প্রধানমন্ত্রীগী লোইশঙ
প্রধান মন্ত্রীনা ৱার্দ তি২০ চেম্পিয়ন ইন্দিয়ন ক্রিকেত তীমগা শানখিবা ৱারীগী অইবা ৱারোল
Posted On:
05 JUL 2024 10:20PM by PIB Imphal
প্রধান মন্ত্রী- মরুপশিং! পুম্নমকপু তরাম্না ওকচরি অমসুং নখোয় পুম্নমক্না লৈবাক অসিবু হরাওবা তয়াম্বা অমসুং নুংঙাইবনা থলহলবসি উবদা অদুক্কী মতীক নুংঙাইবা অমনি। লৈবাক অসিগী মীপুম খুদিংমক্কী আসা অমসুং অপাম্বদুমক মায় নখোয়না মায় পাকহল্লে। ঐহাক্কী মায়কৈদগীসু নখোয়গী মফমদা নুংঙাইবা ফোংদোকচরি। মহৌশাদি ঐহাক ওফিসতা অথেংবা নুমিদাং ফাওবা থবক শুদুনা লৈবনি। অদুবু ঙসি তিভিসু থাদুনা লৈ অমসুং ফাইলসু শুরি, অদুবু ঐহাক ফাইলদা পুক্নিং চঙবা ঙমখিদে। নখোয়গী তীমস স্পিরিত অদু নখোয়না নীংথিনা উৎখ্রে, অমসুং নখোয়গী হৈশিংবা অমসুং খাঙবা কনবদু উৎখিবদুসু নীংথিনা উবা ফংই। খাঙবা কনবা অমসুং নখোয়না হাথু-হাথুখিদবদুসু ঐহাক্না উবা ফংই। নখোয়গী মফমদা অচেৎপা থাজবা অমা লৈখি, মদুগীদমক ঐহাক্কী মায়কৈদগী নুংঙাইবা ফোংদোকচরি।
রাহুল দ্রাবিদ – ইহান হানবদা, অদোমগা উনবা ফংবগী তাঞ্জা অমা পীবীবগীদমক থাগৎচরি অমসুং ঐখোয়না নবেম্বরদা অহেমদবাদতা মেৎচ মায়থিখিবা মতমদা, ঐখোয়গী নুংঙাইতবা মীকুপতসু অদোম্না মফম অদুদসু লাকপীরম্মি। অসিগুম্বা নুংঙাইরবা মীকুপ অসিদা ঙসি অদোমগা উনবা ফংবসি অদুক্কী মতীক নুংঙাইজৈ। ঐহাক্না হায়জনিংই মদুদি রোহিত অমসুং নহা ময়াম অসিনা মাইয়োক্নবগী অমসুং হনবা লৈতবগী ইথিল অদু নীংথিনা উৎখি। ফাইনেল য়ৌরবা ফাওবদা, নহাশিং অসিগী হোৎনজমল কয়া অমা লৈরি। নহাশিং অসিনা অদুক্কী মতীক কন্না হোৎনখি। মখোয়না হৌরক্লিবা নহা কয়াদা ইনোৎ পীহৌরগনি। নহাশিং অসিনা ২০১১দা মায় পাকপা উদুনা লাকখ্রে। মরম অসিনা শানরোইশিং অসিগী মশানা উরগা ঐহাক্না খঙবা ঙমজৈ মদুদি লৈবাক অসিগী নুপামচা নুপীমচা কয়াবু মশানা কয়ানা ইথিল পীবীরি। ঐহাক্না অদোমবু থাগৎচনিংই অমসুং নহাশিং অসিগা হরাওবা ফোঙদোকচরি।
প্রধান মন্ত্রী – ইচিল ইনাওশিংবুসু হরাও তায়াম্বা ফোংদোকচরি। অদোম্না তুংদা লাক্কদবা মতমশিংদা লৈবাক অসিগী নহাশিংবু ইথিল পীবা ঙমগনি। নখোয়না মায় পাকপা পদুরকখ্রে, অদুগা মখোয়বুসু ইথিল কয়া পীরি। অদোম্না মীয়াম্বু অপীক অপীকপা পোৎশিংদগী হৌদুনা লমজিংবা য়াই। হৌজিক্তি নখোয়দা শক্তি অদু লৈরবনি। চহল নহাক করিগী সিরিয়স ওইরবনো? ঐহাক্না খল্লিবসি চুম্লমগনি। হরিয়ানাদগী লাকপা মীপুম খুদিংমক ফিভম অমহেক্তদা হরাওরি, মখোয়না হীরম খুদিংমক্তা নুংঙাইবা ঙম্মি।
রোহিত, মীকুপ অসিদা নহাক্না করি খল্লিবগে হায়বদু খঙনিংই। লৈবাক অমহেক্তা ওইসনু, লৈহাওদি মফম খুদিংদা লৈ অদুবু ক্রিকেত হায়বসিদি পিৎচতা লৈ। অদুগা নহাক্না ক্রিকেতকী পুন্সিবু নুংশিনা লৌরি। মসি ভারত মচা খক্তনা ঙম্মি।
রোহিত শর্ম- ঐখোয়না মায় পাকপগী মীকুপ অদুবু নীংশিংবা পাম্মি অমসুং মদুগী নুংঙাইবদা তাওদুনা লৈনিংই, মসিনি। মরমদি ঐখোয়না পিৎচ অদুদা শানদুনা মায় পাকখিবনি, মদু ঐখোয়না কন্না হোৎনদুনা ঙাইদুনা লাকপনি। ৱার্ল্দ কপতা ঐখোয়না মায় পাকপা য়াবা মতাং কয়া অমা লৈখি, অদুবু ঐখোয়না মায় পাকপদি ঙমখিদে। হন্দক্তি ঐখোয়না মদু ময়াম পুম্নমক্কা লোইননা ফংবা ঙম্ল, মসিগীদমক পিৎচ অদু ঐহাক্কী ইফমদদি য়াম্না মরুওই মরমদি ঐখোয়না পিৎচ অদুদা তৌখিবা খুদিংমক মীকুপ অদুদা থোকখিবনি। ঐখোয়না তীম অমা ওইনা মসিবু ফংনবগীদমক কন্না হোৎনখি অমসুং মদুগী হোৎনজমলদু নুমিৎ অদুদা ফংখি।
প্রধান মন্ত্রী – লৈবাক অসিগী মীপুম খুদিংমক্না মদু খঙই, অদুবু রোহিত, ঐহাক্নদি পোৎশক অনিখক উবা ফংখি। ঐহাক্না মদুদি পুক্নিং ঈহুল উবা ফংখি। নহাক্না ত্রোফী লৌবা চৎলমদাইদা শাখিবা জগোইদু।
রোহিত শর্ম – সার, মদুগী মরমদি ঐখোয়না চহি কয়া ঙাইদুনা লাকপনা মীকুপ অদু ঐখোয় পুম্নমক্কী ওইনদি অদুক্কী মতীক চাউবা মীকুপ অমনি। মরম অসিনা নুপাশিং অসিনা ঐহাক্কী ইফমদা ইচম চম্না চৎপা য়ারোই, তোপ-তোপ্পা অমগা লোইননা চৎকদবনি হায়খি।
প্রধান মন্ত্রী – অদুদি মদু চহলগী আইদিয়ারা?
রোহিত শর্ম – চহলগা কুলদীপকা…
প্রধান মন্ত্রী – অছা! নহাক্কী রিকভরীগী খোঙচৎ অসি য়াম্না অৱাবা অমনি। শানরোই অমা ওইনা, মদু নহাক্কী য়াম্না লিরবা থাজবা অমনি, নহাক্না মদুবু মাংজিল থানা পুখৎখি। অদুবু অসিগুম্বা মতমদদি, মী অমনা রিকভর তৌগদবনি, মরমদি নহাক্না পোস্ত কয়া অমা থাগতখি, ঙসিদি নহাক য়াম্না ফরে হায়না ঐগী মরুপশিংনা ঐঙোন্দা তম্মি।
রিশাব পন্থ – অহানবদা ঐখোয়বু মফম অসিদা কৌবীবগীদমক থাগৎপা ফোংদোকচরি। সার, মসিগী মনীংদা লৈরিবা ৱাখল্লোন্দি, ঐহাক খুদোংথীবা অমা থোকখি অমসুং চহি তংখাই অমরোমগী মমাংদা ঐহাক য়াম্না অৱাবা ফিভম অমদা লৈখি। অদোম্না ঐগী ইমাদা কোল তৌবীরকপদু ঐহাক হৌজিকসু নীংশিংলি। মদুদগী ৱাখল কয়া অমা খনখি। অদোমগী কোল লাকপদগী ইমানা করিসু লৈতে, খঞ্জিনদনবা হায়বীরকখি। ৱাখল শান্তি খরা ফংখি। মদুগী মতুংদা, ঐগী রিকভরী মতমদা, মহাকপু ক্রিকেত শানখিদ্রা নৎত্রগা লেপখ্রদরা হায়না ঐহাক্না মীয়ামগী মফমদগী তাবা ফংখি। মরম অসিনা, অখন্ননা ৱিকেত কীপিংদি অদুমক বেৎস্মেন ওইদুনা লৈবা য়ারি, ঐহাক্না বেত পায়বা য়ারি, অদুবু ঐহাক ৱিকেত অদুমক ওইখিগদ্রা ওইররোইদ্রা? চহি অমা মখাইরোমদি, সারনা ঐহাক ফীল্দদা হল্লকখিগদবনি অমসুং ঐহাক্কী হানগী ফিভমদগী হেন্না ফগৎনবা হোৎনগদবনি, মীয়ামগী নৎত্রবসু নশাগীদমক অমসুং নশানা নশাদা প্রুভ তৌনবগীদমক, ঐহাক ইন্তর্নেসনেল ক্রিকেত শানখিগদবনি অমসুং ভারতনা মায় পাকপা য়েংখিগদবনি।
প্রধান মন্ত্রী – রিশাব, নহাক্কী রিকভরী অদু চত্থরিঙৈ মরক্তা, ঐহাক্না নহাক্কী ইমাগা ৱারী শানখি, ঐহাক্না ৱাহৈ অনি হায়খি, অহানবদা, ঐহাক্না দোক্তরশিংগা তানখি। অদুদগী দোক্তরদগী ঐহাক্না মোৎ লৌদুনা মহাক শানবা য়াররোইদ্রা হায়দুনা হংখি। মখোয়না খনখিগে হায়না খুম্লকখি। অদুবু নহাক্কী ইমানদি নঙোন্দা থাজবা অদুক্কী মতীক থম্বদু উবদা ঐহাক অঙকপা ফাওখি। ঐহাক্না মহাক্কা ৱারী শাবা মতমদা নীংথিনা খঙলমদে, অদুবু ঐঙোন্দা থাজবা নীংথিনা পীরকখি। মদু য়াম্না নুংঙাইবা অমনি।
ঐহাক্না ফাওখি মদুদি অদুগুম্বা মমা অমা লৈজবা তারবদি কৈদৌনুংদা মায়থিবা নংলোই। মসিগী ৱাখল্লোন অসি ঐঙোন্দা মীকুপ অদুদা ফাওখি। অদুগা মদু নহাক্না মীয়ামা উৎকদবনি। ঐহাক্না নহাক্কা ৱারী শানবা মতমদা ফাওবা খ্বাইদগী চাউবা ইহুল হায়রবদি, কনাগুম্বা অমত্তদা থংজিল্লোইদবনি, মসি ঐহাক্কী ইরালনি হায়বসিনি। মসি য়াম্না চাউবা পোৎশক অমনি, নৎত্রবদি, কনাগুম্বা অমদা থংজিন্দুনা লৈরম্বসু য়াই, মফম অদুদা কোম অমা লৈরমখি, কোম অমা, মদুমঙাই, মদু নহাক্না থোকহনবদি নত্তে। মদু ঐহাক্কী ইরালনি। মদু নহাক্না মালেম অসি য়েংবা হৈবগী ওইরম্বসু য়াই, অমসুং অপীকপা পোৎশকশিং, মরুপ মপাং অমসুং মীপুম খুদিংদগী তম্লকপা উরকপা ওইরম্বা য়াই। অদুনা ঐহাক্না অচুম্বা হায়নিংই, মদুদি নহাক্কী অপুন্সি, লৈবাক অসিগী মীয়াম অমসুং শানরোইশিংগী খাঙবা কনবা অসিদা অৱাংবা ৱাখল্লোল অমা য়াওরি। ৱিকেত কীপর অমা কোচ তৌবা হায়বসি কয়া য়াম্না ৱাবগে হায়বা ঐহাক খঙই। মখোয় মখোয়গী খুবীদু পায়দুনা পুং কয়া অমা লেপহনগদৌরিবনি। অদুবু নহাক্না মদুগী লানফমদু মায় পাক্তুনা লাক্লে, অদুনা নহাক্না য়াম্না চাউবা থবক অমা পায়খ্রে। নহাক্কীদমক হরাওবা ফোংদোক্লি।
রিশাব পন্ত- সারবু থাগৎচরি।
প্রধান মন্ত্রী – অকা অকুম নাইবা হায়বসি মতম চুপ্পদা লৈ, অদুবু মতম শাংনা খাংবা কনখিবদু শীজিন্নফম অদুমক লাক্কনি। নহাক্না মদু তঙাইফদবা মতম্না লাকপদা, শানবা মীকুপ্তা উৎখ্রে। ভিরাত, নহাক্কী লানফমসু অকা অকুম নাই হায়বসি নহাক হাইয়ুদনা।
ভিরাত কোহলি – অহানবদা ঐখোয় পুম্নমকপু মফম অসিদা কৌবীবগীদমক অদোম্বু থাগৎচরি। অমসুং মীকুপ অসি ঐহাক্কী ৱাখলদা মতমদা চুপ্পদা নীংশিংদুনা লৈহৌরগনি। মরমদি তুর্নামেন্ত হৌবদগী লোইবা ফাওবদা, ঐহাক্না পীনিংবা শরুক অদু নীংথিনা পীবা ঙমখিদে অমসুং ঐহাক্না রাহুল ভাইদা হায়খি, ঐহাক্না ইশাদা অমসুং তীম অসিদা হৌজিক ফাওবদা নীংথিনা পাঙথোক্নিংবদু ফংদ্রি। অদুনা মহাক্না হায়খি মদুদি মতম লাক্লবদি নহাক্না শোইদনা পারফোর্ম তৌরক্কনি হায়না থাজৈ হায়বীখি। অসুম্না ঐখোয়না ৱারী শানখি, অমসুং ঐখোয়না শানবা থোক্লকপা মতমদা, ঐহাক্না রোহিত্তা অহানবা হায়খি মদুদি ঐহাক্না পাম্লিবা মওংদুমক শানবা ঙমগনি হায়বসি তুর্নামেন্ত অসিদা ঐনা পাঙথোকখিবদু য়েংলুরবদি নীংথিনা পাঙথোকপা ঙমগনি হায়বসি ঐনা থাজদে। ঐখোয়না শানবা থোক্লকপদা, ঐহাক্না অহানবা বোল মরিদুদা মরি অহুম্লক লৌখি, মসিদগী ঐহাক্না মনাক্তা চত্তুনা হায়খি, করি ফিভম্নো সিদি, রন অমত্তা লৌরোইদ্রা খল্লম্বনি, অদুবু তৌরিবসিনি। মফম অদুদা ঐহাক্না খঙখি মদুদি ঐখোয়গী ৱিকেত তুরকপা মতমদা, ফিভম অদুদা ঐহাক সরেন্দর তৌবা তাই। মীকুপ অদুগী তীম অদুদা করি মরুওইরিবগে হায়বসিনা ঐহাক্কী ৱাখলদা লৈখি অমসুং ঐহাক্না জোন অদুদা থখি, হৌজিক্তি ঐহাকনা মফম অদুদা লৈখিবদু করিগীনো হায়বা শন্দোক্না তাকপা লুরে। মীকুপ অদুদা ঐহাক চপ চানা চপতুনা লৈখিবগুম ফাওহল্লি। মদুগী তুংদা, ঐহাক্না খঙলকখি মদুদি থোক্কদবা লৈরবদি মওং অমা নৎত্রগা অমদা হেক্তমক থোক্লক্কনি। মসিমক ঐগী ইফমদা থোক্কনি, তীমদা থোক্কনি। করিগুম্বা অদোম্না মেৎচ অদু য়েংলম্বা তারবা অমসুং অরোইবদা ঐখোয়না করম্না মায় পাকখিবা হায়বদু য়েংলম্লবদি ফিভম অসি ভাপ তাগনি, ঐখোয়না অরোইবদা বোল খুদিংমক শানখি, তাংকক অদুদা মেৎচ অদু মায়কৈ হোংলক্তুনা ঐখোয়না শন্দোক্না তাকপা ঙমদবা মওংদা লাকখি। মেৎচ অদুগী বোল খুদিংমক মফম লেপ্পা ঙমদনা চৎলি। করিগুম্বা মতাংদসু, ঐখোয়দা আসা মাঙলকপা য়াওখি, অদুদগী হার্দিকনা ৱিকেৎ অমা লৌরকখি। মদুগী মতুংদগীদি, বোল মথং মথংদগীদি অমুক হন্না এনর্জী শাগৎলকপা হৌরকখি। য়াম্না লুরবা মতম কয়াগী মতুংদা নুমিৎ অদুদা তীমগীদমক ঐহাক্না শরুক তম্বা ঙমখিবদা ঐহাক য়াম্না হরাওই। নুমিৎ অদুগী ঐখোয়না মায় পাকখিবা মীকুপ অদু পুন্সিদা কৈদৌনুংদা কাওবা ঙম্লোই। মরম অসিনা ঐহাক্না তীম অসিবু মেৎচ অদু মায় পাকপা ঙম্নবা মফম তান্না পুবা ঙমখি।
প্রধান মন্ত্রী – মদুমক মীপুম খুদিংমক্না ফাওখি, মরমদি নহাক্কী তোতেল অদু ৭৫নি, চপ চানা ৭৬, অদুনা মরম ওইদুনা মীকুপ অসি পুরকপা ঙম্লিবনি। মীপুম খুদিংনা হায়নরিবনি, য়ার, নঙনা ঙমগনি। মদুনা পুদুনা চৎনবগী শক্তিসু ওইখি। নহাক্না ৭৫ খক্তমক্তা লৈরম্বা থোক্লবদি ইমুং মনুংগী খুদক্কী ওইবা রিএক্সন্দি করি ওইরম্বা য়াই।
ভিরাত কোহলি – নুংঙাইজরিবদি সার, মফম অসিদা মতমগী খেন্নবা য়াম্না লৈ, অদুনা ঐহাক্না ইমুং মনুংগা য়াম্না ৱারী শানদে, মম্মিনা হেন্না ৱাখল ৱাশিল্লি। অদুবু ঐহাক্না হোৎনজবা খুদিংদু ওইথোকউ য়াদবা কয়া য়াওখি। নহাক্না কন্না হোৎনজরবা, অদুগা ঙমগনি খল্লবদি, নহাক্কী ইগোদু কদাইদগীনো লাক্লগা গেম অদু নঙোন্দগী চৎখিগনি হায়না ফাওরকখি। অদুনা মদু ঐহাক্না থাদোকপা তঙাইফরমদে, অমসুং ঐহাক্না হায়জরম্মি, গেম অদুগী ফিভম অদু ঐগী ইগো পুশিল্লক্নবা মফম লৈতে, অদুনা ঐহাক্কী তীমগীদমক মদু মনীংদা থম্বা তারম্মি। মদুদগী গেম অদুদা, ঐহাক্না গেম অদুবু ইকাইখুম্নরকপা মীকুপ্তা গেম অদুনা ঐবুসু ইকাইখুম্নবা উৎপীরকখি, মসিগী ৱাখল্লোন্সি ঐঙোন্দা ফাওরকখি সার।
প্রধান মন্ত্রী – নহাক্কীদমক অদুক্কীদমক নুংঙাইবা ফাওই।
প্রধান মন্ত্রী – পাজী
জস্প্রিত বুমরাহ- নত্তে সার, ঐহাক্না ভারতকীদমক বোল হেক লংলবা, মদু অনৌবা ওইগেরা নৎত্রগা অমা ওইগেরা অরুবা তানফমদতা ওইগল্লি।
প্রধান মন্ত্রী – নহাক ইদলি চারগা ফীল্দদা চৎপ্রা?
জস্প্রিত বুমরাহ – চৎতে-চৎতে, করিগুম্বা মতাংনবু লুশিল্লক্লবদি, ঐহাক্না বোল লংবা হেক্তমক তাই। অদুনা তীমগীদমক মতেং পাংবা ঙম্লবদি ঐহাক্না নুংঙাইবা ফাওই, অমসুং করিগুম্বা অরুবা মতাংদা মায় পাকপা ঙম্লবদি ঐহাক্কী ইফমদা থাজবা হেনগৎলি অমসুং মদুনা মাংজিল থানা চঙশিনবা ঙম্বা হেল্লি। অমসুং হন্দক্কী তুর্নামেন্ত অসিদা, অরুবা ওভর কয়া লংবা তারম্মি, অমসুং ঐহাক্না তীমগীদমক মতেং পাংদুনা মেৎচ অদু মায় পাকপা ঙমহল্লি।
প্রধান মন্ত্রী – ঐহাক্না ক্রিকেত য়েংলকপশিংদা, ৯০ গী মতুংদা, মায় পাক্কদবগী ৱাখলদা ফাওজবা তারবসু, বেৎসমেনশিং অসিনা ৯০ গী মতুংদতা লুশিন্না লৌবগুম্না তৌই। অসুম্না, করিগুম্বা মদুনা অরোইবা ওভর ওইরক্লবা মতমদা, মায় পাকপা নৎত্রগা পোবা হায়বসি বোল অমখক্কী মখা পোল্লকই, মসিদগীদি তেন্সন অদুমক লৈরগনি। অসিগুম্বা ফিভম অসিদা নহাক্না মতৌ করম্না শানবগে?
জস্প্রিত বুমরাহ – ঐহাক পোগদৌরে নৎত্রগা মেৎচ অদুদা করিগুম্বা অহেনবা অমা তৌবা তাই হেক খল্লক্লবদি ঐদি হেক্তমক শোইগল্লি, অদুগা করিগুম্বা কোক ঙাওরক্লবা নৎত্রগা মীয়াম নৎত্রগা অতোপা মীওইদা কোক ঙাওনা য়েংলুরবদি অদুমক অশোইবা অমা তৌরগনি। অদুনা মীকুপ অদুদা, ঐহাক ইশাবু হন্না য়েংজদুনা করি তৌগদগে খল্লি। অমসুং মমাংদা নীংথিনা পাঙথোকখিবা, অফবা মওংদা শানখিবা অমসুং ঐহাক্না তীমগীদমক মতেং পাংখিবশিং অমসুং নুংঙাইবা মীকুপশিং নীংশিংদুনা খ্বাইদগী ফবা মওংদা শাননবা হোৎনৈ।
প্রধান মন্ত্রী – অদুদি মদু য়াম্না ৱাখল ৱাবা তাংকক ওইগনি, পরাথা চাদবা নুমিৎতি য়াওব্রা?
জস্প্রিত বুমরাহ – চাদে সার, ৱেস্ত ইন্দিসতদি, ইদলি-পরাথা ফংদে। মফম অদুদা অফংবা অমেহক্তা চানবা হোৎনৈ। অদুমওইনমক, নুংঙাইনা লেল্লি, ঐখোয়না হংগৎ হন্দা চৎপনা তীমগী ওইনদি তুর্নামেন্ত অদু নীংথিনা শানখি। ইহান হানবা ওইনা ৱার্ল্দ কপ মায় পাক্লে, মসিগুম্বা ইহুল অমত্তা ঐঙোন্দা ফাওখিদ্রি, অদুনা ঐহাক য়াম্না চাউথোকচৈ অমসুং ঐহাক্না মসিদগী হেন্না ফবা ইহুল অমত্তা ফাওখিদ্রি।
প্রধান মন্ত্রী – নহাক্না য়াম্না মশক থোক্না শানখ্রে, লৈবাক অসিনা নহাক্কীদমক অমসুং মসিগীদমক চাউথোকচৈ।
প্রধান মন্ত্রী – হোই হার্দিক, হায়য়ু।
হার্দিক পান্দিয়া – ইহান হানবদা ঐখোয়বু কৌবীবগীদমক সারবু থাগৎচরি, ঐহাক্না ইন্তর্ভ্যুদা হায়খিবদুমক অচুম্বনি, ঐহাক্না হায়খি মদুদি হৌখিবা থা তরুকমুকসি অকা অকুম কয়াগা লোইননা য়াম্না নুংঙাইবা মীকুপ ওইখি ঐগী ওইনা। ঐহাক্না শান্নবুংদা থোক্লকপা মীকুপতা মীয়াম্না হন্থনা লাউবীখি, অমসুং অসিগুম্বা থৌদোক কয়া অমা থোকখি, অদুবু ঐহাক্না মতম চুপ্পদা থাজৈ মদুদি, পুম্নমকসিগী পাউখুম অসি ঐহাক্না শানবদা পীগনি অমসুং ৱাহৈনা কৈদৌনুংদা পীরোই হায়না খনখি। অমসুং মসিনা তাক্লিবসি, ঐহাক মতমদুদা হায়ফম খঙদবা কয়া অমা য়াওখি, অদুনা হৌজিকসু করি হায়গদবনো হায়বা ঐহাক্না খঙদে, মতম চুপ্পদা লান্থেংনগনি খল্লি। ঐহাক্না মতম চুপদা থাজৈ মদুদি পুন্সি হায়বসি লানফম কয়া মাইয়োক্নগদবনি, শানবদগী কৈদৌনুংদা লাপথোক্লোইদবনি, অসিগুম্বা অৱাবা মতম অসিনা মসিবু খঙহল্লি অমসুং মায় পাকপা মতমদসু মসি উৎলি। অদুনা সার, ঐহাক লৈখিগনি অমসুং কন্না হোৎনখিগনি অমসুং তীম অপুনবা, শানরোইশিং, কেপ্তেন, কোচনা শৌগৎপীরিবা পুম্নমকসি য়াম্না নুংঙাই। অমসুং ঐহাক্না শেম শাদুনা ইশোরনা অরোইবা ওভরদা অসিগুম্বা লাইবক ফবা খুদোংচাবা অসি পীবীখিবনি।
প্রধান মন্ত্রী – নতী, নহাক্কী ওভর অদু পুৱারীদা লৈহৌরগনি, অদুগা নহাক্না সুর্য়াদা করি হায়খি।
হার্দিক পান্দিয়া- সুর্য়ানা কেৎচ অদু ওকখিবা মতমদা, ঐখোয়গী ইহান হানবা রিএক্সন অদু ঐখোয় পুম্নমক্না হরাওবা ফোংদোকখি। মদুদগী ঐহাক্না ভাপ তারকখি মদুদি ঐহাক সুর্য়াদা মদু শোইদ্রবরা হায়বদু হংলম্বনা ফবনি খল্লখি, অদুনা ঐখোয়না কনফার্মেসন অমা লৌরবা মতুংদা হরাওবা ফোংদোকখি, অদুগা মহাক্না নো-নো হায়খি। মহাক্না হায়খি, নহাক্না অহোংবা পুরকপা য়াবা কেৎচ অমা ওক্লে, মসিদগীদি ঐখোয় মপুং ফানা চরাংনবা হৌরকখি, মসিদগী মীপুম খুদিংমক নুংঙাইবদা তাওখি।
প্রধান মন্ত্রী – সুর্য়া হায়য়ু।
সুর্য়াকুমার য়াদব – সার, ঐহাক পুমঙাও ঙাওখি! সার, মীকুপ অদুদা, ঐহাক্না খনখিবসি, ঐহাক্না বোল অসি উপাই অমা তৌদুনা ওক্কনি, ঐহাক্না হায়নিংলিবসি, মদুগী মমাংদা কেৎচ অদু ওক্কনি নৎত্রগা ওক্লোই হায়বসি ঐহাক্না খল্লুদে। ঐহাক্না খনখি মদুদি ঐহাক বোল অদু মনুংদা ইনশিল্লগে খনখি। মতম অদুদা রন অমা, অনিনা খ্বাইদগী য়াম্না লৌহনগদবনি, মরমদি নুংশিৎসু শিৎলি কন্না। বোল অদুনা ঐগী খুৎতা হেক য়ৌরকপদগীদি, ঐহাক্না মদু লংখৎতুনা নাকনা লংশিনখি, মীকুপ অদুদা রোহিতসু লাপ্না লৈ। মদুদগীদি বোলদু ঐগী খুৎতা অদুমক লাক্লে। অদুবু মসিগুম্বা মতাং অসি ঐখোয়না মাংজৌননা য়াম্না তমখ্রে। ঐহাক্না ৱাখলদা অসুম্নসু খনখি, ঐহাক্না বেত্তিং তৌবা লোইরবা মতুং, ওভর লোইরবা মতুংদা, ঐহাক্না তীমগীদমক করি মতেং পাংবা য়াবগে, ফীল্দিংদা নৎত্রগা অতৈ অতোপ্পদা।
প্রধান মন্ত্রী – নখোয় য়ৈখ্রবা বোলবু অমুক হন্না ওকপগীসু য়াওনা প্রেক্তিস তৌব্রা?
রাহুল দ্রাবিদ – সুর্য়ানা ময়াম্মা হায়রে সার, মহাক্না অসিগুম্বা ওকপসি প্রেক্তিস তৌবদা মমাংদা ১৮৫, ১৬০ রোম ওকখ্রে।
প্রধান মন্ত্রী – অশেংবরা?
সুর্য়াকুমার য়াদব – অশেংবনি সার, তুর্নামেন্ত হেক হৌবদগী, অমসুং ঐহাক্না আই.পি.এল.দা হল্লকপদগী, ঐহাক্না অসিগুম্বা কেৎচ অসি ময়াম অমা ওকখ্রে,অদুবু ইশোরনা অসিগুম্বা কেৎচ অমা ওক্নবা হন্দক্কী মতাং অসিদা পীবীরক্কি হায়বদি ঐহাকসু খল্লুদে, অদুবু ঐহাক্না অদুগুম্বা কেৎচ অদু মমাংদা কয়ারক ওকখ্রে, অদুনা মীকুপ অদু লাকপদা ঐহাক্না ফিভম কায়দনা ওকখি, অমসুং মদুগুম্বা মতাং মমাংদসু য়াওখ্রে হায়বসি খঙই। অদুবু কনাগুম্বা অমত্তা স্তেন্দদা লৈতে, অমসুং মী কয়া য়েংখিদে, অদুবু মীকুপ অদুদদি অদুক্কী মতীক হরাওবা ফাওখি।
প্রধান মন্ত্রী – ঐহাক্না হায়রিবসিনি, ঐহাক্না মদু অদুক্কী মতীক শিংথাই, মরমদি, অহানবদা, লৈবাক পুম্বগী ইহুল, অকা অকুম নাইখিবদু য়াম্না নুংঙাইখিদে, অদুবু মীকুপ অদুনা পুম্নমক অওনবা অমা পুরকখি, মসিনা নহাক্কী পুন্সিদা লোইনদুনা লৈহৌরগদবা মীকুপ অদু ওইরগনি অমসুং নহাক য়াম্না লাইবক ফবা মরুপ অমনি।
সুর্য়াকুমার য়াদব – স্তার অমসু লাক্লে… ঐহাক্না হৌজিক্তি নুংঙাইবা ফাওই…
প্রধান মন্ত্রী – নঙগীদমক নুংঙাইবা ফোংদোক্লি!
সুর্য়কুমার য়াদব – থাগৎচরি সার!
প্রধান মন্ত্রী – নহাক্কী অপোকপগী ৱাহৈ অমা লৈবাক পুম্বদা হঞ্জিন হঞ্জিন্না নৈনরি। মহাক্কী অপোকপদা হংলুবা মতমদা য়াম্না পুক্নিং নুংশিবা পাউখুম অমা পীরকখি। মহাক্না হায়খি লৈবাক্কী হান্না য়েংসি অদুগা ইচাগী অমুক য়েংশি, মসিমুক হেন্না চাউবা লৈত্রে! আর্শদীপ, হায়য়ু…
আর্শদীপ সিংহ – সার, থাগৎচরি, অহানবমক্তদা, অদোমগা উনবগী খুদোংচাবা অমা পীবীরে অমসুং ঐহাক্না ক্রিকেতপু অদুক্কী মতীক নুংশিজৈ সার… ঐখোয়না তুর্নামেন্ত অসিবু মায় পাকপা ঙম্বা হায়বসি য়াম্না নুংঙাইবা ফাওই, অদুগা বোলিংগী মতাংদা ঐহাক্না মমাংদা হায়খিবগুম্না, জাসি ভাইনা নাকন্দগী বোল লংলকপা মীকুপ্তা য়াওনা হরাওখি। মদুনা বেৎস্মেন্দা শাফু কয়া অমা পীখি, অদুদগী ঐহাক্না ৱিকেত কয়া অমা লৌবা ঙমখি অমসুং লেমহৌরিবা বোল্লরশিংনসু নীংথিনা বোল লংখি। মদুগী মনাদু ঐহাক্না ফংগদবনি খল্লি, মদু য়াম্না নুংঙাইবা অমনি, ঐহাক্না ৱিকেত কয়া লৌখি, মদুগী ক্রেদিত অদু তীমদা পীনিংই।
প্রধান মন্ত্রী –অক্সরনা স্কুলদা শানরিঙৈ মতমদা ঐহাক্না মহাকপু মনা অমা পীবী খুদোংচাবা ফংখি।
অক্সর পতেল – ৮শুবা স্তেন্দার্দতা।
প্রধান মন্ত্রী – ঐহাক্তি শান-খোৎনবগা কয়া মরী ফদে… অদুবু করিগুম্বা শানখোৎনবদা ঈহৌ অমা লাক্লবদি, ঐগী ৱাখলসি মদুদা লুপ্পী।
অক্সর পতেল – মদুমক্নি কেৎচ অদুগী মতাংদা লৈখিবসু, মখোয়গী পার্তনরশিপ অদু নীংথিনা লৈবনি, অহানবা ওভরদা ৱিকেত তুখি, মদুগী মতুংদগীদি তুখিদ্রে, অমসুং কুলদীপনা বোল লংবা মতমদা, ঐহাক্না লেপ্লিবা মায়কৈদা নুংশিৎ হুম্লকখি, অদুগা ঐনা লেপ্লিঙৈ মহাক্না থোম্লকপা মতমদা, ঐহাক্না মদু অরাইবা কেৎচ অমনি হায়না খনখি, অদুবু বোলদি নুংশিৎকা লোইননা য়াঙনা পায়রকখি, ঐহাক্না খুৎ য়েৎনা ওকশিরা হায়না খনখি, অদুগা ঐহাক্না চোংখৎখি অমসুং খুৎতা অহৌবা মখোল অমা তারকখি, ঐহাক্না খনখি মদুদি অসিগুম্বা কেৎচ অসি ১০গী মনুংদা ৯ দি নান্থোক্কল্লি, অদুবু ঐহাক ৱার্ল্দ কপ অদুদা য়াম্না লাইবক ফখি, তীম্না য়াম্না তঙাইফদবা মীকুপ লাকপদা ঐহাক্না কেৎচ অদু ওকপা ঙমখি।
প্রধান মন্ত্রী – অদুদি অমুল শঙ্গোম অদু য়াম্না কান্নরেনে?
(ময়াম নোকই)
কুলদীপ য়াদব – অদুক্কী মতীক থাগৎচরি সার।
প্রধান মন্ত্রী – ঐবু কুলদীপ কৌশিরা নৎত্রগা দেশদীপ কৌগদ্রা?
কুলদীপ য়াদব – সার অহানবদা, ঐহাক লৈবাক অসিদগীনি, অদুনা অদুমক সার… ঐহাক্তি ভারতকী মেৎচশিং অসি শানবদা য়াম্না নুংঙাইজৈ, অদুক্কী মতীকসু চাউথোকচৈ অমসুং তীম অসিদা লৌরিবা ঐহাক্কী থৌদাং অসি এতেক্কিং স্পিন্নরনি। অদুনা ঐহাক্না মতম চুপ্পদা ময়াই ওইবা ওভরদতা লংই, অদুনা কেপ্তেন অমসুং কোচকী থৌরাংগা মতম চুপ্পদা মান্নৈ অমসুং ঐহাক্কী থৌদাং অসি ময়াই চল্লকপা ওভরদা ৱিকেত লৌবনি। মরম অসিনা ঐহাক্না মতম চুপ্পদা ময়াই চল্লকপা ওভরদা ৱিকেত লৌনবা হোৎনৈ অমসুং য়াঙনা লংবশিংনা নীংথিনা হৌরক্তুনা ৱিকেত অমা নৎত্রগা অনি লৌনরবদি, ময়াই চনবা ওভরদা লংবসি য়াম্না লায়হল্লি। মসিনা নুংঙাইহল্লি। ঐহাক্না ৱার্ল্দ কপ অহুম শানখ্রে অমসুং মসিনা ঐগী নুংঙাইবা খুদোংচাবা অমনি, ঐহাক ত্রোফী অসি লৌরকপদা অদুক্কী মতীক নুংঙাই সার…
প্রধান মন্ত্রী – অদুদি কুলদী, নহাক্না কেপ্তেনবু মতৌ করম্না জগোই শাহনখ্রিবনো?
কুলদীপ য়াদব – ঐহাক্তি কেপ্তেনবু জগোই শাহনখিদে!
প্রধান মন্ত্রী – অরে, মতাংসিদদি মাননি মাননি হায়নরনুদনা?
কুলদীপ য়াদব – ঐহাক্না মদু তৌনবা হায়খি, মহাক্না তৌবা ঙম্লোই হায়রকপদা ঐহাক্না করিগী ঙম্লোইদবগে, ঙমগনি হায়খি, অদুবু ঐহাক্না হায়বদুমক্তি মহাক্না তৌরক্তে।
প্রধান মন্ত্রী – অদুনা হায়বদি য়ানিংদ্রি হায়বনিনে?
প্রধান মন্ত্রী – ২০০৭ দা খ্বাইদগী নহা ওইবা শানরোই ওইখিবা অমসুং ২০২৪গী মায় পাক্লবা তীম অসিগী কেপ্তেন ওইবা নহাক্কীদি করি ৱাখল লৈ?
রোহিত শর্ম – সার, তশেংনা হায়রবদা, ঐহাক্না তীম অসিদা ২০০৭দা য়াওরকপা মতমদা, ঐহাক্না আইয়রলেন্দতা রাহুল ভাইনা কেপ্তেন ওইদুনা চৎখি। মদুগী মতুংদা, ঐখোয়না সাউথ আফ্রিকাদা ৱার্ল্দ কপকীদমক চৎখি। মদুদা ইহান হানবা ওইনা ৱার্ল্দ কপ মায় পাকখি। ৱার্ল্দ কপ অদু মায় পাকতুনা ঐখোয়না ভারত্তা হল্লকপা মতমদা, মুম্বাই পুম্বা শেম শাদুনা লৈরম্মি, এয়রপোর্ততগী ৱানখরে স্তেদিয়ম তম্না য়ৌনবা চৎপা মতমদা পুং মঙা চংখি। অদুগা নুমিৎ ২-৩ লৈরবা মতুংদদি, ঐহাক্না ৱার্ল্দ কপ থোইবা হায়বসি য়াম্না লায় হায়না খনখি। অদুবু মদুগী মতুংদগীদি, ৱার্ল্দ কপ কয়া অমা লাকখ্রে, অদুগা ঐখোয় য়াম্না নক্না চৎখি, অদুবু মায় পাকপদি ঙমখিদে। হন্দক্কী ৱার্ল্দ কপ অসিদা, ঐহাক্না য়াম্না থাজনা হায়বা ঙম্মি মদুদি মফম অসিদগী ঐখোয়না ৱেস্ত ইন্দিসতা চৎপা মতমদা, মীয়ামদা খৌরাংবগী ইথিল চাউনা লৈখি। ন্যু য়োর্ক্তা ক্রিকেত অহানবা ওইনা শানবদা খুদোংচাদবা কয়া অমা লৈখি, ক্রিকেত হায়বসি মফম অদুদা অমুক্তা শানখিদ্রি, লৈমাইশিংসু প্রেক্তিস তৌবদা নুংঙাইবা ওইখিদে। অদুবু শানরোইশিং অসিদা মদুগী মতাংদা করিসু নাচুংখিদে, মখোয়দা লৈখিবা নুংনাংবা অমা হায়রবদি, ঐখোয়না মতৌ করম্না বার্বাদোস্তা ফাইনেল শানগদগে হায়বসিনি। পন্থুং চপ মাননা থোইদবা য়াদে হায়বগী ৱাখল চেনবশিং অসিগী কেপ্তেন ওইবা হায়বসি য়াম্না নুংঙাইনিংঙাই অমনি, অমসুং মীয়ামগী মায়থোংদা মোমোন মীনোক উবা অমসুং অমগা অমগা হরাওবা অমসুং ভারতকী ফিরালগা লোইননা অথেংবা ফাওবা লম্বীদা উবসি অদুক্কী মতীক নুংঙাইবা ফাওই, অমসুং ঐখোয়গী কাংলুপ অসিগী ঐখোয়গী পান্দমদি রাহুল ভাই অমসুং সচিন তেন্দুলকর অমসুং সৌরব গাঙ্গুলি, লক্সমন মখোয়না শানরিঙৈ মতমগুম্না নহাশিংদা ইথিল পীবনি… ঐখোয়না পুম্নমক্না মখোয়না শানবা য়েংখি, মখোয়না ঐখোয় পুম্নমকপু ইথিল পীবীখি, অদুগা ঐখোয়না মতৌ করম্না হৌরক্লিবা নহাশিং অসিবু ইথিল পীগদগে হায়বগী থৌদাং লৈ অমসুং হোই, ঐহাক্না থাজবদা হন্দক্কী ৱার্ল্দ কপ অসিগা লোইননা লাক্কদৌরিবা মীরোলশিংদা ইথিল পীবা ঙমগনি।
প্রধান মন্ত্রী – রোহিত, নহাক মতম চুপ্পদা অসুম্না সিরিয়স য়াম্না ওইদুনা লৈব্রা?
রোহিত শর্ম – সার, নুপামচাশিং অসিতনা পাউখুম অদু পীবা ঙমগনি।
প্রধান মন্ত্রী – মেৎচ খুদিংমকসু মায় পাক্লে, হৌজিক্তি নহাক্কী ইমুং মনুংসু হেনা চাউথোক্লে। অনৌবা লৈবাক কয়া অমসু হৌজিক্তি নৌনা য়াওরক্লে অদুগা ক্রিকেত্তদি মসিমসু চুম্মি, মদুদি শানরোই অমনা লেপতনা হোৎনদুনা লাক্লবনিনা অচৌবা মায় পাকপা অমা লোইশিল্লকপদা মহাক্না তৌখিবনি হায়বসি খঙজদে। মসিনা লৈবাক অসিদা অচৌবা শাফু অমা পীরে, ভারত্তদি ক্রিকেতকী অখন্নবা মশক অমা লৈজৈ। ভারতকী ক্রিকেতকী খোঙচৎ অসি য়াম্না মায় পাক্তুনা লাক্লি। হৌজিক্তি অতৈ মশান্নশিংদসু কন্না হোৎনরক্লি। অমসুং শান্নখোৎনবদা চঙবা মীওইশিং অসিনা খল্লি মদুদি মসি ক্রিকেত্তা থোক্লিবনিনা ঐখোয়দদি করিগী থোক্লোই? মসিনি, মসিনি নখোয়না পীবা থৌনা হায়বদু। করিগুম্বা ঐখোয় ইশানা ঐখোয়বু অমসুং লৈবাক অসিবু মাংজিল থানা পুখৎনবা হোৎনবা মতমদা, ঐখোয়না মশান্না খুদিংমক্তা লৈবাক অসিগী ফিরালবু পাইহনগনি হায়না হোৎনগদবনি, অমসুং ঙসিদি অপীকপা খুঙ্গংদগী হৌদুনা লৈবাক অসিদা তেলেন্ত কয়া অমা উবা ফংলে… তেলেন্ত অসি তাইয়র-২ অমসুং তাইয়র ৩ সিতীশিংদগী ফংলি… মমাংদদি অচৌবা শহর, অচৌবা ক্লবশিংনা মফমশিং অসিদগী লাক্লম্মি। হৌজিক্তি, মদুগুম্না ওইদ্রে, নখোয়গী তীমদা য়াওরিবশিংগী তংখাই অমদি অপীকপা মফমশিংদগী লাকপশিংনা ওইরি। মসি মায় পাকপগী শাফুনি অমসুং মসি মতম কয়াগী মমাংদগী উবা ফংলি। আফগানিস্তানগী মন্ত্রী ৱাফমসু য়াম্না নুংঙাই। মহাক্না খা অফ্রিকাগা অরোইবা মেৎচ ওইনা শানবা ফংখি, মসিগী খোঙচৎ অসি মহাক্কী ওইখ্রে।
প্রধান মন্ত্রী – নখোয়না রাহুলবু চহি ২০গী নহা ওইহল্লে।
রাহুল দ্রাবিদ – নত্তে, মায় পাকপগী মমল পুম্বা নহাশিং অসিগীনি মরমদি, ঐহাক্না মতম চুপ্পদা হায় মদুদি ঐহাক শানরোই অমনি, অমসুং ঐহাক কোচ অমসুনি। ঐখোয়না নহাশিং অসিবু সৌগৎপা খক্তনি। ঐহাক্না তুর্নামেন্ত অসিদা রন অমফাওবা লৌখিবা নত্তে, ৱিকেত অমত্তা লৌখিবা নত্তে, কেৎচ অমত্তা ওকখিবা লৈতে। ঐখোয়না ঐহাক্তমক নত্তনা, ঐখোয়গী তীম, ঐখোয়গী সপোর্ত স্তাফ তীম, ঐখোয়গী অতোপ্পা কোচশিংতমক শৌগৎপা খক্তমক ঙম্মি। ঐহাক্না থাজৈ মদুদি সপ্পোর্ত স্তাফকী তীম্নসু কন্না হোৎনখি, মখোয়না ঐখোয়না নহাশিং অসিতমক শৌগৎপা তাই। অরুবা ফিভম, ভিরাত নৎত্রগা বুমরাহ নৎত্রগা হার্দিক নৎত্রগা রোহিতনা রন লৌবা তাই, অদুগা মফম অসিদা লৈরিবা মীপুম খুদিংমক্না শানবা মতমদা ঐখোয়না মখোয়বু শৌৎপা খক্তনি তৌরিবা, মখোয়গী অপাম্বা ঐখোয়না পীবা ঙমগনি, অদুগা মসিগী মহৈ পুম্বা মখোয়গী থৌনাননি, মখোয়না ঐঙোন্দা অসিগুম্বা খুদোঙচাবা তাঞ্জা অমা পীবীরে, ঐহাক্না হায়নিংবদি, নহাশিং অসিনা ঐহাক্কী ইফমদা পীবীরিবা নুংঙাইরবা মতমশিং অসিগীদমক থাগৎচনিংই, য়াম্না নুংঙাইবা মীকুপশিং পীখি, ঐহাক্না হায়জনিংই মদুদি, ঐখোয়গী তীম স্পিরিতনা তুর্নামেন্ত অসিদা ফগৎলকপদা শান্নরোই তরামাথোইনা শানৈ অদুগা মসিগী মথক্তা মরি অমসু ফমদুনা লৈরিবনি। মসিদা মোহম্মদ সিরাজনা অহানবা মেৎচ অহুম শানখি, য়ু.এস.এ.দা ঐখোয়না ফাস্ত বোল্লর এক্সত্রা ওইনা শানখি। অদুনা তুর্নামেন্ত অসিদা মহাক্না মেৎচ ৩ খক্তমক শানখি, অমসুং মেৎচ অমত্তা শানখিদবা নহা অহুম অমসু য়াওরি। সঞ্জুনা মেৎচ অমত্তা শানখিদে, য়ুজভেন্দ্র চাহলসু মেৎচ অমত্তা শানখিদে, অমসুং য়াশসবি জেশ্বালসু মেৎচ অমত্তা শানখিদে, অদুবু মখোয়দা লৈরিবা হরাওবদি অদুক্কী মতীক চাউই, মখোয়না মীয়ামদা য়েংবদা কৈদৌনুংদা মকোক নোনথখিদে, অমসুং মদুনা ঐখোয়গী অমসুং তীম অসিগী য়াম্না মরুওইবা অমা ওইখি। অসিগুম্বা মরুওইবা তুর্নামেন্ত অমা শানবা মতমদা নাক্কনা ফম্লিবা অঙাংশিং অসিগী থৌনা উবদা ঐহাক্না য়াম্না হরাওই।
প্রধান মন্ত্রী – কোচ অমা ওইনা নহাক্না তীম অপুনবা ওইনা য়েংলম্বসি ঐহাক্না নুংঙাই অমসুং ঐহাক্না থাজৈ মদুদি নহাক্কী ৱাহৈ ৩-৪ অসিবু তারুবশিংদা খলহনগনি মদুদি মীওই খরা ফীল্দদা উবা ফংদ্রবসু মখোয়না ফীল্দ অসিদা মচু হাপ্লি, শম্নহল্লি, অমসুং ঐহাক্না ক্রিকেত্তা উখ্রে মদুদি মীপুম খুদিংমক্কী তোঙান-তোঙানবা শরুক তম্নৈ। অসিগুম্বা অচৌবা থৌনা অসি য়াম্না মরুওই, মসি খক্তদা মায় পাকপা ঙমগনি। অদুবু রাহুল, ঐহাক্না খঙনিংই মদুদি ২০২৮ তা য়ু.এস.এ.দা ওলিম্পিক পাঙথোকপা মতমদদি ক্রিকেতসু ওলিম্পিক্কী শরুক অমা ওইরগনি অমসুং ঐহাক্না থাজৈ মদুদি মীয়াম্না ৱার্ল্দ কপতগী হেন্না মীৎয়েং চঙনরগনি। করিগুম্বা ভারত সরকারনা নত্ত্রগা ক্রিকেত বোর্দনা নৎত্রগা মীয়াম্না নহাক্কী ৱাখল্লোন অসি খনবা তারবদি ওলিম্পিক্কীদমক করম্না শেম শাগনি? মতৌ করম্না তৌগনি? নহাক্না কা হেন্না লূম্না অমুক খল্লবদি নহাক্কী রিএক্সন করি ওইগনি?
রাহুল দ্রাবিদ – নত্তে মোদীজি, ওলিম্পিক্তা শানবা ফংবা হায়বসি শানরোইশিংনা রাই লাইনা ফংবা খুদোংচাবা অমা নত্তে, মরমদি ক্রিকেতপু ওলিম্পিক্তা হাপ্লকপা হায়বসি হন্দক্কী ২০২৮কী অসিনা অহানবনি। মরম অসিনা ঐহাক্না খল্লি মদুদি লৈবাক অসিগী ওইনা অমসুং ক্রিকেত বোর্দকী ওইনা য়াম্না অচৌবা অমনি। ক্রিকেতরশিংগী ওইনদি, তুর্নামেন্তশিংদা কন্না হোৎনগদবনি অমসুং অদোম্না মমাংদা হায়খিবগুম্না, অতৈ মশান্নশিংদসু হোৎনগদবনি, অতৈ মশানশিংদা ঐখোয়গী অফাওবা শানরোই কয়া অমা লৈরি। মখোয়না লৈবাকসিদা চাউথোকচনিংঙাই মিংচৎ কয়া অমা পুরক্লি অমসুং ক্রিকেতপু ওলিম্পিক্তা হাপ্লকপা হায়বসি য়াম্না চাউবা থৌরাং অমনি, মসি ক্রিকেতকী ওইনদি চাউথোকচনিংঙাইনি। অমসুং ঐহাক্না থাজৈ মদুদি মতম অদুদা বি.সি.সি.আই.দা লৈগদবা বোর্দ অদুনা তুর্নামেন্ত অদুগী মতীক চানা শেম শাবীগনি হায়না থাজৈ। ঐহাক্না থাজৈ মদুদি তীম অসিদগী নুপামচা কয়া অমা মদুদা শানবা য়াওগনি… অদুগা ঐহাক্না থাজৈ মদুদি মদুদা রোহিত, বিরাতকুম্বা নহা কয়া অমসু য়াওগনি।
প্রধান মন্ত্রী – চুম্মি, ২০২৮ ফাওবদদি মীওই কয়া অমা লৈগনি! ২০২৮ ফাওবদদি মীওই কয়া অমা লৈরগনি।
রাহুল দ্রাবিদ – অদুনা ঐহাক্না থাজৈ মদুদি হায়রিবা নুপামচাশিং অদুনা শনাগী তক্মান লৌরকপা ওইরসনু, মসিদগী হেন্না নুংঙাইবা মিংচৎ লৈররোই, মরম অসিনা কন্না হোৎনগদবনি।
প্রধান মন্ত্রী – মায় পাকপা মতমদা পি তাবা উবা মীকুপতা ঐহাক্না ফাওই মদুদি মখোয়না মায়থিখিবা মীকুপশিং অদু কয়াগী মতীক ৱারমগদগে হায়বদু উবা ফংই। মীয়াম্না মায়থিবগী মীকুপ অদু ফাওবা ঙমদে, শানরোইশিং অসিনা কয়া য়াম্না মীকুপ অদুদা খাঙবগে হায়বদু খঙবা ঙমদে। মরমদি অৱাবা মীকুপ কয়া অমা খাঙলুরবা মতুংদা খোংথাং অমখক্তমক ৱাৎলিবনি। অদুগা মখোয়না মায় পাক্লকপা মতমদা, মহাক্কী নুংঙাইবা অদুনা মায়থিবা মীকুপতা কয়াগী মতীক ৱারমগদগে হায়বদু খঙবা ঙম্মি। অমসুং হায়রিবশিং পুম্নমকসি নুমিৎ অদুদা উবা ফংই, ঐহাক ইশামক্না মদু ফাওখ্রে, অমসুং ঐহাক্না থাজবা থম্মি মদুদি হায়রিবদু নোংমদি মায় পাকপা ঙমগনি অমসুং ঙসিদি নখোয়না মায় পাক্লে হায়বসি ফাওই। নখোয় পুম্নমক্কী মফমদা হরাওবা কয়ারক হন্না ফোঙদোক্নিংঙাই ওই!
***
(Release ID: 2031217)
Visitor Counter : 29
Read this release in:
English
,
Urdu
,
Marathi
,
Hindi
,
Hindi_MP
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam