ঙসি প্রধান মন্ত্রী শ্রী নরেন্দ্র মোদীনা গুজরাতকী দ্বারকাদা লুপা করোর ৪১৫০ হেনবগী য়াম্লবা চাওখৎ থৌরাংগী প্রোজেক্তশিং শঙ্গাখ্রে, লৈবাক্কী মফমদা কৎথোকখ্রে অমসুং উরেপ উয়ুং তমখ্রে। প্রধান মন্ত্রীনা ওখা মেনলেন্দ অমসুং বৈত দ্বার্কা ঈথৎ শম্নহল্লিবা সুদর্সন সেতু, বাদিনারদা হান্না লৈরম্বা ওফসোর পাইপলাইন শিন্দোকপা, হান্না লৈরম্বা পাইপলাইন এন্দ মেনিফোল্দ (পি.এল.ই.এম.) থাদোক্লম্বা, অমসুং সিস্তেম পুম্বা (পাইপলাইইন, পি.এল.ই.এম. অমসুং অমগা অমগা শম্নরিবা লুপ লাইনশিং) অনৌবা অনকপা মফম অমদা হোংদোকপা য়াওবা পাইপলাইন প্রোজেক্তশিং অমসুং রাজকোত-ওখা, রাজকোত-জেতলসর-সোমনাথ অমসুং জেতলসর-ৱান্সজালিয়া রেল ইলেক্ত্রিফিকেসন প্রোজেক্তশিং লৈবাক্কী মফমদা কৎথোকখ্রে‍‍। প্রধান মন্ত্রীনা এন.ঐচ.-৯২৭দিগী ধোরাজী-জমকান্দোর্না-কলাবদ সেক্সন পাকথোকহনবা; জামনগরদা রিজনেল সাইন্স সেন্তর; সিক্কা থর্মেল পৱার স্তেসন, জামনগরদা ফ্লু গ্যাস দিসল্ফরাইজেসন (এফ.জি.দি.) সিস্তেম পানখৎপা অমদি অতৈ প্রোজেক্তশিংগী উরেপ উয়ুং তমখ্রে ‍।

থৌরম অদুদা তিনখিবা মীয়ামদা ৱা ঙাংবদা, প্রধান মন্ত্রীনা হায়খি ভাগবান কৃষ্ণ দ্বারকা মাইগী লমদমদা কোক নোঞ্জরি। হৌজিক অয়ুক মহাক্না লাই খুরুমখ্রে অমসুং আদি সঙ্করাচার্য়না ‘পীথ’ মরি হায়বদি সার্দা পতি লিংখৎপগুম লৈবাক অমগী লাইনিংগী পুন্সিদা তির্থশিং অসি য়াম্না মরুওই। নাগেশ্বর জয়তিরলিং, রুকমনি দেবী মন্দির অসি তিক ময়াই লৈবা ঙাক্তনি। ‘রাস্ত্রা কাজ’গী লম্বীদা লাইনিংগী মফম কয়া চৎপগী খুদোংচাবশিং হন্দক মহাক্না ফংখ্রে।

প্রধান মন্ত্রীনা হায়খি ঙসি মহাক্না ইরোন্নুংদা লৈখ্রবা দ্বারকা সহরদা লাই খুরুম্নবা সমুদ্রগী ঈশিং মনুংদা লুপখিবা অদু কাউবা ঙম্লরোই। মফম অসি আর্কিওলোজিকেল অমসুং অরিবা লাইরিকশিংগী মতুংইন্না য়াম্না মরুওইবা অমনি। দ্বারকা অসি ভাগবান বিশ্বকর্মা মশামক্না শেমগৎখিবনি হায়না থাজরি। দ্বারকা সহর অসি সহর প্লান তৌবগী অচৌবা খুদম অমনি। ঈশিং মনুংদা লৈখ্রবা দ্বারকা সহরদা লাই খুরুম্নবা ঐনা লুপখিবদা অসি ঈশ্বরগী ওইবা অচৌবা শক্তি অমনা ঐ য়োমশিনবগুম ফাওখি। অধ্যাতিক অমসুং মুৎপা নাইদ্রবা ভক্তিগী অরিবা যুগ অমগা শম্নবগুম ফাওখি। ঐ লাই খুরুমখি অমসুং ঐনা পুরকপা ৱাহোং মতু ঐনা কৎখি।

চহি কয়া নিংজরকপা অদু থুংলে। ইরোন্নুংদা লুপখ্রবা দ্বারকা সহরগী মরমদা হেক খঙলকপদগী, ঐ মতম পুম্নমক্তা চৎনিং অমসুং খুরুমনিংবগী অপাম্বা লৈখি। মহাক্না ইরোন্নুংদা লুপখ্রবা দ্বারকা সহরদা লাই খুরুম্বা মতমদা মহাক্কী মমাঙদা ২১শুবা চহিচাদা ভারতকী তৌবা ঙম্বশিং শক্তমশিং ওইনা চোংথোরকখি। মসিনা বিকসিত ভারত অমা শেমগৎনবা মহাক্কী ৱাশক অমুক্কা হেন্না চেৎশীনহল্লে হায়না প্রধান মন্ত্রীনা মখা তানা ফোঙদোকখি।

প্রধান মন্ত্রীনা হায়খি চহি ৬গী মমাঙদা উরেপ-উয়ুং তমখিবা সুদর্সন সেতু ঙসি অয়ুক শঙ্গাখ্রে। থোং অসিনা ওখা মেনলেন্দ অমসুং বৈত দ্বারকা ইথৎ শম্নহনগনি অমসুং দ্বারকাধেস দর্সনগী চৎথোক-চৎশিন হেন্না নুংঙাইহল্লগনি। ঙসি শঙ্গারিবা অমসুং উরেপ-উয়ুং তম্লিবা প্রোজেকশিং অসি মোদীগী গরেন্তিনি। সুদর্সন সেতু অসি ইঞ্জিনিয়ারিংগী অঙকপা অমনি। ইঞ্জিনিয়ারশিংনা থোং অসিগী তেক্নিকেলগী ওইবা হিরমশিং নৈনগদবনি। থোং অসি শঙ্গাবগীদমক মীয়ামদা নুংঙাইবা ফোঙদোকচরি।

ফেরিশিংগী মখা পোনবা অমসুং লম্বীদা য়াম্না শাংনা চৎপদগী অমসুং সমুদ্রগী ইথক য়াম্না ৱাংবা মতমদা ফেরি সর্বিস লেপ্পদগী দ্বারকা অমসুং বৈত দ্বারকাগী মীয়াম্না থেংনখিবা অৱাবশিং পল্লদুনা প্রধান মন্ত্রীনা হায়খি মহাক্না গুজরাতকী চীফ মিনিস্তর ওইরিঙৈদা থোং অমা শানবা মীয়াম্না হায়জখি। থবক অসি হৌজিক পাল্লিবা চীফ মিনিস্তর শ্রী ভুপেন্দ্র পতেলনা লোইশিনবা অসিদা অপেনবা ফাওই অমসুং মহাক্কী ৱাশক থবক ওইনা পাংথোকপগীদমক থাগৎচরি।

প্রধান মন্ত্রীনা হায়খি থোং অমা শানবা মহাক্না মতম অদুগী কেন্দ্র সরকারদা হায়জবা মতমদা য়াখিদে অমসুং কাইনথংদা ঙসি থোং অসি শঙ্গাবগী খুদোংচাবা ফংলে। ভাগবান শ্রী কৃষ্ণগী থৌজালগা লোয়ননা ঐনা মহাক্কী পাউতাকশিং ইনখি অমসুং ঐগী থৌদাং পাংথোক্লে। থোং অসিদা পাল্লিবা সোলার পেনেলশিংদগী থোং অসি মৈ থান্নবা ইলেক্ত্রিসিতি শীজিন্নগনি। পাক্লবা সমুদ্র য়েংনবা থোং অসিদা তুরিস্ত গেল্লরি ১২ য়াওরে। ঙসি ঐনা হায়রিবা গেল্লরিশিং অদু য়েংলে অমসুং মসি তশেংনা সুদর্সানিয়ানি।

শ্বাছ মিসন থবক ওইনা পাংথোকপগীদমক প্রধান মন্ত্রীনা দ্বারকাগী মীয়াম থাগৎপা ফোঙদোকখি অমসুং মালেম শীনবা থুংনা পুক্নিং চিংশিন্নবা লু-নান্না লৈনবা মখোয়দা খঙহনখি।

অনৌবা ভারতকী মহাক্না থাজবা পীখিবা অদু অমুক পল্লদুনা, প্রধান মন্ত্রীনা হায়খি মখোয়গী মিৎশিংগী মমাঙদা অনৌবা ভারত অমা থোরকপা মীয়াম্না উরে। রাজনিতিগী ৱিল লৈতবা অমসুং লায়রবশিং মতেং পাংনিংদবদগী মসিগী মাইপাকপশিং অসি হান্না উরমদে। বিকসিত ভারত অমগী অচৌবা পান্দমশিংগীদমক ইকোনোমিগী পাক-চাউবা হেনগৎহল্লে। অদুবু হান্নগী সরকারশিং স্কামশিংনা পীক থনখি।

প্রধান মন্ত্রীনা হায়খি ২০১৪দা সরকার পায়রকপা মতমদা কনাগুম্বা অমতনা লৈবাক অসি শগুন তৌহল্লোই হায়না মহাক্না ৱাশকখি। মমাঙগী সরকারশিংদা লুপা করোর লিশিং কয়াগী স্কামশিং থোকখিবা অদু হৌজিক থিংলে। চহি ১০ অসিদা লৈবাক অসি মালেমদা খ্বাইদগী চাউবা ৫শুবা ইকোনোমি ওইরে। মসিগী ফল ওইনা লাইনিংগী মফমশিং অমসুং লাইফমশিং অমুক হন্না শেমগৎলকপা উরে অমসুং অমরোমদা মেগা প্রোজেকশিংগী খুৎথাংদা অনৌবা ভারত চাউখৎলকপা উরে।

মহাক্না সুদর্সন সেতু খুদম ওইনা পীরদুনা প্রধান মন্ত্রীনা হায়খি ভারতকী খ্বাইদগী শাংবা কেবলগী থোং গুজরাত্তা লৈরে, লৈবাক অসিগী খ্বাইদগী শাংবা সমুদ্রগী থোং মুম্বাইদা লৈরে, জম্মু অমসুং কাস্মিরদা চেনাবতা নিংথিরবা থোং শারে, ভারতকী অহানবা ভর্তিকেল লিফ ব্রিজ ওইরিবা অনৌবা পামবান থোং তামিল নাদুদা শাগৎলি অমসুং ভারতকী  খ্বাইদগী শাংবা থোং অসামদা লৈরে। অসিগুম্বা অনৌবা মতমগী লম্বী-থোং অসিনা নুংঙাই-য়াইফবা অমসুং মপাঙ্গল কনবা লৈবাক অমা শেমগৎকনি।

লৈবাক অসিদা তুরিজম চাউখৎহনবদা লম্বী-থোংগী মরুওইবা পল্লদুনা, প্রধান মন্ত্রীনা হায়খি লম্বী-থোং ফগৎলকপদগী গুজরাত তুরিজমগী মফম অমা ওইরক্লে। হৌজিক গুজরাত্তা সেঙ্কচুরি ২২ অমসুং নেসনেল পার্ক ৪ লৈরি। চহি লিশিং কয়া শুরবা হিথাংফমগী সহর লোথালগী মরমদা মালেম শীনবা থুংনা ৱারিনরে। ঙসি অহমেদবাদ সহর, রানি কি ৱাব, চাম্পানর অমসুং ধোলাবিরা ৱার্ল্দ হেরিতেচ সাইত ওইরে। দ্বারকদা সিবপুরি অসি ব্লু ফ্লেগ বিচ অমনি। গিরনারদা এসিয়াদা খ্বাইদগী শাংবা রোপৱে লৈরে। গির উমং অসি এসিয়াতিক নোংশাগী অমতা ঙাইরবা লৈফমনি। এক্তা নাগরদা মালেমদা খ্বাইদগী ৱাংবা মীতম, সাদার সাহেবকী স্তেচু ওফ য়ুনিতি লৈরে। হৌজিক মালেম শীনবা থুংবগী লমকোয়বা মীওইশিংগী মেলা অমা রনোতসবতা পাংথোক্লি। মালেমদা খ্বাইদগী ফবা তুরিস্ত ভিলেজগী মনুংদা কুছকী ধোরদো খুঙ্গং য়াওরে। নাদেবেত অসি মরৈবাক নুংশিবা অমসুং তুরিজমগী মরুওইবা মফম অমা ওইরে।

প্রধান মন্ত্রীনা হায়খি ‘বিকাস ভি বিরাসত ভি’ লাইৱাগী মতুংইন্না, লাইনিংগী মফমশিং শেমগৎলে। দ্বারকা, সোমনাথ, পবাগাধ, মোধেরা অমসুং অম্বাজি য়াওনা মরুওইবা লাইনিংগী মফমশিংদা খুদোংচাবশিং শেমগৎলে। ভারত্তা লমকোয়বা লাকপা মীওইশিংগী মনুংদা মীওই ৫ দি গুজরাত্তা লাকই। হৌখিবা চহিদা গুজরাত্তা লমকোয়বা মীওই লাখ ১৫.৫ লাকখি। ই-ভিসাগী খুদোংচাবশিংনা গুজরাত্তা লমকোয়বা মীওইশিং য়াম্না লাকহল্লে।

প্রধান মন্ত্রীনা হায়খি সৌরাস্ত্রাগী লমদম অসি ৱাশক ঙাক্তুনা থবক পাংথোকখিবগী অচৌবা খুদম অমনি। লমদম অসিদা লাকপা খোঙচৎ খুদিংদা অনৌবা থৌনা হাপখি। মতম অমদা সৌরাস্ত্রাগী মীয়াম ঈশিং মরিক অমা ফাওবা ফংনবা হোৎনবদা অৱাবা কয়া মায়োক্নখি অমসুং নমদুনা য়ুম হোংহনখি। সাউনি য়োজনাগী মখাদা সৌরাস্ত্রাগী খুঙ্গং লিশিং কয়াদা লৌউ-শিংউগী অমসুং থক্নবা ঈশিং পীনবা কিমি ১৩০০ শাংবা পাইপলাইনশিং ফুমদুনা থবক হৌবদগী অনৌবা মঙাল ফংলে।

লোইশিল্লকপদা, প্রধান মন্ত্রীনা হায়খি লাক্লিবা চহিশিংদা গুজরাতকা লোয়ননা সৌরাস্ত্রা লমদম শীনবা থুংনা চাউখৎপগী অনৌবা থাকশিং য়ৌরগনি। ঐখোয় খুদিংমক্তা দ্বারকাধিসকী থৌজাল ফংলে। অপুনবা ওইনা ঐখোয়না বিকসিত সৌরাস্ত্রা অমসুং বিকসিত গুজরাত শেমগৎকনি।

থৌরম অদুদা শরুক য়াখিবশিংগী মনুংদা গুজরাতকী চীফ মিনিস্তর শ্রী ভুপেন্দ্র পতেল অমসুং এম.পি শ্রী সি.আর পতিল য়াওখি।

নুঙগীৱারোল

প্রধান মন্ত্রীনা লৈবাক্কী মফমদা লুপা করোর ৯৮০ রোম চঙনা শাগৎখিবা ওখা মেনলেন্দ অমসুং বৈত দ্বার্কা ঈথৎ শম্নহল্লিবা সুদর্সন সেতু লৈবাক মীয়ামদা কৎথোকখ্রে। মসি কিলোমিতর ২.৩২ রোম শাংদুনা লৈবাকসিগী খ্বায়দগী শাংবা কেবল-স্তেদ থোংনি‍।

সুদর্সসন সেতু নাকল অনিমক্তা শ্রীমদ ভগবদ গীতাগী শ্লোকশিং অমসুং ভগবান কৃষ্ণগী শক্তমশিংনা লৈতেংবা খোঙ লম্বী য়াওবা তোপ তোপ্পা মওং মতৌশিংনা লৈতেংই‍। খোঙ লম্বী অসিগী মথক থংবা শরুক্তা সোলার পেনেলশিং হাপ্তুনা, মৈ মেগাৱাত অমা পুথোক্লি‍। থোং অসিনা চত্থোক চৎশিন কোমহল্লগনি অমসুং লাইনিংবশিংনা দ্বার্কা অমসুং বৈত-দ্বার্কাগী মরক্তা চত্থোক চৎশিন তবগী মতম মশক থোক্না হন্থহল্লগনি‍। থোং অসি শাদ্রিঙৈদা, লাই খুরুম্বা লাকপশিংনা বৈত দ্বার্কাদা চৎনবগীদমক হিদা তাংদুনা লৈরম্মি‍। মশক নাইরবা থোং অসিনা দেবভুমি দ্বার্কাগী ওইনা অচৌবা লমকোয়বশিংগী পুক্নিং চিংশিন্নফম অমসু ওইরগনি‍।

প্রধান মন্ত্রীনা বাদিনারদা হান্না লৈরম্বা ওফসোর পাইপলাইন শিন্দোকপা, হান্না লৈরম্বা পাইপলাইন এন্দ মেনিফোল্দ (পি.এল.ই.এম.) থাদোক্লম্বা, অমসুং সিস্তেম পুম্বা (পাইপলাইইন, পি.এল.ই.এম. অমসুং অমগা অমগা শম্নরিবা লুপ লাইনশিং) অনৌবা অনকপা মফম অমদা হোংদোকপা য়াওবা পাইপলাইন প্রোজেক্ত মীয়ামদা কৎথোকখ্রে‍। প্রধান মন্ত্রীনা রাজকোত-ওখা, রাজকোত-জেতলসর-সোমনাথ অমসুং জেতলসর-ৱান্সজালিয়া রেল ইলেক্ত্রিফিকেসন প্রোজেক্তশিং লৈবাক্কী মফমদা কৎথোকখ্রে‍‍।

প্রধান মন্ত্রীনা এন.-ঐচ.-৯২৭দিগী ধোরাজী-জমকান্দোর্না-কলাবদ সেক্সন পাকথোকহনবা; জামনগরদা রিজনেল সাইন্স সেন্তর; সিক্কা থর্মেল পৱার স্তেসন, জামনগরদা ফ্লু গ্যাস দিসল্ফরাইজেসন (এফ.জি.দি.) সিস্তেম পানখৎপা অমদি অতৈ প্রোজেক্তশিংগী উরেপ উয়ুং তমখ্রে ‍।

****