ভারতকী রাস্ত্রপতী, শ্রীমতী দ্রৌপদী মুর্মুনা পুনে, মহারাস্ত্রদা ঙসি (সেপ্তেম্বর ৩, ২০২৪) সিন্বাইওসিস ইন্দরনেস্নেল (দীম য়ুনিভর্সিতী)গী ২১শুবা কনভোকেসন্দা শরুক য়াখ্রে‍।

মহৈরোয়শিংগী মফমদা ৱা ঙাঙলদুনা, রাস্ত্রপতীনা ঙসি মখোয় লৈবাকসিদা অমদি মপান লৈবাকশিংদা মখোয়গী পর্সনেলিতী অমসুং লৌশিংনা অফবা অহোংবা পুরকপা ঙম্লে হায়না ফোঙদোকখি‍। মখোয়না মেনেজমেন্ত, হেল্থকেয়র, লো, সোসিএল সাইন্স, অমসুং অতৈ হীরমশিংদা ইনোভেসন, আর্তিফিসিএল ইন্তলিজেন্স, অমসুং মেচিন লর্নিংগী খুত্থাঙদা মতিং লৈবা থৌদাং য়াবা ঙমগনি‍ হায়খি‍। মহাক্না মখোয়গী মফমদা লৈবাকসিগী তোঙান তোঙানবা ফুরুপশিং অমসুং লমশিংগী কলচর অমসুং মখোয়না হৌজিক মথৌ তারিবশিং খঙজিন্নবা ৱাফম থমখি‍। হায়রিবা লৌশিং অসিদা য়ুম্ফম ওইরগা মখোয়না মীপুম খুদিংমক, মরুওইনা চাকথুং ফিথুংদ্রবশিংগী ফীভম ফগৎহন্বদা মতেঙ ওইগদবা, অমসুং সস্তেনেবিলিতীসু য়োকখৎকদবা সোফ্তৱেয়র, হেল্থকেয়র পোত্থোকশিং, অমসুং মার্কেতিং স্ত্রেতেজীশিং শেমগৎগদবনি হায়না মহাক্না হায়খি‍। স্তার্ত-অপ ইন্দিয়া, স্কিল ইন্দিয়া, মেক ইন ইন্দিয়া অমসুং দিজিতেল ইন্দিয়ানচিংবা থৌরাংশিংনা মখোয়দা মখোয়গী পান্দমশিং ফংহন্বদা মতেঙ পাংগনি হায়নসু মহাক্না ফোঙদোকখি‍।

সিম্বাইওসিস ইন্তরনেস্নেলদা তম্লিবা মহরোয় ৩৩০০০ রোমগী মনুংদা, নুপামচা অমসুং নুপীমচাগী মশিং হায়রপ মান্ননা লৈ হায়বা ৱাফম থম্লদুনা, নারী শক্তিগী খোঙজেল অসি মীয়ামগী চাউথোকচনিংঙাইগী ৱাফমখক নত্তনা মসি লৈবাকসিগী চাওখৎ খোঙজেলগী মরুওইবা পেরামিতর অমসু ওইরিবনি হায়না রাস্ত্রপতীনা হায়খি‍। সিম্বাইওসিস দীম য়ুনিভর্সিতীনা জেন্দর ইকুইতীদা প্রাইওরিতী পীবদা অমসুং নুপীমচাশিংগী মহৈ মশিং তম্বগী চুনবা এনভাইরনমেন্ত অমসুং ফেসিলিতীশিং ফংহনবদা মহাক্না নুংঙাইবা ফোঙদোকখি‍। মহাক্না মহৈ মশিংগী ইন্সতিত্যুসন পুম্নমক্তা অৱাংবা থাক্কী মহৈ মশিং তম্বদা নুপীমচা মহৈরোয়শিংবু পুক্নিং থৌগৎনবা অমসুং মখোয়গীদমক শাফবা অমসুং চৈঙাক পীগদবা এনভাইরনমেন্ত শেমগৎনবা ৱাফম থমখি‍।

রাস্ত্রপতীনা মেদিকেল সর্ভিসশিং ফগৎহন্নবা খোঙথাঙ অমা ওইরিবা ‘সিম্বাইওসিস অরোগ্য ধাম’ লিংখৎখিবগীদমক থাগৎখি‍। সিম্বাইওসিস দীম য়ুনিভর্সিতীনা কেম্পসকী অকোয়বগী খুঙ্গংশিংদা মোবাইল ফেমিলী হেল্থ ক্লিনিকশিং চলাইরি হায়বা ৱাফমদা মহাক্না হরাওবা ফোঙদোকখি‍। নহা মীরোলদা খ্বায়দগী নৌবা তেক্নোলোজীগী লৌশিংগা লোয়ননা ভেল্যু-বেজ এজুকেসন ফংহন্বনা মহৈ মশিংগী ইন্সতিত্যুসন পুম্নমক্কী পান্দম ওইগদবনি হায়না মহাক্না হায়খি‍।

রাস্ত্রপতীনা সিম্বাইওসিস য়ুনিভর্সিতীগী প্রোফেসরশিং, ফেকল্তী মেম্বরশিং, অমসুং এলুম্নাইশিংগী মফমদা এজুকেসন সিস্তেমগী লমদা থিজিন হুমজিনবগী থৌওং য়োকখৎনবা ৱাফম থমখি‍। চহি কয়া থিজিন হুমজিল্লকপনা অনৌবা ইনভেন্সনশিং পুথোরকই অমসুং শিংনবশিংগী অনৌবা পাম্বৈশিং ফংহল্লি হায়না মহাক্না হায়খি‍। ভারতকী রিছর্চ স্কোলারশিংনা লৈবাকসিগীদা নত্তনা মালেমগী ওইবা পরৈ চেনবা ৱাফমশিংগী পাম্বৈ পুথোকপা ঙমগনি‍। নেস্নেল এজুকেসন পোলিসীনা রিছর্চ পুক্নিং থৌগৎপদা মরুওইবা ৱাফম থম্লি‍। য়ুনিভর্সিতী অসিগী মল্তি-দিসিপ্লিনরী রিছর্চ সেন্তরশিংনা ৱাতর রিসোর্স মেনেজমেন্ত, স্তেম সেল, নেনোসাইন্স, অমসুং ক্লাইমেত চেঞ্জনচিংবা হীরম কয়াদা থবক তৌরি হায়বা খঙবদা মহাক্না নুংঙাইবা ফোঙদোকখি‍।

রাস্ত্রপতীনা মহৈরোয়শিংগী মফমদা থবক থুদিংদা অথোইবা তান্নবা হোৎনগদবনি হায়না পাউতাক পীখি‍। অথোইবা তাল্লু মায় পাকপনা তুংইল্লক্কনি হায়নবা মখোয়না তারম্লগনি হায়না মহাক্না হায়খি‍। অদুবু অয়াম্বা মতমদা মীওই খরদি শেল য়াম্না পায়বা, অচৌবা য়ুম, অচৌবা কার, অমসুং অতৈ পোৎলমশিং লৈবনা মায় পাকপগী খুদম্নি হায়না লৌনৈ‍। অদুবু মখোয়না মায় পাকপগী অশেংবা ৱাহন্থোক খঙবা ঙমগনি অমসুং অতৈগী পুন্সি মহিংসু ফগৎহনগদবা থবকশিং তৌরক্কনি হায়না মহাক্না থাজবা ফোঙদোকখি‍।

রাস্ত্রপতীগী ৱারোল তানবগীদমক চান্বিদুনা মসিদা নম্বিয়ু -

***