U Myntri Rangbah Duh, Narendra Modi un leit sha Srinagar, Jammu and Kashmir ha ka 7 tarik u Lber, 2024. Ha kumba 12 baje nohphaisngi, u Myntri Rangbah Duh un poi ha  Bakshi Stadium, Srinagar, ha kaba un iashim bynta ha ka prokram ‘Viksit Bharat Viksit Jammu Kashmir’.

Ha kane ka prokram, u Myntri Rangbah Duh un aiti sha ka ri ia ka prokram kaba kumba T 5000 klur - ka ‘Holistic Agriculture Development Programme’ – ban kyntiew ia ka ioh ka kot na ki kam rep ha J&K. Un aiti ruh sha ka ri bad plie shibun ki projek kiba iadei bad ki kam jngoh kai kiba kot sha palat T 1400 klur hapoh ka skhim Swadesh Darshan bad ka skhim PRASHAD (Pilgrimage Rejuvenation And Spiritual, Heritage Augmentation Drive), ba kynthup ia ka projek na ka bynta ka ‘Integrated Development of Hazratbal Shrine’, Srinagar. U Myntri Rangbah Duh un plie paidbah ruh ia ka ‘Dekho Apna Desh People’s Choice Tourist Destination Poll’ bad ‘Chalo India Global Diaspora Campaign’. Un pynbna ruh ia ki jaka jngoh kai ba la jied hapoh ka skhim Challenge Based Destination Development (CBDD). Shuh shuh, u Myntri Rangbah Duh un sam ia ki shithi thung kam ia kumba 100 ngut ki briew kiba ioh kam Sorkar thymmai kiba na Jammu and Kashmir bad un iakren ruh bad ki briew kiba ioh jingmyntoi na ki skhim Sorkar bapher bapher, ba kynthup ia ki longkmie kiba la jop ha ki kam, ki  lakhpati didi, ki nongrep, ki nongseng kam lajong bad kiwei kiwei.

Ha ka sienjam ka ban iarap bha ia ka ioh ka kot na ki kam rep ha Jammu and Kashmir, u Myntri Rangbah Duh un iati sha ka ri ia ka ‘Holistic Agriculture Development Programme’ (HADP). Ka HADP ka dei ka prokram kaba pyniasoh ia ki bynta bapher bapher jong ka ioh ka kot na ki kam rep ba kynthup ia ka Horticulture, kam rep bad kam ri jingri ha Jammu and Kashmir. La khmih lynti ba kane ka prokram kan ai jinghikai ia kumba 2.5 lak ngut ki nongrep lyngba ka rynsan Daksh Kisan ba kyrpang. Hapoh kane ka prokram, yn tei kumba 2000 tylli ki 2000 Kisan Khidmat Ghar bad yn pynbiang ia ki lad kiba khlain ban pynbha shuh shuh ia ki mar na ka bynta ka bha ka miat jong ki nongrep. Kane ka prokram kaba plie lad ioh kam kan ai jingmyntoi ia ki lak tylli ki longiing ha Jammu and Kashmir.

Ka jingthmu jong u Myntri Rangbah Duh ka dei ban kyntiew ia ki jingshem jong ki nong jngoh kai bad ki nongleit pilkrim kiba leit sha ki jaka jngoh kai bad ki jaka pilkrim ha ka ri da kaba pynbiang ia ki jingdon jingem bad ki jingai jingshakri kiba katkum ka juk mynta ha kine ki jaka. Ha kaba iadei bad kane, u Myntri Rangbah Duh un aiti sha ka ri bad plie paidbah ia ki sienjam bapher bapher hapoh ki skhim Swadesh Darshan bad PRASHAD kiba kot sha palat T 1400 klur. Ki projek ba u Myntri Rangbah Duh un aiti sha ka ri ki kynthup ia ka jingtei ia ka ‘Integrated Development of Hazratbal Shrine’ ha Srinagar, J&K; ki jingai jingshakri ia ki nongjngoh kai ha ka thain shatei lammihngi ha Meghalaya; kam jngoh kai ba iadei bad ka niam ha Bihar bad Rajasthan; ki kam jngoh kai ha ki jaka nongkyndong bad Tirthankar ha Bihar ; ka jingtei ha ka Jogulamba Devi Temple, Jogulamba Gadwal District, Telangana; bad ka jingtei ha ka Amarkantak Temple, Annupur District, Madhya Pradesh.

Ha ka jingpyrshang ban wanrah ia ki jingdon jingem bad ki jingai jingshakri kiba bha ia ki nongleit pilkrim bad ki nongjngoh kai kiba leit sha ka Hazratbal Shrine, bad ban kyntiew ia ki jingshem jong ki, la wanrah ia ka projek 'Integrated Development of Hazratbal Shrine'. Ki bynta ba kongsan jong ka projek ki long ka jingkyntiew ia baroh kawei ka jaka ba kynthup ia ka jingshna ia ka kynroh ker pud ia kane ka jaka kyntang; Ka jingpynshai sharak ia ka jaka kyntang jong ka Hazratbal; Ka jingkyntiew ia ki Ghat bad ki Devri Path ha sawdong ka jaka kyntang; Ka jingtei ia ka jaka ba pynkylla ktien ia ka Sufi; Ka jingtei ia ka jaka pdiang ia ki nongjngoh kai; Ka jingbuh ia ki jingbatai; Ka jaka pynieng kali; Ka jingtei ia ka Public Convenience Block bad ka khyrdop ban rung sha ka jaka kyntang ha ryngkat kiwei kiwei.

U Myntri Rangbah Duh un plie paidbah ruh ia kumba 43 tylli ki projek ki ban kyntiew ia ki jaka leit pilkrim bad ki jaka jngoh kai ha kylleng ka ri. Kine ki kynthup ia ki jaka ba kongsan ha ka niam kum ka Annavaram Temple ha ka Kakinada distrik jong ka Andhra Pradesh; Ki Navagraha Temple ha ka Thanjavur bad Mayiladuthurai Distrik jong ka Tamilnadu bad Karaikal distrik jong ka Puducherry; ka Sri Chamundeshwari Devi Temple, Mysore District, Karnataka; Karni Mata Mandir, Bikaner District Rajasthan; Maa Chintpurni Temple, Una District, Himachal Pradesh; Basilica of Bom Jesus Church, Goa, ha ryngkat kiwei kiwei. Kine ki projek ki kynthup ruh ia ka jingkyntiew ia kiwei kiwei ki jaka kum ka Mechuka Adventure Park ha Arunachal Pradesh; Rural Tourism Cluster Experience ha Gunji, Pithoragarh, Uttarakhand; Ecotourism zone ha ka khlaw Ananthagiri, Ananathagiri, Telangana; Meghalayan Age Cave Experience and Waterfall Trails Experience ha Sohra, Meghalaya; Reimagining Cinnamara Tea Estate, Jorhat, Assam; Ecotourism experience ha Kanjli Wetland, Kapurthala, Punjab; Julley Leh Biodiversity Park, Leh, ha ryngkat kiwei kiwei.

183. kane ka prokram, u Myntri Rangbah Duh un pynbna ia ki 42 tylli ki jaka jngoh kai ba la jied hapoh ka skhim Challenge Based Destination Development (CBDD). Kane ka skhim kaba la pynbna ha ka Mang Tyngka 2023-24 ka thmu ban pynbiang lut ia ki jingdonkam ha ka jingleit jngoh kai da kaba wanrah ia ka jingkyntiew ia ki jaka jngoh kai bad ka jingkyntiew ia ka jingiaineh bad ruh ka jingialeh ha ki kam jngoh kai. La jied ia ki 42 tylli ki jaka hapoh saw tylli ki thup (16 ki jaka ba iadei bad ka deiriti; 11 kiba iadei bad ka niam; 10 ha ki kam ecotourism bad Amrit Dharohar; bad 5 ha ka thup ki shnong kiba itynnad).

U Myntri Rangbah Duh un plie paidbah ia ka sienjam kaba nyngkong ha ka ri ban lap ia ka jingsngew jong ka ri shaphang ka kam jngoh kai lyngba ka ‘Dekho Apna Desh People’s Choice 2024’. Ka jing thmu jong kane ka khana samari ha kylleng ka ri ka dei ban don jingiakren bad ki briew ban lap ia ki jaka ba khring tam ia ki nongjngohkai bad ki jingsngew jong ki shaphang ki 5 thup jong ki kam jngoh kai – Niam, Deiriti, Mariang bad Mrad Khlaw, Jingshongshit bad ka thup jong kiwei kiwei. Ha ryngkat kine ki saw tylli ki thup ba kham kongsan, ka thup jong kiwei kiwei ka dei ha kaba ki briew ki lah ban jied ia kiba ki sngewtynnad duh bad kane kan iarap ha ka jingshem ia ki jaka ba thymmai bad ki kam ba khring ia ki nongjngoh kai kum ki shnong Vibrant Border, kam jngoh kai na ka bynta ka koit ka khiah, kam jngoh kai na ka bynta ki kam kyntiew kurim, bad kiwei kiwei. Ia kane yn pynlong ha ka rynsan MyGov, ka rynsan jong ka Sorkar India ban iakren bad ki briew jong ka ri.

U Myntri Rangbah Duh un plie ia ka ‘Chalo India Global Diaspora Campaign’ da ka jingthmu ban ai mynsiem ia ki briew jong ka ri kiba don shabar ri ba kin long nongmihkhmat ia ka Incredible India bad kyntiew ia ki jingwan jngoh kai sha ka India. La sdang ia kane ka kam katkum ka jingkyntu u Myntri Rangbah Duh, ha kaba u la kyrpad ia ki briew jong ka India kiba don shabar ka ri ba kin pynshlur ia kumno kumno 5 ngut ki briew ki bym dei na India ba kin wan sha kane ka ri. Ha ka jingdon palat 3 klur ngut ki briew ka India ha kiwei kiwei ki ri, kine ki lah ban kyntiew bha ia ki kam jngoh kai ka India da kaba long ki nongmihkhmat jong ka deiriti.

***