కేంద్ర సచివాలయంలో 2019-2024 మధ్యకాలంలో ‘ఈ- ఆఫీస్’కి ప్రాముఖ్యం పెరిగి, 37 లక్షల దస్త్రాలు (దాదాపు 94 శాతం) ఈ-ఫైళ్ల రూపంలో చలామణి కాగా, 95 శాతం మేర ఫైళ్లను ఎలెక్ట్రానిక్ రూపంలో స్వీకరించారు. ‘ఈ- ఆఫీస్’ విధానం మరింత సమర్ధవంతంగా అమలు చేసేందుకు ప్రభుత్వం ‘ఈ-ఆఫీస్ అనలిటిక్స్’ను అభివృద్ధి పరిచింది. కేంద్ర సచివాలయంలో  ‘ఈ- ఆఫీస్’ వేదిక విజయవంతంగా అమలు కావడంతో, ‘డి.ఏ.ఆర్.పీ.జీ. 100-రోజుల కార్యక్రమం’ లో భాగంగా అన్ని అటాచ్డ్, అనుబంధ కార్యాలయాల, స్వయంప్రతిపత్తి సంస్థలలో ఈ విధానాన్ని ప్రవేశపెట్టాలని కేంద్ర ప్రభుత్వం నిర్ణయించింది. అంతర్ మంత్రిత్వ శాఖల సమావేశం అనంతరం 133 అటాచ్డ్, అనుబంధ కార్యాలయాలు, స్వయంప్రతిపత్తి కల సంస్థలను ‘ఈ-ఆఫీస్’  విధాన అమలు నిమిత్తం గుర్తించారు.  ‘ఈ-ఆఫీస్’  విధానం అమలు కోసం డి.ఏ.ఆర్.పీ.జీ. అటాచ్డ్, అనుబంధ కార్యాలయాలు, స్వయంప్రతిపత్తి సంస్థలకు  24 జూన్ 2004 న మార్గదర్శకాలను జారీ చేసింది.

డి.ఏ.ఆర్.పీ.జీ. కార్యదర్శి శ్రీ వీ. శ్రీనివాస్ అధ్యక్షతన జరిగిన అంతర్ మంత్రిత్వ శాఖల సమావేశంలో ‘ఈ- ఆఫీస్’  విధానం అమలుకు సంబంధించిన విధి విధానాలను, సాంకేతిక అంశాలనూ చర్చించారు. సమావేశానికి అన్ని మంత్రిత్వ శాఖల/విభాగాల అధికారులు, 133 అటాచ్డ్, అనుబంధ కార్యాలయాలు, స్వయంప్రతిపత్తి సంస్థల  సీనియర్ అధికారులు పాల్గొన్నారు. ఎన్.ఐ.సీ. బృందానికి ప్రాతినిధ్యం వహించిన ఆ సంస్థ డిప్యూటీ డైరెక్టర్ జనరల్ శ్రీమతి రచనా శ్రీవాస్తవ, ‘ఈ- ఆఫీస్’ విధానం అమలులో ఎదురయ్యే సాంకేతిక అంశాలను గురించి వివరించారు. 

అన్ని మంత్రిత్వ శాఖలూ తమ పరిధిలోని  అటాచ్డ్, అనుబంధ కార్యాలయాలు, స్వయంప్రతిపత్తి సంస్థలతో సమన్వయం చేసుకుంటూ, నోడల్ అధికారుల నియమకం, డేటా కేంద్రాల ఏర్పాటు చేపట్టాలని, ప్రభుత్వ ‘100-రోజుల కార్యక్రమం’ లో భాగంగా ‘ఈ- ఆఫీస్’ అమలు  ప్రక్రియను నియమిత కాలంలో పూర్తి  చేసేందుకు వీలుగా తమకు అవసరమైన వాడకందారులు లైసెన్సుల సంఖ్య తెలియచేస్తూ ఎన్.ఐ.సీ. కి  అభ్యర్ధనలు పంపాలని కూడా నిర్ణయించారు.

***