నాడు పోస్టు చేయడమైనది:
24 JUL 2024 8:00PM by PIB Hyderabad
బ్రిటన్ విదేశాంగ కార్యదర్శి డేవిడ్ లామీ ఈరోజు ప్రధాన మంత్రి శ్రీ నరేంద్ర మోదీని కలిశారు. విదేశాంగ మంత్రిగా నియమితులైన సందర్భంగా లామీని ప్రధాని అభినందించారు. యూకేలో ప్రభుత్వం ఏర్పడిన మొదటి నెలలోనే భారతదేశాన్ని సందర్శించుటకు చొరవ చూపిన లామీని మోదీ ప్రశంసించారు.
యూకే ప్రధానమంత్రి సర్ స్టార్మెర్‌తో తన ఇటీవలి సంభాషణను ఈ సందర్భంగా ప్రధాని మోదీ గుర్తు చేసుకున్నారు. అలాగే ద్వైపాక్షిక సమగ్ర వ్యూహాత్మక భాగస్వామ్యాన్ని బలోపేతం చేయడానికి యూకే ప్రభుత్వం ప్రాధాన్యమివ్వడం ప్రశంసనీయమన్నారు. ద్వైపాక్షిక సంబంధాలను మరింత ధృడపరుచుకునేందుకు కలిసి పని చేయడం పట్ల తమ నిబద్ధతను ప్రధాని పునరుద్ఘాటించారు.
ఆర్థిక రంగం, పెట్టుబడులు, రక్షణ, భద్రత, కీలకమైన, అభివృద్ధి చెందుతున్న సాంకేతికతలు, వాతావరణ మార్పులు సహా పలు రంగాలలో ద్వైపాక్షిక సంబంధాలను మరింత బలోపేతం చేసుకోవడం పట్ల యూకే విదేశాంగ శాఖ మంత్రి డేవిడ్ లామీ ఆసక్తి వ్యక్తం చేశారు.
***