భారత వైమానిక దళం (ఐఏఎఫ్) 92వ వార్షికోత్సవం సందర్భంగా అక్టోబర్ 8వ తేదీన లద్దాఖ్ లోని థోయిస్ నుంచి అరుణాచల్ ప్రదేశ్ లోని తవాంగ్ వరకు 7 వేల కిలోమీటర్ల 'వాయు వీర్ విజేత' కార్ ర్యాలీని నిర్వహించనున్నారు. ఈ ర్యాలీ ప్రారంభానికి ముందుగా, అక్టోబర్ 01న న్యూఢిల్లీలోని జాతీయ యుద్ధ స్మారక ప్రాంతం వద్ద రక్షణ మంత్రి శ్రీ రాజ్‌నాథ్ సింగ్ లాంఛనంగా వీడ్కోలు పలుకుతారు. సముద్ర మట్టానికి 3,068 మీటర్ల ఎత్తులో ప్రపంచంలోనే అత్యంత ఎత్తయిన వైమానిక స్థావరం థోయిస్ నుండి అక్టోబర్ 8 వ తేదీన అధికారికంగా ర్యాలీ ప్రారంభమై, అక్టోబర్ 29న తవాంగ్ వద్ద ముగుస్తుంది.

ఈ ర్యాలీని ఉత్తరాఖండ్ యుద్ధ స్మారక అనుభవజ్ఞుల సహకారంతో భారత వాయు సేన నిర్వహిస్తోంది. ఐఏఎఫ్ ఘనచరిత్ర గురించి ప్రజల్లో అవగాహన కల్పించడం దీని లక్ష్యం. యుద్ధాల్లో, సహాయక చర్యల్లో వైమానిక యోధులు ప్రదర్శించిన ధైర్య సాహసాలను ప్రజలకు తెలియజెప్పడం కూడా ఈ ర్యాలీ ఉద్దేశంగా ఉంది. మాతృభూమికి సేవ చేసే దిశగా యువతలో స్ఫూర్తిని రగిలించేలా ర్యాలీ కొనసాగుతుంది. ఈ మెగా కార్ ర్యాలీలో మహిళలతో సహా 52 మంది వైమానిక దళ సిబ్బంది పాల్గొంటారు. మాజీ వైమానిక దళాధిపతులు కూడా వివిధ ప్రాంతాల్లో పాల్గొంటారు. మార్గమధ్యంలో ఎయిర్ వారియర్స్ (వాయు వీరులు) 16 ప్రాంతాల్లో ఆగుతూ, వివిధ కళాశాలలు, విశ్వవిద్యాలయాల్లోని విద్యార్థులను కలవనున్నారు. ఐఏఎఫ్ కు చెందిన సాహస విభాగం ఈ ర్యాలీకి నేతృత్వం వహిస్తోంది.

***