ప్రపంచ స్థాయి ఆరోగ్య సేవల్ని అందుబాటు ధరల్లో  అందించే గమ్యస్థానంగా, ప్రపంచ ఫార్మా అగ్రగామిగా భారతదేశం అవతరించిందని కేంద్ర వాణిజ్య, పరిశ్రమల శాఖ సహాయ మంత్రి శ్రీ జితిన్ ప్రసాద అన్నారు. ఉత్తరప్రదేశ్‌లోని గ్రేటర్ నోయిడాలో ఫార్మా ఎక్స్ పోర్టు  ప్రమోషన్ కౌన్సిల్ (కాపెక్సిల్) వాణిజ్య, పరిశ్రమల మంత్రిత్వ శాఖ సంయుక్తంగా నిర్వహిస్తోన్న మూడు రోజుల అంతర్జాతీయ ఫార్మా, ఆరోగ్య సంరక్షణ  ప్రదర్శన (ఐఫెక్స్ 2024) ప్రారంభోత్సవంలో ఆయన మాట్లాడారు. ఫార్మాస్యూటికల్ పరిశ్రమ ఆరోగ్య సంరక్షణలో ప్రపంచ స్థాయి సంరక్షకుడిగా ఎదిగేందుకు కృషి చేయాలని కోరారు.

ఫార్మా పరిశ్రమ ఎగుమతులను పెంచాలని, వృద్ధి సాధించేందుకు కొత్తగా వస్తున్న అవకాశాలను అందిపుచ్చుకోవాలని కోరారు. భారతదేశం ఇప్పటికే 'ప్రపంచ స్థాయి ఫార్మసీ'గా గుర్తింపు పొందిందని అన్నారు. జనరిక్ రంగంలో మన బలాబలాలపై దృష్టి పెట్టడమే కాకుండా.. పాత, కొత్త సంబంధాలను కాపాడుకోవటం చాలా ముఖ్యమని పేర్కొన్నారు. ఉత్పత్తుల అభివృద్ధికి ప్రయత్నించడం, కొత్త శిఖరాలను అదిరోహించటం చాలా ముఖ్యమని ఆయన పేర్కొన్నారు.

నవకల్పన, నాణ్యత  అంశాలపై పరిశ్రమ దృష్టి సారించాలని, ప్రపంచ మార్కెట్‌తో కలిసి పనిచేయాలని మంత్రి కోరారు. 'అంతర్జాతీయ పోటీతత్వం చాలా ముఖ్యం. కొత్త పరిణామాలు, మంచి తయారీ పద్ధతులను తెలుసుకోవడం చాలా ముఖ్యం" అని వ్యాఖ్యానించారు. వైద్యపరికాలు, సాఫ్ట్ వేర్ తయారీల కోసం ఉత్పత్తి ఆధారిత ప్రోత్సహాకల (పీఎల్ఐ) పథకం వంటి వాటిని ప్రభుత్వం తీసుకుస్తోందని తెలిపారు.

" ప్రపంచ స్థాయి దిగ్గజాలతో కలిసి దేశీయ పరిశ్రమలు అనుసంధానం కావడానికీ, వ్యాపారం చేసుకోవడానికీ- ఈ మూడు రోజుల ఫార్మా ప్రదర్శన- ఐఫెక్స్ ఒక గొప్ప వేదికగా ఉపయోగపడుతుందన్నారు. కొత్త సరఫరాదారుల కోసం చురుకుగా చూస్తున్న లేదా ఇప్పటికే ఉన్న ప్రాజెక్టుల ప్రస్తుత పురోగతిని అంచనా వేయడానికి ప్రయత్నిస్తోన్న కొత్త, పాత వినియోగదారులను కలవడానికి ఇది మీకు అవకాశాన్ని అందిస్తుంది” అని వ్యాఖ్యానించారు.

***