"ಭಾರತವು ಕಂಟೆಂಟ್‌ನ ಶಕ್ತಿಕೇಂದ್ರವಾಗಿದೆ. ಹೆಚ್ಚಿನ ಸೃಜನಶೀಲ ಮಹತ್ವಾಕಾಂಕ್ಷೆ ಮತ್ತು ಜಾಗತಿಕ ಮನಸ್ಥಿತಿಯೊಂದಿಗೆ, ನಮ್ಮ ವಿಷಯವು ಜಾಗತಿಕವಾಗಿ ಹೋಗಬಹುದು" ಎಂದು ಅಂತರರಾಷ್ಟ್ರೀಯ ಖ್ಯಾತಿಯ ಚಲನಚಿತ್ರ ನಿರ್ಮಾಪಕ ಕೇತನ್ ಮೆಹ್ತಾ ಅವರು ಇಂದು 18 ನೇ ಮುಂಬೈ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವದ (ಎಂ.ಐ.ಎಫ್.ಎಫ್.) ಸಂದರ್ಭದಲ್ಲಿ ನಡೆದ ತಂಡ ಚರ್ಚೆಯಲ್ಲಿ ಹೇಳಿದರು. ಭಾರತದಲ್ಲಿ ಅನಿಮೇಷನ್ ಮತ್ತು ಡಿಜಿಟಲ್ ವಿಷುಯಲ್ ಎಫೆಕ್ಟ್ಸ್ ಕ್ಷೇತ್ರದ ಪ್ರವರ್ತಕ ಕೇತನ್, ಭಾರತೀಯ ಅನಿಮೇಷನ್ ಚಲನಚಿತ್ರಗಳ ಸಮಯ ಬಂದಿದೆ ಮತ್ತು ಅವರು ಟೇಕ್ ಆಫ್ ಮಾಡಲು ಸಿದ್ಧರಾಗಿದ್ದಾರೆ ಎಂದು ಹೇಳಿದರು.

ಅನಿಮೇಷನ್ ಚಲನಚಿತ್ರ ನಿರ್ಮಾಣದ ಮೇಲೆ ಪರಿಣಾಮ ಬೀರುವ ಕೆಲವು ಪ್ರಮುಖ ಸಮಸ್ಯೆಗಳ ಕುರಿತು ವಿವರಣೆ ನೀಡುತ್ತಾ, ಉತ್ಪಾದನಾ ವೆಚ್ಚಗಳು ಮತ್ತು ವಿತರಣಾ ಮಾರುಕಟ್ಟೆಗಳ ಕೊರತೆಯು ಪ್ರಮುಖ ಅಡೆತಡೆಗಳಾಗಿವೆ ಎಂದು ತಿಳಿಸಿದರು. “ನಾವು ಈ ವಿಷವರ್ತುಲದಿಂದ ಹೊರಬರಬೇಕು ಮತ್ತು ಉತ್ಸಾಹದಿಂದ ಚಲನಚಿತ್ರಗಳನ್ನು ಮಾಡಬೇಕು. ನಿಮ್ಮ ಸ್ವಂತ ಚಿತ್ರದ ಬಗ್ಗೆ ನಿಮಗೆ ಸಂತೋಷವಿಲ್ಲದಿದ್ದರೆ, ಅದನ್ನು ಮಾಡಬೇಡಿ, ”ಎಂದು ಅವರು ಹೇಳಿದರು.

ತಂಡ ಚರ್ಚೆಯಲ್ಲಿ ಭಾಗವಹಿಸಿ, ಅನಿಮೇಷನ್‌ನಲ್ಲಿ 19 ವರ್ಷಗಳ ಅನುಭವ ಹೊಂದಿರುವ ಸಮೃದ್ಧ ಇರಾನಿನ ಬರಹಗಾರ, ನಿರ್ದೇಶಕ ಮತ್ತು ಪಾತ್ರ ವಿನ್ಯಾಸಕ ಮೊಹಮ್ಮದ್ ಖೈರಂದೀಶ್, ತಮ್ಮ ಚಲನಚಿತ್ರಗಳ ವಿಷಯವು ನೈಜತೆ ಮತ್ತು ಸ್ಥಳೀಯ ಸಂಪ್ರದಾಯಗಳನ್ನು ಪ್ರತಿಬಿಂಬಿಸುತ್ತದೆ, ಅನಿಮೇಷನ್ ಮೂಲಕ ಜಾಗತಿಕ ಪ್ರೇಕ್ಷಕರನ್ನು ಪರಿಣಾಮಕಾರಿಯಾಗಿ ತಲುಪುತ್ತದೆ ಎಂದು ಹೇಳಿದರು. "ಹೃದಯದಿಂದ ಬರುವ ಚಲನಚಿತ್ರವು ಲಕ್ಷಾಂತರ ಹೃದಯಗಳಿಗೆ ಹೋಗುತ್ತದೆ" ಎಂದು ಅವರು ಹೇಳಿದರು.

ಮುಂಬೈನ ವೈಭವ್ ಸ್ಟುಡಿಯೋದಲ್ಲಿ ಇಂಟರ್ನ್ಯಾಷನಲ್ ಎಮ್ಮಿ-ನಾಮನಿರ್ದೇಶಿತ ಅನಿಮೇಷನ್ ಚಲನಚಿತ್ರ ನಿರ್ಮಾಪಕ ಮತ್ತು ಸಂಸ್ಥಾಪಕ ಮತ್ತು ಸೃಜನಾತ್ಮಕ ನಿರ್ದೇಶಕ ವೈಭವ್ ಕುಮಾರೇಶ್ ಅವರು ಅನಿಮೇಷನ್ ಮೂಲಕ ಪ್ರೇಕ್ಷಕರನ್ನು ಸೆರೆಹಿಡಿಯುವ ಸಾರದ ಬಗ್ಗೆ ಮಾತನಾಡಿದರು. “ನನ್ನ ಚಿತ್ರದ ಮೊದಲ ಪ್ರೇಕ್ಷಕ ನಾನೇ. ಚಿತ್ರ ನನ್ನನ್ನು ಕದಲಿಸಿದರೆ, ಅದು ಖಂಡಿತವಾಗಿಯೂ ನನ್ನ ಪ್ರೇಕ್ಷಕರನ್ನು ಸೆಳೆಯುತ್ತದೆ. ಪ್ರೇಕ್ಷಕರ ನಾಡಿಮಿಡಿತವನ್ನು ಅರ್ಥಮಾಡಿಕೊಳ್ಳುವುದು ಅತ್ಯಂತ ಮುಖ್ಯವಾದ ವಿಷಯ, ”ಎಂದು ಅವರು ಹೇಳಿದರು.

ಭಾರತೀಯ ಚಲನಚಿತ್ರೋದ್ಯಮದ ಕಿರಿಯ ನಿರ್ಮಾಪಕರಲ್ಲಿ ಒಬ್ಬರಾದ ಜಾಕಿ ಭಗ್ನಾನಿ, ಭಾರತವು ವಿಷಯ ಮತ್ತು ಪ್ರತಿಭೆಯ ಉದಯೋನ್ಮುಖ ಶಕ್ತಿ ಕೇಂದ್ರವಾಗಿದ್ದು ಅದನ್ನು ಸರಿಯಾಗಿ ಅನ್ವೇಷಿಸಿ ಮತ್ತು ಪೋಷಿಸುವ ಅಗತ್ಯವಿದೆ ಎಂದು ವಿವರಣೆ ನೀಡಿದರು. "ಇತ್ತೀಚಿನ ದಿನಗಳಲ್ಲಿ ನಾವು ಬಳಸುತ್ತಿರುವ ತಂತ್ರಜ್ಞಾನದ ಪ್ರಕಾರ, ಸರಿಯಾದ ವೇದಿಕೆಯನ್ನು ನೀಡಿದರೆ, ಮುಂಬರುವ ವರ್ಷಗಳಲ್ಲಿ ಚಲನಚಿತ್ರಗಳಂತೆ ಜಗತ್ತನ್ನು ಆಳುವ ಸಾಮರ್ಥ್ಯವನ್ನು ಭಾರತೀಯ ಅನಿಮೇಷನ್ ಚಲನಚಿತ್ರಗಳು ಹೊಂದಿವೆ" ಎಂದು ಅವರು ಹೇಳಿದರು.

ಲೈವ್-ಆಕ್ಷನ್, ಅನಿಮೇಷನ್, ಗೇಮಿಂಗ್ ಮತ್ತು ವಿ.ಎಫ್‌.ಎಕ್ಸ್‌ ನಾದ್ಯಂತ 27 ವರ್ಷಗಳ ಅನುಭವ ಹೊಂದಿರುವ ಸೃಷ್ಟಿಕರ್ತ, ನಿರ್ಮಾಪಕ ಮತ್ತು ನಿರ್ದೇಶಕ ಮುಂಜಾಲ್ ಶ್ರಾಫ್ ಕಾರ್ಯಕ್ರಮವನ್ನು ನಿರ್ವಹಣೆ ಮಾಡಿದರು.

*****