పరమవీరచక్ర అవార్డు గ్రహీతల పేర్లు కలిగిన 21 అండమాన్ నికోబార్ ద్వీపాలకు సాహసయాత్ర చేపట్టిన మొట్టమొదటి ‘ఓపెన్ వాటర్ స్విమ్మింగ్’ బృందానికి రక్షణమంత్రి శ్రీ రాజ్ నాథ్ సింగ్, సెప్టెంబర్ 20న న్యూఢిల్లీలో స్వాగతం పలికారు.  ‘పరాక్రమ్ దివస్’గా జరుపుకునే నేతాజీ సుభాష్ చంద్ర బోస్ జయంతి జనవరి 23న, గత ఏడాది ప్రధానమంత్రి శ్రీ నరేంద్ర మోదీ అంత వరుకూ పేర్లు లేని అండమాన్ నికోబార్ దీవుల్లోని 21 ద్వీపాలకు పరమ వీరచక్ర అవార్డ్ గ్రహీతల పేర్లు పెట్టారు.   

నామకరణం జరిగి ఏడాది పూర్తయిన సందర్భంలో త్రివిధ దళాలకు చెందిన బృందం ‘ఎక్స్ పెడిషన్ పరమ్ వీర్’ పేరిట ఈ 21 దీవులకు సాహస యాత్ర చేపట్టింది. భారత సైన్యం, నౌకా దళం, వాయుసేన, తీర రక్షక దళాలతో కూడిన 11 మంది సభ్యుల బృందం ఈ 21 దీవులకు చేరుకుని, 21 పరమవీరుల శౌర్యం, త్యాగాలకు నివాళిగా ప్రతి దీవిలో జాతీయ జెండాను ఎగురవేసింది. బృందానికి ప్రఖ్యాత ఓపెన్ వాటర్ ఈతగాడు, టెన్ జింగ్ నార్గే  జాతీయ సాహస పురస్కార గ్రహీత, వింగ్ కమాండర్ పరమ్ వీర్ సింగ్ నేతృత్వం వహించారు.  

సముద్రంలో ఎదురైన కఠినమైన సవాళ్ళను అధిగమించి, పరమవీరుల శౌర్యగాథలను, త్యాగాలను ప్రజలకు చేరవేసినందుకు బృందానికి ధన్యవాదాలు తెలిపిన శ్రీ రాజ్ నాథ్ సింగ్... బృందం ధైర్య సాహసాలను కొనియాడారు. దేశం కోసం ఎన్నో సాహసాలు చేసి, దేశసేవలో ప్రాణాలు అర్పించిన ధీర సైనికుల గాథలు పౌరులకు, ముఖ్యంగా నేటి యువతకు తెలియచెప్పాలన్న ప్రభుత్వ ఆశయాలకి అనుగుణంగా ఈ యాత్ర జరిగిందని మంత్రి చెప్పారు. ఇటువంటి శౌర్యగాథలు తెలుసుకున్న యువత... వీర సైనికులని తమ హీరోలుగా ఆరాధిస్తారంటూ, సైనిక దళాలకు చెందిన బృంద సభ్యులంతా దేశానికి పేరు తెస్తూ యువతకు స్ఫూర్తి దాతలుగా ఉండగలరని ఆకాంక్షించారు.    

కార్యక్రమం సందర్భంగా, యాత్ర చేపట్టిన కారణాన్ని గుర్తు చేస్తూ.. సాహసయాత్రా పతాకను బృందం మంత్రికి అందజేసింది. యావత్తు యాత్రకి సాక్షిగా నిలిచిన ఈ పతాక- బృందం ఎదుర్కొన్న సవాళ్ళు, సభ్యుల మధ్య నెలకొన్న స్నేహపూర్వక వాతావరణం, కష్టసాధ్యమైన యాత్ర సంపూర్ణమైనందుకు ప్రతీకగా నిలిచింది. ఈ కార్యక్రమంలో త్రివిధ దళాల ప్రధానధికారి జనరల్ అనిల్ చౌహాన్, సైనిక దళ అధినేత జనరల్ ఉపేంద్ర ద్వివేది, అండమాన్ నికోబార్ కమాండ్ దళం అధినేత (సిన్ కాన్/కమాండర్-ఇన్-ఛీఫ్) ఎయిర్ మార్షల్ సాజు బాలకృష్ణన్, ఇతర సీనియర్ అధికారులు పాల్గొన్నారు.

ప్రపంచ నీటి దినోత్సవమైన మార్చ్ 24న ఈ సాహసయాత్ర శ్రీ విజయపురం నుండి నేతాజీ సుభాష్ చంద్ర దీవి వరకూ ఈదుకుంటూ వెళ్లాలన్న లక్ష్యంతో మొదలైంది. దీనిని లాంఛనంగా సిన్ కాన్ ప్రారంభించారు. ఐదు నెలల వ్యవధిలో, 300 కిలోమీటర్లు పైబడిన దూరాన్ని పూర్తి చేసి 21 దీవులని చేరుకున్న బృందం, 78 వ స్వాతంత్ర్య దినోత్సవం నాడు తన యాత్రను ముగించింది. యాత్ర ఆఖరిదశలో భాగంగా నేతాజీ సుభాష్ చంద్ర దీవి నుంచి శ్రీ విజయపురం వరకు జరిగిన ఈతలో,  సాయుధ దళాలు, తీరరక్షక దళాలకు చెందిన 78 మంది పాల్గొన్నారు.

సాహసయాత్రలో పాల్గొన్న మన దేశ ఈతగాళ్ళ బృందం, ‘అన్ అసిస్టెడ్ ఓపెన్ వాటర్ స్విమ్’ (ఎటువంటి సామగ్రి సహాయం లేకుండా కేవలం ఈత దుస్తులు, కళ్ళజోళ్ళు, టోపీలు మాత్రమే ఉపయోగిస్తూ చేపట్టే ఈత) అంతర్జాతీయ ప్రమాణాలు, నిబంధనలకు అనుగుణంగా తన యాత్రను పూర్తి చేసింది. సముద్రంలో ఈదుతున్న సమయంలో విపరీతమైన అలసట, శరీరంలో నీటి పరిమాణం తగ్గుదల (డీహైడ్రేషన్), తీవ్రమైన ఎండ వల్ల కలిగిన చర్మ సమస్యలు, సముద్రంలో అల్లకల్లోల పరిస్థితుల వంటి సమస్యలే కాక, ప్రమాదకర సముద్రజీవులను కూడా ఈతగాళ్ళు ఎదుర్కొన్నారు. అధిక శాతం సిబ్బంది మొట్టమొదటిసారిగా ‘ఓపెన్ వాటర్ స్విమ్’లో పాల్గొన్నప్పటికీ మొత్తం యాత్రలో ఎటువంటి ప్రమాదాల బారిన పడకుండా యాత్రను పూర్తి చేయడాన్ని  ఘన విజయంగా పేర్కొనవచ్చు.   

***