প্রধান মন্ত্রী শ্রী নরেন্দ্র মোদীনা আর্থ সাইন্সেস মিনিস্ত্রিগী নোংজু-নুংশা অমসুং অইং-অশাগী মরমদা থিজিন্নবা শেম্লবা হায়-পর্ফোমেন্স কম্পুতিং সিস্তেম(ঐচ পি সি) শঙ্গাখ্রে।

লুপা করোর ৮৫০ গী শেনফম অমা থাদুনা পায়খৎখিবা থাজবা য়াম্না থম্লিবা প্রোজেক অসিনা ভারতনা নোংজু-নুংশা অমসুং অইং-অশাগী মরমদা য়াম্না চুম্না মাঙজৌননা লাউথোকপা ঙম্বগী শক্তি হেনগৎহল্লগনি। মরুওইবা মফম অনি-পুনেদা লৈবা ইন্দিয়ান ইন্সতিতুৎ ওফ ত্রোপিকেল মেতিওরোলোজি অমসুং অমসুং নোইদাদা লৈবা নেসনেল সেন্তর ফোর মেদিয়ম রেঞ্জ ৱেদর ফোরকাস্তিংদা সিস্তেমশিং অসি থম্লে।

ইন্দিয়ান ইন্সতিতুৎ ওফ ত্রোপিকেল মেতিওরোলোজি সিস্তেম অসি পেতা ফ্লোপস ১১.৭৭ গী কেপাসিতি অমসুং পেতাবাইতস ৩৩গী স্তোরেজ লৈরি অমসুং নেসনেল সেন্তর ফোর মেদিয়ম রেঞ্জ ৱেদর ফোরকাস্তিংগী সিস্তেম অসিনা পেতা ফ্লোপস ৮.২৮ কেপাসিতি অমসুং পেতাবাইতস ২৪ গী স্তোরেজ লৈরি। মসিগী মথক্তা, পেতা ফ্লোপস ১.৯গী আর্তিফিসিএল ইন্তিলিজেন্স অমসুং মেছিন লার্নিংগী তোখায়বা সিস্তেম অমা লৈরি।

মসিগী মপাঙ্গল হেনগৎহনবা অসিগা লোয়ননা, আর্থ সাইন্সেস মিনিস্ত্রিগী হান্নগী কেপাসিতি পেতা ফ্লোপস ৬.৮ ওইরম্বদগী হৌজিক মসিগী অপুনবা কম্পুতিং কেপাসিতি পেতা ফ্লোপস ২২ য়ৌরে।

অনৌবা সিস্তেম অসি নুমিৎকা মরী লৈনবা গ্রহশিংগী মমিং লৌদুনা থোল্লে। হৌখিবা সিস্তেমশিংগী মমিং অদিত্যা, ভাস্কারা, প্রাতয়ুস অমসুং মিহির হায়না থোনখি। পৃথিবীগী মরুওইবা মঙাল অমসুং মৈশা ফংফম ওইরিবা নুমিৎকা মখোয়গা মরী লৈনরিবা অসি মমি তাদুনা. অনৌবা ঐচ.পি.সি সিস্তেম অসিগী মমিং ‘অর্কা’ অমসুং ‘অরুনিকা’ হায়না থোল্লে।

কম্পুতিংগী মপাঙ্গল হেনগৎহনবা অসিনা অৱাংবা থাক্কী তেক্নোলোজিশিং হায়বদি আর্তিফিসিএল ইন্তিলিজেন্স অমসুং মেছিন লার্নিং শীজিন্নদুনা অফবা মখলগী মোদেলশিং  পুথোকপা ঙমহল্লগনি। মসিনা তোঙান-তোঙানবা মরী লৈনবশিংদা খুদোংচাবা কয়া শিংথাবা য়ানা ফংহল্লগনি।

ঐচ.পি.সি সিস্তেমনা পীরিবা অফবা কম্পুতিংগী থবকশিং অসিনা মিনিস্ত্রিনা মখা তানা হৌজিক লৈরিবা দেতা শীজিন্নবগী শক্তি হেনগৎহল্লগনি অমসুং মালেমগী নোংজু-নুংশাগী ফিজিক্স অমসুং দাইনামিক্সকী মোদেলশিং হেন্না মরিক চুম্না শেমগৎপা ঙমহল্লগনি। লমদম অমগী মোদেলশিং কিমি অমগী হেন্না ময়েক শেংবা শক্তম নত্ত্রগা ভারতকী খনগৎলবা মফমশিংদগী অশেংবা মমিশিং পুথোকপা ঙম্লগনি। হায়রিবা ময়েক য়াম্না শেংবা মোদেলশিং অসিনা মতম চানা মাঙজৌননা নোংলৈ-নুংশিৎ, নোং কন্নবা চুবা, অখাক-অরাও, লেন তাবা, অকনবা মৈশা, ইকং অমসুং অতোপ্পা নোংজু-নুংশাগী কা হেনবা ফিবমশিং লাউথোকপদা হেন্না খুদোংচাবা পীগনি।

অৱাংবা থাক্কী ঐচ.পি.সি সিস্তেমশিং শীজিন্নবা অসিনা, আর্থ সাইন্সেস মিনিস্ত্রিনা য়াম্না চুম্না নোংজু-নুংশাগী মরমদা মাঙজৌননা লাউথোকপা ঙমহনগনি অমসুং কা হেনবা নোংজু-নুংশাগী ফিবমশিংনা থোকহনবা খুদোংচাবশিং মায়োক্নবা ঙম্নবা থৌরাং তৌবা অমসুং থেংনবা ঙমহনগনি।

*****