চীফ ওফ দিফেন্স স্তাফ(সি দি এস) জেনেরেল অনিল চৌহান্না হায়খি মদুদি অগ্নিবীরশিং শুপ্নগী লান্মীশিং খক নত্তে, লুচিংবশিং, অনৌবা থবক পাংথোকপশিংনি অমসুং লৈবাক্কী মনিংতম্বা ঙাক্লিবা লান্মীশিংনি। মহাক্না মে ২০,২০২৪দা মরাথা রেজিমেন্তেল সেন্তর অমসুং এয়ারমেন ত্রেন্নিং স্কুল, বেলাগাবিদা ত্রেনিং পাংথোক্লিবা অগ্নিবীরশিংগা ৱারি শান্নখ্রে।

লান্মীগী থবক্কী চাউথোকচনিঙাই ওইবা অমসুং মিলিতরিগী ঙাক্লৌ মনুংদা মসিগী মরুওইবা থৌদাং পল্লদুনা আর্মদ ফোর্সশিং খনবগীদমক মরাথা রেজিমেন্তেল সেন্তরদা সি.দি.এসনা অগ্নিবীরশিং থাগৎপা ফোঙদোকখি। মসি লৈবাক্কীদমক মখোয়গী অখন্নবা থৌদাং পাংথোকপগী খুদম অমনি হায়না মহাক্না ফোঙদোকখি।

লান্মীশিং অমসুং মখোয়গী ইমুং-মনুংশিংগী থেংনরিবা অৱাবশিং অমসুং খুদোংচাদবা মফমশিংদা মথৌ পাংথোকপা মতমদা মখোয়না খাংলিবা অৱাবশিংগীদমক থাগৎপা ফোঙদোক্লদুনা জেনেরেল অনিল চৌহান্না হায়খি খুদোংচাদবা কয়া থেংনরবশু, অগ্নিবীরশিংনা মখোয়গী খোঙচৎকী মহৈ ফংগনি অমসুং মখোয়গী খোঙথাং খুদিংমক্না মখোয় মশা চাউখৎহন্নবা লমজিংগনি অমসুং লৈবাক্কীদমক থবক তৌবগী চাউথোকচবা ফাওহনগনি।

লাল্লোংগী মশক হোংলক্লিবা অসিগী মতাংদা সি.দি.এসনা হায়খি তুংলমচৎকী মুক্নবগী অরুবা অমসুং তম্বা ঙমদবা ফিবমশিংগী মনুংদা য়াওরিবা সাইবর ৱারফিয়ার, আর্তিফিসিএল ইন্তিলিজেন্স অমসুং এসেমেত্রিক থ্রিদশিং অসি হৌজিক লানফমগী তঙাইফদবা মচাক অমা ওইরে। তেক্নোলোজিশিং পুনশিনবা অমসুং লেপ্তনা তম্বা অসি দরকার ওই অমসুং খ্বাইদগী নৌবা থবকশিং শীজিন্নবগী মথক্তা লানফমদা অনৌবা লাল্লোংশিং উৎপশু দরকার ওইরে।

মহাক্কী এ.তি.এস বেলাগাবী খোঙচৎ মনুংদা সি.দি.এসনা আই.এ.এফকী অগ্নিবীরবয়ু ত্রেনিংগী মরমদা মমুৎ তানা খঙনবা ত্রেনিং ইন্সতিতুৎ য়েংখি। ২০২২দা দিফেন্স মিনিস্ত্রিনা চৎনবা হৌহনখিবা নৌনা শেমদোক্লবা থৌরাংগী মতুংইন্না হৌজিক ত্রেনিং চৎথরিবা অহুমশুবা বেতচগী অগ্নিবীরবয়ু ত্রেনিশিংগা মহাক্কা ৱারি শানখি। তুংদা লাক্কদবা লাল্লোংশিংগী শিংনবশিং মায়োক্নবা ঙম্নবা থৌরাং তৌনবা তেক্নোলোজি মতিক চানা খঙলবা লান্মীশিং ওইনবা ত্রেনিংদা থৱায় য়াওনবা মহাক্না মখোয়দা পাউতাক পীখি।

সি.দি.এসনা ত্রেনিশিংদা মখা তানা হায়খি লাইরিক তম্বা হায়বসি পুন্সি চুপ্পা চৎথগদবা থবক অমনি অমসুং লেপ্তনা হোংলক্লিবা লাল্লোংগীদমক অকনবা তেক্নোলোজি শীজিন্নবা অমসুং স্কিল হেনগৎহনবা হায়বসি তঙাইফদে। পুকচেল শেংবা, হকচাং ফবা, থকশি-খাসি লৈবা অমসুং লান্মী অমা ওইবগী থৌনা লৈবগী গুনশিং অসি মতম পুম্নমক্তা চেনগদবনি।

ত্রেনিংগী মরুওইবা পল্লদুনা, সি.দি.এসনা এ.তি.এসফ অমসুং মরাথা রেজিমেন্তেল সেন্তরদা লৈরিবা ত্রেনিং ফেকলতিগী থবকশিং থাগৎপা ফোঙদোকখি অমসুং লৈবাক অসিগী লান্মীগী তৌবা ঙম্বা মখা তানা ফগৎহন্নবা অফবা থবকশিং পায়খৎনবা মখোয়দা তকশিনখি।

****