فوڈ سیفٹی اینڈ اسٹینڈرڈز اتھارٹی آف انڈیا (ایف ایس ایس اے آئی) نے ایک ہدایت جاری کی ہے جس میں تمام فوڈ بزنس آپریٹروں (ایف بی او) کو حکم دیا گیا ہے کہ وہ فوری اثر کے ساتھ دوبارہ تشکیل شدہ پھلوں کے رس کے لیبل اور اشتہارات سے ’100 فیصد پھلوں کے رس‘ کے کسی بھی دعوے کو ہٹا دیں۔ تمام ایف بی او کو 1 ستمبر 2024 سے پہلے سبھی موجودہ پرنٹ شدہ پیکیجنگ مواد کو ختم کرنے کی بھی ہدایت کی گئی ہے۔

ایف ایس ایس اے آئی کے علم میں آیا ہے کہ متعدد ایف بی او 100 فیصد پھلوں کا رس ہونے کا دعویٰ کر کے مختلف قسم کے دوبارہ تشکیل شدہ پھلوں کے جوس کی غلط مارکیٹنگ کر رہے ہیں۔ مکمل جانچ کے بعد، ایف ایس ایس اے آئی نے یہ نتیجہ اخذ کیا ہے کہ فوڈ سیفٹی اینڈ اسٹینڈرڈز (ایڈورٹائزنگ اینڈ کلیمز) ریگولیشنز، 2018 کے مطابق، ’100 فیصد‘ دعویٰ کرنے کا کوئی انتظام نہیں ہے۔ اس طرح کے دعوے گمراہ کن ہیں، خاص طور پر ایسی حالتوں میں جہاں پھلوں کے رس کا بڑا جزو پانی ہوتا ہے اور بنیادی جزو، جس کے لیے یہ دعویٰ کیا گیا ہے، صرف محدود مقدار میں موجود ہوتا ہے۔

’100 فیصد پھلوں کے رس‘ کے طور پر دوبارہ تشکیل شدہ پھلوں کے جوس کی مارکیٹنگ اور فروخت کے حوالے سے جاری کردہ وضاحت میں، ایف بی او کو یاد دلایا جاتا ہے کہ انہیں پھلوں کے رس کے معیارات کی تعمیل کرنی چاہیے جیسا کہ فوڈ سیفٹی اینڈ اسٹینڈرڈز (فوڈ پروڈکٹس کے معیارات اور فوڈ ایڈیٹیو) ریگولیشن، 2011 کے ذیلی ضابطے 2.3.6 کے تحت بیان کیا گیا ہے۔ اس ضابطے میں کہا گیا ہے کہ اس معیار کے تحت آنے والی مصنوعات کو فوڈ سیفٹی اینڈ اسٹینڈرڈز (لیبلنگ اور ڈسپلے) ریگولیشنز، 2020 کے مطابق لیبل لگانا چاہیے۔ خاص طور پر، اجزا کی فہرست میں، لفظ ”دوبارہ تشکیل شدہ“ کا تذکرہ اس رس کے نام کے سامنے کیا جانا چاہیے جسے ارتکاز کے ذریعہ دوبارہ تشکیل دیا جاتا ہے۔ اس کے علاوہ، اگر شامل کردہ غذائی مٹھاس 15 گرام/کلوگرام سے زیادہ ہو، تو اس پروڈکٹ پر ’میٹھا جوس‘ کا لیبل لگانا چاہیے۔

فوڈ سیفٹی اینڈ اسٹینڈرڈز اتھارٹی آف انڈیا (ایف ایس ایس اے آئی) پورے ملک میں فوڈ سیفٹی معیارات کے ضابطے اور نگرانی کے ذریعے صحت عامہ کے تحفظ اور فروغ کے لیے وقف ہے۔

**************

ش ح۔ ف ش ع- م ف

U: 7156