سڑک نقل و حمل اور شاہراہوں کے مرکزی وزیر جناب نتن گڈکری نے آج ’سوچھتا ہی سیوا‘ مہم 2024 کے تحت سڑک نقل و حمل اور شاہراہوں اور کارپوریٹ امور کے وزیر مملکت جناب ہرش ملہوترا اور سابق ایم او ایس جناب وی کے سنگھ کی موجودگی میں ملک گیر شجرکاری مہم کا آغاز کیا۔ ملک گیر شجرکاری مہم، وزیر اعظم جناب نریندر مودی کی طرف سے شروع کی گئی ’ایک پیڑ ماں کے نام‘ پہل اور سوچھتا ہی سیوا پہل کے تحت حکومت کی طرف سے سوچھ بھارت مشن کے ذیل میں صاف اور سرسبز ہندوستان کو فروغ دینے کی کوششوں کا ایک حصہ ہے۔ یہ مہم 2014 میں شروع کی گئی سوچھ بھارت مشن کی 10ویں سالگرہ کی مناسبت سے منعقد کی گئی۔

جناب نتن گڈکری اور جناب ہرش ملہوترا نے اترپردیش کے غازی آباد میں ایسٹرن پیریفرل ایکسپریس وے کے دوہائی انٹرچینج پر پودے لگائے۔

جناب نتن گڈکری نے اس موقع پر تمام عہدیداروں اور شرکاء کو سوچھتا حلف دلایا۔

اس موقع پر خطاب کرتے ہوئے جناب نتن گڈکری نے اس بات پر روشنی ڈالی کہ حکومت نے آلودگی سے نمٹنے کے لیے مختلف اقدامات کئے ہیں، جن میں وزیر اعظم جناب نریندر مودی کی طرف سے شروع کی گئی ’’ایک پیڑ ماں کے نام‘‘ مہم بھی شامل ہے۔ انہوں نے اس بات پر زور دیا کہ ٹیکنالوجی کا فائدہ اٹھانا اور الیکٹرک گاڑیوں کو فروغ دینا، آلودگی کو کم کرنے اور ہمارے معیار زندگی کو بہتر بنانے کے لیے اہم اقدامات ہیں۔

انہوں نے ماحول اور ماحولیات کی اہمیت پر زور دیتے ہوئے کہا کہ گاڑیوں سے فوسل فیول کا اخراج آلودگی کا ایک بڑا سبب ہے۔ یہ آلودگی ہماری صحت کو بری طرح متاثر کرتی ہے اور متوقع عمر کو کم کرتی ہے۔ اس لیے آلودگی کی سطح کو کم کرنا ہماری ذمہ داری ہے، تاکہ ہر ایک کے لیے صحت مند اور بہتر زندگی کو یقینی بنایا جا سکے۔

مرکزی وزیر نے دوہائی انٹرچینج کے ساتھ بانس اور گھنے باغات پر مشتمل دو مقامات کا بھی دورہ کیا اور ان مقامات پر پچھلے سال لگائے گئے پودوں کی 100 فیصد شرح بقا کی تعریف کی۔

جناب انوراگ جین، سکریٹری ایم او آر ٹی ایچ اور جناب سنتوش کمار یادو، این ایچ اے آئی کے چیئرمین نے بھی اس موقع پر پودا لگایا۔ اس کے علاوہ ایم او آر ٹی ایچ، این ایچ اے آئی اور این ایچ آئی ڈی سی ایل کے عہدیداروں نے پروگرام کی جگہ پر تقریباً 1000 پودے لگائے۔ ماحولیاتی استحکام کے پیغام کو پھیلاتے ہوئے وزارت کے مختلف فیلڈ دفاتر، این ایچ اے آئی اور این ایچ آئی ڈی سی ایل نے بھی اپنے اپنے مقامات پر شجر کاری مہم میں حصہ لیا۔

این ایچ اے آئی، بانس کی شجرکاری، گھنی شجرکاری اور ورٹیکل لینڈ اسکیپنگ کام شروع کر کے گرین کوریڈور بنانے پر توجہ دے رہی ہے۔ ماحولیاتی استحکام کو فروغ دینے کے لیے، این ایچ اے آئی نے رواں سال کے دوران تقریباً 46 لاکھ پودے لگائے ہیں۔ اس کے علاوہ، این ایچ اے آئی جاپانی طریقہ میاواکی پلانٹیشن کو اپنا رہا ہے اور دہلی-این سی آر میں قومی شاہراہوں کے ساتھ 53 ایکڑ اراضی پر آٹھ مقامات پر 4 لاکھ پودے لگائے ہیں۔

این ایچ اے آئی نے قومی شاہراہوں کے ساتھ ماحول دوست ’بمبو کریش بیریئرز‘ استعمال کرنے کے لیے ایک منفرد پہل کی ہے۔ مختلف قومی شاہراہوں پر تقریباً 10 کلومیٹر طویل حصے میں بمبو کریش بیریئرز کامیابی کے ساتھ نصب کیے گئے ہیں۔

اس سال سوچھتا پکھواڑا کے آغاز کے موقع پر ایک پیڑ ماں کے نام ابھیان کے تحت ملک گیر شجرکاری مہم میں 30,000 سے زیادہ لوگوں نے حصہ لیا۔

ایک پائیدار قومی شاہراہوں کا نیٹ ورک بنانے کے اپنے عزم کو برقرار رکھتے ہوئے، این ایچ اے آئی نے گرین ہائی ویز (شجرکاری، پیوند کاری، تزئین کاری اور دیکھ بھال) پالیسی 2015 کے نفاذ کے بعد سے تقریباً 4 کروڑ پودے لگائے ہیں اور تقریباً 70,000 پودے قومی شاہراہوں سے متصل لگائے ہیں۔

اس موقع پر وزارت، این ایچ اے آئی اور این ایچ آئی ڈی سی ایل کے سینئر افسران موجود تھے۔

******

ش ح۔م م ۔ م ر

U-NO.22