নৌনা পুথোকপা পীতক তৌবা, মমল হোংবা অমসুং য়াম্না লাইনা খোয়বা য়াবা ত্রেক্তরনা লায়রবা অমসুং লম য়াম্না লৈতবা লৌমীশিংগী পোৎথোক হেনগৎহনবগা লোয়ননা লৌউ উবদা চঙবা শেনফম হন্থহনবা ঙমগনি। অসিগুম্বা ত্রেক্তরশিং লৌমীশিংদা ফংহন্নবা পাক-শন্না পুথোক্নবা মেনুফেকচরিং প্লান্ত অমা লিংখৎনবা এম.এস.এম.ই অমনা থৌরাং তৌরে।

ভারতকী লৌমীশিংগী মনুংদা লায়রবা অমসুং লম য়াম্না লৈতবা লৌমীশিংনা চাদা ৮০ ওইরি। মশিং য়াম্লবা লৌমী অয়াম্বা শা-ষন শীজিন্নরি অমসুং মসিনা লৌ উবদা চঙবা শেনফম হঞ্জিনবা ঙমদবগী অচৌবা অৱাবা অমা মায়োক্নরি। ত্রেক্তরশিংনা ষন্না লৌ খোয়বগী মহুৎশিল্লবসু, মখোয় শীজিন্নবদা খুদোংচাদবা কয়া থেংনরি। অমরোমদা, ত্রেক্তরশিং অসি লায়রবা লৌমীশিং অমসুং লৌফম য়াম্না পীক্না লৈবা লৌমীশিংদা চুনদে অমসুং লায়রবা লৌমী অয়াম্বনা মখোয় ৱাইদুনা শীজিন্নবা ঙমদে।

হায়রিবা খুদোংচাদবশিং অসি কোকহন্নবা, সি.এস.আই.আর-সেন্ত্রেল মেকানিকেল ইঞ্জিনিয়ারিং রিছার্স ইন্সতিতুৎনা লায়রবা অমসুং লম য়াম্না লৈতবা লৌমীশিংগী দরকার ওইবশিং ফংহনবা ঙম্নবা অপীকপা হোর্স পৱারগী পীতক তৌবা, মমল হোংবা অমসুং য়াম্না লাইনা খোয়বা য়াবা ত্রেক্তর অমা পুথোক্লে, মসি দি.এস.তিগী সিদ দিবিজনগী মতেংগা লোয়ননা পুথোকপনি।

মখোয়না তেক্নোলোজি অসি হৌজিক লৈরিবা সেল্ফ হেল্প গ্রুপশিংগী মরক্তা শীজিন্নহল্লে অমসুং মসিগী তেক্নোলোজি অসিগী অকক্নবা অনৌবা সেল্ফ হেল্প গ্রুপশিং শেম্নবা থবকশিং পায়খৎলে। ত্রেক্তর মখল অসি মশিং য়াম্না শানবা লোকেল কম্পেনিশিংদা লাইসেন্স পীনবা সি.এস.আই.আর-সেন্ত্রেল মেকানিকেল ইঞ্জিনিয়ারিং রিছার্স ইন্সতিতুৎনা খন্নরি অমসুং মসিনা লৌমীশিংদা কান্নবা পীরগনি।

ত্রেক্তর অসি হোর্স পৱার ৯গী ইঞ্জিন, মমাঙগী স্পিৎ ৮ অমসুং মনিংগী স্পিৎ ২, আর.পি.এম ৫৪০গী সবলাইন্স ৬গী পি.তি.ও য়াওরি। ত্রেক্তর অসিগী অপুনবা অরুম্বা কেজি ৪৫০ রোম্নি অমসুং ৪.৫-১০ অমসুং ৬-১৬গী মমাং অমসুং মনিংগী চাকাশিং য়াওরি। হুইলবেজ(১২০০ এম.এম), গ্রাউন্দ বেজ ক্লিয়ারেন্স (২৫৫ এম.এম) অমসুং তর্নিং রেদিয়স(১.৭৫ এম.এম)নি।

লৌমীশিংনা ষন্না খোয়বদা নুমিৎ কয়ানিগী মতম চঙবা অদু অনৌবা ত্রেক্তর অসিনা শুপ্নগী পুং খরদা লোইশিনবা ঙমগনি অমসুং লৌ উবদা চঙবা শেনফম অমসুং লৌমীশিংনা শেমজিন-শাজিনবদা চঙবদা শেনফম হন্থহনগনি। মরম অদুনা মমল হোংবা ত্রেক্তর অসিনা লায়রবা অমসুং লম য়াম্না লৈতবা লৌমীশিংগী ষনগী মহুৎশীনবা ঙমগনি।

তেক্নোলোজি অসি অনকপা লৌমীশিং অমসুং তোঙান-তোঙানবা মেনুফেকচররশিংদা উৎলে। রাঞ্চিদা লৈবা এম.এস.এম.ই অমনা ত্রেক্তর অসি মশিং য়াম্না পুথোক্নিংবগী অপাম্বা ফোঙদোক্লে। মখোয়না ত্রেক্তরশিং অসি অতাবা মমলশিংদা তোঙান-তোঙানবা রাজ্য সরকারশিংদা ফংহন্নবা থৌরাং তৌরি।

***