তথ্যচিত্ৰ, চুটি কল্পকাহিনী আৰু এনিমেশ্বন ছবিৰ ১৮ সংখ্যক মুম্বাই আন্তঃৰাষ্ট্ৰীয় চলচ্চিত্ৰ মহোৎসৱত আজি “বিয়ণ্ড দ্য লেন্স: তথ্যচিত্ৰ নিৰ্মাণত পুঁজি আৰু মণিটাইজেশ্বন” বিষয়ক এক আকৰ্ষণীয় আলোচনা চক্ৰ অনুষ্ঠিত হয়। এই আলোচনা চক্ৰত তথ্যচিত্ৰ নিৰ্মাণত ধন সংগ্ৰহ আৰু লাভৰ উদ্ভাৱনীমূলক উপায়ৰ বিষয়ে আলোচনা কৰা হয়, যিয়ে কাহিনীক জীৱন্ত কৰি তুলিব বিচৰা চলচ্চিত্ৰ নিৰ্মাতাসকলক যথেষ্ঠ উৎসাহিত কৰিব।

জম্মু-কাশ্মীৰৰ তথ্য আৰু জনসংযোগ বিভাগৰ সঞ্চালক যতীন কিশোৰে জম্মু-কাশ্মীৰক এক প্ৰধান চলচ্চিত্ৰ নিৰ্মাণৰ গন্তব্যস্থান হিচাপে প্ৰচাৰৰ লক্ষ্যৰে অঞ্চলটোৰ নতুন চলচ্চিত্ৰ নীতিৰ ওপৰত আলোকপাত কৰে। তথ্যচিত্ৰ, চুটি কল্পকাহিনী আৰু এনিমেশ্বন ছবিৰ বাবে বিশেষ ব্যৱস্থাৰে ইয়াৰ উপৰিও তেওঁলোকৰ ছিংগল ৱিন্ড' ব্যৱস্থাই জম্মু-কাশ্মীৰত শ্বুটিংৰ বাবে প্ৰয়োজনীয় অনুমতি লাভৰ বাবে প্ৰক্ৰিয়াক সুশৃংখলিত কৰিব বুলি তেওঁ উল্লেখ কৰে। লগতে তেওঁ জম্মু-কাশ্মীৰ প্ৰশাসনে উদীয়মান চলচ্চিত্ৰ নিৰ্মাতাক সহায়ৰ বাবে পুঁজি গঠনৰ পৰিকল্পনাৰ কথাও ঘোষণা কৰে।

(ফটোত: ১৮ সংখ্যক এম আই এফ এফত “বিয়ণ্ড দ্য লেন্স: ফাণ্ডিং এণ্ড মনিটাইজেচন ইন ডকুমেণ্টৰী ফিল্ম মেকিং”ৰ ওপৰত অনুষ্ঠিত আলোচনা চক্ৰ)

এম ইউ বি আইৰ এছিয়া-প্ৰশান্ত মহাসাগৰীয় অঞ্চলৰ প্ৰগ্ৰেমিং সঞ্চালিকা স্বেটলানা নাউডিয়ালে তথ্যচিত্ৰৰ উদীয়মান পৰিৱেশৰ ওপৰত গুৰুত্ব আৰোপ কৰে।  বৰ্তমান সময়ত তথ্যচিত্ৰসমূহ বহু দূৰ আগবাঢ়িছে বুলিও তেওঁ স্বীকাৰ কৰে যদিও এতিয়াও বহুখিনি অগ্ৰগতি বাকী আছে বুলিও স্বীকাৰ কৰে।  এম ইউ বি আইত তেওঁলোকে বৈশিষ্ট্যপূৰ্ণ আৰু অবৈচিত্ৰ্যপূৰ্ণ ছবিৰ মাজত পাৰ্থক্য নৰখাকৈ উচ্চমানৰ বিষয়বস্তুক অগ্ৰাধিকাৰ দিয়ে বুলি তেওঁ প্ৰকাশ কৰে।

নেটৱৰ্ক১৮ৰ জ্যেষ্ঠ মিডিয়া কাৰ্যবাহী তথা কন্টেন্ট এণ্ড ডকুমেণ্টেচনৰ সভাপতি অৰুণ থাপৰে তথ্যচিত্ৰ শিল্পী আৰু সাংবাদিক উভয়ৰে দ্বৈত ভূমিকাক আলোকপাত কৰে। তেওঁ কয় যে তথ্যচিত্ৰৰ ক্ষেত্ৰখনত নতুন ব্ৰেণ্ডিঙে বাস্তৱিক মনোৰঞ্জনক এক শক্তি প্ৰদান কৰিছে। থাপৰে কয় যে তথ্যচিত্ৰই সমাজত গুৰুত্বপূৰ্ণ ভূমিকা পালন কৰে যদিও এই যাত্ৰা সহজ হোৱা নাই। তেওঁৰ মতে তথ্যচিত্ৰই আৰ্থিক সফলতা লাভ কৰিবলৈ হ’লে বজাৰৰ চাহিদা অনুসৰি তথ্যচিত্ৰসমূহ নিৰ্মাণ কৰিব লাগিব। থাপৰে কয় যে ফেষ্টিভেল চাৰ্কিটে ছবিসমূহ ষ্ট্ৰীমিং প্লেটফৰ্মত উপস্থাপন কৰাৰ পূৰ্বে প্ৰচাৰৰ বাবে এক গুৰুত্বপূৰ্ণ মঞ্চ প্ৰদান কৰে। ক্ৰাউডছ’ৰ্চিংও এক কাৰ্য্যকৰী পুঁজিৰ বিকল্প। তেওঁ আমেৰিকাৰ বজাৰৰ সৈতে সমান্তৰালতা অৰ্জন কৰি ৰাজহুৱা সম্প্ৰচাৰ সেৱা আৰু চৰকাৰী সহায়ৰ গুৰুত্বৰ ওপৰতো গুৰুত্ব আৰোপ কৰে।

ডকুবেৰ মুখ্য পৰিচালন বিষয়া গিৰীশ দ্বিবশ্যামে ষ্ট্ৰীমিং প্লেটফৰ্মলৈ কি আহি আছে সেই সন্দৰ্ভত নিজৰ চিন্তাধাৰা প্ৰকাশ কৰে। তেওঁ কয় যে তথ্যচিত্ৰ নিৰ্মাতাসকলে তেওঁলোকৰ বিষয়বস্তুৱে যাতে অধিক দৰ্শকক আকৰ্ষণ কৰে সেয়া নিশ্চিত কৰিব লাগিব। দ্বিবশ্যামে কয় যে সৰ্বভাৰতীয় বা বিশ্বব্যাপী গুৰুত্ব থকা সু-গৱেষণামূলক বিষয়বস্তু অতি প্ৰয়োজনীয়।  তেওঁ কয়, "আন্তঃৰাষ্ট্ৰীয় বঁটাই প্ৰচাৰ বৃদ্ধি কৰিব পাৰে যদিও স্বীকৃতিৰ পূৰ্বচৰ্ত নহয়। সঠিক গৱেষণাৰ জৰিয়তেহে এটা ভাল কাহিনীয়ে গুৰুত্ব লাভ কৰিব পাৰে।"

ফিল্ম মস্কোৰ প্ৰতিষ্ঠাপক ইলিয়া টলষ্টভে ৰাছিয়াৰ বজাৰত ক্ৰমবৰ্ধমান সুযোগৰ বিষয়ে আলোচনা কৰে। যদিও এসময়ত বিশ্বজুৰি পশ্চিমীয়া বিষয়বস্তুৱে আধিপত্য বিস্তাৰ কৰি আছে, তথাপিও ইলিয়া টলষ্টভে কয় যে এতিয়া পৰিৱেশ সলনি হৈছে আৰু ৰাছিয়াৰ চলচ্চিত্ৰ উদ্যোগৰ সম্প্ৰসাৰণ ঘটিছে। “ৰাছিয়াত বহু চলচ্চিত্ৰ মহোৎসৱ অনুষ্ঠিত হয়, যাৰ বাবে চলচ্চিত্ৰ নিৰ্মাতাসকলে ৰাছিয়াৰ বজাৰত প্ৰৱেশৰ সুযোগ লাভ কৰে।” তেওঁ নিশ্চিত কৰে যে তেওঁ সহ-প্ৰডাকচনৰ ধাৰণাসমূহৰ বাবে মুকলি আৰু চলচ্চিত্ৰ নিৰ্মাতাসকলক সমৰ্থন কৰিবলৈ আগ্ৰহী, ভাৰতীয় ছবিসমূহে ৰাছিয়াত উচ্চ ৰেটিং পায় বুলি উল্লেখ কৰে।

এই আলোচনাৰ আঁত ধৰে জীৱনীকাৰ তথা তক্ষশীলা মাল্টিমিডিয়াৰ প্ৰতিষ্ঠাপক ৰজনী আচাৰ্যই। আচাৰ্যই কয়, "তথ্যচিত্ৰৰ সফলতাৰ অনুপাত প্ৰায় ১০%, আৰু চলচ্চিত্ৰ নিৰ্মাতাসকলে ৯০% ৰিস্ক ল'বলৈ সাজু হ'ব লাগিব। যিকোনো তথ্যচিত্ৰ নিৰ্মাতাই সন্মুখীন হোৱা আটাইতকৈ ডাঙৰ প্ৰত্যাহ্বানটো হ'ল পুঁজিৰ ব্যৱস্থা।"

PIB Team MIFF | Gautam/ Bibin/ Darshana | 14 | AN