কেন্দ্রগী গৃহ মন্ত্রী অমসুং কোওপরেসন মন্ত্রী শ্রী অমিত সাহনা ঙসি রাইপুরদা নার্কোতিক্স কন্ত্রোল বৃউরো (NCB) গী জোনেল য়ুনিত ওফিস ভর্চুএল ওইনা শঙ্গাখ্রে‍। শ্রী অমিত সাহনা ছত্তিসগরগী নার্কোতিক্কী ওইরিবা ফীভমমগী মরমদা য়েংশিন মীফম অমসু পাঙথোকখি‍। ছত্তিসগরগী মুখ্য মন্ত্রী শ্রী বিষ্ণুদেব সাই, কেন্দ্রগী গৃহ রাজ্য মন্ত্রী শ্রী নিত্যানন্দ রাই, ছত্তিসগরগী উপ মুখ্য মন্ত্রী শ্রী বিজয় শর্ম, কেন্দ্রগী হোম সেক্রেতরী, দাইরেক্তর, ইন্তলিজেন্স ব্যুরো, দাইরেক্তর জেনেরেল NCB, ছত্তিসগরগী চীফ সেক্রেতরী অমসুং দাইরেক্তর জেনেরেল ওফ পুলিসসু থৌরমদুদা শরুক য়াখি‍।

মহাক্কী ৱারোলদা, কেন্দ্রগী গৃহ মন্ত্রীনা, ভারতকী নীংতম্বগী চহি চাম্মশুবা, ২০৪৭ ফাওবদা দ্রগ-ফ্রী ভারত অমা পুরক্নবগী প্রধান মন্ত্রী শ্রী নরেন্দ্র মোদীগী ফিরেপ ঙসিদি লৈবাকসিগী মীপুম খুদিংমক্কী ফিরেপ ওইরক্লে হায়খি‍। দ্রগ—ফ্রী ভারত অমগী ফিরেপ অসি নুংঙাই য়াইফবা, শাফবা অমসুং অথোইবা ভারত অমা শেমগৎপদা য়াম্না মরু ওই হায়না মহাক্না হায়খি‍। দ্রগ অসি ভারতখক্তগী নত্তনা মালেমগী ওইবা অচৌবা খুদোংথিবা অমনি হায়না শ্রী সাহনা হায়খি‍।

করিগুম্বা ঐখোয়না দ্রগকী মায়োক্তা থেংনরিবা লান্থেং অসি ইচঙ থৌনা, লুম্না লৌদুনা অমসুং মপুং ফাবা লাল্লোং অমগা লোয়ননা চঙশিল্লবদি লান্থেং অসি ঐখোয়না মায় পাকপা ঙমগনি‍। ভারত্তা নার্কোতিক্সকী ইলিসিত ত্রাফিক্কিংনা নেস্নেল সিক্যুরিতীদা শাথিনা শোকহল্লি হায়না মহাক্না হায়খি‍। অরান্বা মওংদা দ্রগ লল্লোন্বদগী লাকপা শেনফম্না তেরোরিজম অমসুং লেফ্ত ৱিং এক্সত্রিমিজম য়োকখৎলি অমসুং লৈবাকসিগী শেন্মিৎলোন মপাঙ্গল শোন্থহল্লি‍। দ্রগনা লৈবাকসিগী নহা মীরোলবু মাঙহন্বতা নত্তনা লৈবাকসিগী ঙাকশেল থৌরাংবুসু মপাঙ্গল শোন্থহল্লি হায়না মহাক্না ফোঙদোকখি‍।

পুম্নমক্না নার্কোতিক্সকী মায়োক্তা জিরো তোলোরেন্সকী পোলিসী মাঙদা পুখৎকদবনি অমসুং দ্রগ-ফ্রী ভারত অমগী মোদী জীগী ফিরেপ্পু মপুং ফাহনগদবনি হায়না কেন্দ্রগী গৃহ অমসুং কোওপরেসন মন্ত্রীনা হায়খি‍।

ঙসি NCB গী রাইপুর জোনেল ওফিস শঙ্গারে হায়না শ্রী অমিত সাহনা হায়খি‍। ওফিস অসিনা স্তেত অসিদা খক্তা নত্তনা মায়কৈ অসোমদা নার্কোতিক লাকশিন্বদা মরুওইবা থৌদাং অমা য়াগনি হায়না মহাক্না মখা তাখি‍। ঐখোয়গী পান্দমদি লৈবাকসিগী স্তেত খুদিংদা NCB লৈহন্বদুনি হায়না শ্রী সাহনা হায়খি‍। মোদী লৈঙাক্না স্তেত খুদিংদা NCBগী ওফিসশিং লিংখৎকনি অমসুং স্তেত লৈঙাকশিংগী মতেঙগা লোয়ননা দ্রগ লল্লোনবা মুত্থৎকনি হায়না মহাক্না মখা তাখি‍।

কেন্দ্রগী গৃহ মন্ত্রীনা ঙসিদি দ্রক ত্রাফিক্কিংগী মওং মতৌ হোংলক্লি অমসুং মহৌশাগী ওইবা দ্রগতগী খুৎশেমগী দ্রগতা মায় ওনশিল্লক্লি হায়খি‍। ছত্তিসগরদা সিদেতিব শীজিন্নবগী চাং অসি চাদা ১.৪৫নি, মসি লৈবাক্কী ওইবা চাংচত্তগী হেল্লি অমসুং গঞ্জা শীজিন্নগী চাংনা চাদা ৪.৯৮নি, মসিসু লৈবাক্কী ওইবা চাংচত্তগী হেল্লিবনি‍ হায়না মহাক্না হায়খি‍।

শ্রী অমিত সাহনা দ্রগ ত্রাফিক্কিং কেসশিংদা সাইন্তিফিক ওইবা থৌওংশিং শীজিন্নবগী ৱাফম থমখি‍। ঐখোয়না ‘মতোন্দগী মখোঙ ফাওবা অমসুং মখোঙদগী মতোন ফাওবা’ হায়রিবা থৌওংসিদা চঙশিন্দুনা নেতৱর্ক পুম্বা মীনুংশি লৈতনা থুগাইবা মথৌ তাই হায়না মহাক্না হায়খি‍। ঐখোয়না নেতৱর্ক পুম্বদা লান্দাদ্রবদি, ঐখোয়না দ্রগ-ফ্রী ভারতকী পান্দম ফংবা ঙম্লোই হায়না শ্রী সাহনা হায়খি‍।

কেন্দ্রগী গৃহ মন্ত্রীনা দ্রগ শীজিন্নরিবা মীওইদু ভিক্তিম অমনি অদুগা মসিবু লল্লোল্লিবা মীওইদুনা ক্রিমিনেলনি হায়খি‍। ঐখোয়না থেংনরিবা লান্থেং অসি দ্রগ থিদোকপা, নেতৱর্ক থুগাইবা, মরাল লৈবা মীওইশিং ফাজিন্বা অমসুং ভিক্তিমশিং রিহেবিলিতেত তৌবা হায়রিবা পরম মরি অসি ইল্লবা মতমদতা মায় পাকপা ঙমগনি হায়না মহাক্না হায়খি‍। দ্রগকী মায়োক্তা থেংনরিবা লান্থেং অসিদা লৈঙাক্না মপুং ফানা চঙশিন্বগী থৌওং পায়খৎলবতদা ঐখোয়না মপুং ফানা মায় পাকপা ঙমগনি হায়না মহাক্না মখা তাখি‍।

NCB গী পর্ফোর্মেন্স হৌখিবা চহি ১০সিদা প্রধান মন্ত্রী শ্রী নরেন্দ্র মোদীগী লুচিং মখাদা য়াম্না ফরি হায়না শ্রী অমিত সাহনা হায়খি‍। ২০০৪ দগী ২০১৪ ফাওবগী চহি ১০সিদা অপুন্বা কেস ১২৫০ রেজিস্তর তৌখি অদুগা ২০১৪ দগী ২০২৪ ফাওবদনা কেস ৪১৫০ লৌখত্তুনা ২৩০% হেনগৎলক্লে‍। ২০০৪ দগী ২০১৪ ফাওবদা মীওই ১,৩৬০ ফাখি, অদুগা হৌজিক্না মীওই ৬,৩০০ ফাখ্রে‍। মতৌ অসুম্না, ২০০৪ দগী ২০১৪ ফাওবদা দ্রগ কেজি লাখ ১ লিশিং ৫২ ফাগৎখি অদুগা ২০১৪ দগী ২০২৪ ফাওবদনা কেজি লাখ ৫, লিশিং ৪৩ ফাগত্তুনা ২৫৭% হেনগৎখি‍। ২০০৪ দগী ২০১৪ ফাওবদা ফাগৎখিবা দ্রগকী মমল লুপা করোর ৫,৯০০ ওইখি অদুগা ২০১৪ দগী ২০০২৪ ফাওবদা ফাগৎখিবা দ্রগকী মমল লুপা করোর ২২,০০০ ওইখি‍ হায়না মহাক্না হায়খি‍। প্রধান মন্ত্রী মোদীগী লুচিং মখাদা, ঐখোয়না দ্রগকী মায়োক্তা থেংনরিবা লান্থেং অসি মওং মরিল নাইনা চহি ১০সিদা মপুং ফাবা থাক অমদা পুরকপা ঙম্লে হায়না শ্রী সাহনা হায়খি‍। প্রধান মন্ত্রী মোদীগী দ্রগ-ফ্রী ভারত অমগী পান্দম ফংবা ঙম্নবগীদমক, থেংনরিবা লান্থেং অসি লৈবাকসিগী নহা অমসুং মীচম মীয়ামগী মরক্তা এৱ্যারনেস হেনগৎহন্দুনা ‘জন অন্দোলন’ অমা ওইহন্বা তাই হায়না মহাক্না মখা তাখি‍।

কেন্দ্রগী গৃহ মন্ত্রীনা NCORD মেকানিজমগী মখাদা থাক ৪ মক্তা চাং নাইনা মীফম পাঙথোকপা মথৌ তাই হায়খি‍। হন্দক্তা হৌদোকখিবা MANAS পোর্তেল অসি পুম্নমক্না শীজিন্নগদবনি হায়না মহাক্না হায়খি‍। শ্রী সাহনা স্তেত পুম্নমক্তা দ্রগ ফাইনান্সিংগী মরমদা থিজিন্বদা লৈঙাক্কী এজেন্সী পুম্নমক্কী মতেঙ লৌগদবনি হায়খি‍। শ্রী সাহনা জোইন্ত কোওর্দিনেসন কম্মিতীবু চাং নাইনা শীজিন্নবগী মথৌ তাই হায়বা ৱাফমসু মহাক্না থমখি‍। দ্রগকী নেতৱর্ক পুম্বা থুগাইনবগীদমক ইন্তর-স্তেত কেসশিং NCB শিন্নগদবনি হায়না মহাক্না হায়খি‍।

*****