হৌদোকপগী ৱারোল

ভারতকী পেরা শতলর সুহাস য়াথিরাজনা পেরিস ২০২৪ পেরালিম্পিক্সতা নুপাগী সিংগল এস.এল.৪ কাংলুপ্তা লুপাগী তক্মান অমা লৌদুনা পেরালিম্পিক্সতা মহাক্কী মশক থোকপা স্ত্রীক মখা চত্থরি। এস.এল.৪ কাংলুপ অসি খোঙ অমা নৎত্রগা অনিমক্কী খুদোংচাদবা লৈবা অমসুং চৎপা নৎত্রগা চেনবদা খল চাদবগী নুংঙাইতবা লৈঈবা এথলেতশিংগীদমক শেম্বনি।

ফ্রাঞ্চকী লুকাস মজুরগা অকনবা লম্বা পানরদুনা সুহাসনা তোকিয়ো পেরালিম্পিক্স ২০২০ দা মায় পাকখ্রবা মতুংদা মহাক্কী অনিশুবা লুপাগী তক্মান অমা থংননা লৌখিবনি। অসিগুম্বা মায় পাকপা অসিগা লোইননা, সুহাসনা তোকিয়ো অমসুং পেরিস পেরালিম্পিক্স অনিমক্তা তক্মান অমা লৌবা ঙম্বা ভারতকী অমত্তা ঙাইরবা শতলর ওইদুনা পেরা বেদমিন্তন্দা মহাক্কী মমিং ময়েক লানা হকখ্রে।

পব্লিক সর্ভিস অমসুং পেরা বেদমিন্তনগী মায় পাকপগী মরক্তা খল চানা থম্বা

হৌজিক হৌজিক নুপাগী সিঙ্গল এল.এস.৪ কাংলুপকী ওইনা মালেমগী মকোক থোংলিবা (সেপ্তেম্বর ৩, ২০২৪ ফাওবদা) সুহাস এল য়াথিরাজ তোকিয়ো ২০২০ পেরালিম্পিক্সকী লুপাগী তক্মান লৌখিবা মীশক অমনি। ২০০৭ গী বেৎচতা উত্তর প্রদেশকী কেদর অমা ওইনা আই.এ.এস. ওফিসর ফংখিবা সুহাসনা গৌতম বুদ্ধ নগরগী দিস্ত্রিক্ত মেজিস্ত্রেতকী থৌসু পুরি। পেরা-বেদমিন্তন্দা মশক থোকপা মায় পাকপা পুরকপনা মশক নাইরবা আর্জুন এৱার্দসু ফংখি।

ফেব্রুৱারী ০৭, ১৯৮৩ দা কর্নাতকাগী শিবমোগাদা পোকখিবা সুহাস য়াথিরাজনা পোক্লকপদগী মহাক্কী ওই থংবা খুনিংদা অশোইবা অমা য়াওরকখি। মহাক্কী হকচাংগী ফিভমদা নুংঙাইতবা লৈরবসু মহাক্না অচেৎপা ফিরেপ অমগা লোইননা মহাক্কী মহৈ মশিংগী ওইবা মঙলানগী মায়কৈদা চঙশিনখি। মহাক্না মহাক্কী অঙনবা মহৈগী থাক হসন জিলাগী ময়াদা লৈবা দুদাদা লোইশিনখি, অমসুং তুংদা শিবমোয়াদা লৈবা দি.ভি.এস. ইন্দিপেন্দেন্ত কোলেজদা সেকেন্দরী স্কুল্লিংগীদমক তমখি। মহৈ মশিংদা মীথোই মীহেনবা ওইরকপগা লোইননা, সুহাসনা কম্প্যুতর ইঞ্জিনীয়রিংদা নেসনেল ইন্সতিত্যুত ওব তেক্নোলোজী (এন.আই.তি.) সুরথকলদগী দিগ্রী ফংখি। মহাক্কী মহৈ মশিংদা মীথোই মীহেনবা ওইরকপা অসিমক মহাকপু ইন্দিয়ন এদমিনিস্ত্রেতিব সর্ভিস (আই.এ.এস.)তা খল্লকপা অসিগা চুননা চৎখি।

সুহাসকী পেরা-বেদমিন্তনগী খোঙচৎ অসি অতৈ এথলেতশিংগা চাংদম্নবদা মহাক্কী পুন্সিগী অথেংবা তাঙ্কক্তা চঙশিনখি, অদুবু মহাক্না শান্নখোৎনবদসু ফাওগৎলকপা অসি কা হেন্না য়াঙনা চঙশিনখি। জাতিগী থাক্তা অথোইবা ওইদুনা মহাক্না জাতিগী থাক্তা লৈবা তাইতল কয়া লৌখি, মসিনা মহাকপু ভারতকী পেরা বেদমিন্তন শান্নরোইশিংগী মরক্তা মকোক থোংবা মীশক অমা ওইখি। মহাক্কী প্রোফেসনেল কেরিয়র অমসুং বেদমিন্তনগী অপাম্বা অনিগী মরক্তা খল চানা থমদুনা সুহাসনা কত্থোকপগা লোইননা আই.এ.এস. ওফিসর অমা ওইনসু থৌ পুখি। মহাক্না পেরা-বেদমিন্তন্দা চঙলকখিবা অসি খাঙবা কনবা অমসুং অকনবা থাক্তা ত্রেনিং তৌদুনা চঙশিনখি, মসিনা মহাকপু ভারতকী অমত্তা ঙাইরবা অর্জুন এৱার্দ অমসুং পেরালিম্পিক মেদাল ফংবা ভারতকী আই.এ.এস. ওফিসর অমা ওইরি। মহাক্কী মায় পাকপা অসিনা মখা চত্থরদুনা মহাক্না এসিয়ন পেরা গেম্স ২০২২ দা হাংঝৌদা পোদিয়মগী মকোক্তা লৈখি।

তক্মান্না য়োম্লবা খোংচৎ অমগী ৱারী

সুহাস এল য়াথিরাজনা পেরা বেদমিন্তন্দা লেপ্পা লৈতনা মায় পাকপা কয়া পুরক্তুনা মহাক্কী অখন্নবা হৈশিংবা অমসুং অচেৎপা ফিরেপ ময়ামদা তাকখ্রে। মহাক্কী কেরিয়রগী ৱারী অসি ২০১৬ এসিয়ন পেরা বেদমিন্তন চেম্পিয়নশিপতা মহাক্না নুপাগী সিঙ্গলদা শনাগী তক্মান লৌদুনা হৌখি। মহাক্না ২০১৮ এসিয়ন পেরা গেম্সতা শেঞ্জেংগী তক্মান লৌখি। সুহাসকী পারফোর্মেন্স অসি তোকিয়ো ২০২০ পেরালিম্পিক্সতা মহাক্না নুপাগী সিঙ্গলস্তা লুপাগী তক্মান অমা লৌদুনা অনৌবা পন্দুপ অমা হৌখি। মহাক্কী মায় পাকপা অসি ২০২২ এসিয়ন পেরা গেম্সতা লুপাগী তক্মান অমা লৌদুনা মখা চত্থরকখি।

হন্দক্তা ইনৌ নৌনা সুহাসনা ২০২৪ ৱার্ল্দ চেম্পিয়শিপতা নুপাগী সিঙ্গলস্তা শনাগী তক্মান অমা লৌখি, অমসুং হৌজিক্না মহাক ২০২৪ পেরিস পেরালিম্পিক্সতা লুপাগী তক্মান অমা ফংলদুনা পেরা বেদমিন্তন শান্নরোইশিংগী মক্তা মকোক্তা লৈদুনা মহাক্কী মফম অসি হেন্না চেৎশিনহনখি।

মরুওইবা লৈঙাক্কী থৌরাংশিং

সুহাস এল য়াথিরজকী মায় পাকপগী লম্বীদা ভারত সরকারনা তোঙান-তোঙানবা মওংদা মতেং কয়া পাংদুনা অচৌবা থৌদাং লৌখি। মহাক্না থাইলেন্দ, য়ু.এ.ই., স্কোৎলেন, ইংলন্দ, বাহরেন, ব্রাজিল, স্পেন, জাপান, অমসুং চাইনাগুম্বা লৈবাকশিংদা ত্রেনিং অমসুং কম্পিতিসনশিং শরুক য়াদুনা ফোরেন এক্সপোজর ফংখি। মসিগী মথক্তা, মহাক্না দা. শকুন্তলা মিস্রা নেসনেল রিহেবিলিতেসন য়ুনিভর্সিতী, লখনৌদা নুমিত ৫০ নিগী ত্রেনিং কেম্প অমদা শরুক য়াদুনা মহাক্কী শেম শাবদা অচৌবা মতেং ওইখি। শেলথুমগী মতেং ওইনসু মহাক্কী ত্রেনিং অমসুং কম্পিতিসনগী চাদিংশিংগীদমক অমসুং বেদমিন্তনগী খুৎলাইশিং লৈনবগীদমক পীখি। সুহাসনা তার্গেত ওলিম্পিক পোদিয়ম স্কিম (তোপ্স)কী মখাদা আউত ওব পোকেত এলাৱেন্সসু ফংদুনা শান্নখোৎনবদা মীকোক থোংনবা তঙাইফদবা রিসোর্সশিং পীখি।

প্রধান মন্ত্রীনা য়াথিরাজবু পেরিস পেরালিম্পিক্সতা লুপাগী তক্মান লৌরকপগীদমক হরাওবা ফোংদোকখ্রে

মহাক্কী মায় পাকপবু শকখঙবীবা ওইনা প্রধান মন্ত্রী শ্রী নরেন্দ্র মোদীনা সুহাস য়াথিরাজনা হৌজিক চত্থরিবা পেরিস পেরালিম্পিক্সতা নুপাগী সিঙ্গলস এস.এল.৪ বেদমিন্তন ইভেন্ততা লুপাগী তক্মান লৌরকপদা হরাওবা ফোগ্নদোকখি। প্রধান মন্ত্রীনা ফোংদোকখি, "সুহাস য়াথিরাজনা তাঙলবা লুপাগী তক্মান অমা পেরালিম্পিক্স ২০২৪তা নুপাগী সিঙ্গলস এস.এল.৪ বেদমিন্তন ইভেন্ততা লৌরক্তুনা অচৌবা মায় পাকপা অমা পুরক্লে! ভারতনা মহাক্কী মায় পাকপবু হরাওবা ফোঙদোক্লি। মহাক্না শান্নখোৎনবদা হনবা লৈতনা অচেৎপা ফিরেপকা লোইননা হোৎনবগীদমক চাউথোকচৈ।"

লোইশিনবা

সুহাস এল. য়াথিরাজকী  আই.এ.এস. ওফিসরদগী মালেমগী মশক নাইরবা পেরা বেদমিন্তন শান্নরোই অমা ওইনা মশক থোকপা খোঙচৎ অসি্না অখন্নবা খাঙবা কনবা অমসুং মীথোই মীহেনবা হায়বদু তাক্লে। মহাক্কী খ্বাইদগী নৌবা ২০২৪ পেরিস পেরালিম্পিক্সতা লুপাগী তক্মান অমা লৌদুনা মায় পাকপা পুরকাপ অসিনা মহাক্কী হৈশিংবা অমসুং খাঙবা কনবদু উৎলে। লৈঙাক্কী তোঙান-তোঙানবা থৌরাংশিংনা মতেং পাংলদুনা অমসুং মশাগী খাঙবা কনবনা মমাই চুম্লদুনা সুহাসনা মহাক্কী কেরিয়রবু হেন্না ৱাংখৎহনবদা নত্তনা লৈবাক অসিবু চাউথোকপা পোকহ্ললে। মহাক্কী লেপ্পা লৈতবা মায় পাকপা অসিনা মালেমগী থাক্তা খল কায়দনা থম্বা ঙম্বগী মচৎ অদু উৎলে। সুহাসনা মহাক্কী মায় পাকপগা লোইননা ইথিল পীবগা লোইননা, শান্ন খোৎনবা অমসুং পব্লিক সর্ভিস অনিমক্তা অচেৎ ফিরেপ অমসুং মীথোই মীহেনবা হায়বদুগী মৈরি ওইহৌরগনি।

রিফরেন্স:

5. https://x.com/Media_SAI/status/1830658902524039368
5. https://pib.gov.in/PressReleasePage.aspx?PRID=2051101

ভারতকী এথলেতশিং: PARIS PARALYMPICS 2024 pdf

***