صدر جمہوریۂ ہند  محترمہ دروپدی مرمو نے آج (28 ستمبر 2024) سکندرآباد  کے راشٹرپتی نیلائم میں بھارتیہ کلا مہوتسو کے پہلے ایڈیشن کا افتتاح کیا۔ اس آٹھ روزہ میلے کا اہتمام راشٹرپتی نیلائم نے شمال مشرقی خطہ کی ترقی کی وزارت اور ثقافت کی وزارت کے اشتراک سے کیا ہے۔ اس میلے کا مقصد شمال مشرقی ریاستوں اروناچل پردیش، آسام، منی پور، میگھالیہ، میزورم، ناگالینڈ، سکم اور تریپورہ کے گراں مایہ اور متنوع ثقافتی ورثے کو آنے والوں کے سامنے پیش کرنا ہے۔

اس موقع پر خطاب کرتے ہوئے صدر جمہوریہ نے کہا کہ یہ ہماری اجتماعی ذمہ داری ہے کہ ہم اپنے ملک کے شاندار ثقافتی ورثے کا تحفظ کریں اور اسے فروغ دیں۔ شمال مشرقی ریاستوں کا ثقافتی تنوع، ان کے لوک رقص، موسیقی، آرٹ اور روایتی لباس ہمارے ملک کی میراث ہیں۔ یہ تہوار شہریوں کو خطے کی روایات اور برادریوں سے زیادہ واقف کرانے کی ایک کوشش ہے۔

صدر  جمہوریہ نے کہا کہ یہ تہوار ثقافتی تبادلے کو فروغ دینے کا بھی ایک موقع ہے۔ انہوں نے امید ظاہر کی کہ یہ مہوتسو ہمارے ملک کے شمال مشرقی اور جنوبی حصوں کے درمیان ایک پل کا کام کرے گا۔ انھوں نے اس یقین کا اظہار کیا  کہ یہ جشن شمال مشرق کے دستکاروں، فنکاروں اور برادریوں کو ان کی روایات اور صلاحیتوں کو آگے لا کر بااختیار بنانے میں مدد کرے گا۔

تلنگانہ کے گورنر اور مرکزی وزیر برائے ثقافت و سیاحت کے علاوہ شمال مشرق کی تمام آٹھ ریاستوں کے گورنر اور ریاستی وزیر برائے ڈونر افتتاحی تقریب میں موجود تھے۔

بھارتیہ کلا مہوتسو زائرین کے لیے 29 ستمبر سے 6 اکتوبر 2024 تک صبح 10:00 بجے سے شام 8:00 بجے تک کھلا رہے گا۔ وہ https://visit.rashtrapatibhavan.gov.in پر جا کر سلاٹ بک کر سکتے ہیں۔ واک-اِن وزیٹرس  کے لیے موقع پر بکنگ کی سہولت بھی دستیاب ہے۔

 صدر کی تقریر دیکھنے کے لیے یہاں کلک کریں۔

******

ش ح ۔ ک ح۔

U-598