U Myntri Rangbah Duh, Narendra Modi u la leit jngoh ia ka Sabarmati Ashram bad u la plie paidbah ia ka Kochrab Ashram bad pyllait paidbah ia ka Master plan jong ka Gandhi Ashram Memorial mynta ka sngi. U Myntri Rangbah Duh u la leit buh syntiew ha u mot jong u Mahatma Gandhi bad u la leit jngoh ia ka Hriday Kunj. U la iaid lyngba ka exhibition bad thung ia u tynrai dieng.

Ha ka jingai jingkren jong u, Myntri Rangbah Duh u la ong ba ka Sabarmati Ashram ka dei ka jaka kaba don ka bor kaba kyrpang bad ba ngi sngewthuh ia ka jingioh mynsiem jong u Bapu halade. “Ka Sabarmati Ashram ka la pynneh ia ki jingngeit u Bapu ha ka hok bad ka jingkyntait ia ka jingiaumsnam, rashtra seva bad ka jingiohi ia ka jingshakri ia u Blei ha ka jingshakri ia kito kiba shem jingeh,” u la ong. U Myntri Rangbah Duh u la kren shaphang ka por jong u Gandhi Ji ha Kochrab Ashram kaba long ka jaka ba u Gandhiji u la sah shuwa ba un leit sha Sabarmati. La aiti sha ka ri ia ka Kocharab Ashram ba la pynthymmai mynta ka sngi. U Myntri Rangbah Duh u la ai burom ia u Mahatma Gandhi bad u la kitbok kitrwiang ia ki briew na ka bynta ki projek ba kongsan bad kiba ai mynsiem mynta ka sngi.

U la kren shaphang ka 12 tarik u Lber ha kaba u Bapu u la sdang ia ka Dandi March bad u la pynkylla kyrpang ia kane ka sngi ha ka jingiakhih ka India na ka bynta ka jinglaitluid, u Myntri Rangbah Duh u la ong ba kane ka sngi ka la sakhi ia ka juk kaba thymmai jong ka India kaba la laitluid. Da kaba pynkynmaw ba ka ri ka la sdang ia ka Azadi Ka Amrit Mahotsav na Sabarmati Ashram ha ka 12 tarik u Lber, u Myntri Rangbah Duh u la ong ba kane ka la don ka bynta kaba khraw ha ka jingkynmaw ia ki jinglenlade jong kane ka jaka. “Ka Amrit Mahotsav ka la tei ia ka khyrdop ia ka India ba kan rung sha ka Amrit Kaal”, la ong u Myntri Rangbah Duh, da kaba bynrap ba kane ka la wanrah ia ka jinglong jingman jong ka jingiatylli hapdeng ki briew jong ka ri kaba iasyriem ia ka jinglong jingman ba la iohi ha ka por ba ka India ka ioh jinglaitluid. U la kren shaphang ka bynta jong ki jingngeit jong u Mahatma Gandhi bad ka jingiar jong ka Amrit Mahotsav. “Palat 3 klur ngut ki briew ki la bam smai Panch Pran ha ka prokram Azadi Ka Amrit Kaal”, la ong u Myntri Rangbah Duh. U la pyntip ruh shaphang ka jingsdang ia palat 2 lak tylli ki Amrit Vatika ha kiba la thung palat 2 klur ki tynrai dieng, ka jingsdang ia palat 70,000 tylli ki Amrit Sarovar na ka bynta ka jingpynneh ia ka um, ka kam Har Ghar Tiranga kaba la long ka dak jong ka jingieid ia ka ri bad ka kam Meri Mati Mera Desh ha kaba ki briew jong ka ri ki la ai burom ia ki nongiakhun na ka bynta ka jinglaitluid. U Myntri Rangbah Duh u la kren ruh shaphang ka jingbuh maw nongrim jong palat 2 lak tylli ki projek ha ka Amrit Kaal kaba la pynkylla ia ka Sabarmati Ashram sha ka jaka leit pilkrim na ka bynta ka jingkut jingmut ban ioh ia ka Viksit Bharat.

“Ka ri ka bym lah ban pynneh ia ka deiriti ka duh ia ka lawei. Ka Sabarmati Ashram jong u Bapu ka dei ka deiriti jong baroh ki briew ha ka pyrthei, ym tang ka ri,” la ong u Myntri Rangbah Duh. U la kdew sha ka jingieh bein ia kane ka jaka kaba kyrpang ha kaba u la kren shaphang ka jingswai ka jingheh jong kane ka Ashram na 120 acre sha 5 acre bad u la ong ba na 63 tylli ki jingtei, la sah satang 36 tylli bad ki briew ki lah ban rung ban peit ia tang 3 tylli na kine. U la ong ba ka dei ka jingbahkhlieh jong baroh 140 klur ngut ki briew ka India ban pynneh ia kane ka Ashram namar ka jingiadei jong ka bad ka jingiakhih na ka bynta ka jinglaitluid.

U Myntri Rangbah Duh u la ai jingsngewnguh ia ka jingiatreilang jong ki nongsah ha kane ka Ashram ban ioh biang 55 acre ka jaka jong ka Ashram. U la ong ba ki kwah ban pynneh ia baroh ki jingtei ha kane ka Ashram kumba ki ju long.

U Myntri Rangbah Duh u la ong ba ka dei ka jing duna ka jingkut jingmut, ka rukom pyrkhat ha ki por jong ki mynder bad ka jingpynhun ia ki briew ka la ialam sha ka jingieh bein ia kum kine ki jaka ba kyrpang. U la ai nuksa da ka Kashi Vishwanath Dham ha kaba ki briew ki la iatreilang bad la ioh 12 acre ka jaka na ka bynta kane ka projek ban pynbiang ia ki jingdonkam jong ki riewngeit kaba la ialam sha ka jingwan haduh 12 klur ki pilkrim hadien ka jingtei pynthymmai ia ka Kashi Vishwanath Dham. Kumjuh, la pyllait 200 acre ka jaka ban pyniar ia ka Shri Ram Janambhoomi ha Ayodhya. Hangne ruh palat 1 klur ngut ki riewngeit ki la leit na ka bynta ka Darshan ha kine ki 50 sngi ba la dep.

U Myntri Rangbah Duhu la ong ba ka Gujarat ka la pyni ia baroh kawei ka ri ia ka rukom ban pynneh ia ka deiriti. U la kren shaphang ka jingkhyllie ia ka Somnath hapoh ka jingialam jong u Sardar Patel bad u la ong ba kane ka dei kaba kyrpang ha ka histori. Sa kiwei ki nuksa jong ka jingpynneh ki long ka nongbah Ahmedabad kum ka World Heritage City ha ryngkat ka Champaner bad Dholavira, Lothal, Girnar, Pavagadh, Modhera bad Ambaji, u la ong.

Ha ka jingkren shaphang ka kam ban pynthymmai biang ia ki jaka ba iadei bad ka jingiakhun ka India ban ioh jinglaitluid, u Myntri Rangbah Duh u la kren shaphang ka jingpynthymmai biang ia ka Rajpath ha ka rukom jong ka Kartavya Path bad ka jingbuh ia u mot jong u Netaji Subhash Chandra Bose, ka jingpynthymmai ia ki jaka kiba don jingiadei bad ka jingiakhun jinglaitluid ha ki dewlynnong Andaman bad Nicobar, ka jingtei ia ki jaka ba iadei bad u B R Ambedkar ha ka rukom jong ka ‘Panch Teerth’, ka jingplie paidbah ia u mot Statue of Unity ha Ektanagar bad ka jingpynkylla ia ka Dandi. U Myntri Rangbah Duh u la ban jur bad ka jingpynthymmai biang ia ka Sabarmati Ashram ka dei ka kam kaba kongsan ha kane.

“Ki pateng ki ban wan bad kito kiba leit sha Sabarmati Ashram kin ioh mynsiem na ka bor jong ka chakhra bad ka bor jong ka ban wanrah ia ka jingiakhih. U Bapu u la wanrah ia ka jingkyrmen bad ka jingngeit ha ka ri kaba shem ia ka jingjynjar na ka jingduh jingkyrmen namar ki spah snem jong ka jinglong mraw,” u la ong. U la ong ba ka jing thmu jong u Bapu ka pyni ia ka lynti kaba shai na ka bynta ka lawei jong ka India kaba phyrnai, u Myntri Rangbah Duh u la ong ba ka Sorkar ka peit bniah ia ka bha ka miat jong kiba duk ba suk na ki jaka nongkyndong bad ba ka pyniaid ia ka kam aatmanirbhar Bharat da kaba bud ia ka jingngeit ha ka Aatmanirbharta bad Swadeshi kumba la wanrah da u Mahatma Gandhi. U Myntri Rangbah Duh u la kren ruh shaphang ki rukom rep tynrai bad u la pyntip ba 9 lak ki longiing kiba trei ha ki kam rep ha Gujarat ki la pdiang ia ka rukom rep tynrai kaba la wanrah ia ka jingpynduna ia ka urea da 3 lak metric ton. U Myntri Rangbah Duh u la ban jur halor ka jingim katkum ki jingngeit ba la wanrah da ki longshuwa ha kine ki por ba mynta bad u la kren shaphang ka jingkyntiew ia ka jingpyndonkam ia ka Khadi ban kyntiew ia ka ioh ka kot jong kiba duk ba suk ha ki jaka nongkyndong bad ka kam aatmanirbhar.

Ha ka jingkren shaphang ka jingpynkupbor ha ki shnong, u Myntri Rangbah Duh u la ong ba ka jing thmu jong u Bapu ia ki Gram Swaraj ka la seisoh. U la kren shaphang ka bynta kaba la kham iar jong ki longkmie bad u la ong, La ki dei ki self help group, palat 1 klur ki lakhpati didi, ki longkmie kiba la khreh ban long ki nongpynher drone, kane ka jingkylla ka dei ka nuksa jong ka India kaba khlain bad ruh ka nuksa jong ka India kaba kdup lang ia baroh.”

U Myntri Rangbah Duh u la kren ruh shaphang ki 25 klur ngut ki briew kiba la lait na ka jingduk ha kine ki 10 snem ba la dep namar ki sienjam jong ka Sorkar. U la kren ruh shaphang ki jingjop jong ka India ha ki kam kiba iadei bad ka haw haw. “Mynta haba ka India ka jam shaphrang ha ka jingkut jingmut ban don ka roi ka par kane ka jaka kaba kyntang jong u Mahatma Gandhi ka dei kaba ai mynsiem ia ngi baroh. Kumta ka jingkyntiew ia ka Sabarmati Ashram bad ka Kochrab Ashram kam dei tang ka jingkyntiew ia ki jaka kiba kyrpang ha ka histori. Ka pynkhlain ruh ia ka jingngeit jong ngi ha ka jingkut jingmut bad ka jingioh mynsiem na ka bynta ka Viksit Bharat”, la ong u Myntri Rangbah Duh. U la ong ba u ngeit skhem ba ki jingngeit jong u Bapu bad ki jaka ba ai mynsiem kiba iadei bad u kin bteng ban ialam lynti ia ngi ha kane ka jingtei ia ka ri.

U Myntri Rangbah Duh u la kyntu ia ka Sorkar Gujarat bad ka Ahmedabad Municipal Corporation ban pynlong ia ka jingkahun hapdeng ki nongsynran namar ka Ahmedabad ka dei ka nongbah kaba don ka deiriti bad u la kyntu ruh ia ki skul ba kin ialam kumno kumno 1000 ngut ki khynnah man ka sngi sha ka Sabarmati Ashram bad pynlut por ha kane ka jaka. “Kane kan plie lad ia ngi ba ngin khyllie im ia ki jingjia khlem da hap ban buh pisa kyrpang.” Ha ka jingpynkut ia ka jingkren, u Myntri Rangbah Duh u la ong ba u ngeit skhem ba ka jingwanrah ia ka rukom peit kaba thymmai kan aibor ia ka jingiaid lynti ka India sha ka roi ka par.

U Lat ka jylla Gujarat, Acharya Devvrat bad u Myntri Rangbah ka Gujarat, Bhupendra Patel ki la iadon lang ha ryngkat kiwei kiwei ha kane ka sngi.

Ka nongrim

U Myntri Rangbah Duh u la plie paidbah ia ka jingtei biang ia ka Kochrab Ashram. Kane ka dei ka Ashram ba nyngkong ba la seng da u Mahatma Gandhi hadien ba u la wan sha India na South Africa ha u snem 1915. La pynneh ia kane ka jaka kum ka jaka sah jingkynmaw bad ka jaka jngoh kai da ka Gujarat Vidyapeeth. U Myntri Rangbah Duh u la pyllait paidbah ruh ia ka Master Plan jong ka Gandhi Ashram Memorial.

Ka dei ka jingpyrshang jong u Myntri Rangbah Duh ban pynneh bad bat ia ki jingngeit jong u Mahatma Gandhi bad ruh ban plie ia ki lad kiba pyni ia kine ki jingngeit jong u bad pynjan ia u bad ki briew. Sa kawei ka sienjam na ka bynta kane, ka Gandhi Ashram Memorial Project kan iarap ban khyllie biang ia ki jinghikai jong u Mahatma Gandhi bad ki jingngeit jong u ha kine ki por ba mynta bad na ka bynta ki pateng ban wan. Hapoh kane ka master plan, ka 5 acre ba don mynta jong ka Ashram ka dei ka ban pyniar sha ka 55 acre. 36 tylli ki jingtei kiba don hangne kidei ki ban pynthymmai biang, bad na kine, 20 tylli ki jingtei ba kynthup ia ka ‘Hriday Kunj’, kaba dei ka jaka sah jong u Gandhi, ki dei ki ban pynneh, 13 tylli ki jingtei ki dei ki ban pynthymmai biang bad 3 tylli ki dei ki ban tei thymmai biang.

Kane ka master plan ka kynthup ia ki jingtei ba thymmai ban don ki jaka pyniaid kam, ki jaka na ka bynta ki nongwankai kum ka orientation center, ki interactive workshop ha ka jingkyllain chakhra, ka kot ba shna da ka kti, ka jingthain ksai cotton bad ka kam da ki snieh ha ryngkat ki jingai jingshakri paidbah. Kine ki jingtei kin don ki exhibition bad ki kam ki ban pyni ia ka jingim jong u Gandhi bad ruh ka histori jong ka Ashram. Ka master plan ka thmu ruh ban tei ia ka library bad ki jingtei archive na ka bynta ki riewshemphang ba wan wad bniah. Kane ka projek kan plie lad ruh ia jingtei ia ka interpretation center ka ban ai jingtip ia ki nongwankai ha ki ktien bapher bapher.

Ka jingtrei sah jingkynmaw kan long kaba ai mynsiem ia ki pateng ban wan, ka ban kyntiew ia ki rukom pyrkhat jong u Gandhi bad ki jingngeit jong u.

***