମୁମ୍ବାଇ ମେଟ୍ରୋ ଲାଇନ ୩ ର ବିକେସିରୁ ଆରେ ଜେଭିଏଲଆର ସେକ୍ସନର ଉଦଘାଟନ କରିଥିଲେ। ଏହି ସେକ୍ସନରେ ୧୦ଟି ଷ୍ଟେସନ ରହିବ, ସେଥି ମଧ୍ୟରୁ ୯ଟି ଅଣ୍ଡର ଗ୍ରାଉଣ୍ଡ ରହିବ । ମୁମ୍ବାଇ ମେଟ୍ରୋ ଲାଇନ୍ - ୩ ହେଉଛି ଏକ ପ୍ରମୁଖ ସାର୍ବଜନୀନ ପରିବହନ ପ୍ରକଳ୍ପ ଯାହା ମୁମ୍ବାଇ ସହର ଏବଂ ମୁମ୍ବାଇ ସହର ମଧ୍ୟରେ ଯାତାୟତରେ ଉନ୍ନତି ଆଣିବ। ସମ୍ପୂର୍ଣ୍ଣ କାର୍ଯ୍ୟକ୍ଷମ ଲାଇନ୍ -୩ ଦୈନିକ ପ୍ରାୟ ୧୨ ଲକ୍ଷ ଯାତ୍ରୀଙ୍କୁ ସେବା ଯୋଗାଇବ ବୋଲି ଆଶା କରାଯାଉଛି।

ପ୍ରଧାନମନ୍ତ୍ରୀ ପାଖାପାଖି ୧୨,୨୦୦ କୋଟି ଟଙ୍କା ବ୍ୟୟରେ ନିର୍ମିତ ହେବାକୁ ଥିବା ଥାନେ ଇଣ୍ଟିଗ୍ରାଲ ରିଂ ମେଟ୍ରୋ ରେଳ ପ୍ରକଳ୍ପର ଶିଳାନ୍ୟାସ କରିଛନ୍ତି । ୨୦ଟି ଏଲିଭେଟେଡ୍ ଏବଂ ୨ଟି ଅଣ୍ଡରଗ୍ରାଉଣ୍ଡ ଷ୍ଟେସନ ସହିତ ଏହି ପ୍ରକଳ୍ପର ସମୁଦାୟ ଦୈର୍ଘ୍ୟ ୨୯ କିଲୋମିଟର। ମହାରାଷ୍ଟ୍ରର ଏକ ପ୍ରମୁଖ ଶିଳ୍ପ ଏବଂ ବାଣିଜ୍ୟିକ କେନ୍ଦ୍ର ଥାନେର ବଢୁଥିବା ପରିବହନ ଆବଶ୍ୟକତାକୁ ପୂରଣ କରିବା ପାଇଁ ଏହି ମହତ୍ୱାକାଂକ୍ଷୀ ଭିତ୍ତିଭୂମି ପ୍ରକଳ୍ପ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ।

ପ୍ରଧାନମନ୍ତ୍ରୀ ଛେଡା ନଗରରୁ ଥାନେର ଆନନ୍ଦ ନଗର ପର୍ଯ୍ୟନ୍ତ ପ୍ରାୟ ୩,୩୧୦ କୋଟି ଟଙ୍କା ମୂଲ୍ୟର ଏଲିଭେଟେଡ୍ ଇଷ୍ଟର୍ଣ୍ଣ ଫ୍ରିୱେ ଏକ୍ସଟେନସନର ଶିଳାନ୍ୟାସ କରିଥିଲେ । ଏହି ପ୍ରକଳ୍ପ ଦକ୍ଷିଣ ମୁମ୍ବାଇରୁ ଥାନେକୁ ନିରବଚ୍ଛିନ୍ନ ସଂଯୋଗ ପ୍ରଦାନ କରିବ ।

ଏହାବ୍ୟତୀତ ପ୍ରଧାନମନ୍ତ୍ରୀ ପାଖାପାଖି ୨,୫୫୦ କୋଟି ଟଙ୍କା ବ୍ୟୟରେ ନଭି ମୁମ୍ବାଇ ଏୟାରପୋର୍ଟ ଇନ୍‌ଫ୍ଲୁଏନ୍ସ ନୋଟିଫାଏଡ୍ ଏରିଆ (ଏନଏଆଇଏନଏ) ପ୍ରକଳ୍ପର ପ୍ରଥମ ପର୍ଯ୍ୟାୟ ପ୍ରକଳ୍ପର ଶିଳାନ୍ୟାସ କରିଛନ୍ତି । ଏହି ପ୍ରକଳ୍ପରେ ମୁଖ୍ୟ ରାସ୍ତା, ପୋଲ, ଫ୍ଲାଏଓଭର, ଅଣ୍ଡରପାସ୍ ଏବଂ ସମନ୍ୱିତ ୟୁଟିଲିଟି ଭିତ୍ତିଭୂମି ନିର୍ମାଣ ଅନ୍ତର୍ଭୁକ୍ତ ।

ପାଖାପାଖି ୭୦୦ କୋଟି ଟଙ୍କା ବ୍ୟୟରେ ନିର୍ମିତ ହେବାକୁ ଥିବା ଥାନେ ମ୍ୟୁନିସିପାଲିଟି କର୍ପୋରେସନର ଶିଳାନ୍ୟାସ କରିଛନ୍ତି ପ୍ରଧାନମନ୍ତ୍ରୀ । ଥାନେ ମ୍ୟୁନିସିପାଲିଟି କର୍ପୋରେସନର ଉଚ୍ଚସ୍ତରୀୟ ପ୍ରଶାସନିକ କୋଠା ଥାନେର ନାଗରିକମାନଙ୍କୁ ଅଧିକାଂଶ ମ୍ୟୁନିସିପାଲିଟି କାର୍ଯ୍ୟାଳୟକୁ ଗୋଟିଏ ସ୍ଥାନରେ ରଖି ସୁବିଧା ପ୍ରଦାନ କରିବ ।

BS