প্রধান মন্ত্রী শ্রী নরেন্দ্র মোদীনা ঙসি উত্তর প্রদেশকী গ্রেতর নোইদাদা লৈবা ইন্দিয়া এক্সপো মার্ত্তা সেমিকোন ইন্দিয়া 2024 হৌদোকখ্রে। শ্রী মোদীনা থৌরম অদুদা উৎখিবা একজিবিসন অদু য়েংখি। সেপ্তেম্বর 11দগী 13 ফাওবা নুমিৎ হুমনিগী কনফরেন্স অসিদা ভারত অসি সেমিকন্দক্তরশিংগী মালেমগী হব অমা ওইহন্নবা পান্দম থম্লিবা ভারতকী সেমিকন্দক্তর স্ত্রেতেজী অমসুং পোলিসী উৎকনি।

থৌরম অদুদা ৱা ঙাংলদুনা প্রধান মন্ত্রীনা সেমিগী মেম্বর পুম্নমক্তা থাগৎপা ফোংদোক্লদুনা হায়খি মদুদি মালেমগী সেমিকন্দক্তর ইন্দস্ত্রীগা মরী লৈনবা থৌরম অমা পাংথোকপা ভারত অসি মালেমগী নিপানশুবা লৈবাক ওইরি। ভারত্তা লৈনবগীদমক্তা মসি অচুম্বা তানফমনি। অদোম্না অচুম্বা মফমদা অচুম্বা তানফমদা লৈরি," হায়না পি.এম. মোদীনা অকনবা ৱাফম থমখি। "21শুবা চহিচাগী ভারত্তা, চিপশিং অসি অমুক্তা হনবা তৌদ্রি"। মহাক্না মখা তারদুনা হায়খি, ঙসিগী ভারতনা মালেমদা থাজবা পীরি মদুদি, "করিগুম্বা চিপশিং দাউন চৎলবদি, অদোম্না ভারত্তা থাজবা থম্বা য়াগনি।"

সেমিকন্দক্তর ইন্দস্ত্রী অমসুং ইনর্জীনা মাইকৈ অমদা খক্তা চৎলিবা দাইওদকী মরক্তা লৈনরিবা মরী অদু পল্লদুনা প্রধান মন্ত্রীনা হায়খি মদুদি ভারতকী সেমিকন্দক্তর ইন্দস্ত্রী অসি মাইকৈ অনিমক্তা ইনর্জী থাদোকপা অখন্নবা দাইওদশিং য়াওরি। মহাক্না হায়খি মদুদি ইন্দস্ত্রীশিংনা শেল থাদদুনা ভেল্যু শেম্বা মতমদা, অমরোমদা সরকারনা স্তেবল ওইবা পোলিসীশিং অমসুং ইজ ওফ দুইং বিজিনেস ফংহল্লি। প্রধান মন্ত্রীনা হায়খি মদুদি ভারতনা সেমিকন্দক্তর ইন্দস্ত্রীদা শীজিন্নরিবা ইন্তিগ্রেতেদ সর্কিৎকা মান্নবা ইন্তিগ্রেতেদ ইকোসিস্তেম অমা পীরি অমসুং ভারতকী দিজাইনরশিংগী য়াম্না খন্ন-নৈনরিবা তেলেন্ত অদু পনখি। দিজাইনিংগী মালেমদা ভারতনা শরুক তম্মিবা অসি চাদা 20 ওইরি অমসুং লেপ্তনা হেনগৎলক্লি হায়না পল্লদুনা প্রধান মন্ত্রী মোদীনা হায়খি মদুদি ভারতনা তেক্নিসিয়ন, ইঞ্জিনীয়র অমসুং R&D এক্সপর্ত 85,000গী সেমিকন্দক্তর ৱার্কফোর্স অমা শেমগৎলি। প্রধান মন্ত্রীনা হায়খি মদুদি “ভারতনা মহৈরোয়শিং অমসুং প্রোফেস্নেলশিংবু ইন্দস্ত্রী রেদী ওইহনবা মীৎয়েং থম্লি” হায়রদুনা ভারতকী রিসর্স ইকোসিস্তেমদা অনৌবা মাইকৈ অমসুং ইনর্জী পীনবা পান্দম থম্লিবা আনুসন্ধন নেস্নেল রিসর্স ফাউন্দেসনগী অহানবা মীফম অদু মহাক্না নিংশিংখি। মহাক্না লুপা ত্রিলিয়ন 1গী অখন্নবা রিসর্স ফন্দ অমগী মতাংদসু পনখি।

প্রধান মন্ত্রী মোদীনা হায়খি মদুদি অসিগুম্বা খোঙথাংশিং অসিনা সাইন্স সেক্তরদা সেমিকন্দক্তরশিং অমসুং ইন্নোভেসনশিংগী স্কোপ হেনগৎহনগনি অমসুং সেমিকন্দক্তর ইনফ্রাস্ত্রকচরদা সরকারনা মীৎয়েং চংলিবা অসিগী মতাংদসু পনখি। ভারত্তা দাইমেন্সনেল পাৱর অহুম লৈ মমিং ওইনা পল্লবদা হৌজিক লৈরিবা রিফোর্মসিস্ত সরকার, লৈবাক অসিগী চাউখৎলক্লিবা মেন্যুফেকচরিং বেজ অমসুং তেক্নোলোজিগী চৎনবীশিং খঙবা লৈবাক অসিগী এস্পিরেস্নেল মার্কেত অসি শন্দোক্না তাক্লদুনা প্রধান মন্ত্রীনা হায়খি মদুদি 3D পাৱরগী অসিগুম্বা বেজ অসি অতোপ্পা মফমদা ফংবদা অৱাভা ওই।

ভারতকী এস্পিরেস্নেল অমসুং তেক্নোলোজী-ওরিএন্তেদ সোসাইতীগী অখন্নবা মশক অদু পল্লদুনা, প্রধান মন্ত্রীনা হায়খি মদুদি ভারত্তা চিপশিংগী ৱাহন্থোক অসি তেক্নোলোজী খক্তদা অকক্নবা ওইদে অদুবু মসিনা প্রজা করোর কয়াগী এস্পিরেসনশিং মপুং ফাহন্নবগী মেদিয়ম অমা ওইরি। ভারত অসি অসিগুম্বা চিপশিংগী অচৌবা কঞ্জুমর অমনি হায়না পল্লদুনা, পি.এম. মোদীনা হায়খি মদুদি মালেমগী খ্বাইদগী ফবা দিজিতেল পব্লিক ইনফ্রাস্ত্রকচর অসি মসিনা য়ুম্ফম ওইদুনা শেমগৎখি। পি.এম. মোদীনা হায়খি, "মসিগী অপীকপা চিপ অসিনা ভারত্তা লাস্ত মাইলগী দেলিভরী ফংহন্নবা অচৌবা থবক কয়া পায়খৎলি।" মালেমগী খ্বাইদগী মপাঙ্গল কল্লবা বেঙ্কিং সিস্তেমশিং মথৌ পাংথোকপা ঙমহনখিদবা কোরোনাভাইরসকী অৱাবা অদু নীংশিংলদুনা শ্রী মোদীনা হায়খি মদুদি ভারত্তা বেঙ্কশিং লেপ্পা লৈতনা মথৌ তৌখি। ভারতকী UPI ওইরো, রুপে কার্দ ওইরো, দিজি লোকর ওইরো নত্রগা দিজি য়াত্রা ওইরো, দিজিতেল প্লেৎফোর্ম ময়াম অসি ভারতকী মীয়ামগী পুন্সিগী শরুক অমা ওইরে।" আত্মনির্ভর ওইনবা, প্রধান মন্ত্রীনা হায়খি মদুদি ভারতনা সেক্তর খুদিংমক্তা মেনুফেকচরিং হেনগৎহল্লি, গ্রীন ত্রাঞ্জিসন পাক-শন্না পাংথোক্লি অমসুং দেতা সেন্তরশিংগী দিমান্দসু হেনগৎলক্লি। “ভারতনা মালেমগী সেমিকন্দক্তর ইন্দস্ত্রীদা অচৌবা থৌদাং অমা লৌগদৌরি,” হায়না মহাক্না মখা তাখি।

প্রধান মন্ত্রীনা হায়খি মদুদি অরিবা হায়নবা অমা লৈরি - "মখোয়না পাম্বা মফমদা চিপশিং অদু থাদোক্কদবনি" হায়বসিনা হায়বদি করিগুম্বা অমা থোক্লবদি মদু থাদোক্কদবনি অদুবু ঙসিগী নহা ওইরিবা অমসুং আশা লৈবা ভারতনা মসিগী ৱাখল্লোন অসি ঙাক্না চৎনদ্রে। মহাক্না হায়খি মদুদি "ভারতকী অনৌবা মন্ত্র অসি ভারত্তা পুথোকপা চিপশিংগী মশিং হেনগৎহনবনি।" সেমিকন্দক্তর মেনুফেকচরিং প্রমোৎ তৌনবা সরকারনা লৌখৎলিবা খোঙথাং কয়া পল্লদুনা শ্রী মোদীনা হায়খি মদুদি সরকারনা সেমিকন্দক্তর মেনুফেকচরিং ফেসিলিতীশিং লিংখৎনবগীদমক চাদা 50গী শেন-থুমগী তেংবাং পীরি লোয়ননা রাজ্য সরকারশিংনসু খোঙথাং অসিদা মরুওইবা থৌদাং লৌরি। অসিগুম্বা পোলিসীশিং অসিনা মরম ওইদুনা, ভারতনা য়াম্না অতেনবা মতমগী মনুংদা লুপা ত্রিলিয়ন 1.5 হেনবগী ইনভেস্তমেন্ত লাকহনখ্রে অমসুং অতোপ্পা প্রোজেক্ত কয়া অমসু পাইপলাইনদা লৈরি হায়না মহাক্না হায়খি। শ্রী মোদীনা সেমিকোন ইন্দিয়া প্রোগ্রামগী মপুং ফাবা থৌরাংগী মতাংদসু পনখি, মসিনা ফ্রন্ত-এন্দ ফেবশিং, দিসপ্লে ফেবশিং, সেমিকন্দক্তর পেকেজিং অমসুং সপ্লাই চেনগী অতৈ মরুওইবা পোৎলমশিংগীদমক্তা শেলগী তেংবাং পীরি। "ঐখোয়গী মঙলানদি মালেমগী খুৎলাই খুদিংমক্তা ভারতনা পুথোকপা চিপ অমা য়াওহনবনি," হায়না মহাক্না চহি অসিদা লাল কিলাদগী ফোংদোকখিবা অদু নীংশিংখি। সেমিকন্দক্তরগী পাৱরহাউস অমা ওইনবগীদমক ভারতনা তৌবা য়াবা পুম্নমক পাংথোক্নবা মহাক্না অমুক হন্না থাজবা ফোংদোকখি।

সেমিকন্দক্তর ইন্দস্ত্রীগীদমক মথৌ তাবা মরুওইবা মিনরেলশিং ফংহন্নবা সরকারনা মীৎয়েং চংলিবা অদুগী মতাংদসু প্রধান মন্ত্রীনা পনখি। লৈবাক অসিদা পোৎথোক পুথোকপা হেনগৎহন্নবা অমসুং মপান লৈবাক্তগী পোৎলমশিং ফংহন্নবা নৌনা লাউথোকখিবা ক্রিতিকেল মিনরেল মিসনগী মতাংদসু মহাক্না পনখি। মহাক্না হায়খি মদুদি ভারতনা কস্তম দ্যুতীগী অয়াবা পীবা অমসুং মরুওইবা মিনরেলশিংগী মাইনিংগী লিলামদা খোঙজেল য়াংনা থবক তৌরি। শ্রী মোদীনা ইন্দিয়ন ইন্সতিত্যুৎ ওফ স্পেস সাইন্সতা সেমিকন্দক্তর রিসর্স সেন্তর অমা IITশিংগা খুৎশম্নদুনা ঙসিগী হাই-তেক চিপশিং পুথোকপদা নত্তনা নেক্স-জেনরেসনগী চিপশিংসু পুথোক্নবা থৌরাং তৌরি হায়নসু ফোংদোকখি। ইন্তর্নেস্নেল কোল্লাবোরেসনশিংগী মতাংদা প্রধান মন্ত্রীনা "ওইল দিপ্লোমেসী"গী মতাংদা পনখি অমসুং হায়খি মদুদি ঙসিদি মালেম অসি "সিলিকোন দিপ্লোমেসী"গী চহিচা অমদা চংশিল্লি। প্রধান মন্ত্রীনা হায়খি মদুদি ভারত অসি ইন্দো-পেসিফিক ইকনোমিক ফ্রেমৱার্ক্কী সপ্লাই চেন কাউন্সিলগী ভাইস চেয়র ওইনা খনখ্রে অমসুং QUAD সেমিকন্দক্তর সপ্লাই চেন ইনিসিএতিবকী মরুওইবা পার্তনর অমনি। মসিগী মথক্তা, জপান অমসুং সিঙ্গাপুরগুম্বা লৈবাকশিংগা লোয়ননা য়ানা ৱারোলশিং খুৎয়েক পীনখ্রে অমসুং সেমিকন্দক্তর সেক্তরদা ভারতনা য়ুনাইতেদ স্তেৎসকা লোয়ননা মরী হেন্না চেৎশিলহল্লি হায়না মহাক্না মখা তাখি।

সেমিকন্দক্তরশিংদা ভারতনা মীৎয়েং থম্লিবা অসিগী মতাংদা ৱাহং হংলিবা মীওইশিংদা প্রধান মন্ত্রীনা দিজিতেল ইন্দিয়া মিসনগী মায় পাকপগী মতাংদা নৈননবা হায়খি। দিজিতেল ইন্দিয়া মিসনগী পান্দমদি লৈবাক অসিদা ত্রান্সপরেন্ত, ইফেক্তিব অমসুং লিকেজ ফ্রী গভর্নান্স অমা পীবনি অমসুং মসিগী মল্তিপ্লাইয়র ইফেক্ত অসি ঙসিদি উবা ফংলে হায়না মহাক্না ফোংদোকখি। দিজিতেল ইন্দিয়াগী মায় পাকপগীদমক, ভারত্তা মোবাইল হেন্দসেৎশিং অমসুং দেতা হোংনা য়ৌহন্নবা মথৌ তাবা রিফোর্মশিং অমসুং ইনফ্রাস্ত্রকচরশিং পায়খৎলে হায়না প্রধান মন্ত্রীনা হায়খি। মহাক্না হায়খি মদুদি ভারত অসি চহি তরাগী মমাংদা মোবাইল ফোনশিং ইম্পোর্ত তৌবদা খ্বাইদগী চাউবা লৈবাক অমা ওইরম্মি অদুগা ঙসিদি মালেমদা মোবাইল ফোনশিং পুথোকপা অমসুং থাদোকপদা অনিশুবা খ্বাইদগী চাউবা লৈবাক ওইরে। মহাক্না ভারতকী খোঙজেল য়াংনা খুমাং চাউশিল্লক্লিবা, মরুওইনা 5G হেন্দসেৎকী কৈথেলগী মতাংদা পনখি। মহাক্না হায়খি মদুদি হৌজিক্তি ভারত অসি মালেমগী ওইনা 5G হেন্দসেৎকী অনিশুবা খ্বাইদগী চাউবা কৈথেল ওইরে, মসি 5G রোল আউৎ তৌখিবগী শুপ্নগী চহি অনিগী মনুংদা ফংবা ঙমখি।

ভারতকী ইলেক্ত্রোনিক্স সেক্তরগী মমল হৌজিক্তি দোল্লর বিল্লিয়ন 150 হেনখ্রে। প্রধান মন্ত্রীনা লৈবাক অসিগী ইলেক্ত্রোনিক্স সেক্তর অসি দোল্লর বিল্লিয়ন 500দা হেনগৎহন্নবা অমসুং চহি তরা অসিগী লোইশিল্লকপদা থবক মিলিয়ন 6 শেমগৎনবা অচৌবা পান্দম অমা থমখি। মহাক্না হায়খি মদুদি চাউখৎপা অসিনা ভারতকী সেমিকন্দক্তর সেক্তরদা হকথেংননা কান্নবা পীগনি। :ঐখোয়গী পান্দমদি ইলেক্ত্রোনিক মেনুফেকচরিংগী 100% ভারত্তা তৌহনবনি। ভারতনা সেমিকন্দক্তর চিপশিং অমসুং ফিনিশ প্রদক্ত পুথোক্কনি," হায়না মহাক্না মখা তাখি।

প্রধান মন্ত্রী মোদীনা অকনবা ৱাফম থমখি, "ভারতকী সেমিকন্দক্তর ইকোসিস্তেম অসি ভারতকী শীংনবশিং খক্তা নত্তনা মালেমগী শীংনবশিংদসু সোল্যুসন অমনি।" দিজাইনগী লমদগী লৌরকপদা, প্রধান মন্ত্রীনা "সিঙ্গল পোইন্ত ওফ ফেলিয়র"গী মেতাফোর অমা পনখি অমসুং দিজাইনগী মহৈরোয়শিংনা মরুওইনা সিস্তেম অসিনা কম্পোনেন্ত অমখক্তদা মখা পোল্লিবা অসিনা মরম ওইদুনা অশোয়বা অসিদগী লাপথোক্নবা তাকপীরি হায়না শন্দোক্না হায়খি। মহাক্না মখা তাখি মদুদি হায়রিবা প্রিন্সিপল অসি সপ্লাই চেনশিংদা চপ মান্ননা চৎনৈ। মহাক্না হায়খি, কোবিদ ওইগেরা নত্ত্রগা লান ওইগেরা, সপ্লাই চেনগী অৱাবা লৈতবা ইন্দস্ত্রী অমত্তা লৈখিদে। রেসিলিয়েন্ত সপ্লাই চেনগী মরুওইবা অদু পল্লদুনা, প্রধান মন্ত্রীনা সেক্তর পুম্নমক্তা রেসিলিয়েন্ত শেমগৎপদা ভারতনা লৌরিবা মরুওইবা থৌদাং অদুদা চাউথোকচবা ফোংদোকখি, মসিনা সপ্লাই চেনশিং ঙাকথোক্নবা মালেমগী মিসন অসিদা লৈবাক অসি মরুওইবা প্লেয়র অমা ওইহল্লি।

তেক্নোলোজী অমসুং দেমোক্রেতিক ভেল্যুশিংগী মরক্তা লৈনরিবা মরী অদুগী মতাংদা পল্লদুনা প্রধান মন্ত্রীনা হায়খি মদুদি তেক্নোলোজীগী পোজিতিব পৱার অসি দেমোক্রেতিক ভেল্যুশিংগা পুনশিন্নবা মতমদা হেন্না মপাঙ্গল কনখৎহল্লি। তেক্নোলোজীদগী দেমোক্রেতিক ভেল্যুশিং লৌথোকপদা অথুবা মতমদা অশোয়বা লাক্কনি হায়নসু মহাক্না পনখি। শ্রী মোদীনা খুদোংচাদবা মতমদসু মথৌ পাংথোকপা ঙম্বা মালেম অমা শেমগৎনবা ভারতনা মীৎয়েং চংলিবা অদু অমুক হন্না ফোংদোকখি। মহাক্না হায়খি, "মোবাইল মেন্যুফেকচরিং, ইলেক্ত্রোনিক্স, নৎত্রগা সেমিকন্দক্তর ওইগেরা, ঐখোয়গী মীৎয়েং অসি ময়েক শেংই। ঐখোয়না খুদোংচাদবা মতমদসু তোকপা নৎত্রগা লেপহনবা লৈতবা অদুবু মাংলোমদা চংশিল্লি মালেম অমা শেমগৎপা পাম্মি।" মহাক্কী ৱারোল লোইশিল্লদুনা প্রধান মন্ত্রীনা মালেমগী থবকশিংবু মপাঙ্গল কনখৎহন্নবা ভারতনা তৌবা ঙম্বদা থাজবা ফোংদোকখি অমসুং মিসন অসিদা শরুক য়ারিবা স্তেকহোল্দর পুম্নমক্তা য়াইফ-পাউজেল পীখি।

উত্তর প্রদেশকী মুখ্য মন্ত্রী শ্রী যোগী অদিত্যনাথ, ইলেক্ত্রোনিক্স অমসুং ইনফোর্মেসন তেক্নোলোজীগী কেন্দ্রগী মন্ত্রী শ্রী অশ্বিনী বৈষ্ণব, ইলেক্ত্রোনিক্স অমসুং ইনফোর্মেসন তেক্নোলোজীগী কেন্দ্রগী রাজ্য মন্ত্রী শ্রী জিতিন প্রসাদ, সেমিগী প্রসিদেন্ত অমসুং CEO শ্রী অজিৎ মনোচা, তাতা ইলেক্ত্রোনিক্সকী প্রসিদেন্ত অমসুং CEO দা রনধির থাকুর, NXP সেমিকন্দক্তর্সকী CEO, শ্রী কর্ত সিভর্স, রেনেসাসকী CEO, শ্রী হিদেতোশি শিবাতা অমসুং IMECগী CEO, শ্রী লুক ভেন দেন হোভেনা থৌরম অসিদা শরুক য়াখি।

বেকগ্রাউন্দ

সেমিকন্দক্তর দিজাইন, মেনুফেকচরিং অমসুং তেক্নোলোজী দিবেলপমেন্তকীদমক ভারতপু মালেমগী হব অমা ওইনা থম্নবা প্রধান মন্ত্রীগী মীৎয়েং ওইরি। ভিজন অসিগী মখাদা সেমিকোন ইন্দিয়া 2024 অসি সেপ্তেম্বর 11দগী 13 ফাওবা 'শেপিং দি সেমিকন্দক্তর ফ্যুচর' হায়বা থীমগা লোয়ননা পাংথোক্লগনি। নুমিৎ অহুমগী কনফরেন্স অসিদা ভারতপু সেমিকন্দক্তরশিংগী মালেমগী হব অমা ওইহন্নবা পান্দম থম্লিবা ভারতকী সেমিকন্দক্তর স্ত্রেতেজী অমসুং পোলিসী উৎকনি। মসিদা মালেমগী সেমিকন্দক্তরগী অচৌবা লুপশিংগী মকোক থোংবা লুচিংবশিংনা শরুক য়াগনি অমসুং মালেমগী লুচিংবশিং, কম্পনীশিং অমসুং সেমিকন্দক্তর ইন্দস্ত্রীগী এক্সপর্তশিং পুনশিনগনি। কনফরেন্স অসিদা একজিবিস্তর 250 অমসুং স্পিকর 150 হেন্না শরুক য়াগনি।

*****