মনিপুর য়ুনিভর্সিতীনা নেস্নেল হ্যুমেন রাইতস কমিসন (NHRC)গা খুৎশম্নদুনা 2024গী ওগস্ত 30দা ‘ভারত্তা হ্যুমেন রাইতসকী মতাংদা নুমিৎ নিনিগী ওইবা ত্রেনিং প্রোগ্রাম’ অমা মাইপাক্না লোইশিনখ্রে। থৌরম অদু মনিপুর য়ুনিভর্সিতীগী কোর্ত হোলদা পাংথোকখি, মসিদা লিগেল এক্সপর্তশিং, একাদেমিসিয়ানশিং, হ্যুমেন রাইতস দিফেন্দরশিং অমসুং মহৈরোইশিং য়াওনা মীওই 100 হেনবনা শরুক য়াখি।

থৌরম অদু NHRCগী জেনরেল সেক্রেতরী, শ্রী ভারত লালনা ভেলিদিক্তরী এদ্রেস পীবগা লোইননা লোইশিনখি। শ্রী লালনা মহাক্কী এদ্রেস অদুদা প্রিয়েম্বল, ফন্দামেন্তেল রাইতস, অমসুং দাইরেক্তিব প্রিন্সিপলস ওফ স্তেত পোলিসীগী অশেংবা ৱাহন্থোক অদুগী মরু ওইবা অদুগী মতাংদা পনখি। মহাক্না বিচার ফংনবগীদমক্তা নাগ্রিকশিংদা পীরিবা কনস্তিত্যুশন অমসুং আইনগী ওইবা রিসোর্সশিং, মরু ওইনা বিচার পাম্বগী মতাংদা আর্তিকল 32 অসিগী মতাংদশু ঙাংখি। মহাক্না সিভিল, পোলিতিকেল, কলচরেল অমসুং সোসিয়ো-ইকোনোমিক রাইতশিং ঙাক-শেন্দুনা থম্বদা সরকারগী থৌদাং অদুগী মতাংদা হন্না-হন্না পনখি।

শ্রী লালনা কনস্তিত্যশন য়াওরিবা অসিগী মতুং ইন্না মীশিংগী মরক্তা ফ্রেতর্নিতী শাগৎপগী তঙাইফদবা অদুগী মতাংদা য়াম্না মরু ওইনা পনদুনা বিচার ফংনবগীদমক্তা হিংশাগী থবক তৌবগী মহুত্তা কনস্তিত্যুশন অমসুং আইনগী ওইবা প্রোভিজনশিং অদুগী মতেং লৌনবা তকশিনখি। মহাক্না মীওইবগী হকশিং অসিবু ঙাক-শিন্দুনা থম্বা হায়বসি নুংগী ওইবা ফিরেপ অমা ওইনা লৌগদবনি, মপান্থোংগী ওইবা তৌদা য়াদবা থৌদাং অমা ওইনা লৌরোইদবনি হায়না মহাক্না হায়খি।

শ্রী ভারত লালনা কনস্তিত্যুশন অসিগী থৱাই ওইরবা প্রিয়েম্বল অসিদা ইক্বালিতী, জস্তিস, লিবর্তী অমসুং ফ্রেতর্নিতী মপুং ওইবা আইদিয়লশিং অদু য়াওই। মহাক্না হায়খি মদুদি মখল অমত্তগী তশেংনা হায়রগদি হিংশা খুদিংমক মইওইবগী হকপু খোংগাওনবনি, লোইননা লান, তেরোরিজম অমসুং হিংশা অসিনা মীওইবগী পুনশি অমসুং দিগ্নিতীদা খ্বাইদগী চাউবা শিংনবশিংগী মনুংদা অমনি। শ্রী লালনা মহাক্কী এদ্রেসতা মহৈরোইশিং অমসুং ওজাশিং অনিমক্না হকথেংননা শান্তিবু য়োকখৎকদবানি অমসুং মীওইবা জাতি পুম্বগী হকশিংবু ইকাইখুম্নগদবনি, মসিগী থবকশিং অসিনা নহা ওইরিবা তুংগী মীরোলগীদমক্তা নুংঙাই-য়াইফবা অমসুং য়াম্না অফবা তুংলমচৎ অমা শেম্বীরম্নবগীদমক্তা য়াম্না মরু ওই হায়না য়াম্না মরু ওইনশু পনখি।

মহাক্না গুৱাহাতিদা হন্দক্তা পাংথোকখিবা NHRC কেম্প অদুবুশু পনখি, মদুদা মনিপুরগী মীওইবগী হক খোংগাওনবগী কেস 25 য়েংশিনখি। শ্রী লালনা মীপুম খুদিংমক্কী হ্যুমেন রাতশিং ঙাক-শেন্নবা অমসুং য়োকখৎনবা NHRCগী ফিরেপ অদুগী মতাংদা অমুক্কশু হন্না থাজবা পীরকখি, মীওইবগী হকশিংবু ইকাইখুম্নবীবা হায়বসিনা পুনশিগী মচৎ অমা ওইনা ওইনবা ঐখোয় পুম্নমক্না অমত্তা ওইনা অচেৎপা ফিরেপ অমগা লোইননা অমসুং লেপ্তনা হোৎনমিন্নবা হায়খি। মহাক্না মীপুম খুদিংমক্কী পুনশিবু ফগৎহন্নবা অমসুং ইজৎ লৈনা হিংনবা ময়াম পুন্না খুৎশম্নদুনা থবক তৌমিন্ননবা হায়রদুনা ৱারোইশিন তাখি।

থৌরম অদুদা মীওইবগী হক্কী মরু ওইবা মওং-মতৌ অদুবু নৈনবা মরু ওইবা সেসন নিপান য়াওই। থৌরম অদুদা লিগেল এক্সপর্তশিং, একাদেমিসিয়ানশিং, অমসুং হ্যুমেন রাইতস এক্তিবিস্তশিং য়াওনা পার্তিসিপেন্ত 100 হেন্না শরুক য়াখি। থৌরম অদুগী অহানবা নিমিত্তা, হান্নগী দীন, প্রোফেসর রামেসচন্দ্র বোরপাত্রাগোহেন্না হ্যুমেন রাইতসকি প্রিন্সিপলশিং অমসুং প্রক্তিসশিং অদুগী মতাংদা শম্লপ্পা অমগা লোইননা হৌদোকখি, মথংদা ধনমঞ্জুরি য়ুনিভর্সিতীগী এসোসিয়েত প্রোফেসর, দা. এন. প্রমোদ সিংনা ভারত্তা হ্যুমেন রাইতসনা লৌরিবা থৌদাংশিং অদুগী মতাংদা খন্নখি। ইকাইখুম্নরবা জস্তিস, কে.ঐচ. নোবিন সিংনা হ্যুমেন রাইতস অমসুং ক্রিমিনেল জস্তিস সিস্তেমগী ইন্তরসেক্সন অদুবু থিজিনখি, অদুগা ইকাইখুম্নরবা MCPCR চিয়রপার্সন, শ্রী কৈশাম প্রদিপকুমারনা মনিপুরদা চাইল্দ রাইতশিংগী মতাংদা থেংনরিবা শিংনবশিং অদুবু য়েংশিনখি। ৱিমেন এক্সন ফোর দেবেলপমেন্তকী সেক্রেতরী, শ্রীমতি সোবিতা মাসাতাবমনা জেন্দর জস্তিসকী মতাংদা NGOশিংনা লৌরিবা থৌদাং অদুগী মতাংদা পনখি, অমসুং মনিপুরগী হ্যুমেন রাইতস লো নাতৱার্ক্কী দাইরেক্তর, শ্রী মৈহৌবম রাকেশনা ফাবা আমসুং পুনবদা কনস্তিত্যুশন্না পীরিবা ইশা ঙকথোকচনবগী পীরিবা হকশিং অদুবু য়েংশিনখি। ইম্ফাল তাইমসকী চীফ এদিতর, শ্রী রিঙ্কু খুমুকচমনা মীওইবগী হকশিং য়োকখৎপা অমসুং ঙাক-শেনবদা মীদিয়ানা লৌরিবা থৌদাংশিং অদুগী মতাংদা খন্নখি।

মসিগী থৌরাম অসি মীওইবগী হকশিংবু ইকাইখুম্নবীবা অমসুং মমুৎ তানা খঙনবা হোৎনবদা NHRCনা লেপ্তনা লৌরক্লিবা ফিরেপশিং আদুগা লোইননা, নোর্থ-ইস্ততা হ্যুমেন রাইতস এজুকেশন অমসুং এদভোকেসী খুমাং চাউশিনহনবদা য়াম্না মরুওইবা খোংথাং অমা ওই। NHRCনা কেন্দ্র অমসুং রাজ্য সরকার কয়া অমগা লোইননা, মখোয়গী পেরাসেতল ওর্গনাইজেশনশিং, একাদেমিক ইনস্তিত্যুশনশিং, NGOশিং, হ্যুমেন রাইতস দিফেন্দরশিং, মরু ওইনা নহাশিং অমসুং নুপী ওইবীশিংগা খুৎশম্নদুনা অনৌবা পাঙ্গল-থৌনা অমগা লোইননা পুনশিরোলগী শরুক অমা ওইনা মীওইবগী হকশিংবু ঙাক-শেনবা অমসুং য়োকখৎপা অমসুং মীওইবা জাতি পুম্নমকপু ইকাইখুম্নদুনা অমসুং ইজৎ লৈনা তৌবীনবা লেপ্তনা থবক তৌরি।

***