কেন্দ্রগী গৃহ মন্ত্রী অমসুং কোওপরেসন মন্ত্রী শ্রী অমিত শাহনা ঙসি গুজরাতকী গান্ধীনগরদা 102শুবা মালেমগী কোওপরেতিবশিংগী নুমিৎ পালন তৌনবা পাঙথোকপা ‘সহকার সে সমৃদ্ধি’ (কোওপরেসনগী খুত্থাংদা চাউখৎপা) প্রোগ্রামদা ৱা ঙাংখ্রে। থৌরম অদুদা গুজরাতকী মুখ্য মন্ত্রী শ্রী ভুপেন্দ্র পতেল, অমসুং কোওপরেসন মন্ত্রালয়গী সেক্রেতরী য়াওনা অতৈ দিগনিতরীশিংনা শরুক য়াখি।

মহাক্কী ৱারোলদা শ্রী অমিৎ শাহনা হায়খি মদুদি ঙসি অসি বেঙ্গোল অমসুং কাশ্মীর অসি ভারতকী অপুনবা শরুক অমা ওইহন্নবগীদমক ঐখোয়না শ্যাম প্রসাদ মুখর্জীগী মফমদা থাগৎপা ফোঙদোকচরি। মহাক্না হায়খি মদুদি দা. মুখর্জীনা লৈবাক অমদা লেজিস্লেসন অনি, মকোক অনি অমসুং ফিরাল অনি লৈবগী মায়োক্তা ইহৌ হৌখিবা অমসুং মসিগীদমক লান্থেংনদুনা মহাক্কী পুন্সি কৎখি। শ্রী শাহনা হায়খি মদুদি ঙসি প্রধান মন্ত্রী শ্রী নরেন্দ্র মোদীগী লুচিং মখাদা কাশ্মীরদা আইন অনি (বিধান), মকোক অনি (প্রধান) অমসুং ফোরাল অনি (নিশান) লৈবগী মতম লোইখ্রে অমসুং চাউথোকচবা পোকপগা লোয়ননা মচু অহুমগী ফিরাল ৱাংনা পায়রি। মহাক্না হায়খি মদুদি ঙসি অসি বাবু জগজীবন রামজীগী মপোক কুমওনসুনি। মহাক্না লৈবাক অসিগী দলিতশিংগীদমক চাউখৎ থৌরাংগী প্রোগ্রাম কয়া হৌদোকখি অমসুং মাংলোমদা চংশিনখি। মহাক্না খুন্নাইগী নুংশি চান্নবগী য়ুম্ফম থোনখি অমসুং ধর্মগী ওইবা অহোংবা পুরকপগী মায়োক্তা লান্থেংনখি।

কোওপরেসন সেক্তরগা মরী লৈনবা মীওইশিং অমসুং শিন্মীশিংগীদমক ঙসি অসি য়াম্না মরু ওইবা নুমিৎ অমনি হায়না কেন্দ্রগী কোওপরেসন মন্ত্রীনা হায়খি। মহাক্না হায়খি মদুদি ঙসি প্রধান মন্ত্রী শ্রী নরেন্দ্র মোদীনা ইন্দিপেন্দেন্ত মিনিস্ত্রী ওফ কোওপরেসন অমা লিংখৎখ্রে। তোঙানবা কোওপরেসন মিনিস্ত্রী অমগী দিমান্দদা মমাংগী সরকারশিংনা করিগুম্বা অমত্তা মীৎয়েং চংখিদে হায়না মহাক্না হায়খি। মহাক্না হায়খি মদুদি গুজরাতকী লমদমদগী লাকপা শ্রী নরেন্দ্র মোদীনা, প্রধান মন্ত্রী ওইরবা মতুংদা, ঙসিগী মতম অসিদা কোওপরেসনগী তঙাইফদবা অদু খঙলদুনা মশাগী ওইবা কোওপরেসন মন্ত্রালয় অমা লিংখৎখি।

শ্রী অমিত শাহনা হায়খি ঙসি গুজরাত সরকারনা য়াম্না মরুওইবা ৱারেপ অমা লৌখ্রে অমসুং নেনো-য়ুরিয়া অমসুং নেনো- DAPদা চাদা 50গী সবসিদী অমা লাউথোকখ্রে। মহাক্না গুজরাত সরকারগী ৱারেপ অদুগীদমক থাগৎপা ফোঙদোকখি অমসুং লৌমীশিংনা নেনো-য়ুরিয়া অমখক্তং চাইবগী মথৌ তাই হায়না ফোঙদোকখি অমসুং মহৈ-মরোংশিং চাউখৎলকপা মতমদা মতুং তারকপদা লমশিংদা য়ুরিয়া হাপচিনবগী মথৌ তাদে হায়খি। শ্রী শাহনা হায়খি মদুদি লমদম অসিদা নেনো-য়ুরিয়া অমসুং নেনো- DAP চাইবনা পোত্থোক হেনগৎহনগনি অমসুং লৈহাও মাংহল্লোই। মহাক্না হায়খি মদুদি মোদী সরকারনা মখোয়বু মমল হন্থহল্লে অমসুং লৌমীশিংনা মখোয়বু শিজিন্নগদবনি। মহাক্না হায়খি মদুদি ভারত সরকারনা নেস্নেল কোওপরেতিব ওর্গানিক লিমিতেদ (NCOL ) লিংখৎখ্রে। মসিগী পান্দমদি ওর্গানিক প্রদক্তশিং প্রমোৎ তৌবা অমসুং ওর্গানিক ফার্মিং তৌরিবা লৌমীশিংদা মখোয়গী পোত্থোকশিংগী অচুম্বা মমল ফংহনবনি। শ্রী শাহনা হায়খি মদুদি ঙসি NCOL না ভারত ওর্গানিক আত্তা হৌদোকখ্রে। শ্রী শাহনা হায়খি অমুলনা দিল্লীদা ওর্গানিক প্রদক্তশিংগী দুকান অমসু হৌদোক্লে। মহাক্না হায়খি মদুদি ভারত ওর্গানিক অমসুং অমুল অনিমক থাজবা য়াবা অমসুং 100% ওর্গানিক ব্রান্দশিংনি। শ্রী শাহনা হায়খি মদুদি মালেমগী খ্বাইদগী অনৌবা তেক্নোলোজী শীজিন্নদুনা ওর্গানিক প্রদক্তশিং চাংয়েং তৌরবা মতুংদা ভারত ব্রান্দ স্তাম্প অসি নমখি।

কেন্দ্রগী গৃহ মন্ত্রী অমসুং কোওপরেসন মন্ত্রীনা হায়খি মদুদি কোওপরেসন অসি ভারত্তা অনৌবা ৱাখল্লোন অমা নত্তে অমসুং ঐখোয়গী অরিবা ইপা-ইপুশিংনা চহি 125গী মমাংগী ৱাখল্লোন অসিবু লৌশিনখি। মহাক্না হায়খি মদুদি সরদার পতেল, মহাত্মা গান্ধী, গাদগিলজী, বৈকুন্থভাই মেহতা অমসুং ত্রিবুবন্দাস পতেলগুম্বা শক্নাইরবা মীওই কয়ানা মসি হৌদোকখি। মহাক্না হায়খি মদুদি ৱাখল্লোন অসি তপ্না তপ্না হন্থরকপা মতম অমা লাকখি। শ্রী শাহনা হায়খি মদুদি প্রধান মন্ত্রী মোদীনা কোওপরেসনগী মরুওইবা খঙদুনা অনৌবা অমসুং নীংতম্বা কোওপরেসন মন্ত্রালয় অমা লিংখৎখি। মহাক্না হায়খি ঙসি ঐখোয়না মরুওইবা তাঙ্কক অমদা লৈরে অমসুং চহি 125গী কোওপরেতিব মুভমেন্তনা লৈবাক অসিগী তোঙান তোঙানবা মফমশিংদা অচৌবা থৌদাং লৌরি। মহাক্না হায়খি মদুদি কোওপরেতিব সেক্তরনা লৌউ-শিংউগী লোন য়েন্থোকপদা চাদা 20, ফর্তিলাইজর য়েন্থোকপদা চাদা 35 অমসুং পোত্থোক পুথোকপদা চাদা 21, সুগর পুথোকপদা চাদা 31, গমগী পোত্থোক পুথোকপদা চাদা 13 অমসুং ফৌগী পোত্থোক পুথোকপদা চাদা 20 শরুক তম্মি। মহাক্না হায়খি কোওপরেতিব সেক্তরনা খুঙ্গংগী অমসুং লৌউ-শিংউগী শেন্মিৎলোনদা য়াম্না মরু ওইবা থৌদাং অমা লৌরি। মহাক্না হায়খি মদুদি ঐখোয়না মথংগী চহি 5 দা কোওপরেসনগী মপাঙ্গল কনবা ফাউন্দেসন অমা থমগদবনি মদুদি কোওপরেসন অসিনা মথংগী চহি 125দা খুঙ্গং অমসুং য়ুমথোং খুদিংমক্তা য়ৌহনবা ঙমগনি।

শ্রী অমিত শাহনা হায়খি মদুদি কোওপরেতিবশিংগী খুত্থাংদা মোদী সরকারনা অনৌবা স্কিম অনি পুথোক্লে। মহাক্না হায়খি মদুদি সরকারনা ইথানোল প্রমোৎ তৌনবা অমসুং মহৈ-মরোং পুথোক্লিবা লৌমীশিংগী য়াইফনবা মরু ওইবা খোংথাং কয়া লৌখৎলি। মহাক্না হায়খি মদুদি সরকারগী অচৌবা কোওপরেতিব ইন্সতিত্যুসন অনি অসিনা লৌমীশিংনা পুথোকপা গেহু অদু ওনলাইনদা মিনিমম সপোর্ত প্রাইস (MSP) দা য়োল্লগনি অমসুং মদুদগী ইথানোল শেমগনি। মহাক্না হায়খি মদুদি মসিনা লৌমীশিংবু চাউখৎহনবতা নত্তনা পেত্রোলগী ইমপোর্ত হন্থহন্দুনা লৈবাক অসিগী ফোরেন এক্সচেঞ্জ রিজর্ব হেনগৎহনবদা মতেং পাংগনি। শ্রী শাহনা হায়খি মদুদি চপ মান্ননা, হৌজিক নেস্নেল এগ্রিকলচরেল কোওপরেতিব মার্কেতিং ফেদরেসন ওফ ইন্দিয়া (NAFED) অমসুং কঞ্জ্যুমর কোওপরেতিব ইন্সতিত্যুসনশিংসু মখল মরিগী পোল্সশিং MSP দা চাদা 100দা ফংহনখি। মহাক্না হায়খি মদুদি ঐখোয়না কোওপরেতিব ইন্সতিত্যুসনশিংগী মরক্তা কোওপরেসন হেনগৎহনগদবনি। কোওপরেতিব সেক্তরগী ইকনোমিক ত্রাঞ্জেক্সন পুম্নমক কোওপরেতিব সেক্তরগী মনুংদগী ঐখোয়না পাঙথোক্লবদি কোওপরেতিব সেক্তরগী মপান্দগী লুপা অমা ফাওবা পুরকপগী তঙাইফদবা লৈরোই হায়না মহাক্না হায়খি। কোওপরেসন মন্ত্রীনা নেস্নেল বেঙ্ক ফোর এগ্রিকলচর অমসুং রুরেল দিবেলপমেন্ত (NABARD) অমসুং লৈবাক শিনবা থুংনা লৈরিবা স্তেত কোওপরেতিব বেঙ্ক পুম্নমক্তা হায়খি মদুদি প্রাইমরী এগ্রিকলচর ক্রেদিৎ সোসাইতী (PACS) অমসুং অতোপ্পা কোওপরেতিব ইন্সতিত্যুসন খুদিংমক্না দিস্ত্রিক্ত কোওপরেতিব বেঙ্ক নৎত্রগা স্তেত কোওপরেতিব বেঙ্কতা মখোয়গী একাউন্ত হাংদোক্কদবনি। মসিনা কোওপরেতিব সেক্তরবু মপাঙ্গল কনখৎহনবতা নত্তনা কেপিতেল অমসুং থাজবসু হেনগৎহল্লগনি।

কেন্দ্রগী গৃহ মন্ত্রী অমসুং কোওপরেসন মন্ত্রীনা হায়খি মদুদি প্রধান মন্ত্রী শ্রী নরেন্দ্র মোদীনা লৈবাক অসিগী কোওপরেতিব সেক্তরদা 'সহকার সে সমৃদ্ধি'গী স্লোগান পীখ্রে। মহাক্না হায়খি মদুদি হৌখিবা চহি 10দা প্রধান মন্ত্রী মোদীনা মীওই করোর 30বু লায়রবগী মরক্তা লৈহন্দুনা মখোয়গী নুমিৎ খুদিংগী মথৌ তাবশিংগী পোৎলুমশিংদগী কোকহনখি। মহাক্না হায়খি মদুদি প্রধান মন্ত্রী মোদীনা লৈবাক অসিগী লায়রবা মীওই করোর কয়াদা য়ুম, মৈ, তোইলেৎ, থক্নবা ঈশিং, লেম্না চেং হৱাই কিলোগ্রাম 5 অমসুং গ্যাস সিলিন্দরগুম্বা খুদোংচাবশিং ফংহল্লে। শ্রী শাহনা হায়খি মদুদি হৌজিক্তি লায়রবা মীওই করোর কয়া অসিনা লৈবাক অসিগী চাউখৎ থৌরাংদা শরুক য়াবা পাম্মি অদুবু মখোয়গী মফমদা কেপিতেল লৈতে। মহাক্না হায়খি লৈবাক অসি চাউখৎহনবদা মতেং পাংনবা অমসুং কেপিতেল য়াওদনা মশাবু চাউখৎহনবগী অমত্তা ঙাইরবা পাম্বৈদি কোওপরেসননি। শ্রী শাহনা হায়খি মদুদি প্রধান মন্ত্রী শ্রী নরেন্দ্র মোদীনা পীরকপা 'সহকর সে সমৃদ্ধি'গী মন্ত্র অসিগী তুংদা লৈরিবা অমত্তা ঙাইরবা পান্দমদি নীংতম্বা ফংলবা চহি 75গী মতুংদসু শোত্থনা লৈরিবা মীওই করোর 30গী পুন্সিদা থাজবা, নুংঙাইবা অমসুং চাউখৎপা পুরকপা অসিনি।

কেন্দ্রগী কোওপরেসন মন্ত্রালয়না কোওপরেতিব সেক্তরগীদমক মরুওইবা খোঙথাং কয়া লৌখৎলি হায়না শ্রী অমিত শাহনা হায়খি। মহাক্না হায়খি মদুদি সরকারনা লৈবাক অসিদা রাজ্য নত্ত্রগা জিলা অমত্তদা মপাঙ্গল লৈরবা দিস্ত্রিক্ত কোওপরেতিব বেঙ্ক অমসুং মপাঙ্গল লৈরবা দিস্ত্রিক্ত মিল্ক প্রদ্যুসর য়ুনিয়ন লৈতবা লৈহন্দনবা পান্দম থম্লি। মহাক্না হায়খি মদুদি মসি পাংথোক্তুনা ঐখোয়না কোওপরেতিব সেক্তর পাকথোক চাউথোকহল্লগনি অমসুং খুঙ্গংগী অমসুং লায়রবা মীওই খুদিংমক চাউখৎহল্লগনি। মসিগীদমক্তা ঐখোয়না কোওপরেতিব পঞ্চায়ৎ অমগী ৱাখল্লোন থম্লে হায়না শ্রী শাহনা ফোঙদোকখি। মহাক্না হায়খি ঙসিসু লৈবাক অসিদা কোওপরেতিব ইন্সতিত্যুসন অমত্তা লৈতবা পঞ্চায়ৎ লাখ 2 লৈরি। মহাক্না হায়খি মদুদি ঐখোয়না পান্দম থম্লি মদুদি লাক্কদৌরিবা চহi 5দা ঐখোয়না হায়রিবা পঞ্চায়ৎ লাখ অনি অসিদা মল্তি-পরপজ PACS শেম্নবা ঐখোয়না থবক পায়খৎকনি। শ্রী শাহনা হায়খি মদুদি সরকারনা PACS গীদমক মোদেল বাইলোশিংসু শেমখ্রে অমসুং PACS অসি রাজ্যগী সবজেক্ত অমা ওইরবসু, কাশ্মীরদগী কন্যাকুমারী অমসুং অসামদগী দ্বারকা ফাওবগী রাজ্য খুদিংমক্না মোদেল বাই-লোশিং অসি অয়াবা পীখ্রে। শ্রী শাহনা হায়খি মদুদি সরকারনা PACSবু মল্তি-পর্পস ওইহন্নবা হোৎনরি অমসুং ঙসিদি লৈবাক অসিদা লৈরিবা ফঙ্কসনেল PACS 65,000 গী মনুংদা 48,000 না মখোয় মশাদা অনৌবা থবক থৌরমশিং হাপচিন্দুনা চৎনবা য়াবা ওইহন্নবা খোঙথাং লৌখৎলি।

কেন্দ্রগী কোওপরেসন মন্ত্রীনা হায়খি মদুদি কেন্দ্র সরকারনা মল্তি-স্তেৎ কোওপরেতিব ইন্সতিত্যুসন অহুম - ওর্গানিক কম্মিতী, এক্সপোর্ত কম্মিতী অমসুং সিদ কম্মিতী শেমখ্রে। মসিগী খুত্থাংদা লৌমীশিংগী পুন্সি মহিং হেনগৎহন্নবা লম্বী য়াৎলি। সরকারনা অথুবা মতমদা নেস্নেল কোওপরেতিব পোলিসী অমা পুরক্লগনি হায়না মহাক্না হায়খি। শ্রী শাহনা হায়খি মদুদি লৈবাক অসিদা অনৌবা ফার্মর প্রোদ্যুসর ওর্গনাইজেসন (FPO) 1100 শেমখ্রে। PACS লাখ 1 হেনবনা অনৌবা বাইলোশিং অসি য়াখ্রে। হৌজিক নেস্নেল কোওপরেতিব দিবেলপমেন্ত কোরপোরেসন (NCDC) দা লুপা করোর 2000গী বোন্দ ইসু তৌবগা লোয়ননা, ইন্সতিত্যুসন অসিনা কোওপরেতিব ইন্সতিত্যুসন কয়াগী য়াইফনবা থবক তৌবা ঙম্লগনি। মসিগা লোয়ননা অর্বান কোওপরেতিব বেঙ্কশিংনা অনৌবা ব্রাঞ্চশিং হাংবগী পান্দম থম্লে। কোওপরেতিব বেঙ্কশিংনা পীবা পর্সনেল হাউসিং লোনগী লিমিৎ অসি শরুক অনি হেনগৎহনখ্রে। ইনকম তেক্সকী কান্নবা অমসুং শেল লৌথোকপগী লিমিৎ অনিমক হেনগৎহনখ্রে। প্রধান মন্ত্রী শ্রী নরেন্দ্র মোদীনা আইন অমা শেমদুনা সুগর কোওপরেতিব মিলশিংগী লুপা করোর 15000গী ইনকম তেক্স লৌথোকপগী থবক পায়খৎলে। IT লাইএবিলিতী অসি চহি কয়াদগী লেপ্পা লৈরি।

শ্রী অমিৎ শাহনা লৈবাক শিনবা থুংনা কোওপরেতিব সেক্তরগী শিন্মীশিংদা ৱাকৎখ্রে অমসুং কোওপরেতিবশিং অসি লৈবাক অসিগী শেন্মিৎলোনগী মপাঙ্গল কনবা য়ুম্বী অমা ওইহন্নবা হায়খ্রে। মহাক্না হায়খি কোওপরেতিবশিংবু মপাঙ্গল কনবা য়ুম্বী অমা ওইহনবতা নত্তনা ঐখোয়না সেক্তর অসিগী খুত্থাংদা লৈবাক অসিগী লায়রবা মীওই করোর কয়াগী পুন্সিদা খুদোংচাবশিং, নুংঙাই-য়াইফবা অমসুং মশা-মউ ফনা লৈহন্নবা থবক পায়খৎকদবনি। শ্রী শাহনা থাজবা থমখি মদুদি 2029দা মালেমগী কোওপরেতিবশিংগী নুমিৎ পাঙথোক্কদৌরিবা নুমিত্তা, লৈবাক অসিদা PACS লৈতবা পঞ্চায়ৎ অমত্তা লৈরোই। প্রধান মন্ত্রী শ্রী নরেন্দ্র মোদীগী মঙলান অদু মঙফাওনহন্নবা অমসুং লায়রবশিংগী শেবা তৌনবা কোওপরেতিবশিংবু মাংলোমদা পুখৎনবা ঐখোয় পুম্নমক্না পুন্না হোৎনমিন্নবা মথৌ তাই হায়না মহাক্না হায়খি।

*****