ভাৰতৰ বাবে এক গুৰুত্বপূৰ্ণ সাংস্কৃতিক সফলতাত অসমৰ “মৈদাম– আহোম ৰাজবংশৰ টিলা-সমাধি ব্যৱস্থা”ক আনুষ্ঠানিকভাৱে ইউনেস্কোৰ বিশ্ব ঐতিহ্য তালিকাত সন্নিবিষ্ট কৰা হৈছে। আজি ২৬ জুলাই, ২০২৪ তাৰিখে নতুন দিল্লীত চলি থকা বিশ্ব ঐতিহ্য সমিতিৰ ৪৬ সংখ্যক অধিৱেশনৰ সময়ত এই ঘোষণা কৰা হয়। ফলত ইয়াক ভাৰতৰ পৰা ইয়াত অন্তৰ্ভুক্ত ৪৩ সংখ্যক সম্পত্তিত পৰিগণিত কৰে।

১৯৮৫ চনত প্ৰাকৃতিক শ্ৰেণীৰ অন্তৰ্গত কাজিৰঙা ৰাষ্ট্ৰীয় উদ্যান আৰু মানস বন্যপ্ৰাণী অভয়াৰণ্যৰ পিছত অসমৰ এইটো তৃতীয় বিশ্ব ঐতিহ্য সম্পত্তি।বিশাল স্থাপত্যৰ জৰিয়তে ৰাজকীয় বংশ উদযাপন আৰু সংৰক্ষণ কৰা চৰাইদেউৰ মৈদামসমূহইজিপ্তীয় ফাৰো পিৰামিড আৰু প্ৰাচীন চীনৰৰাজকীয় কবৰৰ সৈতে তুলনাযোগ্য।

ইউনেস্কোৰ তালিকাত এই ঐতিহ্যস্থানবোৰ অন্তৰ্ভুক্ত কৰাৰ উদ্দেশ্য হৈছে ১৯৫খন দেশত সাংস্কৃতিক, প্ৰাকৃতিক আৰু মিশ্ৰিত সম্পত্তিত পোৱা অ'ইউভি (অসামান্য সাৰ্বজনীন মূল্যবোধ)ৰ ওপৰত আধাৰিত অংশীদাৰী ঐতিহ্য সংৰক্ষণ আৰু প্ৰচাৰ কৰা। ইয়াৰ অংশস্বৰূপেভাৰত ২০২১-২৫ বৰ্ষৰ বাবে বিশ্ব ঐতিহ্য সমিতিৰ সদস্য হৈছিল আৰু ১৯৭২ চনৰ ইউনেস্কোৰ বিশ্ব ঐতিহ্য সন্মিলনত যোগদান কৰাৰ পিছত বৰ্তমান প্ৰথমবাৰৰ বাবে অধিৱেশন আয়োজন কৰি আছে। বিশ্ব ঐতিহ্য সমিতিৰ ৪৬ তম অধিৱেশন ২১ জুলাইত আৰম্ভ হৈছিল আৰু ৩১ জুলাইলৈকে নতুন দিল্লীৰ ভাৰত মণ্ডপত চলিব।

এই বাৰ্ষিক বৈঠকত ১৫০খনতকৈও অধিক ৰাষ্ট্ৰৰ প্ৰতিনিধিয়ে অংশগ্ৰহণ কৰে, যিসকলইউনেস্কোৰ বিশ্ব ঐতিহ্য চুক্তিৰ স্বাক্ষৰকাৰী আৰু নতুন স্থানৰ শিলালিপিকে ধৰি বিশ্ব ঐতিহ্যৰ সৈতে জড়িত বিষয়সমূহ পৰিচালনাৰ বাবে দায়বদ্ধ।

এই ঘোষণাৰ পিছত এখন সংবাদমেলত কেন্দ্ৰীয় সাংস্কৃতিক আৰু পৰ্যটন মন্ত্ৰী শ্ৰী গজেন্দ্ৰ সিং শ্বেখাৱটে কয় যে এই ঐতিহাসিক স্বীকৃতিয়ে অসম আৰু ভাৰতৰ সমৃদ্ধ সাংস্কৃতিক ঐতিহ্যত আলোকপাত কৰি চৰাইদেউত থকা আহোম ৰজাসকলৰ ৭০০ বছৰ পুৰণি টিলা সমাধি ব্যৱস্থাৰ প্ৰতি সমগ্ৰ বিশ্ব দৃষ্টি আকৰ্ষণ কৰে। এই সন্মানীয় স্বীকৃতিৰ দিশত মৈদামৰ যাত্ৰাৰ নেতৃত্ব দিছিল প্ৰধানমন্ত্ৰী শ্ৰী নৰেন্দ্ৰ মোদীয়ে, যি ২০২৩ চনত এই প্ৰাচীন গাঁথনিসমূহক ভাৰতৰ আনুষ্ঠানিক প্ৰৱেশ হিচাপে মনোনীত কৰিছিল। এই মনোনয়নে মৈদামবোৰৰ সাংস্কৃতিক আৰু ঐতিহাসিক তাৎপৰ্যক সূচায়, যাৰ ফলত এয়া প্ৰথম সাংস্কৃতিক ঐতিহ্য ক্ষেত্ৰ আৰু উত্তৰ-পূৰ্বাঞ্চলৰ তৃতীয়খন স্থান হিচাপে বিশ্ব ঐতিহ্য তালিকাত অন্তৰ্ভুক্ত হৈছে বুলি তেওঁ কয়।

মন্ত্ৰীগৰাকীয়ে জানিবলৈ দিয়ে যে ভাৰতে যোৱা এটা দশকত সফলতাৰে ১৩ টা বিশ্ব ঐতিহ্য সম্পত্তি লিপিবদ্ধ কৰিছে আৰু এতিয়া সৰ্বাধিক সংখ্যক বিশ্ব ঐতিহ্য সম্পত্তিৰ বাবে বিশ্বৰষষ্ঠ স্থানত আছে। এই গোলকীয় স্বীকৃতি বিশ্ব মঞ্চত ভাৰতৰ ঐতিহ্যক আলোকপাত কৰাৰ নতুন ভাৰতৰ নিৰন্তৰ প্ৰচেষ্টাৰ প্ৰমাণ।

মন্ত্ৰীগৰাকীয়ে লগতে উল্লেখ কৰে যে ইউনেস্কোৰ বিশ্ব ঐতিহ্য তালিকাত মৈদামবোৰৰ অন্তৰ্ভুক্তি ইয়াৰ অসামান্য সাৰ্বজনীন মূল্যৰ প্ৰমাণ। আন্তৰ্জাতিক স্মৃতিস্তম্ভ আৰু স্থান পৰিষদে (আই.চি.ও.এম.ও.এছ.) এক সাংস্কৃতিক পৰম্পৰাৰ প্ৰতি মৈদামবোৰৰ ব্যতিক্ৰমী সাক্ষ্য আৰু মানৱ ইতিহাসৰ গুৰুত্বপূৰ্ণ পৰ্যায়ৰ প্ৰতিনিধিত্বৰ ওপৰত আলোকপাত কৰে। এই স্বীকৃতিয়ে ঐতিহাসিক সম্পদসমূহ সংৰক্ষণৰ ক্ষেত্ৰত ভাৰতীয় প্ৰত্নতাত্ত্বিক জৰীপ (এ এছ আই)আৰু অসম চৰকাৰৰ প্ৰচেষ্টাক আলোকপাত কৰে, মন্ত্ৰীগৰাকীয়ে কয়।

শ্ৰী শেখাৱটে এই কথাত গুৰুত্ব আৰোপ কৰে যে ভাৰতত প্ৰচুৰ পৰিমাণে থকা এনে কীৰ্তিচিহ্নসমূহৰ সংৰক্ষণৰ প্ৰসাৰ কৰাটো অতি গুৰুত্বপূৰ্ণ। ইউনেস্কোৰ বিশ্ব ঐতিহ্য ক্ষেত্ৰ হিচাপে মৈদামবোৰৰ স্বীকৃতিয়ে ভৱিষ্যত প্ৰজন্মৰ বাবে আমাৰ সাংস্কৃতিক ঐতিহ্য সংৰক্ষণৰ গুৰুত্বৰ স্মাৰক হিচাপে কাম কৰিব। এই স্থানসমূহ ভ্ৰমণ আৰু সমৰ্থন কৰি আমি ইয়াৰ সংৰক্ষণ আৰু ভাৰতৰ চহকী আৰু বৈচিত্ৰময় ইতিহাসৰ বিস্তৃত আখ্যানত অৰিহণা যোগাইছো, তেওঁ কয়।

মৈদামৰ বিষয়ে– আহোম ৰাজবংশৰ টিলা-সমাধি ব্যৱস্থা

উত্তৰ-পূব ভাৰতৰ টাই-আহোমৰ দ্বাৰা সৃষ্টি কৰা ৰাজকীয় টিলা সমাধিস্থল মৈদামবোৰ পূব অসমৰ পাটকাই প্ৰদেশৰ পাদদেশত অৱস্থিত। এই সমাধিৰ স্তূপবোৰক টাই-আহোমসকলে পবিত্ৰ বুলি গণ্য কৰে আৰু ইয়াৰ দ্বাৰা তেওঁলোকৰ একক অন্ত্যেষ্টিক্ৰিয়াৰ প্ৰথা প্ৰতিফলিত হয়। ত্ৰয়োদশ শতিকাত টাই-আহোম লোকসকলে অসমত উপস্থিত হৈ চৰাইদেউক তেওঁলোকৰ প্ৰথম নগৰ হিচাপে প্ৰতিষ্ঠা কৰি ৰাজকীয় সমাধিস্থল হিচাপে প্ৰতিষ্ঠা কৰিছিল। ১৩ শতিকাৰ পৰা ১৯ শতিকালৈকে ৬০০ বছৰ ধৰি টাই-আহোমসকলে পাহাৰ, অৰণ্য, পানীৰ দৰে প্ৰাকৃতিক উপাদান ব্যৱহাৰ কৰি মৈদাম বা "আত্মাৰ বাবে ঘৰ" নিৰ্মাণ কৰি এক পবিত্ৰ ভূগোল সৃষ্টি কৰিছিল।

তেওঁলোকৰ ৰজাসকলক ঐশ্বৰিক বুলি বিশ্বাস কৰি টাই-আহোমসকলে ৰাজকীয় সমাধিৰ বাবে মৈদাম নিৰ্মাণৰ এক সুকীয়া অন্ত্যেষ্টিক্ৰিয়াৰ পৰম্পৰা গঢ়ি তুলিছিল। এই টিলাবোৰ প্ৰথমে কাঠেৰে আৰু পিছলৈ শিল আৰু পোৰা ইটাৰে নিৰ্মাণ কৰা হৈছিল, যিটো আহোমসকলৰ পৰম্পৰাগত নীতিগত সাহিত্য চাংৰুং ফুকনত নথিভুক্ত কৰা হৈছে। টাই-আহোম সমাজৰ শ্ৰেণীভিত্তিক গাঁথনিৰ প্ৰতিফলন ঘটাই ৰাজকীয় শেষকৃত্য অনুষ্ঠানবোৰ আনুষ্ঠানিকভাৱে অনুষ্ঠিত কৰা হৈছিল।

বিংশ শতিকাৰ আৰম্ভণিৰ ধন-সম্পত্তি আক্ৰমণকাৰীসকলৰ প্ৰত্যাহ্বান স্বত্বেও ভাৰতীয় প্ৰত্নতাত্ত্বিক জৰীপ আৰু অসম ৰাজ্যিক পুৰাতত্ব বিভাগে চৰাইদেউৰ অখণ্ডতা পুনৰুদ্ধাৰ আৰু সংৰক্ষণৰ বাবে সহযোগিতা আগবঢ়াইছে। কেন্দ্ৰীয় আৰু ৰাজ্যিক দুয়োটা নিয়মৰ পৰা সুৰক্ষা লাভ কৰি ইয়াৰ গাঁথনিগত অখণ্ডতা আৰু সাংস্কৃতিক স্বকীয়তা ৰক্ষাৰ বাবে ঠাইখনৰ ভালদৰে ৰক্ষণাবেক্ষণ কৰা হৈছে।

https://drive.google.com/file/d/1rtKMVjRWIkiUr4UbGJQfYqGY3NmcZr2Z/view?usp=drivesdk

বিশ্ব ঐতিহ্য সমিতিৰ ৪৬সংখ্যক অধিৱেশন

২০২৪ চনত বিশ্ব ঐতিহ্য সমিতিৰ ৪৬ সংখ্যক অধিবেশনত সমগ্ৰ বিশ্বৰ বিভিন্ন প্ৰান্তৰ পৰা অহা ২৭টা মনোনয়ন পৰীক্ষা কৰা হৈছে, য’ত ১৯টা সাংস্কৃতিক, ৪টা প্ৰাকৃতিক, ২টা মিশ্ৰিত স্থানআৰু ২টা বৰ্তমানৰ সীমাৰ উল্লেখযোগ্য পৰিৱৰ্তন। ভাৰতৰ মৈদামবোৰ- আহোম ৰাজবংশৰ টিলা-সমাধি ব্যৱস্থাক এইবাৰ ভাৰতৰ পৰা সাংস্কৃতিক সম্পত্তিৰ শিতানত আনুষ্ঠানিকভাৱে প্ৰেৰণ কৰা হৈছিল।

বিশ্ব ঐতিহ্য সমিতিৰ ৪৬ সংখ্যক অধিৱেশনৰ উদ্বোধনী অনুষ্ঠানত প্ৰধানমন্ত্ৰী শ্ৰী নৰেন্দ্ৰ মোদীৰ উপৰিইউনেস্কোৰ সঞ্চালকপ্ৰধান শ্ৰীমতী আড্ৰেই আজৌলে, বৈদেশিক পৰিক্ৰমা মন্ত্ৰী ড০ এছ জয়শংকৰ আৰু সাংস্কৃতিক আৰু পৰ্যটন মন্ত্ৰী শ্ৰী গজেন্দ্ৰ সিং শ্বেখাৱটউপস্থিত থাকে। এই অনুষ্ঠানত বিভিন্ন দেশৰ সাংস্কৃতিক মন্ত্ৰী,ৰাষ্ট্ৰদূত আৰু বিভিন্ন ৰাজ্যিক চৰকাৰৰ সাংস্কৃতিক মন্ত্ৰীসকলেও অংশগ্ৰহণ কৰে।

****

BeenaYadav/KD