ঙসি ভিদিও মেসেজ অমগী খুৎথাংদা প্রধান মন্ত্রী শ্রী নরেন্দ্র মোদী গ্রিন হায়দ্রোজেনগী অনিশুবা মালেমগী মীফমদা ৱা ঙাংখ্রে।

গ্রিন হায়দ্রোজেনগী অনিশুবা মালেমগী মীফম শরুক য়াখিবা শক্নাইরবশিং তরাম্না ওকপগা লোয়ননা প্রধান মন্ত্রীনা মহাক্কী ৱা ঙাংবা হৌদোকখি অমসুং হায়খি মদুদি মালেম অসি মরুওইবা অওনবা অমা চৎথরি। অইং-অশাগী খল হোংলকপা অসি তুংলমচৎ খক্তগী ৱাফম অমা নত্তে, মসিগী চৈথেং হৌজিক ফংলে। থবক পাংথোক্নবগী মতম মফম অসিনি অমসুং হৌজিক্নি। ইনর্জিগী অওনবা পুরকপা অমসুং তুংকোইনা চৎনবা য়াবা থবক পায়খৎপা হায়বসি মালেমগী থৌশিল শেম্বগী মরুওইবা ওইরে।

মৈখু চেন্দবা অমসুং অশং-অমান্না থল্লবা মালেম অমা ওইহন্নবা লৈবাক অসিনা পায়খৎলিবা থবকশিং পল্লদুনা, প্রধান মন্ত্রীনা হায়খি মদুদি গ্রিন ইনর্জিগী মতাংদা পেরসিকী ৱাশক ঙাকপা অহানবা জি-২০ লৈবাকশিংগী মনুংদা ভারত য়াওরে। মসি ২০৩০ দা পান্দম থম্বদগী চহি ৯ ঙনখৎনা হায়রিবা ৱাশকশিং অদু থবক ওইনা পাংথোক্লে। হৌখিবা চহি ১০ অসিদা লৈখিবা চাউখৎপগী মতাংদা প্রধান মন্ত্রীনা হায়খি মদুদি ভারতনা পুথোকপা ঙম্বা নন-ফোসিল ফ্যুএল অসি চাদা ৩০০ য়ৌরে অমসুং সোলার ইনর্জি পুথোকপা ঙম্বনা চাদা ৩,০০০ য়ৌরে। হায়রিবা মাইপাকপশিং অসিদা ঐখোয় পেন্থোক্তুনা লৈথোক্তে অমসুং অনৌবা হিরমশিং য়েংবগা লোয়ননা হৌজিক লৈরিবা পাম্বৈশিং মপাঙ্গল কনখৎহন্নবা লৈবাক অসিনা মীৎয়েং চঙলে।

প্রধান মন্ত্রীনা হায়খি মদুদি মালেমগী ইনর্জিগী থবকশিংদা গ্রিন হায়দ্রোজেন অসি থাজবা য়াবা নৌনা হাপচিল্লকপা অমা ওইরে। মসিনা ইলেক্ত্রিক্না পাংথোকপদা অৱাবা ওইরিবা ইন্দস্ত্রিশিং কার্বোন থাদোকপা হন্থহনবদা মতেং পাংগনি। রিফাইনরিশিং, হার অমসুং স্তিল পুথোকপা প্লান্তশিং, অরুম্বা পুবা গারিশিং অমসুং অতোপ্পা হিরমশিংদা গ্রিন হায়দ্রোজেন্না কান্নবা পীগনি। অহেনবা রিন্যুএল ইনর্জি তুংশিন্দুনা থম্নবা পাম্বৈ অমা পুথোকপদা গ্রিন হায়দ্রোজেন শীজিন্নবা য়াগনি। ২০২৩ দা নেসনেল গ্রিন হায়দ্রোজেন মিসন হৌদোকখি অমসুং ভারতকী পান্দমদি লৈবাক অসি গ্রিন হায়দ্রোজেন পুথোকপা, শীজিন্নবা অমসুং মপান লৈবাকশিংদা থাদোক্নবা মফম অমা ওইহনবনি।

প্রধান মন্ত্রীনা হায়খি মদুদি নেসনেল গ্রিন হায়দ্রোজেন মিসন্না ইন্নোবেসন, ইনফ্রাস্ত্রকচর, ইন্দস্ত্রি অমসুং ইনভেস্তমেন্তদা ইনোৎ অমা পীরে। অৱাংবা থাক্কী রিছার্স অমসুং দিবলপমেন্তদা শেন থাদরে, ইন্দস্ত্রি অমসুং মহৈলোয়শঙ পুন্না থবক তৌমিন্নরে অমসুং হিরম অসিগী স্তার্দ-অপশিং অমসুং ওন্ত্রেপ্রেনিউয়রশিং পুক্নিং থৌগৎলে। গ্রিন হায়দ্রোজেন্না থবক ফংহন্নবা খুদোংচাবশিং শেমগৎপা য়ারে অমসুং হিরম অসিদা লৈবাক অসিগী নহারোলশিংগী স্কিল হেনগৎহন্নবা সরকারনা থবক কয়া পায়খৎলে। 

অইং-অশাগী খল হোংলকপা অমসুং ইনর্জিগী অওনবা পুরকপগী মালেমগী ওইনা নুংনাঙবা লৈরিবা অসিগী মতাংদা, প্রধান মন্ত্রীনা হায়খি মদুদি অসিগুম্বা নুংনাঙবশিং অসি মালেমগী ওইনা খন্নগদবনি। কার্বোন থাদোকপা হন্থহন্নবা গ্রিন হায়দ্রোজেন শীজিন্নবা পুক্নিং থৌগৎনবা মালেমগী ওইনা পুন্না থবক তৌমিন্নবা য়াম্না মরুওই অমসুং মতেং পীনদুনা পোৎথোক পুথোকপা হেনগৎহনবা, পুথোকপদা চঙবা মমল হন্থহনবা অমসুং ইনফ্রাস্ত্রকচর শেমগৎপদা য়াংখৎহনবা ঙমগনি। মখা তানা তেক্নোলোজি চাউখৎনবা রিছার্স অমসুং ইন্নোবেসন্দা অপুনবা ওইনা শেন থাদবা দরকার ওইরে। সেপ্তেম্বর ২০২৩ দা ভারত্তা জি-২০ মীফম পাংথোকখিবা অদু নিংশিংলদুনা, প্রধান মন্ত্রীনা হায়খি মদুদি মীফম অদুদা গ্রিন হায়দ্রোজেন্দা অকনবা মীৎয়েং থমখি অমসুং হায়দ্রোজেনগী মতাংদা নিউ দিল্লি জি-২০ লিদরস দিক্লারেসন্না লৌখিবা অৱাংবা থাক্কী ৱাফম মঙা অদুনা অপুনবা লম্বী অমা শেম্বদা মতেং পাংলে। ঐখোয় খুদিংমক্না নিংশিংগদবদি, হৌজিক লৌরিবা ৱারেপশিং অসিনা ঐখোয়গী তুংগী মীরোলশিংগী পুন্সি লেপকনি।

প্রধান মন্ত্রীনা হায়খি মদুদি গ্রিন হায়দ্রোজেন সেক্তর চাউখৎনবা মালেমগী ওইনা হেন্না মতেং পীনগদবনি অমসুং হিরম অসিগী অখঙ-অহৈশিং অমসুং সাইন্তিফিক কম্মুনিতিনা লম্বী লমজিংগদবনি। অসিগুম্বা মরুওইবা হিরম অমদা লম্বী লমজিংনবা অমসুং পুন্না থবক তৌমিন্ননবা অখঙ-অহৈশিং য়াম্না মরুওই।  গ্রিন হায়দ্রোজেন ইন্দস্ত্রিনা মায়োক্নরিবা অৱাবশিং কোকহন্নবা অপুনবা থবক অমা দরকার ওইরে।

হিরম অসি মখা তানা শৌগৎনবা লৈঙাক্কী থৌশিলদা অহোংবা পুরক্নবা প্রধান মন্ত্রীনা সাইন্তিস্তশিং অমসুং ইন্নোবেতরশিং পুক্নিং থৌগৎখি। মালেমগী সাইন্তিফিক কম্মুনিতিদা মরুওইবা ৱাহং হংলদুনা, শ্রী মোদীনা হায়খি মদুদি গ্রিন হায়দ্রোজেন পুথোকপদা ঐখোয়না ইলেক্ত্রোলাইজরশিং অমসুং অতোপ্পা মচাকশিং মথৌ পাংথোকপা হেনগৎহনবা ঙমগদরা? গ্রিন হায়দ্রোজেন পুথোকপদা ঐখোয়না সমুদ্রগী ঈশিং অমসুং সহরগী অমোৎপা ঈশিং শীজিন্নবা য়াগদরা? মীয়ামগী চৎথোক-চৎশিন, জহাজ হোনবা অমসুং কংফাল মনুংগী ঈশিং লম্বীশিংদা গ্রিন হায়দ্রোজেন শীজিন্নবদা থেংনরিবা অৱাবশিং কোকহন্নবা হোৎনগদবনি। অপুনবা ওইনা অসিগুম্বা হিরমশিং মশক খঙদোকপা অসিনা মালেম শীনবা থুংনা গ্রিন ইনর্জিগী অওনবা পুরকপদা চাউনা মতেং পাংগনি। হায়রিবা ৱাফমশিং অসি  গ্রিন হায়দ্রোজেনগী অনিশুবা মালেমগী মীফমগুম্বা ফোরমশিংনা নিংথিনা খন্নগনি হায়বগী থাজবা থম্লি।

অৱাবশিং কোকহনখিবা মীওইবগী পুৱারি নিংশিংলদুনা, প্রধান মন্ত্রীনা হায়খি মদুদি, মতম খুদিং ঐখোয়না অপুনবা অমসুং অনৌবা পাম্বৈশিংগী খুৎথাংদা ঐখোয়না অৱাবশিং কোকহল্লি। অসিগুম্বা অপুনবা অমসুং অনৌবা থবক্কী ৱাখল্লোন্না তুংকোইনা চৎনবা য়াবা মালেম অমা লমজিংগদবনি। ঐখোয় অমতা ওইরবা মতমদা ঐখোয়না খুদিংমক ফংবা ঙমগনি। গ্রিন হায়দ্রোজেন চাউখৎপা অমসুং শীজিন্নবা য়াংখৎহন্নবা ঐখোয় পুন্না থবক তৌমিন্নরসি। 

ৱারোল লোইশিল্লকপদা, প্রধান মন্ত্রীনা গ্রিন হায়দ্রোজেনগী অনিশুবা মালেমগী মীফমদা শরুক য়াখিবশিংদা মহাক্কী য়াইফ-পাউজেল পীখ্রে। মহাক্না হায়খি মদুদি গ্রিন হায়দ্রোজেন চাউখৎনবা অমসুং শীজিন্নবা হেনগৎহন্নবা ঐখোয় অমা ওইনা পুন্না থবক তৌমিন্নরসি। মৈখু চেন্দবা অমসুং তুংকোইনা চৎনবা য়াবা মালেম অমা ওইহন্নবা পুন্না থবক তৌমিন্নবা দরকার ওইরে।

****