প্রধানমন্ত্রীগী লোইশঙ
প্রধান মন্ত্রীনা বিহারগী বেগুসারাইদা তোঙান-তোঙানবা চাউখৎ-থৌরাংগী প্রোজেকশিং মীয়ামদা কৎথোকখ্রে অমসুং উরেপ-উয়ুং তমখ্রে
লুপা করোর লাখ ১.৪৮ রোমগী থাউ অমসুং গ্যাসকী তোঙান-তোঙানবা প্রোজেকশিং মীয়ামদা কৎথোকখ্রে অমসুং উরেপ-উয়ুং তমখ্রে
বিহারদা লুপা করোর ১৩,৪০০ হেনবগী তোঙান-তোঙানবা চাউখৎ-থৌরাংগী প্রোজেকশিং মীয়ামদা কৎথোকখ্রে অমসুং উরেপ-উয়ুং তমখ্রে
বরাউনিদা হিন্দুস্থান উরবারক এন্দ রসয়ান লিমিতেদ(হুরল) ফর্তিলাইজর প্লান্ত শঙ্গাখ্রে
লুপা করোর ৩৯১৭ রোমগী তোঙান-তোঙানবা রেলৱে প্রোজেকশিং মীয়ামদা কৎথোকখ্রে অমসুং উরেপ-উয়ুং তমখ্রে
‘ভারত পাসুধান’- লৈবাক অসিগী শা-ষনশিংগী দিজিতে দেতাবেজ অমা লৈবাক মীয়ামদা কৎথোকখ্রে
‘১৯৬২ ফার্মরস এপ্প’ হৌদোকখ্রে
“দবল ইঞ্জিন সরকারনা মরম ওইদুনা বিহার হরাওবা অমসুং থাজবনা পীক থল্লে”
“করিগুম্বা বিহার বিকসিত ওইরবদি, ভারতশু বিকসিত ওইগনি”
“বিহার অমসুং নোংপোক ভারত নুংঙাই-য়াইফবা মতমদা ভারত চাউখৎলি হায়বসি পুৱারিনা প্রমান্নি”
“ভারতকী অশেংবা খুন্নাইগী অচুম্বা ‘সানতুস্তিকারন’না ফংগনি ‘তুসতিকারন’ না ফংলোই। কান্নবশিং মীওই খুদিংমক্তা ফংহল্লবা মতমদা খুন্নাইগী অচুম্বা ফংগনি”
“দবল ইঞ্জিন সরকারগী থবকশিংনা বিহার বিকসিত ওইরগনি”
Posted On:
02 MAR 2024 6:27PM by PIB Imphal
ঙসি প্রধান মন্ত্রী শ্রী নরেন্দ্র মোদীনা বিহারগী বেগুসারাইদা লৈবাক শীনবা থুংনা লুপা করোর লাখ ১.৪৮ রোমগী থাউ অমসুং গ্যাসকী তোঙান-তোঙানবা প্রোজেকশিং অমসুং লুপা করোর ১৩,৪০০ হেনবগী তোঙান-তোঙানবা চাউখৎ-থৌরাংগী প্রোজেকশিং মীয়ামদা কৎথোকখ্রে অমসুং উরেপ-উয়ুং তমখ্রে।
থৌরম অদুদা তিনখিবা মীয়ামদা ৱা ঙাংবদা, প্রধান মন্ত্রীনা হায়খি বিকসিত ভারত অমা শেমদুনা বিহার চাউখৎহন্নবা ৱাশক্কা লোয়ননা ঙসি মহাক বিহারগী বেগুসারাইদা লাকপনি। মহাক্না মশিং য়াম্লবা মীয়াম থাগৎপা ফোঙদোকখি অমসুং মীয়াম্না মহাক নুংশিবা অমসুং থৌজাল পীবগীদমক মহাক্না মীয়াম থাগৎপা ফোঙদোকখি।
প্রধান মন্ত্রীনা হায়খি বেগুসারাই অসি হৈথোই-শিংথোইবা নহারোলশিংগী লমদম অমনি অমসুং লমদম অসিদগী লৈবাক অসিগী লৌমীশিং অমসুং শিন্মিশিং মশিং য়াম্না পুথোক্লি। ঙসি লুপা করোর লাখ ১.৫০ রোমগী প্রোজেকশিং শঙ্গাবা নত্ত্রগা উরেপ-উয়ুং তমখিবা অসিনা বেগুসারাইগী মমাঙঙৈগী চাউখৎপা অদু হল্লক্লে। হান্নদি অসিগুম্বা থৌরমশিং নিউ দিল্লিগী বিগ্যান ভাবন্দা পাংথোক্লমখি, অদুবু হৌজিক, মোদীনা দিল্লি বেগুসারাইদা পুরক্লে। বিহার মথন্তদা লুপা করোর ৩০,০০গী প্রোজেকশিং পায়খৎলে। মসিনা ভারতকী তৌবা ঙম্বগী শক্তি উৎলে অমসুং বিহারগী নহারোলশিংদা অনৌবা থবক কয়া ফংহল্লগনি। ঙসিগী চাউখৎ-থৌরাংগী প্রোজেকশিং অসিনা বিহারদা নুংঙাই-য়াইফবগী লম্বী শেম্বতা নত্তনা মালেমদা ভারতনা ৩শুবা খ্বাইদগী চাউবা ইকোনোমি অমা ওইনবা পাম্বৈ অমা ওইরগনি। ঙসি বিহারদা অনৌবা ত্রেন কয়া লমথারে।
প্রধান মন্ত্রীনা হায়খি ২০১৪দা সরকার পায়রকপদগী য়াংনা চাউখৎহন্নবা সরকারনা মরুওইনা লৌরি। বিহার অমসুং নোংপোক ভারত নুংঙাই-য়াইফবা মতমদা ভারত চাউখৎলি হায়বসি পুৱারিনা প্রমান্নি। বিহারগী ফত্তবা ফিবমশিংনা লৈবাক অসিদা ফজদবা মমি অমা তাহল্লে। করিগুম্বা বিহার বিকসিত ওইরবদি, ভারতশু বিকসিত ওইগনি। মসি ৱাশক অমা নত্তে, মসি মিসন অমনি। ঙসিগী পেত্রোলিয়ম, হার অমসুং রেলৱেজগা মরী লৈনবা প্রোজেকশিং অসি মাইকৈ অসিদা থাংজিনবা অচৌবা খোংথাং অমনি। ইনর্জি, হার অমসুং লম্বী-থোং অসি চাউখৎপগী য়ুম্ফমনি। লৌউ-শিংউ নত্ত্রগা উদোগ ওইগেরা, খুদিংমক মখোয়গী মখা পোল্লি। থবক ফংবা অমসুং থবক ফংনবগী খুদোংচাবশিং হেনগৎহন্নবা সরকারনা মরুওইনা লৌরি।
প্রধান মন্ত্রীনা হায়খি বরাউনি ফর্তিলাইজর প্লান্ত থবক হৌবা অসি ঙসি গরেন্তি অমা থবক ওইনা পাংথোক্লবনি। মসি বিহারগী য়াওনা লৈবাক অসিগী লৌমীশিংগী অচৌবা মাইপাকপা অমনি। গোরাখপুর, রামাগুন্দম অমসুং সিন্দ্রিগীগী প্লান্তশিং থবক লেপখি অদুবু হৌজিক মখোয় ভারতনা মশাগী ওক্নবা য়ুরিয়া পুথোক্নবা য়ুম্বীশিংনি। মরম অদুনা মীয়াম্না হায়রি, মদুদি মোদীগী গরেন্তি হায়বদি গরেন্তি অদু থবক ওইনা পাংথোকপনি।
প্রধান মন্ত্রীনা হায়খি বরাউনি রিফাইনরি পাকথোক-চাউথোকপগী থবক অসিনা শিন্মী লিশিং কয়া থবক ফংহল্লগনি। বিহারগী উদোগ চাউখৎহনবদা বরাউনি রিফাইনরিনা অনৌবা থৌনা অমা পীগনি অমসুং ভারত অত্মনির্ভর ওইহনবদা মরুওইবা থৌদাং অমা লৌগনি। বিহারদা লুপা করোর ৬৫,০০০ হেনবগী পেত্রোলিয়ম অমসুং নেচরেল গ্যাসকা মরী লৈনবা চাউখৎ-থৌরাংগী প্রোজেক অয়াম্বা লোইশিল্লে। গ্যাস পাইপলাইনশিং শাংদোক্তুনা বিহারগী নুপীশিংদা মমল হোংবা গ্যাস ফংহল্লে অমসুং মসিনা লমদম অসিদা উদোগশিং লিংখৎপদা লাইহল্লে।
প্রধান মন্ত্রীনা হায়খি কে.জি বেসিন্দগী পুথোকপা ‘অহানবা থাউ’ লৈবাক মীয়ামদা কৎথোকখ্রে, ঙসি ও.এন.জি.সি গোদাবরি দিপৱাতর প্রোজেক্তগী অহানবা শুংদোক্ত্রিবা থাউ পুবা তেঙ্কর লমথাখ্রে। মসিনা মরুওইবা সেক্তর অসিদা অত্মনির্ভর ওইবদা মতেং পাংগনি। মসি সরকারনা লৈবাক্কী য়াইফনবা থবক তৌবা অমসুং মশাগী খনবা শাগৈগী রাজনিতি লৈতবগী খুদমনি। হৌজিক ভারত রেলৱে মতমগা চুনবা মওংদা শেমগৎপগী মতাংদা মালেম শীনবা থুংনা ৱারিনরে। লাইনশিং মৈ ফংহল্লে অমসুং স্তেসনশিং শেমগৎলে।
প্রধান মন্ত্রীনা হায়খি ভারতকী অশেংবা খুন্নাইগী অচুম্বা ‘সানতুস্তিকারন’না ফংগনি ‘তুসতিকারন’ না ফংলোই। কান্নবশিং মীওই খুদিংমক্তা ফংহল্লবা মতমদা খুন্নাইগী অচুম্বা ফংগনি। মহাক্না অসিগুম্বা ম ওংগী সেকুলারিজম অমসুং খুন্নাইগী অচুম্ব খক মশক খঙই। লেম্না চেং, পাক্কাগী য়ুমশিং, গ্যাস, তোতি ঈশিং, তোইলেতশিং, লেম্না লায়য়েংবা, লৌমীশিংদা কিষান সম্মান নিধি ফংহল্লবা মতমদা খুন্নাইগী অচুম্বা ফংগনি। হৌখিবা চহি ১০ অসিদা সরকারগী স্কিমশিংগী কান্নবশিং খ্বাইদগী য়াম্না ফংলিবা অসি দলিত, তোল্লবশিং অমসুং খুন্নাইদা খ্বাইদগী শোৎথরবা কাংলুপশিংনি।
প্রধান মন্ত্রীনা হায়খি ঐখোয়গী ওইনা, খুন্নাইগী অচুম্বা হায়বসি নারী শক্তিগী থৌনা অসিনি। নুপী করোর ১ লাখপতি দিদি ওইহল্লে অমসুং নুপী করোর ২ লাখপতি দিদিশিং ওইহন্নবা পান্দম থম্লি। পি.এম সুর্য়াঘর মুফ বিজলি য়োজননা মৈগী বিল হন্থহনগনি অমসুং অহেনবা শেন তানবা ঙমগনি। বিহারগী এন.দি.এ সরকারনা লায়রবা, নুপীশিং, লৌমীশিং, খুৎহৈবশিং, তোল্লবশিং অমসুং নৈহৎপীরবশিং য়াইফনবা থবকশিং পায়খৎলে। দবল ইঞ্জিন সরকারগী থবকশিংনা বিহার বিকসিত ওইরগনি।
লোইশিল্লকপদা, প্রধান মন্ত্রীনা হায়খি লমদম অসিগী মীয়ামদা তৌবীমল খঙবা উৎচরি অমসুং লুপা করোর লিশিং কয়াগী প্রোজেকশিংগীদমক মীয়ামদা নুংঙাইবা ফোঙদোকচরি। ঙসিগী থৌরম অসিদা মশিং য়াম্লবা নুপীশিং শরুক য়াবগীদমক থাগৎচরি।
ঙসিগী থৌরম অসিদা শরুক য়াখিবশিংগী মনুংদা বিহারগী রাজ্যপাল শ্রী রাজেন্দ্র ভি অরলেকার, বিহারগী চীফ মিনিস্তর শ্রী নিতিস কুমার, বিহারগী চীফ মিনিস্তরশিং শ্রী সামরাত চৌধুরি অমসুং শ্রী বিজয় কুমার সিনহা, পেত্রোলিয়ম অমসুং নেচরেল গ্যাসকী য়ুনিয়ন মিনিস্তর শ্রী হরদিপ সিংহ পুরি, এম.পি শ্রী গিরিরাজ সিংহ য়াওখি।
নুঙগীৱারোল
প্রধান মন্ত্রীনা লুপা করোর লাখ ১.৪৮ রোমগী থাউ অমসুং গ্যাস সেক্তরগী তোঙান-তোঙানবা চাউখৎ-থৌরাংগী প্রোজেকশিং শঙ্গাখ্রে, মীয়ামদা কৎথোকখ্রে অমসুং উরেপ-উয়ুং তমখ্রে। প্রোজেকশিং অদু বিহার, হরিয়ানা, অন্ধ্র প্রদেস, মহারাস্ত্রা, পঞ্জাব অমসুং কর্নাতকাগী কে.জি বেসিন য়াওনা লৈবাক অসিগী তোঙান-তোঙানবা রাজ্যশিং শীনবা থুংনা শন্দোক্লি।
প্রধান মন্ত্রীনা কে.জি বেসিন্দগী ‘অহানবা থাউ’ লৈবাক অসিগী মীয়ামদা কৎথোকখ্রে অমসুং ওন.এন.জি.সি কৃষ্ণ গোদাবরি দিপৱাতর প্রোজেক্তগী অহানবা ক্রুদ ওইল তেঙ্কর লমথাখ্রে। কে.জি বেসিন্দগী ‘অহানবা থাউ’ চিংথোকপা অসি ভারতকী ইনর্জি সেক্তরদা পুৱারি ওইরবা মাইপাকপা অমনি, মসিনা ঐখোয়না মপান লৈবাকশিংদগী ইনর্জি পুশিল্লকপা শিংথাবা য়ানা হন্থহল্লগনি। প্রোজেক অসি ভারতকী ইনর্জি সেক্তরদা অনৌবা যুগ অমা হৌবনি অমসুং ইনর্জ ৱাৎহন্দবা অমসুং শেন-থুমগী চৈথেং কয়া মায়োক্নবা ঙম্বগী থৌনা হেনগৎহল্লগনি।
বিহারদা থাউ অমসুং গ্যাস সেক্তরদা লুপা করোর ১৪,০০ রোমগী প্রোজেকশিং পায়খৎকনি। প্রোজেকশিংগী মনুংদা লুপা করোর ১১,৪০০ রোম চঙনা বরাউনি রিফাইনরি পাকথোক-চাউথোক্নবা প্রোজেক উরেপ-উয়ুং তমখি অমসুং বরাউনি রিফাইনরিদা গ্রিদ ইনফ্রাস্ত্রচর প্রোজেকশিং শঙ্গাখি; পারাদিপ-হালদিয়া-দুরগাপুর এল.পি.জি পাইপলাইন পাতনা অমসুং মুজাফ্ফারপুর ফাওবা শাংদোকপা য়াওরি।
লৈবাক শীনবা থুংনা পায়খৎকদবা অতোপ্পা থাউ অমসুং গ্যাসকী প্রোজেকশিংগী মনুংদা হরিয়ানাদা পানিপত রিফাইনরি এন্দ পেত্রোকেমিকেল কমপ্লেক্স; পানিপত রিফাইনরিদা ৩জি ইথানোল প্লান্ত অমসুং কেতালিস্ত প্লান্ত; অন্ধ্র প্রদেসতা বিসাখ রিফাইনরি মোদর্নাইজেসন প্রোজেক(ভি আর এম পি); পঞ্জাবগী ফাজিলকা, গঙ্গানগর অমসুং হনুমানগর জিলাশিং য়াওবা সিতি গ্যাস দিস্ত্রিবিউসন নেতৱার্ক প্রোজেক; গুলবারগা কর্নাতকাদা অনৌবা পি.ও.এল দিপো, মহারাস্ত্রাদা মুম্বাই হায় নোর্থ রিদিবলপমেন্ত ফেজ-৪ য়াওরি। প্রধান মন্ত্রীনা অন্ধ্র প্রদেসকী বিশাখাপত্নমদা ইন্দিয়ান ইন্সতিতুৎ ওফ পেত্রোলিয়ম এন্দ ইনর্জি(আই আই পি ই)গী উরেপ-উয়ুং তমখি।
প্রধান মন্ত্রীনা বরাউনিদা হিন্দুস্থান উরবারক এন্দ রসায়ন লিমিতেদ(হুরল) ফর্তিলাইজর প্লান্ত শঙ্গাখি। লুপা করোর ৯৫০০ হেন্না চঙনা শেমগৎপা প্লান্ত অসিনা লৌমীশিংদা মমল হোংনা হার ফংহনগনি অমসুং মখোয়গী পোৎথোক হেনগৎহনগনি অমসুং শেন-থুমগী ফিবম ফগৎহনগনি। মসি লৈবাক অসিগী অমুক হিঙ্গৎহনবা মরিশুবা ফর্তিলাইজর প্লান্ত ওইরগনি।
প্রধান মন্ত্রীনা লুপা করোর ৩৯১৭ রোমগী তোঙান-তোঙানবা রেলৱে প্রোজেকশিং শঙ্গাখি অমসুং উরেপ-উয়ুং তমখি। প্রোজেকশিংগী মনুংদা রাঘোপুর-ফোরবেসগঞ্জ গেজ ওনখৎপা; মুকুরিয়া-কাতিহার-কুমেদপুর রেল লাইন দবল ওইহনবা; বরাউনি-বাছৱারাগী অহুমশুবা অমসুং মরিশুবা লাইন; কাতিহার-জোগবানি রেল সেক্সন মৈ ফংহনবা য়াওরি। রেল প্রোজেকশিং অসিনা রেলদা চৎথোক-চৎশিন হেন্না ফগৎহনগনি, লাইন কেপাসিতি হেনগৎহনগনি অমসুং ত্রেনশিং চেনবা হেনগৎহনগনি অমসুং লমদম অসিদা উদোগ চাউখৎপা হেনগৎহনগনি। প্রধান মন্ত্রীনা ত্রেন মরি লমথাগনি। হায়রিবা ত্রেনশিং অদুদি দানাপুর-জোগবানি এক্সপ্রেস(ভাইয়া দারভঙ্গা-সাক্রি); জোগবানি-সাহারসা এক্সপ্রেস; সোনপুর-ভাইসালি এক্সপ্রেস অমসুং জোগবানি-সিলিগুরি এক্সপ্রেস য়াওরি।
প্রধান মন্ত্রীনা ‘ভারত পাসুধান’- লৈবাক অসিগী শা-ষনশিংগী দিজিতেল দেতাবেজ লৈবাক মীয়ামদা কৎথোকখি। নেসনেল দিজিতেল লাইভস্তোক মিসন(এনদিএলএম)গী মখাদা শেমগৎপা ‘ভারত পাসুধান’ অসি শা-ষনশিং খোঙ্গুল লিনবা দিজিত ১২গী তেগ আই.দি অমা পীরে। প্রোজেক অসিগী মখাদা, শা-ষন করোর ৩০.৫গী মনুংদা করোর ২৯.৬ তেগ তৌখ্রে অমসুং মখোয়গী অকুপ্পা মরোলশিং দেতাবেজদা ফংলে। ‘ভারত পাসুধান’না লৌমীশিংনা মখোয়গী শা-ষনশিং খোঙ্গুল লিবা অমসুং লায়নাশিং য়েংশিনবা অমসুং লাকশিনবদা মতেং পাংগনি।
প্রধান মন্ত্রীনা লৌমীশিংনা ‘ভারত পাসুধান’ দেতাবেজ শীজিন্ননবা ‘১৯৬২ ফার্মরস এপ্প’ হৌদোকখ্রে।
***
(Release ID: 2011084)
Visitor Counter : 38
Read this release in:
Hindi
,
English
,
Urdu
,
Marathi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam