ఉప రాష్ట్రపతి సచివాలయం
జాతీయ ఫోరెన్సిక్ శాస్ర్తాల విశ్వవిద్యాలయం, గాంధీనగర్ లో ఉప రాష్ర్టపతి ప్రసంగ పాఠం
Posted On:
23 AUG 2024 4:42PM by PIB Hyderabad
నేడు మీ అందరి ముందుకు రావడం ప్రత్యేక గౌరవంగా భావిస్తున్నాను. ఈ విశ్వవిద్యాలయానికి నేను రావడం ఇదే ప్రథమం. ప్రపంచ మానవాళిలో ఆరో వంతు జనాభా ఉన్న దేశంలో, ఒక రాష్ర్టంలో ఇన్నోవేటివ్ గా పడిన అడుగు కావడం వల్ల దీనిపై నేను దీర్ఘకాలికంగా ఆలోచిస్తూనే ఉన్నాను. ఈ అగ్రగామి సంస్థ సరిహద్దులు దాటి విస్తరించింది. ప్రతిభ పరంగా, ఫోరెన్సిక్ సైన్సు రంగంలో దీనిని ఒక దీపశిఖగా చెప్పవచ్చు. నేరచట్టాల పరిధిని దాటి ఇది విస్తరించింది.
జాతీయ భద్రత, న్యాయం, అభివృద్ధిపై ప్రత్యక్ష ప్రభావం చూపగల జ్ఞానాన్ని అందరికీ పంచాలన్న ఆసక్తీ, ముందుచూపు గల విద్యావేత్తలు, చైతన్యశీలురు అయిన మీ ముందు ప్రసంగించడం ఆనందాన్ని ఇస్తోంది. ఫోరెన్సిక్ శాస్ర్తం అంటే అందరూ అనుకుంటున్నట్లుగా కేవలం సాంకేతిక ప్రాధాన్యంగల విభాగం మాత్రమే కాదు, సత్యానికీ, న్యాయానికీ మూల స్తంభం.
ఇది మనకు ఏం చెబుతుంది? అభిప్రాయాల కన్నా ఆధారాలు ముఖ్యమనీ, అవాస్తవాలపై వాస్తవాలదే విజయమనీ మనకు తేటతెల్లం చేస్తుంది. ఫోరెన్సిక్ శాస్ర్తాలే లేకుంటే దేశంలో నేరన్యాయ వ్యవస్థ పరిస్థితి ఏమిటో ఊహించండి. న్యాయానికి శిక్ష పడుతుంది.
ఇక అలాంటి ప్రమాదం లేదు. ఫోరెన్సిక్ శాస్ర్తం దోషులను శిక్షించేలా చూస్తుంది. అమాయకులను రక్షిస్తుంది. అత్యాధునిక వ్యవస్థలు, అత్యాధునిక పరిశోధనా వసతులు, అంకిత భావం కలిగిన నిపుణులు కలిగిన ఈ సంస్థ, సమాజంలో సత్యానికి సంరక్షకులైన కొత్త తరం ఫోరెన్సిక్ నిపుణులను తయారు చేస్తుంది. సత్యాన్ని కాపాడుకోలేకపోతే, క్రిమినల్ న్యాయ వ్యవస్థ కూలిపోతుంది. అందుకే ఫోరెన్సిక్ శాస్ర్త విభాగంలో ఉన్న మీరంతా అంతిమ దోషులను గుర్తించడంలో సహాయకారిగా నిలవాలి.
ఈ విశ్వవిద్యాలయ ప్రాధాన్యత విద్యాపరంగా నైపుణ్యాలు సాధించడానికే పరిమితం కాదు. అన్ని కోణాల్లోనూ న్యాయాన్ని కాపాడాలన్న జాతి కట్టుబాటుకు ఇది చక్కని ప్రతీక. వాస్తవం చెప్పాలంటే మీరంతా మరో కోణంలో న్యాయ విద్యార్థులే.
ఈ విశ్వవిద్యాలయం మన రాజ్యాంగ పీఠిక కీర్తిని నిలబెట్టడానికి కృషి చేస్తోంది. దానికి ఉన్న మూడు కోణాలు కూడా మానవత, మానవ అస్తిత్వాన్ని కాపాడడంలో కీలకంగా పని చేస్తాయి. నా యువ మిత్రులారా, ఇక్కడ మీరు నేర్చుకునే నైపుణ్యాలు నేర దర్యాప్తు, జాతీయ భద్రత, పౌర వివాదాలు వంటి సంక్లిష్టమైన సవాళ్లను పరిష్కరించడంలో వృత్తి నిపుణులుగా మిమ్మల్ని తీర్చి దిద్దుతాయి.
మీరు ఎంచుకున్న రంగం ఎంతో కీలకం. ఎందుకంటే, ఫోరెన్సిక్ శాస్ర్తం న్యాయవ్యవస్థపై మన పౌరులకు ఉన్న విశ్వాసాన్ని మరింత పెంచుతుంది. న్యాయాన్ని అందించలేకపోవడానికి మించిన పతనం సమాజానికి మరొకటి ఉండదు. ఫోరెన్సిక్ సైన్సు లేకుండా, ఈ సమస్యను అధిగమించడం అసాధ్యం.
ఫోరెన్సిక్ సైన్స్ అనేది నేరస్థులను న్యాయస్థానానికి తెచ్చే సాధనం మాత్రమే కాదు. ప్రజలకు ఇదేనని భావిస్తారు, కానీ దీనికి అంతకు మించిన బాధ్యతే ఉంది.
నేరస్థులు శిక్ష అనుభవించి తీరతారు. కానీ, అదే సమయంలో అమాయకులను రక్షిస్తున్నాం. అమాయకుల ఆర్తనాదాల్ని పట్టించుకోని సమాజం దిగజారిపోతుంది.
మీరు దుర్భేద్యమైన కోట గోడలు. ఫోరెన్సిక్ సైన్సు యోధులు. దురుద్దేశంతో కూడిన, వలపక్షంతో కూడిన మౌఖిక వాంగ్మూలంతో అమాయకుడిని శిక్షించేందుకు జరిగే ప్రయత్నాన్ని అడ్డుకునే రక్షణ కవచాలు మీరు.
ప్రతీకారేచ్ఛతో రగులుతున్న వారిని మీ నైపుణ్యాలు, మీ చర్యలు సమర్థవంతంగా నిలువరించి వారిని విస్మయంలో ముంచెత్తుతాయి. మిత్రులారా, మన ప్రపంచంలోని మిస్టరీలను ఛేదించగల, మన సామాజిక విభాగాలను రక్షించగల, జాతి అభివృద్ధికి బాటలు వేయగల బహుముఖీన ప్రజ్ఞతో కూడిన విభాగం ఇది. కల్పన కన్నా వాస్తవం మరింత అబ్బురం కలిగించగలదని ఫోరెన్సిక్ సైన్స్ మనకు చూపిస్తుంది.
కొన్ని రకాల భయంకరమైన నేరాల్లో.. ఒక అమాయకుడు నేరాభియోగాన్ని ఎదుర్కోవాల్సి వస్తుంది. మరో వైపు సమాజం యావత్తు దోషిని శిక్షించాలంటూ నినదిస్తుంది. అలాంటి సందర్భంలో ఫోరెన్సిక్ సైన్స్ ఆ అమాయకుడికి చివరి ఆశగా నిలుస్తుంది. పర్యావరణ వైపరీత్యాలను దర్యాప్తు చేయడం దగ్గర నుంచి కీలక పత్రాలు అధీకృతం చేసే వరకు; కీలక ఆధారాలు విశ్లేషించడం నుంచి సంక్లిష్టమైన న్యాయ విచారణ సాగుతున్న కేసుల్లో సత్యాన్ని వెలికి తీయడం వరకు...మన రోజువారీ జీవితాల్లో, మన జాతి పురోగతిలో ఫోరెన్సిక్ సైన్స్ కీలక పాత్ర పోషిస్తుంది. న్యాయవాదిగా నేనున్న నాటి పరిస్థితులు మీకు ఇపుడు తెలిసే అవకాశం లేదు.
మౌఖిక సాక్ష్యం ఒక్కటే నాడు ఆధారం. మరణశయ్యపై ఉన్నవారు సత్యమే తప్ప అసత్యం చెప్పరన్న నమ్మకం ఆనాడు ఉండేది. దీని వల్ల ఇవతలి వ్యక్తి ప్రాణాలు పోయేవి. ప్రజాభిప్రాయం ఇందుకు భిన్నంగా ఉన్నా పట్టించుకునే వీల్లేదు.
వీలైనంత త్వరితంగానే మీ నైపుణ్యం ఉపయోగపడుతుంది. మీ నైపుణ్యం, లోతైన సాంకేతిక పరిజ్ఞానం అమాయకులను కాపాడగలుగుతుంది. నేరస్థులను ఉరికంబానికి పంపుతుంది. సత్యాన్ని వెలికి తీయడానికి ఫోరెన్సిక్ సైన్స్ ఒక సాధనంగా ఉంటుంది. కొన్ని సందర్భాల్లో సత్యాన్ని వెలికి తీయడం తేలిక కాదు.
సత్యాన్ని వెలికి తీయడానికి ఎంతో కష్టపడాల్సి ఉంటుంది. కొన్ని సందర్భాల్లో సాంకేతిక పురోగతి ప్రత్యేకించి ఆధునిక టెక్నాలజీలు సత్యం బహిర్గతం కాకుండా దానిని కప్పి ఉంచుతాయి. అలాంటి సందర్భాల్లో వాస్తవాన్ని వెలికి తీసి, సత్యాన్ని బహిర్గతం చేస్తారు.
ఫోరెన్సిక్ ఆధారాల్లోని స్పష్టత, ఆధారనీయత ప్రపంచవ్యాప్తంగా ఆధునిక న్యాయ వ్యవస్థలో అంతర్గత భాగంగా మారిపోయాయి. మొదట రక్తం ఒక ఆధారంగా సరిపోతుందని నేను చెప్పాను.
అది మానవ రక్తం అయి ఉండాలని వారన్నారు. అది ఆర్ఎస్ నెగిటివ్ తో సరిపోలాలన్నారు. మంచిదే.
దీనికంటే మెరుగ్గా, ఇప్పుడు డిఎన్ఏ వచ్చింది. దేశంలోని న్యాయచట్టాన్ని అది బలోపేతం చేస్తోంది. అది దేశంలోని న్యాయ చట్టాన్ని బలోపేతం చేస్తుందని నేను మరోసారి చెప్పదలచుకున్నాను.
సత్యానికి బలమైన అండగా నిలబడకపోతే న్యాయచట్టానికి అస్తిత్వమే ఉండదు. ఆ సత్యాన్ని వెలికి తీయడమే ప్రధానం. కాని మనిషి ఆత్మాశ్రయం గనుక వ్యక్తుల ద్వారా సత్యం వెలికి రాకపోవచ్చు.
వారి సొంత అభిప్రాయాలు వారికుంటాయి. రాబోయే ఫలితంపై కూడా వారు నిశ్చితాభిప్రాయంతో ఉంటారు. ఇలాంటి వాతావరణంలోనే దాని చుట్టూ ఒక మిస్టరీ ఆవరించి ఉంటుంది. ఫోరెన్సిక్ సైన్స్ అలాంటి అనుమానాలన్నింటినీ తొలగిస్తుంది. ఎట్టకేలకు వారు ఒక నిశ్చితాభిప్రాయానికి రావడానికి వీలు కలుగుతుంది.
ఇదే ప్రజాస్వామ్య విలువలకు శిఖరాయమానం. నా యువ మిత్రులారా, సైబర్ భద్రత విభాగంలో రోజురోజుకీ పెను మార్పులు చోటు చేసుకుంటున్నాయి. అది వ్యవస్థకు, సమాజానికి, వ్యక్తులకు కూడా సవాలుగా మారుతోంది.
ఈ నేపథ్యంలో ఫోరెన్సిక్ సైన్స్ కొత్త బాట పట్టింది. సైబర్ ముప్పు అత్యంత ఆధునాతనంగా, తీవ్రంగా మారిన నేపథ్యంలో సైబర్ నేరాలను దర్యాప్తు చేయగల, మన డిజిటల్ మౌలిక వసతులను పరిరక్షించగల ఫోరెన్సిక్ నిపుణుల అవసరం గతం కన్నా పెరిగింది.
భారతదేశం వృద్ధిపథంలో పయనిస్తున్న దేశం. ఆ వృద్ధిని నిలువరించలేనిది. ప్రత్యేకించి డిజిటైజేషన్ లో వృద్ధిని అసలు నిలువరించలేం. మిత్రులారా, ప్రపంచంలో జరుగుతున్న ప్రత్యక్ష లావాదేవీల్లో 50 శాతం మన దేశంలోనే జరుగుతున్నాయి. మన తలసరి ఇంటర్నెట్ వినియోగం అమెరికా, చైనా రెండు దేశాల ఉమ్మడి వినియోగం కన్నా అధికం.
10 కోట్ల మంది వ్యవసాయదారులు ప్రతీ ఏడాది మూడు విడతలుగా ప్రత్యక్ష నగదు బదిలీ ద్వారా లబ్ధి పొందుతున్నారు. ఈ కోణంలో చూసినా భద్రత చాలా ప్రధానం. ఏ మాత్రం అవకాశం దొరికినా వ్యవస్థలో అస్థిరత సృష్టించేందుకు ప్రయత్నించే మోసగాళ్ల బారి నుంచి మీ నైపుణ్యాలే వారిని కాపాడగలుగుతాయి. ఈ రంగంలో జరుగుతున్న కృషి మాత్రమే జాతి భద్రతను, సునిశిత సమాచారాన్ని కాపాడడంలోను, డిజిటల్ వ్యవస్థల పట్ల ప్రజల విశ్వాసం బలోపేతం చేయడంలోను కీలకంగా నిలుస్తుంది.
ఇప్పటివరకు మనం అన్ని దేశాల కన్నా ఎంతో ముందున్నాం. కాని సవాళ్లు రోజురోజుకీ పెరుగుతున్నాయి. అందువల్ల మీరు సదా అప్రమత్తంగా ఉండాలి. సోక్రటీస్ శకం ముందు కాలం నాటి తత్వవేత్త హెరాక్లిటస్ చెప్పిన మాటలు ఈ సందర్భంగా నాకు గుర్తుకొస్తున్నాయి. జీవితం అంటే మార్పు అని ఆయన సిద్ధాంతీకరించాడు. ఒకే వ్యక్తి ఒకే సమయంలో ఒకే నదిలోకి రెండు సార్లు ప్రవేశించలేడని; వ్యక్తీ ఒకేలా ఉండడు, నదీ ఒకేలా ఉండకపోవడమే అందుకు కారణమని అన్నాడు. అయితే వేలాది సంవత్సరాల క్రితం హెరాక్లిటస్ ఊహించిన దాని కన్నా వేగంగా మార్పు చోటు చేసుకుంటున్నందు వల్ల మీరు దాని గురించి జాగ్రత్త తీసుకోవాలి. నా యువ మిత్రులారా, ప్రపంచం వాతావరణ మార్పులు, పర్యావరణ క్షీణత వంటి సవాళ్లు ఎదుర్కొంటున్న తరుణంలో ఫోరెన్సిక్ సైన్స్ వైవిధ్యభరితమైన పాత్రలు పోషిస్తోంది.
కాలుష్యాన్ని గుర్తించడంలో అది సహాయపడుతుంది. వన్యప్రాణుల వేటను నిరోధించగలుగుతుంది. పర్యావరణ నిబంధనలకు కట్టుబాటును పర్యవేక్షించగలుగుతుంది. మనం నిర్లక్ష్యంగా సహజ వనరులను దోపిడీ చేస్తున్నామని నేను దీర్ఘకాలంగా చెబుతూ వస్తున్నాను. అలా చేయడం ద్వారా మన అస్తిత్వానికే మనం ముప్పు తెచ్చుకుంటున్నాం. మనకు నివశించేందుకు మరో మండలం లేదన్న విషయం మనం మర్చిపోతున్నాం.
భవిష్యత్ తరాల కోసం మనం ఈ భూమండలాన్ని కాపాడుకోవాలి. ఈ భూమండలం ఎలా ఉందో అలా నిలబెట్టుకోవడానికి, మరింత మెరుగుపరిచేందుకు మానవ వనరులన్నీ సంఘటితం కావడం అవసరం. ఇందులో కూడా ఫోరెన్సిక్ సైన్స్ ప్రధాన పాత్ర పోషిస్తుంది.
పర్యావరణ వినాశానికి కారణం ఏమిటో శాస్ర్తీయంగా నిర్ధారించగల సామర్థ్యం అత్యంత కీలకం. కారణం తెలిసినప్పుడే దాన్ని మీరు పరిష్కరించగలుగుతారు. భవిష్యత్ తరాల కోసం జాతీయ వనరులను సంరక్షించుకోవడం, నియమాలు ఉల్లంఘించే వారిని బాధ్యులను చేయడం అత్యంత కీలకం.
మిత్రులారా, 1989లో నేను పార్లమెంటుకు ఎన్నికయ్యాను. 1990లో మంత్రిని అయ్యాను. నాటి కాలంలో భారత ఆర్థిక వ్యవస్థ పరిమాణం లండన్, పారిస్ నగరాల ఆర్థిక వ్యవస్థల పరిమాణానికి సమానంగా ఉండేది. మీకు అది నమ్మశక్యం కాకపోవచ్చు. కాని మనం ఇప్పుడెక్కడ ఉన్నాం? గత 10 సంవత్సరాల కాలంలో ప్రపంచంలోనే ఐదో ఆర్థిక వ్యవస్థ స్థాయికి ఎదిగాం. మరో రెండేళ్లలో లేదా అంతకన్నా ముందుగానే మూడో పెద్ద ఆర్థిక వ్యవస్థ స్థాయికి ఎదగబోతున్నాం. ఈ నేపథ్యంలో భారత్ తన ఎదుగుదలను కొనసాగించుకోవాలి. ఆ క్రమంలో మనం ఎదుర్కొంటున్న సవాళ్లు మరింత సంక్లిష్టంగా మారుతున్నాయి.
దురదృష్టవశాత్తు లోపలి నుంచి, వెలుపలి నుంచి కూడా కొన్ని సవాళ్లు ఎదురవుతున్నాయి. ప్రజలు జాతీయతను గౌరవించడంలేదు. రాజకీయ, స్వార్ధ ప్రయోజనాల కన్నా జాతీయ ప్రయోజనాలకు సమున్నత స్థానం కల్పించడం ఈ మహోన్నత దేశ పౌరులుగా మనందరి బాధ్యత.
దేశంలో ఏ పాటి కల్లోలం జరిగినా దాన్ని స్వప్రయోజనాలకు వాడుకునే కొందరున్నారు. నా యువ మిత్రులారా, మన పొరుగు దేశంలో ఏదో జరిగితే ఈ దేశంలో కూడా అది జరగవచ్చునని ప్రచారం చేస్తున్న వారుండడం ఎంత బాధాకరం. వారిలో కొందరు న్యాయవాదులు, కొందరు మంత్రులు, మరి కొందరు విదేశాంగ సర్వీసులో పని చేసిన వారు ఉన్నారు. కాని అలాంటి అవకాశమే లేదు.
అలాంటి ప్రజలకు సమాధానం మీ మౌనం కాదు. మీరంతా ఆలోచనలకు పదును పెట్టాలి. ఈ భూమండలంపై అతి పెద్ద ప్రజాస్వామ్య దేశాన్ని అస్థిరం చేసేందుకు జరుగుతున్న హానికరమైన చర్యలను తిప్పికొట్టేందుకు మీరు సామాజిక మాధ్యమాలను ఉపయోగించుకోవాలి.
వారిని మనం తటస్థం చేయాలి. మిత్రులారా, ఉగ్రవాదం, వ్యవస్థీకృత నేరాలపై పోరాటం; పర్యావరణ క్షీణత, సైబర్ ముప్పు వంటివి తిప్పి కొట్టడంలో మీ నైపుణ్యాలు ఎంతో సహాయకారి అవుతాయి. మీ నైపుణ్యాల అవసరం బాగా పెరుగుతోంది.
మీరందరూ వెలుపలికి రావాలి. దేశంలోనే కాదు, దేశం వెలుపల కూడా మీ నైపుణ్యాల అవసరం ఉంది. నేను ముందుగానే చెప్పినట్టు ఉగ్రవాదులు, నేరస్థులను పట్టుకోవడంలో క్రిమినల్ న్యాయ వ్యవస్థకు ఫోరెన్సిక్ న్యాయ వ్యవస్థ ఎంతో ఉపయోగపడుతోంది. పరిశోధన, ఇన్నోవేషన్ లో అద్భుతాలు ఆవిష్కరించేందుకు నిరంతరం కృషి చేయాలని ఈ సుప్రసిద్ధ విద్యా సంస్థ విద్యార్థులు, అధ్యాపకులను కోరుతున్నాను.
భారతదేశం నిరంతరం అద్భుతమైన వృద్ధి బాటలో పయనిస్తూ గణాంకాలకు అతీతమైన వేగంతో పురోగమిస్తున్న నేపథ్యంలో ఫోరెన్సిక్ సైన్స్ లో మీ కృషి ప్రపంచ ప్రమాణాలకు దీటుగానే కాదు, కొత్త బెంచ్ మార్క్ లు కూడా నెలకొల్పేదిగా ఉండాలి. మన ముందు ఎవరున్నారు అని ఆలోచించే పరిస్థితిలో మనం లేం. వరుసలో ద్వితీయ స్థానంలో ఉన్న వారి కన్నా మనం ఎంతో ముందుండాలి.
నా ప్రియ మిత్రులారా, ఈ వేగం అన్ని రంగాల్లోనూ చోటు చేసుకుంటోంది. భారతదేశం అత్యాధునిక టెక్నాలజీల్లో భారత్ సాధిస్తున్న వేగాన్ని ప్రపంచంలోని ఎన్నో దేశాలు అందుకోలేకపోతున్నాయి. ఒక్కసారి క్వాంటమ్ కంప్యూటింగ్ గురించి ఆలోచించండి. హరిత హైడ్రోజెన్ కార్యక్రమం కూడా అలాంటిదే. అలాగే మనం మెషీన్ లెర్నింగ్, బ్లాక్ చెయిన్ వంటి టెక్నాలజీలపై మనం దృష్టి సారిస్తున్నాం. 2025 నుంచి వాణిజ్యపరంగా 6జి వినియోగం ప్రారంభం కానుంది. అంటే ప్రతీ రంగంలోనూ భారత్ పురోగమించి తీరాలి.
ప్రమాదం అంచున ఉన్న 5 నుంచి అగ్రగామి 5 దేశాల్లో చేరడం అంటే మాటలా? నా కళ్లను నేనే నమ్మలేకపోతున్నాను. 1989, 1990 సంవత్సరాల్లో నేను మంత్రిగా ఉన్న కాలంలో కనీసం దీని గురించి ఆలోచించలేకపోయాను. మన విదేశీ మారకం నిల్వలు వంద కోట్ల డాలర్ల స్థాయిలో కదలాడిన రోజులున్నాయి.
రెండు బ్యాంకుల్లో తాకట్టు పెట్టడానికి బంగారాన్ని స్విట్జర్లాండ్ కు విమానాల్లో తరలించాల్సి వచ్చింది. కాని నేడు మన విదేశీ మారకం నిల్వలు 66 వేల కోట్ల డాలర్ల స్థాయిని దాటాయి. ఒక్క వారంలో మనం 600 నుంచి 700 కోట్ల డాలర్లు విదేశీ మారకం నిల్వలకు జోడించగలిగాం. డిజిటైజేషన్ లో భారతదేశం సాధించిన పురోగతి ప్రపంచం కూడా నేర్చుకోగల స్థాయిలో ఉన్నదని ప్రపంచబ్యాంకు చెబుతోంది.
4 దశాబ్దాలకు పైబడి సాధించలేని దాన్ని మనం కేవలం 6 సంవత్సరాల్లో సాధించాం. పెట్టుబడులు, అవకాశాలకు మెరుగైన కేంద్రంగా అంతర్జాతీయ ద్రవ్య నిధి భారత్ ను గుర్తించింది. ప్రపంచం అంతటిలో ప్రతికూల పవనాలు వీస్తున్న, అత్యంత సంక్లిష్టమైన బాటలో పయనిస్తున్న, ప్రపంచంలోని అతి పెద్ద ఆర్థిక వ్యవస్థల్లోనే గాలిబుడగల వంటి వాతావరణం నిండిన నేపథ్యంలో భారత్ అనుకూల ప్రపంచ గమ్యంగా నిలిచింది.
చంద్రయాన్ 3ని ఇంతవరకు ప్రపంచంలోని ఏ దేశం కూడా అడుగు పెట్టని చంద్రమండల దక్షిణ ధ్రువంపై విజయవంతంగా దించడం ద్వారా అంతరిక్ష రంగంలో కూడా మనం చరిత్ర సృష్టించాం. ఎన్నో అత్యాధునిక టెక్నాలజీ రంగాల్లో మనం ముందువరుసలో ఉన్నాం.
భారతదేశం అసాధారణమైన, అద్భుత పురోగతి పథంలో అడుగేస్తున్న ప్రస్తుత వాతావరణంలో మీరు చదువుకుంటున్న రంగంలో నిపుణులుగా నిలవడమే కాదు, భారతదేశ భవిష్యత్తుకు ఆశాజ్యోతులుగా మీరు నిలవాలని నేను కోరుతున్నాను. నా దృష్టిలో దేశ పరిపాలనలోను, ఏ రంగంలో అయినా దేశ పురోగతిలోనూ మీరంతా భాగస్వాములే. భారతదేశం స్వాతంత్ర్య శత వార్షికోత్సవాల దిశగా 2047 నాటికి వికసిత్ భారత్ దిశగా సాగించే ప్రయాణంలో మీరంతా అత్యంత కీలకమైన చోదక శక్తులుగా నిలవాలి.
ఈ అద్భుత ప్రయాణానికి మీరే సారథులు. ముందుగా కాకపోయినా 2047 నాటికి వికసిత్ భారత్ సాకారం అవుతుంది. అందుకే నా యువ మిత్రులారా మనం ఎదుర్కొంటున్న సంక్లిష్టమైన సవాళ్ల నుంచి వెలుపలికి రావడానికి మీ నైపుణ్యాలు ఉపయోగించండి. సమాజం యావత్తుకు ఆచరణీయమైన పరిష్కారాలు అందించడానికి ప్రభుత్వ సంస్థలు, పరిశ్రమలో సహకరించండి.
ప్రభుత్వ సర్వీసులో మాత్రమే చేరాలన్న భావంలో చిక్కుకుపోకండి. కోచింగ్ సెంటర్లకు పరుగులు తీయకండి. ఇతర రంగాల్లో అవకాశాలు పుష్కలంగా, మరింత ఉత్పాదకంగా ఉన్నాయి. అందుకే ఈ బంధనాల్లో చిక్కుకోకండి.
ఆ రంగాలు మీ నైపుణ్యాలను, జ్ఞానాన్ని పరీక్షిస్తాయి. మిమ్మల్ని నవకల్పనలు, పరిశోధన బాటలో నడుపుతాయి. ఈ రంగంలో నైపుణ్యం లేదా పరిజ్ఞానం ఉన్న వ్యక్తి ప్రభుత్వ ఉద్యోగాలకు ఎందుకు పరుగులు తీయాలి, ఆలోచించండి.
మీ వృత్తిలో అత్యున్నత నైతిక ప్రమాణాలు, సమగ్రత పాటించాలని నేను ఈ రంగంలోని ప్రతి విద్యార్థిని, వృత్తి నిపుణుడిని అభ్యర్థిస్తున్నాను. మీరు ఏ మాత్రం అలసత్వం వహించినా ఉగ్రవాదులు తప్పించుకుంటారు. అమాయకులు జైళ్లకు, ఉరికంబాలకు చేరతారు. సత్యం మాత్రమే మీ పనికి గీటురాయిగా తీసుకోండి. ఎలాంటి పక్షపాతం, రాజీ లేకుండా న్యాయం అందేలా చూడండి.
నైతికంగా బలహీనం అయితే ఫోరెన్సిక్ నైపుణ్యాలు ఒక పెద్ద కొండలా, అందుకోలేనివిగా కనిపిస్తాయి. అందుకే ఎల్లప్పుడూ ఫోరెన్సిక్ విశ్లేషణలో నిజాయతీకి కట్టుబడండి. ఈ సైన్స్ ను మరింత అభివృద్ధి పథంలో నడిపేందుకు, భావి ఆలోచనలను ప్రేరేపించడానికి అధ్యాపకులు, పరిశోధకులు చేస్తున్న నిరంతర కృషిని నేను అభినందిస్తున్నాను.
మరింత న్యాయబద్ధమైన, సమానత్వంతో కూడిన సమాజానికి మీ కృషి పునాది అవుతుంది. అందుకు ఈ సమాజం మీకెంతో రుణపడి ఉంటుంది. నేను ప్రపంచం అంతటా పర్యటించాను. భారతదేశం పట్ల గౌరవ భావం గల వ్యక్తులను చూశాను.
నేను కలిసిన వారిలో భారతదేశం పేరు చెబితేనే ఒక రకమైన పులకరింత కలిగింది. శతాబ్దాల క్రితం భారత్ విశ్వగురు స్థానంలో నిలిచిన విషయం తెలిసిందే. తిరిగి దేశాన్ని ఆ స్థానంలో నిలిపే దిశగా మనం వేగంగా అడుగేస్తున్నాం. సైన్స్ మార్గదర్శకంలో శక్తివంతం, సురక్షితం, సుసంపన్నం అయిన భారత్ ను మనందరం కలిసికట్టుగా నిర్మించుకుందాం.
మీ జీవితం, కెరీర్ ఉజ్వలంగా ఉండాలని నేను ఆకాంక్షిస్తున్నాను.
ధన్యవాదాలు.
***
(Release ID: 2048835)
Visitor Counter : 19