Ka High level Committee halor ka jingpynlong lang ia ki elekshon ha kajuh ka por ba la thung hapoh ka jingialam jong u Ram Nath Kovind, President barim jong ka India, ka la iakynduh ia ka President jong ka India, Droupadi Murmu bad aiti ia ka Kaiphod jong ka. Ka Kaiphod ka kynthup 18,626 sla, kadei ka jingmih jong ki jingiamir jingmut bad kito kiba don bynta ha kane ka kam, ki riewshemphang bad ka kam wad bniah kaba 191 sngi, naduh ba la thung ia ka ha ka 2 tarik Nailur, 2023.

Kiwei kiwei ki dkhot jong ka Committee kilong u Amit Shah, Myntri sorkar pdeng ba dei khmih ia ka Tnat Kam Pohiing bad Cooperation, u Ghulam Nabi Azad, Nongialam barim jong ka Liang pyrshah ha Rajya Sabha, u N.K. Singh, Chairman barim, 15th Finance Commission, Dr. Subhash C. Kashyap, Secretary General barim, Lok Sabha, u Harish Salve, Senior Advocate, bad u Sanjay Kothari, Chief Vigilance Commissioner barim. U Arjun Ram Meghwal, Myntri Khynnah (Independent Charge) Tnat Law and Justice u long u Nongshah khot kyrpang bad Dr. Niten Chandra u long u Secretary jong ka HLC.

Ka Committee ka la pynlong ia ki jingiamir jingmut ban sngewthuh ia ki jingsngew jong kito kiba don bynta ha kane ka kam. 47 tylli ki seng sain pyrthei ki la aiti ia ki jingsngew bad ki jingai jingmut jong ki, na kane 32 ki kyrshan ia ka jingpynlong elekshon lang ha kajuh ka por. Bun ki seng sain pyrthei ki la pynlong ki jingiamir jingmut bad ka HLC halor kane ka phang. Hadien ka jingpynbna paidbah ba la pyllait ha ki kot khubor ha baroh ki jylla bad ki Union territory, 21,558 tylli ki jubab kidei kiba la iohpdiang na ki briew jong ka ri. 80 per cent kiba jubab ki kyrshan ia ka jingpynlong elekshong ha kajuh kapor. La khot sngewbha da ka Komiti ia ki riewshemphang ha ka ain kum saw ngut ki Chief Justice ba rim jong ka India, phra ngut ki State Election Commissioner bad Chairman, Law Commission of India ban iakren halor kane ka kam. La twad jingmut ruh na ka Election Commission jong ka ri India.

La khot ruh ia ki kynhun kiba trei ha ki kam khaii pateng kum ka CII, FICCI, ASSOCHAM bad ki riewshemphang ha ki kam ka ioh ka kot ba kin ai jingmut halor ka jingktah ia ka ioh ka kot lada pynlong elekshon lang ha kajuh ka por. Ki la ong ba kane ka long kaba donkam na ka bynta ka ioh ka kot namar ka jingpynlong elekshon ha ki por bapher bapher ka wanrah ia ka jingkiew dor ki mar bad ka jingsuki jong ka ioh ka kot. Kine ki kynhun ki la ong ia ka Komiti ba ka jingpynlong elekshon na ka por sha ka por ka ktah ia ka jingkiew ka ioh ka kot, ka jingpynlut pisa na ka bynta ki paidbah, ka pule puthi bad ka ktah ruh ia ka shongsuk shongsain ha ka imlang sahlang.

Hadien ka jingpyrkhat jylliew shaphang kine ki jingai jingmut bad ki jingsngew, ka Komiti ka la ai jingmut ia ka rukom treikam kaba ar bynta ban ialam sha ka jingpynlong lang ia ka elekshon ha kajuh ka por. Kum ka sienjam ba nyngkong, yn pynlong elekshon lang na ka bynta ka Iing Dorbar Thaw ain jong ki paidbah bad ki Iing dorbar Thaw Ain jong ki Jylla. Ha ka sienjam kaba ar, yn pyniahap lang ia ki elekshon na ka bynta ki Municipality bad ki Panchayat ha kajuh ka por bad kine ki Iing Dorbar Thaw Ain ha ka rukom ba ki elekshon jong ki Municipality bad ki Panchayat kin long hapoh shispah sngi hadien ba la pynlong ia ki elekshong na ka bynta ka Iing Dorbar Thaw ain jong ki paidbah bad ki Iing dorbar Thaw Ain jong ki Jylla.

Ka Komiti ka la ai jingmut ruh ba ka dei ban don tang kawei ka electoral roll bad ki Electoral Photo Identity Card (EPIC) ban pyndonkam ha ki elekshon na ka bynta ki lai kyrdan jong ka Sorkar.

Katkum ka kam jong ka ban peit ia ki rukom pyntreikam na ka bynta ka jingpynlong lang ia ki elekshon ha kajuh ka por, bad da kaba kynmaw ia ka jinglong jong ka Riti Synshar, ka Komiti ka la ai ia ki jingmut jong ka ha ka rukom ba iahap bad ka jinglong jong ka Riti Synahr jong ka India bad ha ka rukom ba donkam tang katto katne ki jingpynkylla ia ka Riti Synshar.

Hadien ki jingiamir jingmut, ka Komiti ka la ong ba baroh ki jingai jingmut jong ka kin kyntiew ia ka jingshai, ka jingai bynta lang ia baroh, ka jingshaniah bad ka jingsuk jong ki nongthep vote. Ka jingkyrshan kaba pura na ka bynta ka jingpynlong lang ia ka elekshon ha kajuh ka por kan kyntiew ia ki kam na ka bynta ka roi ka par bad ka jingiaid ryntih ka imlang sahlang, pynskhem ia ka nongrim jong ka synshar paidbah, bad pynurlong ia ki jing thmu jong ka India kaba long ka Bharat.

Ia ka kaiphod ba pura lah ban ioh ha ka: onoe.gov.in/HLC-Report.

Shong hangne ban ioh ia ka: Kaiphod ha ka ktien phareng (https://onoe.gov.in/HLC-Report-en#flipbook-df_manual_book/1/), Kaiphod ha ka ktien Hindi (https://onoe.gov.in/HLC-Report-hi#flipbook-df_manual_book/1/), Flyer English, Flyer Hindi, FAQs.

**************