নহারোল অমসুং শান্ন-খোৎনবগী মন্ত্রালয়
ভারতকী মেদাল তেল্লী মখা চত্থরি!
শরদ কুমারনা পেরা এথলেতিক্সতা ৱাংনা কাখৎলক্লি
Posted On:
07 SEP 2024 2:04PM by PIB Imphal
ভারতকী পেরা এথলেত শরদ কুমারনা পেরিস পেরালিম্পিক্স ২০২৪গী নুপাগী হায় জম্প তি ৬৩দা লুপাগী তক্মান অমা লৌদুনা মহাক্কী তুপিদা লৈতেং অমসু হাপচিনখ্রে। মহাক্কী পার্ফোরমেন্স অসি লৈবাক অসিগী ওইনদি অচৌবা ইনোৎ অমনি, মসিনা মখা তারদুনা ভারতকী মকোক থোগবা পেরা-এথলেত অমগী থাক অদু হেন্না ৱাংখৎহনখ্রে।
![](https://static.pib.gov.in/WriteReadData/userfiles/image/1370Z.jpeg)
অঙনবা পুন্সি অমসুং হৌরকপগী ৱারী
শরদ কুমারগী পুন্সি খোংচৎ অসি খাঙবা কনবগী মশক থোকপা ৱারী অমনি। মার্চ ১, ১৯৯২দা বিহারগী মোতিপুরদা পোকখিবা শরদ চহি অনিতা ঙাইরিঙৈদা পোলিওনা নাখি। মহাক্কী অঙনবা পুন্সিগী তাঙ্কক অসি হকচাং নুংঙাইতবনা হোস্পিতালদা তোইনা চৎপা তঙাইফদবা লৈখিবা অমসুং মহাকপু ফনবগীদমক তৌবা য়াবা থবক কয়া তৌদুনা অৱাবা ফিভম অমদা লাকখি।
চহি মরি শুরকপদা, শরদ বোর্দিং স্কুল অমদা থাখি, মসিদসু অমুক অৱাবা কয়া মাইয়োক্নখি – শান্নখোৎনবদা য়াওবা ফংখিদে। অতৈ অতোপ্পশিংনা শানবা মতমদা শরদপু ফান্দতা ফমহনখি, মসিনা মহাক্কী মফমদা শাথিনা নুংঙাইতবা পোকহনখি। অসিগুম্বা নুংঙাইতবশিং অসিদগী ঙাকথোক্নবা হোৎনবনা মহাক্কী শান্নখোৎনবগী ইনোৎ পীরকখি, মরুওইনা হায় জম্পতা। স্কুলগী রেকোর্দ পায়খিবা মহাক্কী ময়াম্বনা ইথিল পীদুনা শরদনা হায় জম্পতা মীৎয়েং চঙখি অমসুং মসিদগী মমাই লৈরকখিদে।
অন্তর্জাতিগী থাক্তা ৱাংখৎলকপা
শরদ কুমারগী এথলেতিক কেরিয়র অসি মহাক্না ৬শুবা জুনিয়র নেসনেল পেরা এথলেতিক্স চেম্পিয়নশিপ ২০০৯দা শনাগী তক্মান অমা লৌখিবদুনা হৌদোকখি, মসিনা মহাক্কী অন্তর্জাতিগী থাক্তা খোঙ থাংজিল্লকপগী হৌরকফম ওইখি। অসিগুম্বা অঙনবা মতমদগী হৌদুনা মায় পাকপা অসিনা ইন্তর্নেসনেলদা ২০১০ এসিয়ন পেরা গেম্স চাইনাগী গুৱাংঝৌদা থোকখি। চহি কয়া অসিদা শরদনা মশাগী অমসুং হকচাংগী ফিভম্না চাদ্রবসু মহাক্কী স্কিলশিং হেন্না থৌহনখি। মহাক্কী মরুওইবা মায় পাকপা খরদি তোকিয়ো পেরালিম্পিক্স ২০২০দা নুপাগী হায় জম্প তি ৪২দা শেঞ্জেংগী তক্মান লৌখিবা, ৱার্ল্দ পেরা এথলেতিক্স চেম্পিয়নশিপ ২০১৯ অমসুং ২০১৭ দা লুপাগী তক্মান অমসুং এসিয়ন পেরা গেম্স ২০১৮ অমসুং ২০১৪ দা শনাগী তক্মান লৌখিবসিনি। মসিগী মথক্তা, মহাক্না মলেসিয়া ওপন পেরা এথলেতিক্স চেম্পিয়নশিপতা শনাগী তক্মান অমা লৌদুনা ভারতকী মকোক থোংবা পেরা এথলেত অমা ওইবগী থাক অদু হেন্না চেৎশিনহনখি।
![](https://static.pib.gov.in/WriteReadData/userfiles/image/3333333333333333883O.png)
লৈঙাক্কী মতেং: শরদকী মায় পাকপগী মরুওইবা অমা
শরদ কুমারগী পেরা এথলেতিক্সতা মায় পাকপা অসি ভারত সরকারনা তোঙান-তোঙানবা স্কিম কয়াগী খুত্থাংদা চাউনা মতেং তৌদুনা হেন্না পাঙ্গল লৈহনখি। শেলগী তেংবাং কয়াসু মহাকপু মপুং ফাহনবদা য়াম্না মরুওইরিবা মহাক্কী ত্রেনিং, কম্পিতিসন, অমসুং এক্সপর্ত কোচিংগীদমক পেখি। পঞ্চকুলাদা লৈবা তাউ দেবী লাল স্তেদিয়মদা মতীক চাবা ত্রেনিং ফেসিলিতী লৈবনা মহাক্না শেম হানবা হোৎনবদা হেন্না মতেং ওইখি। মসিগী মথক্তা, তার্গেত ওলিম্পিক পোদিয়ম স্কিম (তোপ্স)না শরদপু মপুং ফাবা মতেং অমসুং রিসোর্সশিং পীখি। হায়রিবা থৌরাংশিং অসিনা শরদপু অৱাংবা থাক্তা অথোই অহেন তান্নবদা শরুক য়াবা ঙমহন্দুনা মায় পাকপা পুরকপদা মতেং ওইখি।
ৱারোইশিন
শরদ কুমারগী ৱারী অসি অৱাবা কয়া মাইয়োক্নদুনা মায় পাক্লকপগী ৱারী অমনি। পোলিয়োগী খুদোংচাদবা লান্থেংনবদগী হৌদুনা তোকিয়ো অমসুং পেরিস পেরালিম্পিক্সকী পোদিয়ম ফাওবগী খোঙচৎ অসি এথলেত ওইজনিংবশিংগী মফমদদি অদুকী মতীক ইনোৎ হাপ্নিংঙাই ওই। মহাক্কী মমিংদা মিংচৎ কয়া পুরক্লদুনা শরদনা খুদোংচাদবা কয়া থেংনদুনা লৈবাক অসিগী মিংচৎ পুরক্লি।
রিফরেন্সেস
ইন্দিয়ন এথেলতসঃ পেরিস পেরালিম্পিক্স ২০২৪ পিদিএফ
https://pib.gov.in/PressReleasePage.aspx?PRID=2051582#:~:text=The%20Prime%20Minister%2C%20Shri%20Narendra,for%20his%20consistency%20and%20excellence.
পিদিএফ দাউনলোদ তৌনবা মফম অসিদা নম্বীয়ু
***
(Release ID: 2052777)
Visitor Counter : 31