Ka Kynhun Myntri jong ka Sorkar Pdeng ba la khlieh da u Myntri Rangbah Duh Narendra Modi ka la ai jingmynjur ia ka jingtyrwa jong ka Tnad Kam Bording ban ai ia ka jingiarap pisa ka Sorkar Pdeng ne ka Central Financial Assistance (CFA) ia ki Sorkar Jylla ha ka thain shatei lammihngi ban kyntiew ia ki Hydro Electric Project ha ka thain shatei lammihngi lyngba ka jingiatreilang Joint Venture hapdeng ki kynhun ha ki Jylla bad ki Central Public Sector Undertaking.

Kane ka skhim ka dei kaba la mang T. 4136 klur bad yn pyntreikam ia ka naduh u snem mang tyngka 2024-25 haduh u snem mang tyngka 2031-32. Yn kyrshan ia ka bor pynmih bording kaba kumba 15000 MW lyngba kane ka skhim. Ia kane ka skhim yn bei tyngka 10% ka Gross Budgetary Support (GBS) na ka bynta ka thain shatei lammihngi na ka jingmang tyngka ia ka Tnad Kam Bording.

U Myntri Sorkar Pdeng, ba dei khmih ia ka Tnad Kam Bording, Manohar Lal Khattar u la ong ba kane ka skhim kan don ka bynta kaba heh ha ka jingpyndonkam ia ki lad kiba don ha ka thain shatei lammihngi ha kaba iadei bad ka bording. Kan wanrah ka jingbei tyngka kaba bun ha ka thain shatei lammihngi bad kan plie shibun ki lad ioh kam ia ki briew jong ka thain.

Kane ka skhim ba la saindur da ka Tnad Kam Bording ka pynbiang ia ka jingsdang ia ka kompani Joint Venture na ka bynta baroh ki projek jong ka PSU jong ka Sorkar Pdeng bad ki Sorkar Jylla.

Ka bynta grant towards equity jong ka Sorkar Jylla jong ka thain shatei lammihngi kan long haduh u pud uba 24% jong baroh kawei ka projek equity kaba lah ban kot haduh T. 750 klur ia man ka projek. Ia une u pud uba T. 750 klur lah ban peit biang, lada donkam, katkum ki projek. Ka bynta jong ka equity jong ka CPSU bad ka Sorkar Jylla ha ka JV ka dei ka ban pynbiang ha ka por ba pyllait ia ka grant.

Kane ka jingiarap pisa ka Sorkar Pdeng kan dei thik ia ki Hydro Electric Projek kiba lah ban seisoh. Ki Jylla ki hap ban pyndam / tehlakam ia ka jingaiei ka bording / lane ai jingsiew SGST khnang ban pynseisoh ia kine ki projek.

Lyngba ka jingwanrah ia kane ka skhim, yn pynshlur ia ka jingiashim bynta ki Sorkar Jylla ha ka kam ban kyntiew ia ki projek hydro bad yn iabah lang ia ki jingma bad ki jingkitkhlieh bad ruh ki kam kiba iadei bad ka ain kin kham duna namar ka jingiadon bynta lang ki Sorkar Jylla ha ka kam. Kane kan pynlait na ka jingsepei ka por bad ka jingkiew ka jinglut jingsep na ka bynta kine ki projek.

Kane ka skhim kan don ka bynta kaba heh ha ka jingpyndonkam ia ki lad kiba don ha ka thain shatei lammihngi ha kaba iadei bad ka bording hydro. Kan wanrah ki jingbei tyngka kiba heh ha ka thain shatei lammihngi bad kan plie ki lad ioh kam ia ki briew jong ka thain ha ryngkat ki kam bad ki lad seng kam lajong ia kiwei kiwei lyngba ka jingleit jingwan, ka kam jngoh kai, ki kam khaii barit baria. Ka jingtei ia ki projek hydroelektrik kan iarap ruh ia ka jingpynurlong ia ka Nationally Determined Contribution (NDC) jong ka India ban tei ka bor pynmih 500 GW ka bording na ki tyllong ba lah ban pynthymmai shuwa u snem 2030 bad kan iarap ha ka jingpyniasoh ia ki tyllong bording ba lah ban pynthymmai bad ka grid ka ban kyntiew ia ka jinglah treikam, ka jingshngain bad ka jingskhem jong ka grid jong ka ri.

Ka Sorkar India ka la wanrah shibun ki sienjam lyngba ki polisi ban pynbeit ia ki jingeh ha ka jingkyntiew ia ka bording hydro. Ban kyntiew ia ka kam bording hydro bad ban pynseisoh shuh shuh ia ka, ka kynhun Myntri, ha ka 7 tarik u Lber, 2019 ka la ai jingmynjur ia ki sienjam kum ka, jingithuh ia ki projek bording hydro kum ki tyllong bording ba lah ban pynthymmai, ki Hydro Power Purchase Obligation (HPO), ki sienjam ban pynryntih ia ki bai bording, ka jingai jingkyrshan ban iada na ka jingshlei um bad ka jingkyrshan ha ka mang tyngka na ka bynta ka bai pyntreikam ia ki jingdon jingem kum ka jingtei ia ki surok bad ki jingkieng.

*****