ڈیفنس ریسرچ اینڈ ڈیولپمنٹ آرگنائزیشن (ڈی آر ڈی او) نے بھارتی فضائیہ(آئی اے ایف) کے سو-30 ایم کے - I  پلیٹ فارم سے لانگ رینج گلائیڈ بم (ایل آر جی بی)، گورَو کی پہلی پرواز کا کامیاب تجربہ کیا ہے۔ یہ ٹیسٹ اوڈیشہ کے ساحل پر کیا گیا۔

گورَوایک فضائی لانچ کیا گیا 1,000 کلوگرام کلاس گلائیڈ بم ہے جو طویل فاصلے تک اہداف کو نشانہ بنانے کی صلاحیت رکھتا ہے۔ لانچ ہونے کے بعد، گلائیڈ بم آئی این ایس اور جی پی ایس ڈیٹا کے امتزاج کے ساتھ انتہائی درست ہائبرڈ نیویگیشن اسکیم کا استعمال کرتے ہوئے ہدف کی طرف بڑھتا ہے۔ گورَو کو ریسرچ سینٹر امارات (آر سی آئی)، حیدرآباد نے مقامی طور پر ڈیزائن اور تیار کیا ہے۔

فلائٹ ٹیسٹ کے دوران، گلائیڈ بم نے لانگ وہیلر کے جزیرے پر کھڑے ہدف کو درستگی کے ساتھ نشانہ بنایا۔ ٹیسٹ لانچ کے دوران فلائٹ کا مکمل ڈیٹا ٹیلی میٹری اور الیکٹرو آپٹیکل ٹریکنگ سسٹمز کے ذریعے حاصل کیا گیا جو ساحلی پٹی کے ساتھ مربوط ٹیسٹ رینج کے ذریعے تعینات کیا گیا تھا۔ پرواز کی نگرانی ڈی آر ڈی او کے سینئر سائنسدانوں نے کی۔ اڈانی ڈیفنس اور بھارت فورج، ڈیولپمنٹ کم پروڈکشن پارٹنرز نے بھی فلائٹ ٹرائل کے دوران حصہ لیا۔

وزیر دفاع جناب راج ناتھ سنگھ نے کامیاب فلائٹ ٹیسٹ کے لیے ڈی آر ڈی او، آئی اے ایف اور صنعت کی تعریف کی۔ انہوں نے اسے مسلح افواج کی صلاحیت کو مزید مستحکم کرنے کے لیے ملکی دفاعی ٹیکنالوجی کی تیاری میں ملک کی کوششوں میں ایک اہم سنگ میل قرار دیا۔

دفاعی تحقیق و ترقی کے محکمے کے سکریٹری اور چیئرمین ڈی آر ڈی او، ڈاکٹر سمیر وی کامت نے ایل آر جی بی کے کامیاب فلائٹ ٹیسٹ کرنے پر ڈی آر ڈی او کی پوری ٹیم کو مبارکباد دی۔

****

 (ش ح –ا ب ن۔ م ف)

U.No:9787