مرکزی وزیر شیوراج سنگھ چوہان نے آج دیہی ترقی کی وزارت کا عہدہ سنبھال لیا ہے۔ چارج سنبھالنے کے بعد میڈیا سے خطاب کرتے ہوئے وزیر موصوف نے کہا کہ دیہی ترقی، وزیر اعظم نریندر مودی کی ترجیح رہی ہے اور اس سمت میں کئی اسکیمیں نافذ کی جارہی ہیں۔ جناب چوہان نے کہا کہ پردھان منتری گرام سڑک یوجنا (پی ایم جی ایس وائی) جیسی اسکیموں نے ملک کے دیہی منظرنامے کو بدل دیا ہے۔ مہاتما گاندھی قومی دیہی روزگار گارنٹی  اسکیم (ایم جی این آر ای جی ایس) کے بارے میں بات کرتے ہوئے، انہوں نے کہا کہ یہ ایک بہت بڑا روزگار پیدا کرنے والی اسکیم ہے اور اب اس اسکیم کے تحت اثاثے بنانے پر زور دیا جا رہا ہے۔ انہوں نے کہا کہ وزیر اعظم مودی کی قیادت میں دیہی ترقی میں انقلابی پیشرفت ہوئی ہے اور تین کروڑ لکھ پتی دیدیوں کو بااختیار بنانا ان کا خواب ہے۔ جناب چوہان نے کہا کہ یہ اسکیم ان کے دل کے بہت قریب ہے اور ان کی حکومت ملک کی خواتین آبادی کے لیے انصاف کو یقینی بنانے کے لیے پرعزم ہے۔ وزیرموصوف نے کہا کہ خواتین کو بااختیار بنانا حکومت کا ایک مشن ہے اور خود امداد ی گروپ اس کے لیے اہم کردار ادا کر رہے ہیں۔ دیہی ترقی کے وزیر نے یہ بھی کہا کہ ان کی وزارت حکومت کے 100 دن کے پلان میں طے شدہ کاموں کو حاصل کرنے کے لیے کام کرے گی۔ انہوں نے مرکزی کابینہ کی طرف سے پردھان منتری آواس یوجنا کے تحت مزید تین کروڑ مکانات تعمیر کرنے کے فیصلے کا بھی ذکر کیا۔

بعد ازاں، انہوں نے وزارت کے سینئر حکام کی میٹنگ کی اور وزارت کے کام میں شفافیت کی ضرورت پر زور دیا۔ انہوں نے دیہی ترقی کے لیے حکومتی منشور بھی پیش کیا اور ہر ایک سے اس کی تکمیل کے لیے کام کرنے کی اپیل کی۔

دیہی ترقیات کے وزیر مملکت جناب کملیش پاسوان نے بھی آج اپنے قلمدان کا چارج سنبھال لیا ہے۔ محکمہ کے سیکرٹریوں اور وزارتوں کے دیگر اعلیٰ حکام نے معزز وزراء کا استقبال کیا۔

****

ش ح۔ش ت۔ن ع

U:7331