ভারতকী হিথাংফম চাউখৎহন্নবা থৌরমদা অচৌবা ইনোৎ অমা ওইনা, ৱার্ল্দ বেঙ্ক অমসুং এস এন্দ পি গ্লোবেল মার্কেত ইন্তিলিজেন্সনা শেম্বা রিপোর্ত- কন্তেন্নর পোর্ত পর্ফোমেন্স ইন্দেক্স(সি পি পি আই),২০২৩ দা মালেমগী মকোক থোংবা হিথাংফম ১০০গী মনুংদা, ভারতকী মরুওইবা হিথাংফম ৯ য়াওরে। মাইপাকপা অসিগী মনা, হিথাংফমশিং মতমগা চুনবা মওংদা শেমগৎনবা অমসুং মখোয় থবক পাংথোকপা হেনগৎহন্নবা, প্রধান মন্ত্রী নরেন্দ্র মোদীনা শেমগৎপা সাগরমালাদা, পোর্তস, সিপ্পিং অমসুং ৱাতরৱেজগী য়ুনিয়ন মিনিস্তর শ্রী সর্বনন্দা সোনোৱালনা পীখি।

থৌরম অদুদা ৱা ঙাংবদা, শ্রী সর্বনন্দা সোনোৱালনা হায়খি মসি ভারতকী হিথাংফমশিংগী অচৌবা মাইপাকপা অমনি অমসুং থবক পাংথোকপা হেনগৎহন্নবা মখোয়  মতমগা চুনবা মওংদা শেমগৎনবা, মেকানাইজ তৌনবা অমসুং তেক্নোলোজি শীজিন্ননবা প্রধান মন্ত্রী নরেন্দ্র মোদীগী সরকারনা হোৎনখিবগী খুদম অমনি। জহাসশিং অমসুং কার্গো লোয়নবগী থবকশিং শিংথাবা য়ানা ফগৎলে।

মীৎয়েং শানবা লুচিংবগীদমক প্রধান মন্ত্রী শ্রী নরেন্দ্র মোদী থাগৎলদুনা, শ্রী সর্বনন্দা সোনোৱালনা হায়খি সাগরমালাগুম্বা অচৌবা থবকশিংগী খুৎথাংদা ঐখোয়না হিথাংফমশিং মথৌ পাংথোকপা হেনগৎহল্লে। মসিনা ভারতকী মেরিতাইম উদ্যোগ অসি মালেমগী কৈথেলশিংদা চাংদম্নবা ঙম্নবা অমসুং তুংকোইনা থবক তৌবা ঙম্নবা খুদোংথিবা মায়োক্নবা ঙম্বা, অনৌবা তেক্নোলোজি শীজিন্নবা অমসুং গ্রিন ইনফ্রাস্ত্রকচর শেমগৎপদা মতেং পাংলে। হিরম অসিদা থবক কয়া পায়খৎতুনা, ভারতকী মেরিতাইম সেক্তর অসি মখা তানা ফগৎহনবা ঙমগনি অমসুং হিথাংফম্না লমজিংবা শেন্মিৎলোন অমা চাউখৎহনবা ঙমগনি হায়না ঐখোয়না থাজবা থম্লি।

বিশাখাপত্নম অসি ২৭.৫ মুভস পর ক্রেন আৱার, পুং ২১.৪গী তর্ন আরাউন্ত তাইম(তি আর তি) লৈদুনা অমসুং বার্থ আইদল তাইম য়ামদনা লৈদুনা ফজনা থবক তৌরি হায়বা উৎলে। হায়রিবা মশিং অসিনা কন্তেন্নর জহাসশিং শেন্নবদা হিথাংফম অসিনা পাংথোক্লিবা থবকশিং উৎথোক্লে। মালেমগী মকোক থোংবা হিথাংফম ১০০গী মনুংদা য়াওরিবা ভারতকী অতোপ্পা হিথাংফম ৭ অদুদি পিপাবাব(৪১), কমারাজার(৪৭), কোচিন(৬৩), কৃষ্ণপত্নম(৭১), চেন্নাই(৮০) অমসুং জৱাহরলাল নেহরু(৯৬)নি।

*****