মে ৩১,২০২৪ দগী মেজর জেনেরেল হার্স ছিব্বর কলেজ ওফ দিফেন্স মেনেজমেন্ত, সিকন্দরবাদকী কমান্দেন্ত ওইরে, ফম অসি রিয়ার এদমিরেল সঞ্জয় দত্তনা পায়রম্বনি। নেসনেল দিফেন্স একাদেমিগী মহৈরোয় মেজর জেনেরেল ছিব্বর আর্মি সর্বিস কোরদা দিশেম্বর ১৯৮৮ দা চঙখি।

মেজর জেনেরেল হার্স ছিব্বর বিজিনেস মেনেজমেন্ত অমসুং পব্লিক এদমিনিস্ত্রেসন্দা এম.ফিল দিগ্রি অনিগা লোয়ননা পব্লিক পোলিসিদা দোক্তর ওফ ফিলোসোফি(পি.ঐচ.দি) দিগ্রি অমা পায়রি। মহাক তেক্নিকেল স্তাফ ওফিসারস কোর্স(তি এস ও সি), হায়র দিফেন্স মেনেজমেন্ত কোর্স(ঐচ দি এম সি) অমসুং এদভান্স প্রোফেসনেল প্রোগ্রাম ইন পব্লিক এদমিনিস্ত্রেসন(অপ্পা) শরুক য়াখ্রে।

পেরা এ.এস.সি কম্পেনি, এ.এস.সি বত্তালিয়ন অমসুং এ.এস.সি ত্রেনিং সেন্তর য়াওনা ইস্তর্ন, নোর্থন অমসুং ৱেস্তর্ন সেক্তরশিংদা মেজর জেনেরেল হার্স ছিব্বরনা তোঙান-তোঙানবা মরুওইবা থৌদাং কয়া পাংথোকখ্রে। মহাক ইস্তর্ন সেক্তরদা ব্রিগেদিয়ার জেনেরেল স্তাফ(ইনফোর্মেসন সিস্তেম) অমসুং নোর্থন সেক্তরদা মেজর জেনেরেল(ওপরেসনেল লোজিসতিক্স) ওইখ্রে। মহাক আর্মি সর্বিস কোর সেন্তর অমসুং কলেজদা ইন্সত্রক্তর ওইনশু থৌ পুরমখি অমসুং  কলেজ ওফ দিফেন্স মেনেজমেন্তদা ফাইনান্সিএল মেনেজমেন্ত দিপার্তমেন্তদা দিরেক্তিং স্তাফ অমসুং হেদ ওইনা পুরমখি। মহাক্না শেমগৎখিবা সোফৱায়র এপ্লিকেসনশিং অমসুং থবক ওইনা পাংথোকখিবশিং মশিং য়াম্লবা য়ুনিতশিংদা শীজিন্নরি।

****